Jɔlɛ Difuɛ Mun

4 Sanngɛ kɛ Eidi wuli’n, Izraɛlifuɛ’m be yoli sa tɛ ekun Zoova ɲrun.+ 2 Ɔ maan Zoova fali be wlali Zabɛn m’ɔ ti Kanaan famiɛn’n,+ m’ɔ sie Azɔɔ’n i sa nun. Be flɛ i sonja’m be su kpɛn’n kɛ Sizera, ɔ tran Arosɛti.*+ 3 Izraɛlifuɛ’m be kpan flɛli Zoova,+ afin Zabɛn* le kakaklolo ya ngwlan (900) mɔ blalɛ o be ja’m be su’n,*+ yɛ ɔ kleli Izraɛlifuɛ’m be nun+ afuɛ ablaɔn (20).

4 Blɛ sɔ’n nun’n, Lapidɔtu i yi Debora m’ɔ ti Ɲanmiɛn nuan ijɔfuɛ bla’n+ yɛ ɔ di Izraɛlifuɛ’m be jɔlɛ-ɔ. 5 Debora i nglesia waka’n i bo lɔ yɛ ɔ tran titi-ɔ, Rama+ nin Betɛli+ be afiɛn’n nun, Efraimun okaoka lika’n nun lɔ. Izraɛlifuɛ’m be kɔ i wun lɔ yɛ ɔ di be jɔlɛ mun-ɔn. 6 Debora sunmannin sran Baraki+ m’ɔ ti Abinoamun i wa’n i sin Kedɛsi-Nɛftali+ lɔ, naan be ko se i kɛ: “Zoova m’ɔ ti Izraɛli Ɲanmiɛn’n i ndɛ m’ɔ kannin’n yɛ: ‘Kɔ! Nanti kɔ* Tabɔɔ Oka’n i wun lɔ, fa sran akpiakpi blu (10.000) Nɛftali nin Zabilɔn akpasua’n nun naan amun wɔ. 7 Ń má fá Sizera m’ɔ ti Zabɛn i sonja’m be su kpɛn’n, ɔ nin i alɛ kunlɛ kakaklolo mun, ɔ nin i sonja mun ń kɔ́ ɔ wun lɔ, Kisɔn nzue ba’n+ su lɔ, yɛ ń fɛ́ i ń wlá ɔ sa nun.’”+

8 Yɛ Baraki seli i kɛ: “Sɛ a ko sunman min’n, ń kɔ́, sanngɛ sɛ w’a ɔman wie’n, n su kɔman.” 9 Yɛ ɔ seli i kɛ: “E nin wɔ é kɔ́. Sanngɛ alɛ nga a su kó kún i lɛ’n nun’n, a su ɲanman ɲrun, afin bla kun i sa nun yɛ Zoova wá fá Sizera wlá-ɔ.”+ I sin’n, Debora jasoli, kpɛkun ɔ nin Baraki be ɔli Kedɛsi.+ 10 Baraki yiali Zabilɔnfuɛ mun nin Nɛftalifuɛ mun+ Kedɛsi lɔ. Sran akpiakpi blu (10.000) be su i su. Debora kusu suli i su wie.

11 Ebɛɛ m’ɔ ti Keninfuɛ’n, ɔ jasoli Keninfuɛ+ onga’m be wun lɛ, yɛ ɔ ko kplɛnnin i tannin sua’n waka dan ng’ɔ o Zaanannimun lɔ’n i wun lɛ, Kedɛsi lɔ. Keninfuɛ’m be ti Moizi i sia+ Obabu i mma mun.

