Jɔlɛ Difuɛ Mun
6 Izraɛlifuɛ’m be yoli sa tɛ Zoova ɲrun ekun.+ Ɔ maan Zoova fali be wlali Madianfuɛ’m be sa nun afuɛ nso.+ 2 Madianfuɛ’m be kleli Izraɛlifuɛ’m be yalɛ.+ Madianfuɛ’m be ti’n, Izraɛlifuɛ’m be yoli fiawlɛ lika wie mun* oka’m be nun, nin yɔbuɛ buɛ’m be nun, ɔ nin lika nga be nun lɔ kɔlɛ’n ti kekle’n be nun.+ 3 Sɛ Izraɛlifuɛ’m be lua like’n, Madianfuɛ mun, nin Amalɛkifuɛ mun,+ nin wia afiliɛ lɔfuɛ’m+ be wa tɔ be su. 4 Be bo nanmue be wun lɛ, kpɛkun be saci be fie’m be su ninnge mun lele fa ju Gaza. Be yaciman like fi lɛ manman Izraɛlifuɛ’m be kɛ be di. I bua-o, i nannin tola-o, i aflunmun-o, be yaciman ba kun sa lɛ.+ 5 Kɛ bé bá’n, be fa be nnɛn mun, ɔ nin be tannin sua mun yɛ be ba-ɔ. Be sɔnnin kpa kɛ lalo mun sa.+ Be kwlá kaman be nin be ɲɔnngɔnmin mun.+ Be ba mɛn’n i sacilɛ. 6 Madianfuɛ’m be ti’n, Izraɛlifuɛ’m be dili yalɛ dan. Ɔ maan be kpan flɛli Zoova kɛ ɔ uka be.+
7 Kɛ Madianfuɛ’m be ti’n Izraɛlifuɛ’m be kpan flɛli Zoova kɛ ɔ uka be’n,+ 8 Zoova sunmannin Ɲanmiɛn ɲrun jranfuɛ kun, ɔ seli be kɛ: “Ndɛ nga Zoova m’ɔ ti Izraɛli i Ɲanmiɛn’n ɔ kan’n yɛ: ‘N fali amun Ezipti mɛn’n nun fiteli, n fali amun kanga sua’n nun fiteli.+ 9 N deli amun Eziptifuɛ’m be sa nun, n deli amun be nga be kle amun yalɛ’n be kwlaa be sa nun. N fuannin be amun ɲrun, kpɛkun n fali be mɛn’n n mannin amun.+ 10 N seli amun kɛ: “N ti amun Ɲanmiɛn Zoova.+ Nán amun sro Amɔɔfuɛ mɔ amun tran be mɛn’n nun’n be ɲanmiɛn mun.”+ Sanngɛ amun ɲin w’a yiman min.’”*+
11 I sin’n, Zoova i anzi’n bali+ wa trannin waka dan ng’ɔ o Ofra lɛ’n i bo lɛ. Waka sɔ’n ti Zoasi m’ɔ ti Abiezɛɛfuɛ’n+ i liɛ. I wa Zedeɔn+ su bo ble duvɛn yiwlɛ’n nun lɛ, kɛ ɔ ko yo naan Madianfuɛ’m b’a wunmɛn i’n ti. 12 Zoova i anzi’n fiteli i ɲrun, yɛ ɔ seli i kɛ: “Alɛ kunfuɛ dan, Zoova nin wɔ o nun.”+ 13 Zedeɔn tɛli i su kɛ: “?Min min, yaci, sɛ Zoova nin e wo nun’n, ngue ti yɛ sa nga’m be ju e su-ɔ?+ ?Sa dandan ng’ɔ yoli mɔ e nannan’m be kɛnnin i ndɛ’n be o nin?+ Be seli e kɛ: ‘Zoova yɛ ɔ fali e Ezipti lɔ fiteli-ɔ.’+ Sanngɛ siɛn’n, Zoova w’a yi e blo,+ w’a fa e w’a wla Madianfuɛ’m be sa nun.” 14 Zoova jrɛnnin i ɲrun lɛ, yɛ ɔ seli i kɛ: “Fa wunmiɛn nga a le i’n kɔ, yɛ á dé Izraɛlifuɛ mun Madianfuɛ’m be sa nun.+ ?Nán min yɛ n sunmannin wɔ-ɔ?” 15 Zedeɔn tɛli i su kɛ: “Zoova, yaci. ?Ń yó sɛ naan m’an de Izraɛlifuɛ mun? Nian! Awlobo akpasua* nga n fin nun’n yɛ ɔ ti Manase akpasua’n nun kaan’n niɔn. Min si i awlo’n nun’n, min yɛ n ti be nun kaan’n niɔn.” 16 Sanngɛ Zoova seli i kɛ: “Ń má jrán ɔ sin,+ ɔ maan á wá kwlá Madianfuɛ mun kɛ sran kunngba yɛ a nin i be su kun sa.”
