Jɔlɛ Difuɛ Mun

8 I sin’n, Efraimun i mma yasua’m be wa seli i kɛ: “?Ngue ti yɛ a yoli e sɔ-ɔ? ?Ngue ti yɛ kɛ a nin Madianfuɛ’m bé kó kún alɛ’n w’a flɛman e-ɔ?”+ Ɔ maan be ijɔli i kpa.+ 2 Sanngɛ ɔ seli be kɛ: “?N liɛ nga n yoli’n ɔ ju amun liɛ’n nun? ?Kɛ be tili viɲin’n, i ng’ɔ kali lɛ mɔ Efraimun wa tili i kasiɛn su’n+ w’a sɔnman w’a traman Abiezɛɛ liɛ ng’ɔ tili i viɲin tilɛ blɛ’n nun’n?+ 3 Amun sa nun yɛ Ɲanmiɛn fali Orɛbu nin Zeɛbu mɔ be ti Madian lɔ sran dan’n wlali-ɔ.+ ?N liɛ nga n yoli’n ɔ ju amun liɛ’n nun?” Kɛ ɔ kannin ndɛ sɔ’n, be guali be ya’n i ase.

4 I sin’n, Zedeɔn ɔli Zurdɛn nzue’n i wun lɔ, yɛ ɔ kpɛli nzue’n. Ɔ nin sran ya nsan (300) nga be su i su’n b’a fɛ, sanngɛ be te su be kpɔfuɛ’m be su. 5 Ɔ maan ɔ seli Sukɔtu lɔ yasua’m be kɛ: “Amun yaci, amun man min sran’m be kpanwun, afin b’a fɛ yɛ n su fuan Zeba nin Zalmuna mɔ be ti Madian famiɛn’n.” 6 Sanngɛ Sukɔtu lɔ sran dandan’m be seli kɛ: “?W’a tra Zeba nin Zalmuna ti yɛ é fá e kpanwun é mán ɔ sonja mun-ɔn?” 7 Kɛ be kannin sɔ’n, Zedeɔn seli kɛ: “I sɔ mɔ amun kannin’n ti’n, kɛ Zoova wá fá Zeba nin Zalmuna wlá min sa nun’n, ń má fá aawlɛ flɛnnɛn’n nun lɔ owieowie mun nin ijre tɛtɛ mun ń bó amun.”+ 8 Ɔ fɛli i lɛ ɔli Peniɛli lɔ, yɛ ɔ srɛli be like kunngba’n. Sanngɛ Peniɛli lɔ yasua’m be tɛli i su kɛ nga Sukɔtu lɔ yasua’m be fa tɛli i su’n sa. 9 Ɔ maan ɔ seli Peniɛli lɔ yasua’m be kɛ: “Sɛ n sa min sin wɛɛtɛ su’n, ń má búbú sua fleiin nga.”+

10 Zeba nin Zalmuna be nin be sonja mun be o Kaakɔɔ lɔ. Be ti sran akpiakpi blu-nin-nnun (15.000). Wia afiliɛ lɔfuɛ’m be sonja nga be kali’n be kwlaa yɛ be o lɛ-ɔ.+ Afin be fali tokofi kunnin be nun sran akpiakpi ya akpiakpi ablaɔn (120.000). 11 Zedeɔn fali atin nga tannin sua nun tranfuɛ’m be sin su’n, ɔ o Noba nin Zɔgbea be wia afiliɛ lɔ lika’n nun.+ Be wa fuli Madianfuɛ’m be nun be tɔli be su. 12 Kɛ Zeba nin Zalmuna mɔ be ti Madian famiɛn’n be wanndili’n, ɔ fuannin famiɛn nɲɔn sɔ mun lele ɔ ko trali be. I sɔ’n ti’n, nanmue’n nun sanngannin mlɔnmlɔn.

13 Kɛ Zoasi i wa Zedeɔn fín alɛ kunlɛ bá’n, ɔ fali atin ng’ɔ fu kɔ Erɛsi lɔ’n. 14 Kɛ ɔ́ bá’n, ɔ trali Sukɔtu lɔ gbanflɛn kun yɛ ɔ usɛli i sa. Gbanflɛn’n klɛli Sukɔtu lɔ sran dandan mun, nin kpɛnngbɛn’m be dunman mun mɛnnin i. Be ti sran ableso-nin-nso (77). 15 Kɛ ɔ yoli sɔ’n, ɔ toli Sukɔtufuɛ’m be lɔ, yɛ ɔ seli be kɛ: “Zeba nin Zalmuna mɔ be ti yɛ amun klɔklɔli min’n be yɛ be o yɛ. Amun seli min kɛ: ‘?W’a tra Zeba nin Zalmuna ti yɛ é fá e kpanwun é mán ɔ sran mɔ b’a fɛ’n niɔn?’”+ 16 I sin’n, ɔ trali klɔ’n su kpɛnngbɛn mun, yɛ ɔ fali aawlɛ flɛnnɛn’n nun lɔ owieowie mun nin ijre tɛtɛ mun fa tuli Sukɔtu lɔ yasua sɔ’m be fɔ.+ 17 Kpɛkun ɔ bubuli Peniɛli lɔ sua fleiin’n,+ ɔ kunnin klɔ’n nun yasua mun.