12 Sran wie’m be ko seli Sizera kɛ Abinoamun i wa Baraki w’a fu Tabɔɔ Oka’n su lɔ.+ 13 Sizera ka lɛ yiɛli i alɛ kunlɛ kakaklolo mun, ɔ nin i sonja nga be nin i ɔli Arosɛti Goimun lɔ’n be kwlaa be nuan. Kakaklolo’m be ti ya ngwlan (900) yɛ blalɛ o be ja’m be su.* Ɔ yiali be naan be fɛ i Arosɛti* lɛ be wɔ Kisɔn nzue ba’n+ su lɔ. 14 Debora seli Baraki kɛ: “Jaso, afin andɛ yɛ Zoova wá fá Sizera wlá ɔ sa nun-ɔn. Zoova dún mmua ɔ ɲrun.” Yɛ Baraki fin Tabɔɔ Oka’n su jrali-ɔ, sran akpiakpi blu (10.000) be su i su. 15 Yɛ Zoova yoli maan Sizera nin i alɛ kunlɛ kakaklolo mun, nin i sonja’m be nun sanngannin+ Baraki i tokofi’n i ɲrun. Kasiɛn su’n, Sizera fin i kakaklolo’n nun jrali, kpɛkun ɔ wanndili i ja nun. 16 Baraki suli alɛ kunlɛ kakaklolo mun nin sonja’m be su lele juli Arosɛti* lɔ. Be fali tokofi kunnin Sizera i sonja’m be kwlaa, be nun ba kun sa w’a kaman lɛ.+

17 Sizera wanndili i ja nun ɔli Ebɛɛ+ m’ɔ ti Keninfuɛ’n i yi Zaɛli+ i tannin sua’n i wun lɔ. Afin Zabɛn+ m’ɔ ti Azɔɔ famiɛn’n, ɔ nin Ebɛɛ m’ɔ ti Keninfuɛ’n i awlofuɛ’m be di anuansɛ. 18 I sin’n, Zaɛli fite ɔli Sizera i atin kpalɛ. Ɔ seli i kɛ: “Wlu wa, min min, wlu wa. Nán srɛ kun wɔ.” Ɔ maan ɔ wluli i tannin sua’n nun lɔ, ɔ fali kondro kun kɛtɛli i su. 19 Kpɛkun ɔ seli i kɛ: “Yaci, man min nzue kan maan n nɔn, nzuewe kun min.” Ɔ maan ɔ tikeli kplo kun mɔ nɔnnɔn o nun’n su, yɛ ɔ mɛnnin i wie kɛ ɔ nɔn.+ I sin’n, ɔ kɛtɛli i su ekun. 20 Sizera seli i kɛ: “Jran tannin sua’n i anuan’n nun lɛ. Sɛ sran wie usa wɔ kɛ: ‘?Sran o wa?’ Se i kɛ: ‘Cɛcɛ!’”

21 Sanngɛ Ebɛɛ i yi Zaɛli fali tannin sua ja kun nin maato kun. Kɛ ɔ́ yó sɔ’n, nn Sizera w’a fɛ kpa, ɔ su lafi kpa sa pɔɔ. Bla’n wunngeli i wun lɔ blɛlɛlɛ, kpɛkun ɔ fali tannin sua ja’n kplɛnnin i ti’n i papla nun, ɔ boli nun asiɛ wun lɔ naan w’a wu.+

22 Kɛ Baraki kúnndɛ Sizera’n, ɔ juli lɛ. Zaɛli ko kpɛli i atin, kpɛkun ɔ seli i kɛ: “Bla maan n kle wɔ sran nga a su kunndɛ i’n.” Ɔ nin i wluli tannin sua’n nun lɔ, kpɛkun ɔ wunnin Sizera, ɔ la lɛ, w’a wu. Tannin sua ja’n kplɛn i ti’n i papla nun.

23 Kɛ ɔ fɛ i cɛn sɔ’n nun’n, Ɲanmiɛn fali Zabɛn m’ɔ ti Kanaan famiɛn’n wlali Izraɛlifuɛ’m be sa nun.+ 24 Kɛ aliɛ’n cɛ́n m’ɔ́ sán’n, nn Izraɛlifuɛ’m be sa tín Zabɛn m’ɔ ti Kanaan+ famiɛn’n i su, lele be kunnin i.+