Ɲanndra Mun

13 Ba ng’ɔ ti ngwlɛlɛfuɛ’n kɛ i si tu i fɔ’n, ɔ fa,+

sanngɛ ba ng’ɔ yo sran finfin’n, kɛ be ijɔ i’n,* ɔ faman.+

 2 Kɛ sran kun ɲán like kpa dí i lɛ’n, ɔ fin i nuan nun ndɛ’n,+

sanngɛ like nga gblɛfuɛ’n i awlɛn o su’n, yɛle nzaje sa yolɛ.

 3 Sran ng’ɔ si i nuan sie’n, ɔ sɛsɛ i nguan’n,+

sanngɛ sran ng’ɔ ijɔ plapla’n, sa ɲɛ́n i.+

 4 Fuɛnfuɛ’n i konvi’n cɛnnin, sanngɛ ɔ leman like fi,+

sanngɛ sran ng’ɔ ti juejue’n, i sa su mianman like fi wun.*+

 5 Sran ng’ɔ yo sa i nuan su’n, i ɲin ci gblɛ’n,+

sanngɛ klunwifuɛ’n i ayeliɛ’n fa ɲannzuɛn nin kuakualɛ’n ba.

 6 Sa nuan su sɛsɛ yolɛ’n sasa sran nga w’a yoman sa’n,+

sanngɛ klunwi yolɛ’n yi sa tɛ yofuɛ’n i ase.

 7 Sran wie o lɛ’n, ɔ yo i wun kɛ ɔ ti aɲanbeunfuɛ sa, kusu nn ɔ leman like fi.+

Sran wie kusu o lɛ’n, ɔ yo i wun kɛ ɔ ti yalɛfuɛ sa, sanngɛ ɔ le like kpanngban kpa.

 8 Klɔ sran fɛ i aɲanbeun’n fa kpɔ i ti,+

sanngɛ yalɛfuɛ’m be liɛ’n, be kleman be yalɛ kaan sa.*+

 9 Be nga be yo sa i nuan su’n, be kannin’n kpaja kpa,*+

sanngɛ klunwifuɛ’m be kannin liɛ’n ɔ́ núan.+

10 Tutre’n i like ng’ɔ kpɛ i ba’n yɛle ndɛnngan’n,+

sanngɛ ngwlɛlɛ’n ti be nga be usa ngwlɛlɛ afɛ’n* be liɛ.+

11 Aɲanbeun like nga be ɲɛn i ndɛndɛ’n,* ɔ cɛman be sa nun,+

sanngɛ aɲanbeun like nga be tiɛn i nuan kanngan’n,* ɔ́ sɔ́n kpa.

12 Like nga be ɲin o i sin* m’ɔ baman ndɛndɛ’n, ɔ kpɛ awlɛn,+

sanngɛ like nga be kunndɛ mɔ be ɲɛn i’n, ɔ ti kɛ nguan waka sa.+

13 Sran nga be kle i like* m’ɔ faman su’n, ɔ́ wún i su afɛ,+

sanngɛ sran ng’ɔ di mmla’n su’n, ɔ́ ɲán su ye.+

14 Like* nga ngwlɛlɛfuɛ’n kle’n, ɔ man nguan,+

ɔ yo maan sran tɔman wie’n i nuan’n* nun.

15 Sran ng’ɔ ti akunndanfuɛ kpa’n, bé kló i,

sanngɛ gblɛfuɛ’m be atin’n ti kunngblokunngblo.

16 Ngwlɛlɛfuɛ’n jran like ng’ɔ si i’n su naan w’a yo like,+

sanngɛ sinnglinfuɛ’n yi i bɔbɔ i sinnzin’n i nglo.+

17 Ngaliɛ kanfuɛ nga i klun yo wi’n, ɔ ɲan ndɛ,+

sanngɛ sran nanwlɛfuɛ nga be sunmɛn i’n, ɔ yo maan sran yo juejue.+

18 Sran nga be tu i fɔ-ɔ, ɔ sɔman nun’n, yalɛ’n dí i kpɛkun i ɲin gúa ase,

sanngɛ sran ng’ɔ fa ngwlɛlɛ nga be kle i’n* su’n, ɔ́ ɲán kɔmin.+

19 Kɛ sran kun ɲan like nga i ɲin o i sin’n, i klun jɔ,+

sanngɛ sinnglinfuɛ’m be kunndɛman kɛ bé yáci sa tɛ yolɛ.+

20 Sran ng’ɔ nin ngwlɛlɛfuɛ’n be nanti’n, ɔ́ káci ngwlɛlɛfuɛ,+

sanngɛ sran ng’ɔ nin sinnglinfuɛ’n be san nun’n, ɔ́ ɲán ndɛ.+

21 Ɲrɛnnɛn’n su sa tɛ yofuɛ’m be su,+

sanngɛ be nga be yo sa i nuan su’n be liɛ’n, aɲanbeun’n yɛ ɔ́ lá be ase-ɔ.+

22 Sran ng’ɔ ti kpa’n, ɔ yaci aja like mɛn i anunman mun,

sanngɛ sa tɛ yofuɛ’n i liɛ’n, bé síe i aɲanbeun ninnge’m be lɛ bé mán sran ng’ɔ yo sa i nuan su’n.+

23 Kɛ yalɛfuɛ’n di fie’n, ɔ ɲan aliɛ kpanngban kpa,

sanngɛ sran lufle bulɛ’n ti’n, be* kwla mlin.

24 Sran ng’ɔ faman ɲantiaan’n kɛnmɛn i wa’n,* nn ɔ kpɔ i,+

sanngɛ sran ng’ɔ klo i wa’n, ɔ nian nun tu i fɔ.*+

25 Sran ng’ɔ yo sa i nuan su’n, ɔ di like lele i ku yi,+

sanngɛ klunwifuɛ’n i liɛ’n, like fi nunmɛn i ku sɛ’n nun.+