Fluwa klikli nga Pɔlu klɛli Korɛntifuɛ mun’n

4 Maan sran’m be wun kɛ e ti Klisi i junman difuɛ nin Ɲanmiɛn i like m’ɔ ti fiawa’n+ i sunianfuɛ. 2 Kusu’n, like nga be kunndɛ i like sunianfuɛ’n i lika’n, yɛle kɛ maan ɔ yo nanwlɛfuɛ. 3 Min liɛ’n, sɛ amún dí min jɔlɛ annzɛ jɔlɛ difuɛ’m bé dí min jɔlɛ’n, ɔ yoman min like fi. I kpa bɔbɔ’n, nán n bɔbɔ yɛ n di min wun jɔlɛ-ɔ. 4 Afin n wunman kɛ n yoli sa tɛ wie. Sanngɛ i sɔ’n kleman kɛ n ti sɛsɛfuɛ. Afin sran ng’ɔ di min jɔlɛ’n, yɛle Zoova.*+ 5 Ɔ maan sɛ jɔlɛ dilɛ blɛ’n nin-a juman’n, nán amun di sran fi jɔlɛ.+ Amun minndɛ kɛ e Min’n bla ka. Sɛ ɔ ba’n, ɔ́ fá ninnge nga be ti fiawa aosin’n nun’n ɔ́ fíte wia nun. Yɛ ɔ́ wá yó maan bé sí sran’m be awlɛn’n nun lɔ sa mun. Kɛ ɔ ko yo sɔ’n, like ng’ɔ nin sran kun fata’n yɛ Ɲanmiɛn fá yí i ayɛ-ɔ.+

6 Aniaan mun, amun kpa yolɛ ti yɛ n kannin min nin Apolɔsu+ e ndɛ-ɔ. I liɛ’n e ti’n, amún sí mmla ng’ɔ o yɛ’n. Ɔ se kɛ: “Nán fa ndɛ uflɛ uka ng’ɔ ti klɛwa’n su.” Kɛ ɔ ko yo naan amun a tuman amun wun+ naan amun a buman sran wie kpa b’a traman wie’n ti. 7 ?Ngue ti yɛ a bu i kɛ ɔ kpa tra ɔ wiengu-ɔ? ?Ngue yɛ a le i mɔ nán Ɲanmiɛn yɛ ɔ fa mannin wɔ-ɔ?+ ?Yɛ sɛ Ɲanmiɛn yɛ ɔ fa mannin wɔ’n, ngue ti yɛ a di ɔ nuan kɛ ɔ bɔbɔ ɔ fanngan nun yɛ a ɲɛnnin i kwlaa sɔ’n sa-ɔ?

8 ?Amun a ɲan like kwlaa? ?Amun a ɲan amun wun w’a wie? ?Amun su di famiɛn kpɛ e?+ N kunndɛ kpa kɛ amun bo famiɛn dilɛ bo, kɛ ɔ ko yo naan e kusu y’a di famiɛn kɛ amun sa wie’n ti.+ 9 Ɔ yo min kɛ e mɔ e ti akoto’n, Ɲanmiɛn w’a fa e w’a kle sran mun kɛ e ti be nga be seli kɛ bé kún be’n be kasiɛn sa.+ Afin y’a yo kɛ anɔ yifuɛ sa mɛn’n nun.+ Yɛ anzi mun, ɔ nin sran mun be nian e. 10 Klisi ti’n, y’a kaci sinnglinfuɛ.+ Sanngɛ amun liɛ’n, Klisi ti’n, amun a kaci ngwlɛlɛfuɛ. E leman wunmiɛn, sanngɛ amun liɛ’n, amun le wunmiɛn. Be yi amun ayɛ, sanngɛ e liɛ’n, be gua e ɲin ase. 11 Lele nin andɛ’n, awe+ nin nzuewe+ te kun e. E wun ti kplɛn, be bo e,+ yɛ e leman lawlɛ, 12 e fa e sa e di junman kekle kpa.+ Kɛ be kpɛ e nzowa’n, e yra e nuan man be.+ Kɛ be kle e yalɛ’n, e tra e awlɛn, ɔ maan ɔ sɔn e nun.+ 13 Kɛ be saci e dunman’n, e tɛ su wɛtɛɛ su.*+ Kɛ ɔ fɛ i laa lele mɔ w’a fa ju yɛ’n, e ti kɛ mɛn’n nun wla sa. E ti kɛ ninnge nga sran’m be gua be blo’n sa.

14 Nán kɛ min waan ń gúa amun ɲin ase ti yɛ n klɛ ndɛ nga mun-ɔn. Sanngɛ n kunndɛ kɛ ń mán amun afɔtuɛ, afin amun ti min awlɛn su ba. 15 Kannzɛ amun le like klefuɛ akpiakpi blu (10.000) naan be kleli amun Klisi i atin’n, sanngɛ amun leman siɛ kpanngban. Afin kɛ mɔ min nin Klisi Zezi e ti sran wunmuan’n, n kacili amun si jasin fɛ mɔ n boli n kleli amun’n ti.+ 16 Ɔ maan ń srɛ́ amun, amun nian min liɛ’n su yo.+ 17 I sɔ’n ti’n, ń má súnman Timote amun wun lɔ. Afin ɔ ti min wa kpa, yɛ ɔ su e Min’n nanwlɛ su. Wafa nga n yo ninnge mun Klisi Zezi i junman’n i dilɛ nun’n,+ mɔ i sɔ yɛ n kle i asɔnun kwlaa nun’n, ɔ́ nían su fá kpɛ́n amun wla.

18 Amun nun wie’m be di be nuan kɛ wienun-ɔn, n su kɔman amun wun lɔ kun sa. 19 Sanngɛ ɔ ka kan’n, sɛ Zoova* di su’n, ń má jú amun wun lɔ. Kpɛkun ń sí be nga be tu be wun’n. Nán be nuan ndɛ’n yɛ ń sí i-ɔ, sanngɛ kwlalɛ nga be le i’n yɛ ń sí i-ɔ. 20 Afin Ɲanmiɛn Sielɛ’n timan ndɛ kanlɛ, sanngɛ ɔ ti kwlalɛ ndɛ. 21 ?Kɛ ń má bá amun wun lɔ’n, ngble yɛ n fa bla-ɔ?+ ?Annzɛ kusu klolɛ nin awlɛn wɛtɛɛ yɛ n fa bla-ɔ? ?Beninfuɛ’n yɛ amun kunndɛ-ɔ?