17 Yɛ ɔ tɛli i su kɛ: “Sɛ ɔ klun jɔ min wun sakpa’n, kle min nzɔliɛ kun m’ɔ kle kɛ wɔ yɛ a su kan ndɛ’n kle min-ɔn. 18 Yaci, ka wa maan n ko fa like kan n bla naan n fa sie ɔ ɲrun.”+ Ɔ maan ɔ seli kɛ: “Ń ká wa lele á bá.” 19 Zedeɔn ɔli ko tɔnnin boli gbanflɛn kun, kpɛkun ɔ fali sanmlɛn efa* kun fa tɔnnin kpanwun mɔ levii nunman nun’n.+ Ɔ fali nnɛn’n guɛli i gbogbo kun nun, yɛ ɔ fɛli i bo nzue’n guɛli i sɛ kun nun. I sin’n, ɔ fa be bali kpɛkun ɔ fa mɛnnin i waka dan’n i bo lɛ.
20 Ɲanmiɛn Kpli i anzi’n seli i kɛ: “Fa nnɛn’n nin kpanwun mɔ levii nunman nun’n naan fa be sie i yɔbuɛ dan nga su, yɛ fɛ i bo nzue’n gua su.” Yɛ ɔ yoli sɔ-ɔ. 21 I sin’n, Zoova i anzi’n tinngɛli kpɔnman ng’ɔ o i sa nun’n nun, ɔ fɛli i ti’n kannin nnɛn’n nin kpanwun mɔ levii nunman nun’n, kpɛkun sin fin yɔbuɛ’n nun fiteli, ɔ yrali nnɛn’n nin kpanwun mɔ levii nunman nun’n.+ Kpɛkun Zoova i anzi’n mlinnin i ɲrun. 22 Zedeɔn wunnin i wlɛ kɛ Zoova i anzi-ɔ.+
Kɛ Zedeɔn wunnin i wlɛ sɔ cɛ’n, ɔ seli kɛ: “Ee, min Min Zoova, wɔ mɔ a Sie Like Kwlakwla’n, si min aunnvɔɛ, afin min ɲinma w’a wun Zoova i anzi’n min ɲin jrɛiin su.”+ 23 Sanngɛ Zoova seli i kɛ: “Maan ɔ wun jɔ wɔ fɔuun. Nán srɛ kun wɔ.+ A su wuman.” 24 Ɔ maan Zedeɔn kplannin tɛ yiwlɛ kun lɛ mannin Zoova. Lele nin andɛ’n be te flɛ i Zoova-Salɔmun.*+ Ɔ te o Ofra lɔ, Abiezɛɛfuɛ’m be lɔ.
25 Kɔnguɛ sɔ’n nun’n, Zoova seli i kɛ: “Fa ɔ si i nannin gbanflɛn’n, fa nannin gbanflɛn nɲɔn su’n m’ɔ le afuɛ nso’n, kpɛkun bubu Baali i tɛ yiwlɛ ng’ɔ ti ɔ si liɛ’n, yɛ kpɛ waka mɔ be sɔ i’n* m’ɔ o i wun lɛ’n i bo.+ 26 Fa yɔbuɛ wie mun siesie be wiengu su yɔbuɛ dan nga su naan fa yo tɛ yiwlɛ kun man ɔ Ɲanmiɛn Zoova. Fa nannin gbanflɛn nɲɔn su’n fa yi tɛ nga kɛ bé yí’n be yra nnɛn’n i kɔlikɔli’n. Fa waka nga be sɔ i’n* mɔ a kpɛli i bo’n fa yo i bo yie.” 27 Ɔ maan Zedeɔn fɛli i sufuɛ’m be nun yasua blu, kpɛkun be yoli i kɛ nga Zoova fa kannin’n sa. Sanngɛ srɛ kunnin i i si i awlofuɛ mun nin klɔ’n nunfuɛ’m be wun dan ti’n, w’a yomɛn i wia nun. Kɔnguɛ yɛ ɔ yoli-ɔ.
