1 Be Ɲoliɛ

10 Filistifuɛ’m be nin Izraɛlifuɛ’m be kunnin. Sanngɛ Izraɛlifuɛ’m be wanndili Filistifuɛ’m be ɲrun. Yɛ be nun sunman be wuli Gilboa Oka’n su lɔ.+ 2 Filistifuɛ’m be suli Saili nin i mma’m be su lele be mantannin be koko kpa. Kpɛkun be kunnin Saili i mma yasua mun, yɛle kɛ Zonatan nin Abinadabu nin Malki-Sia.+ 3 Alɛ’n yrili kpa Saili su. Kɛ ta tofuɛ’m+ be wunnin i mɔ be toli i wun ta’n, ta mma’m be ɲɛnnin i. 4 Yɛ Saili seli sran ng’ɔ trɛ i alɛ ninnge’m be nun’n kɛ: “Fa ɔ tokofi’n wɔ min naan ɔ bo nun lɔ. Nán maan sran sɔ mɔ b’a wlaman be klɛn’n, be yo min tɛtɛ.”+ Sanngɛ sran ng’ɔ trɛ i alɛ ninnge’m be nun’n w’a kplinman su, afin srɛ kun i dan. I sɔ’n ti’n, Saili bɔbɔ cuɛnnin i tokofi’n kpɛkun ɔ tu tɔli su.+ 5 Kɛ sran ng’ɔ tra Saili i alɛ ninnge’m be nun’n wunnin kɛ w’a wu’n, i kusu fɛli i tokofi liɛ’n. Ɔ tu tɔli su kpɛkun ɔ wuli. 6 Ɔ maan Saili nin i wa yasua nsan’m be wuli kɛ ngalɛ’n sa. I awlo’n nun sran’m be kwlaa be wuli likawlɛ.+ 7 Kɛ Izraɛlifuɛ’m be kwlaa nga be o kongo’n nun’n be wunnin kɛ sran’m be kwlaa be wanndili naan Saili nin i mma’m be wuli’n, be yacili be klɔ’m be lɛ be wanndili. Yɛ Filistifuɛ’m be bali be wa trannin lɛ-ɔ.

8 Kɛ aliɛ cɛnnin’n, Filistifuɛ’m be bali naan bé ísa be nga be kunnin be’n be bo ninnge mun. Kpɛkun be wunnin Saili nin i wa yasua’m be fuɛn mun Gilboa Oka’n su.+ 9 Ɔ maan be yiyili Saili i wun ninnge mun, kpɛkun be kpɛli i ti’n. Asa ekun’n, be fɛli i alɛ ninnge mun. Yɛ be sunmannin sran Filistifuɛ’m be mɛn wunmuan’n nun naan be ko bo jasin sɔ’n be kle be amuin mun+ nin sran’m be kwlaa. 10 I sin’n, be fɛli i alɛ ninnge mun sieli i be amuin’n i sua’n nun. Kpɛkun be fɛli i ti kongloman’n sendeli i Dagɔn i sua’n+ nun lɔ.

11 Kɛ be kwlaa nga be tran Zabɛsi+ m’ɔ o Galaadi lɔ’n be tili like kwlaa nga Filistifuɛ’m be fa yoli Saili’n,+ 12 sonja’m be kwlaa be ɔli be ko fali Saili nin i mma’m be fuɛn mun. Be fa bali Zabɛsi naan b’a sie be owie mun waka dan ng’ɔ o Zabɛsi+ lɛ’n i bo lɛ. Yɛ be cili nglɛmun cɛn ba nso.

13 Kɛ Saili wuli kɛ ngalɛ’n sa, afin ɔ nin Zoova b’a nantiman klanman. W’a faman ndɛ nga Zoova kannin’n su.+ Asa ekun’n, ɔ ɔli bla kun m’ɔ nin be nga be wuli’n be ijɔ’n+ i sin, 14 sanngɛ w’a ko usaman Zoova i ngwlɛlɛ afɛ. I sɔ’n ti’n, Ɲanmiɛn yoli maan ɔ wuli. Kpɛkun ɔ fali famiɛn dilɛ’n mannin Zese+ i wa Davidi.