18 Ɔ usali Zeba nin Zalmuna be kɛ: “?Sran nga amun kunnin be Tabɔɔ lɔ’n, be wafa ti sɛ?” Yɛ be tɛli i su kɛ: “Be ti kɛ wɔ sa. Be kwlaa be ti kɛ famiɛn wie mma mun sa.” 19 Ɔ tɛli be su kɛ: “Min niaan mun-ɔn. Min nin i mma yasua mun-ɔn. N kan Zoova m’ɔ lafiman’n, sɛ ɔ ti kɛ amun yacili be lɛ sa’n, nn n su kunman amun.” 20 I sin’n, ɔ seli Zetɛɛ m’ɔ ti i wa klikli’n kɛ: “Jaso naan kun be.” Sanngɛ gbanflɛn kan’n w’a yimɛn i tokofi’n. Srɛ kunnin i, afin ɔ te yo gbanflɛn kan. 21 Ɔ maan Zeba nin Zalmuna be seli i kɛ: “Ɔ bɔbɔ jaso naan kun e. Afin kɛ sran’n fa ti’n yɛ i wunmiɛn’n fa ti-ɔ.” Ɔ maan Zedeɔn jasoli naan w’a kun Zeba nin Zalmuna,+ ɔ fali be nɛnnglɛnman mɔ be yoli i kɛ anglo ba mɔ w’a fi uflɛuflɛ sa’n, mɔ be o be ɲɔnngɔnmin’m be kɔmin’n.

22 Kɛ ɔ́ kɔ́ i ɲrun’n, Izraɛli yasua’m be seli Zedeɔn kɛ: “Maan ɔ bɔbɔ nin ɔ mma mun, nin ɔ anunman mun amun sie e. Afin a deli e Madianfuɛ’m be sa nun.”+ 23 Sanngɛ Zedeɔn seli be kɛ: “N su sieman amun. Min wa’n kusu su sieman amun. Zoova yɛ ɔ́ síe amun-ɔn.”+ 24 Zedeɔn kan guali su kɛ: “Maan n srɛ amun like kun. Ninnge nga amun ɲɛnnin i’n, amun tinuntinun amun fɛ i nun be bue nun nga kun be man min.” (Kɛ mɔ be ti Ismaɛlifuɛ’n ti’n, be le be bue nun sika ɔkwlɛ nga wie mun.)+ 25 Be tɛli i su kɛ: “E tili, é wá fá é mán wɔ.” Be sɛli tralɛ tɛnndɛn kun, kpɛkun be tinuntinun be fali be bue nun nga kun ninnge nga be ɲɛnnin i’n nun be yili su. 26 Be bue nun sika ɔkwlɛ nga mɔ Zedeɔn srɛli’n, i nɔnnin’n ti sika ɔkwlɛ sikli akpi kun ya nso (1.700).* Asa ekun’n, be mɛnnin i nɛnnglɛnman mɔ be yoli i kɛ anglo ba mɔ w’a fi uflɛuflɛ’n sa’n, nin asunmanndi, nin Madian famiɛn mun be tralɛ mɔ be fali jese ɔkwlɛ kankan be yoli’n, ɔ nin ɲɔnngɔnmin’m be kɔmin ɲanman mun.+

27 Zedeɔn fa yoli efɔdu kun,+ yɛ ɔ fa sieli i i klɔ’n su lɔ Ofra lɔ.+ Izraɛlifuɛ’m be kwlaa be sɔli efɔdu sɔ’n lɔ.*+ Ɔ kacili kɛ aya sa Zedeɔn nin i awlofuɛ’m be bo.+

28 Ɔ maan Madianfuɛ’m+ be loli be wun mannin Izraɛlifuɛ mun, b’a klɔklɔman be kun.* Zedeɔn blɛ su’n, mɛn’n tɔli fɔuun afuɛ ablanan (40).+

29 Zoasi i wa Zeribaali+ sɛli i sin i awlo yɛ ɔ kali lɔ.

30 Zedeɔn wuli ba yasua ableso (70),* afin i yi’m be sɔnnin. 31 I yi ng’ɔ o Sisɛmun lɔ’n i kusu wuli ba kun. Ɔ flɛli i kɛ Abimelɛki.+ 32 Zoasi i wa Zedeɔn wa wuli. Ɔ cɛli nguan nun, yɛ ɔ dili aklunjɔɛ. Be sieli i i si Zoasi i asieliɛ m’ɔ o Ofra lɔ’n nun, Abiezɛɛfuɛ’m be lika liɛ’n nun lɔ.+

33 Kɛ Zedeɔn wuli cɛ’n, Izraɛlifuɛ’m be sɔli Baali mun.*+ Be takali Baali-Beriti, ɔ yoli be amuin.+ 34 Izraɛlifuɛ’m be wla fili be Ɲanmiɛn Zoova+ m’ɔ deli be be kpɔfuɛ mɔ be bo sin yia be’n be kwlaa be sa nun’n.+ 35 Yɛ kusu Zeribaali m’ɔ suan Zedeɔn m’ɔ yoli sa kpa mannin Izraɛlifuɛ mun’n, b’a simɛn i awlo’n i ye.+