28 Kɛ aliɛ cɛnnin mɔ klɔ’n nunfuɛ’m be jasoli nglɛmun ndɛ kpa’n, be wunnin kɛ b’a bubu Baali i tɛ yiwlɛ’n, kpɛkun b’a kpɛ waka mɔ be sɔ i’n* m’ɔ o i wun lɛ’n i bo. Yɛ be wunnin kɛ b’a fa nannin gbanflɛn nɲɔn su’n b’a yi tɛ tɛ yiwlɛ nga be kplannin’n su. 29 Be usali be wiengu kɛ: “?Wan yɛ ɔ yoli sa nga-ɔ?” Kɛ be usausali nun’n, be seli kɛ: “Zoasi i wa Zedeɔn yɛ ɔ yoli sa sɔ’n niɔn.” 30 Ɔ maan klɔ’n nunfuɛ’m be seli Zoasi kɛ: “Fa ɔ wa’n bla maan e kun i, afin ɔ bubuli Baali i tɛ yiwlɛ’n, kpɛkun ɔ kpɛli waka mɔ be sɔ i’n* m’ɔ o i wun lɛ’n i bo.” 31 Zoasi+ seli be nga be su kunndɛ i ndɛnngan’n be kɛ: “?Amun yɛ ɔ fata kɛ amun kpli Baali i ti-ɔ? ?Amun yɛ ɔ fata kɛ amun de i-ɔ? Sran kwlaa ng’ɔ kpli Baali i ti’n, maan be kun i nglɛmun nga bɔbɔ.+ Sɛ ɔ ti ɲanmiɛn’n, maan i bɔbɔ kpli i ti.+ Afin i bɔbɔ i tɛ yiwlɛ’n yɛ sran kun bubuli i-ɔ.” 32 Cɛn sɔ’n nun’n, ɔ tɔnnin Zedeɔn i dunman kɛ Zeribaali.* Ɔ seli kɛ: “Maan Baali bɔbɔ kpli i ti, afin sran kun bubuli i tɛ yiwlɛ’n.”
33 Madianfuɛ mun,+ nin Amalɛkifuɛ mun,+ nin wia afiliɛ lɔfuɛ’m be kwlaa be bo yoli kun,+ be kpɛli nzue’n kpɛkun be ɔli Zizreɛli Kongo’n nun lɔ, be boli nanmue lɔ. 34 Zoova i wawɛ’n jrali Zedeɔn su,+ ɔ boli awɛ’n,+ kpɛkun Abiezɛɛfuɛ’m+ be wa suɛnnin i bo. 35 Ɔ sunmannin sran Manase akpasua’n nunfuɛ’m be kwlaa be sin, be kusu be bali be wa suɛnnin i bo. Asa ekun’n, ɔ sunmannin sran Azɛɛ, nin Zabilɔn, nin Nɛftali akpasua’n nunfuɛ’m be sin, be kusu be nin i be wa yiali.
36 Zedeɔn seli Ɲanmiɛn Kpli kɛ: “Sɛ ɔ waan á sín min lika dé Izraɛlifuɛ mun kɛ nga a fa kannin’n sa’n,+ 37 ń má fá bua kplo mɔ ndrɛ o su’n ń síe i ble bowlɛ’n nun. Sɛ bɔlɛ’n lua bua ndrɛ’n i ngunmin naan i wun lɛ asiɛ’n ka wisiwisi’n, ń sí kɛ á wá sín min lika dé Izraɛlifuɛ mun kɛ nga a fa kannin’n sa.” 38 Kpɛkun ɔ yoli sɔ sɛsɛsɛ. Kɛ aliɛ cɛnnin m’ɔ jasoli nglɛmun ndɛ kpa’n, ɔ cuɛnnin bua ndrɛ’n nun. I nun nzue’n yili cɛn dilɛ klowa dan kun. 39 Sanngɛ Zedeɔn seli Ɲanmiɛn Kpli kɛ: “Nán fa ya min wun, maan n srɛ wɔ like kun ekun. Yaci, maan n fa bua ndrɛ’n n fa kpɛ sa kun ekun bo n nian. Yaci, maan bua ndrɛ’n i ngunmin ka wisiwisi naan bɔlɛ’n luɛ i wun lɛ asiɛ’n i kwlaa.” 40 Kɔnguɛ sɔ’n nun’n, i sɔ yɛ Ɲanmiɛn yoli-ɔ. Bua ndrɛ’n i ngunmin kali wisiwisi, sanngɛ bɔlɛ’n luɛli i wun lɛ lika’n i kwlaa.