Zeremin

27 Kɛ Zoziasi i wa Zozakimun m’ɔ ti Zida famiɛn’n boli famiɛn dilɛ bo’n, Zoova kannin ndɛ kleli Zeremin: 2 “Zoova seli min kɛ: ‘Wɔ ɲanman wie mun, yɛ yo waka nga be fa sie be kɔmin su’n naan fa be sie ɔ kɔmin su. 3 Kpɛkun fa man be nga be sunmannin be Sedesiasi m’ɔ ti Zida famiɛn’n i sin Zerizalɛmun wa’n, naan be fa ko man Edɔmun+ famiɛn’n, nin Moabu+ famiɛn’n, nin Amɔnfuɛ’m+ be famiɛn’n, nin Tir+ famiɛn’n, nin Sidɔn+ famiɛn’n. 4 Se be kɛ be se be famiɛn’m be kɛ yoo:

“‘“Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan amun ko se amun famiɛn mun kɛ: 5 ‘Min yɛ n fali min tinmin dan’n nin min sa mɔ wunmiɛn o nun’n, n yili asiɛ’n nin klɔ sran mun nin nnɛn nga be o asiɛ’n su’n mun-ɔn. Sran nga n klo kɛ ń fá mɛ́n i’n yɛ n fa mɛnnin i-ɔ.+ 6 M’an fa nvle kwlaa sɔ mun m’an wlɛ i min sufuɛ Nebikadnezaa+ m’ɔ ti Babilɔnin famiɛn’n i sa nun. M’an fa blo nnɛn mun bɔbɔ m’an mɛn i kɛ be su i. 7 Nvle’m be kwlaa be nunfuɛ’m bé sú i nin i wa’n nin i anunman’n be lele naan nvle uflɛ w’a kwlɛ i bɔbɔ i nvle liɛ’n.+ Blɛ sɔ’n nun’n, nvle kpanngban nin famiɛn dandan’m bé fɛ́ i yó be kanga.’+

8 “‘“Zoova waan yoo: ‘Sɛ nvle kun annzɛ famiɛn diwlɛ kun waan ɔ suman Nebikadnezaa m’ɔ ti Babilɔnin famiɛn’n, sɛ i waan ɔ fɛmɛn i ti wlɛmɛn i Babilɔnin famiɛn’n i kɔmin su waka’n i bo’n, ń fá tokofi+ nin awe’n nin tukpacɛ m’ɔ sa ndɛndɛ’n ń klé i nun lele ɔ́ núnnún i mlɔnmlɔn.’

9 “‘“‘I sɔ’n ti’n, amun ɲanmiɛn’m be nuan ijɔfuɛ mun, nin amun wunnzue yifuɛ mun, nin amun laliɛ cɛnfuɛ mun, nin amun atrɛ yifuɛ mun, nin amun bae difuɛ nga be se amun kɛ: “Amun su suman Babilɔnin famiɛn’n,” nán amun sie amun su be nuan bo. 10 Afin be ndɛ nga be kan kle amun’n ti ato. Sɛ amun sie amun su be nuan bo’n, bé fá amun kɔ́ amun nvle’n i wun mmua kpa. Ń yó maan amún bó sánndi, yɛ amún núnnún mlɔnmlɔn.

11 “‘“Zoova waan yoo: ‘Sanngɛ nvle nga i nunfuɛ’m be fa be kɔmin man Babilɔnin famiɛn’n naan ɔ fa kɔmin su waka’n sie su’n naan be su i’n, ń yáci be lɛ naan be ka* be nvle’n nun, bé dí fie yɛ bé trán lɛ.’”’”

12 Ndɛ kunngba’n yɛ n kan kleli Sedesiasi+ m’ɔ ti Zida famiɛn’n niɔn. N seli i kɛ: “Maan amun fa amun kɔmin’n man Babilɔnin famiɛn’n naan ɔ fa kɔmin su waka’n sie su naan amun su i nin i nvle’n nunfuɛ mun. I liɛ’n, amún ká nguan nun.+ 13 ?Sɛ alɛ’n*+ nin awe’n+ nin tukpacɛ m’ɔ sa ndɛndɛ’n+ be kun wɔ nin ɔ nvle’n nunfuɛ mun’n, i klanman lika’n yɛle benin? Afin kɛ nga Zoova fa kannin’n sa’n, nvle nga i waan ɔ suman Babilɔnin famiɛn’n, i sɔ sa’n yɛ ɔ́ jú i su-ɔ. 14 Ɲanmiɛn nuan ijɔfuɛ nga be se amun kɛ: ‘Amun su suman Babilɔnin famiɛn’n,’+ nán amun fa amun su sie be nuan bo. Afin ndɛ nga be kan’n ti ato.+

15 “Zoova waan yoo: ‘M’an sunmanman be, sanngɛ be fa min dunman’n be bua ato. Sɛ amun fa be ndɛ’n su’n, amun bɔbɔ-o, be nga be kannin ndɛ sɔ mun-o, ń yó maan amún bó sánndi, yɛ amún núnnún mlɔnmlɔn.’”+

16 N seli Ɲanmiɛn ɲrun jranfuɛ mun nin be kwlaa nga be o lɛ’n be kɛ: “Zoova waan yoo: ‘Amun Ɲanmiɛn nuan ijɔfuɛ nga be se amun kɛ: “Zoova i sua’n nun ninnge nga be fa ɔli Babilɔnin’n, ɔ cɛ kan’n bé wá fá sá be sin’n,”+ nán amun fa be ndɛ’n su. Afin be su bua ato kle amun.+ 17 Nán amun fa be ndɛ’n su. Amun su Babilɔnin famiɛn’n, i liɛ’n amún ká nguan nun.+ ?Sɛ be bubu klɔ nga i sekeseke’n i klanman lika’n yɛle benin? 18 Sanngɛ sɛ be ti Ɲanmiɛn nuan ijɔfuɛ naan Zoova kan ndɛ kle be sakpa’n, maan be srɛ Zoova m’ɔ ti sonja’m be su kpɛn’n kɛ Zoova i sua’n nun ninnge nga be kali lɛ’n, ɔ nin ninnge nga be o Zida famiɛn’n i awlo lɔ’n, ɔ nin nga be o Zerizalɛmun wa’n, nán be fa be wɔ Babilɔnin.’

19 “Zoova m’ɔ ti sonja’m be su kpɛn’n waan sua ja mlomlo mun,+ nin Jenvie’n,*+ nin kakaklolo mun,+ nin ninnge nga be kali klɔ nga su’n, 20 mɔ kɛ Nebikadnezaa m’ɔ ti Babilɔnin famiɛn’n ɔ́ trá Zozakimun i wa Zekoniasi m’ɔ ti Zida famiɛn’n nin Zida nin Zerizalɛmun lɔ sran dandan mun lomuɛn Zerizalɛmun lɛ kɔ́ Babilɔnin’n ɔ yacili be lɛ’n,+ 21 ninnge nga be kali Zoova i sua’n nun’n nin Zida famiɛn’n i awlo lɔ’n ɔ nin Zerizalɛmun wa’n, be su ndɛ nga Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n, ɔ kan’n yɛ: 22 ‘“Bé fá be kɔ́ Babilɔnin.+ Yɛ bé ká lɔ lele saan cɛn nga ń nían be lika ekun’n w’a ju. Kpɛkun ń fá be ń sá be sin, yɛ ń síe be lika nga nun wa ekun.” Zoova yɛ ɔ kan sɔ-ɔ.”’+