Ɲanndra Mun

20 Duvɛn’n yo be wanzo,+ nzan’n yo be ɲin su jeinjein.+

Sran nga nzan ti’n ɔ jaso atin kpa’n su’n, ɔ siman ngwlɛlɛ.+

 2 Kɛ famiɛn kun o sa’n, i sro m’ɔ yo’n ti kɛ asɔmɔli’n* i kpanlɛ’n sa.+

Sran ng’ɔ klɔklɔ i ya’n, ɔ kunndɛ wie.+

 3 Kɛ sran kun kunndɛman ndɛnngan’n, i sɔ’n mɛn i kɔmin su,+

sanngɛ sinnglinfuɛ’n fɛ i wun wla nun.+

 4 Fuɛnfuɛ’n tuman kacɛ ayrɛ blɛ’n nun,

ɔ maan ninnge’m be kpɛlɛ blɛ’n nun m’ɔ su ɲanman like fi’n, ɔ́ srɛ́srɛ́ like sín.*+

 5 Akunndan* nga be o sran kun klun’n, be ti kɛ nzue nga be bo ti kploun’n sa,

sanngɛ sran ng’ɔ bu sa sin’n, ɔ yi be fite.

 6 Sran sunman be kan kɛ be klo sran titi,

?Sanngɛ wan yɛ ɔ kwla ɲan sran kun m’ɔ ti nanwlɛfuɛ’n niɔn?

 7 Sran ng’ɔ yo sa i nuan su’n, ɔ nanti seiin.+

I mma* ng’ɔ yaci be i sin wa’n, be liɛ su ti ye.+

 8 Kɛ famiɛn’n trɛn i bia’n su naan ɔ́ dí jɔlɛ’n,+

ɔ wun sa kwlaa ng’ɔ ti tɛ’n i wlɛ.*+

 9 ?Wan yɛ ɔ kwla se kɛ: “N yoli min awlɛn’n i sanwun,+

sa tɛ fi nunman min wun-ɔn”?+

10 Jayɔbuɛ nin toe nga be fa di ndrunmun’n,*

Zoova i ɲin ci be nɲɔn’n.+

11 Bakan* bɔbɔ’n, sɛ i nzuɛn’n ti kpa naan ɔ nanti ndɛnman su’n,

like ng’ɔ yo’n yɛ ɔ yi i sɔ liɛ’n i nglo-ɔ.+

12 Be su mɔ be fa ti sa’n, nin be ɲinma mɔ be fa wun ase’n,

Zoova yɛ ɔ yili be nɲɔn’n niɔn.+

13 Nán klo lafilɛ, ɔ timɛn i ti’n yalɛ’n dí wɔ.+

Tike ɔ ɲinma’n, i liɛ’n á ɲán kpanwun dí yɛ ɔ ku yí.+

14 Like tofuɛ’n se kɛ: “Ɔ timan kpa, ɔ timan kpa.”

Kpɛkun kɛ ɔ kɔ i ɲrun’n, ɔ ko di i nuan.+

15 Sika ɔkwlɛ’n o lɛ, yɛ be diman korai’n* i yalɛ kusu,

sanngɛ ndɛ ng’ɔ fin sran ng’ɔ si sa’n i nuan fite’n, ɔ ti kpa dan.+

16 Sɛ sran kun jrannin i wiengu kun mɔ be simɛn i’n i nuan’n, fɛ i tralɛ’n.+

Sɛ ɔ jrannin aofuɛ bla* kun i nuan’n, fɛ i sa nun like kɛ aowa sa.+

17 Awie like’n, ɔ yo be nuan nun fɛ,

sanngɛ i agualiɛ su’n, yɔbuɛ mma’m be yi be nuan’n i piɛ.+

18 Kɛ be usa ngwlɛlɛ afɛ’n,* like nga be waan bé yó’n ɔ yo ye,*+

nian ajalɛ klanman* nga be kleli wɔ’n su naan w’a kun alɛ.+

19 Suɛn tɔnfuɛ’n fa nvialiɛ nun ndɛ mun tru.+

Nán a nin sran ng’ɔ klo sran wun ndɛ kanlɛ’n* be san nun.

20 Sran ng’ɔ bo i si nin i nin be sannzan’n,

kɛ lika’n wá lú tritri’n, i kannin’n núan.+

21 Aja like nga be fa aɲinkpli be ɲɛn i’n,

kasiɛn su’n, ɔ yoman be wun sa ye.+

22 Nán se kɛ: “Sa tɛ nga be yoli min’n, ń yí mán.”+

Fa ɔ wla’n guɛ i Zoova su,+ yɛ ɔ́ dé wɔ.+

23 Jayɔbuɛ nga be fa di ndrunmun’n* Zoova i ɲin ci be,

yɛ toe nga be fa di sran lufle’n, ɔ timan kpa.

24 Ajalɛ nga sran kun tu i sa’n, Zoova yɛ ɔ kle i-ɔ.+

?Ɔ́ yó sɛ naan sran kun w’a wun atin nga i bɔbɔ fa’n

i wlɛ?

25 Sɛ sran kun w’a buman akunndan naan ɔ kpan se kɛ “ɔ ti Ɲanmiɛn liɛ klonglo’n,”+

naan i sin yɛ ɔ bu nda ng’ɔ tali’n i akunndan’n, i sɔ’n ti kɛ aya sa.+

26 Famiɛn ng’ɔ si ngwlɛlɛ’n, ɔ sanndi klunwifuɛ mun aunmuan’n nun,+

yɛ ɔ fa like nga be fa bo ble nin ɔɔzu’n i ja’n sin be su.+

27 Aunmuan m’ɔ o sran kun nun’n, ɔ ti kɛ Zoova i kannin’n sa,

ɔ kpɛjɛ i klun lɔ longolongo kwlaa nun.

28 Sran klolɛ dan’n nin nanwlɛ dilɛ’n be sasa famiɛn’n.+

I sran klolɛ dan’n ti’n, i famiɛn bia’n taka kpa.+

29 Gbanflɛn nin talua’m be aɲrunɲan like’n yɛle be wunmiɛn’n,+

yɛ sran oke’m be aɲrunɲan like liɛ’n yɛle be ti je’n.+

30 Be wunnɛn m’ɔ suku tuun’n nin be wun kanninkannin’m be salo* sa tɛ’n,+

yɛ bolɛ’n yo be klun lɔ’n i sanwun.