Fluwa nɲɔn su nga Pɔlu klɛli Tesalonikifuɛ mun’n

3 Siɛn’n aniaan mun, amun srɛ man e titi+ naan Zoova* i ndɛ’n tru ndɛndɛ+ naan sran’m be sɔ nun klanman kɛ amun fa sɔli nun’n sa, 2 naan e ɲan e ti abɔlɛfuɛ mun nin sran tɛtɛ’m be sa nun,+ afin nán sran kwlaa yɛ ɔ lafi e Min’n su-ɔ.+ 3 Sanngɛ e Min’n ti nanwlɛfuɛ. Ɔ maan ɔ́ wlá amun fanngan, yɛ ɔ́ sásá amun klunwifuɛ’n i lika. 4 Asa ekun’n, e Min’n i dunman nun’n, e lafi amun su. E si kɛ dɔ nga su’n amun nanti e afɔtuɛ’m be su, yɛ e si kɛ amún nánti be su titi. 5 Maan e Min’n uka amun naan amun klo Ɲanmiɛn,+ yɛ maan ɔ uka amun naan amun tra amun awlɛn+ be su Klisi’n su titi.

6 Aniaan mun, e Min Zezi Klisi dunman nun’n, é sé amun kɛ nán amun fa amun wun mantan aniaan kwlaa ng’ɔ timan aɲinyiɛfuɛ’n,+ m’ɔ nantiman ndɛ nga e kan kleli amun’n* su’n.+ 7 Amun bɔbɔ amun si wafa ng’ɔ fata kɛ amun sɔnnzɔn e’n.+ Afin i nun nga e o amun wun lɔ’n, y’a yoman ɲin keklefuɛ kɛ be sa. 8 Asa kusu’n, y’a diman sran wie i aliɛ ngbɛn.+ Sanngɛ kɔnguɛ nin wia nun’n, e dili junman kekle, yɛ e fɛli kpa, kɛ ɔ ko yo naan y’a kaciman amun nun wie fi i ti su trɔ’n ti.+ 9 Nán kɛ e leman atin e yoman sɔ ti-ɔ.+ Sanngɛ e kunndɛ kɛ é klé amun ajalɛ kpa naan amun nian su sɔnnzɔn e.+ 10 I kpa bɔbɔ’n, i nun nga e o amun wun lɔ’n, e kannin ndɛ yɛ’n e kleli amun: “Sɛ sran kun waan ɔ diman junman’n, nán maan ɔ di like kusu.”+ 11 Afin e tili i kɛ amun nun wie’m be faman e ndɛ’n su.+ Yɛle kɛ be diman junman mlɔnmlɔn, sanngɛ be fa be nuan wla ndɛ ng’ɔ timan be ndɛ’n nun.+ 12 E Min Zezi Klisi i dunman nun’n, e mannin sran sɔ’m be afɔtuɛ. E seli be kɛ be kan be wun ase be di junman naan be di aliɛ nga be bɔbɔ be ɲɛn i’n.+

13 Aniaan mun, amun liɛ’n nán amun sa sin bubu amun sa kpa yolɛʼn nun. 14 Sanngɛ sɛ sran wie nantiman fluwa nga i nun ndɛ’n su’n, amun sie sran sɔ’n i nzɔliɛ, yɛ nán amun nin i san nun kun.+ I liɛ’n, ɔ́ wún ɲannzuɛn. 15 Nán amun kpɔ i, sanngɛ amun bu i amun niaan, kpɛkun an tu i fɔ titi.+

16 Maan e Min’n m’ɔ man alaje’n i bɔbɔ man amun alaje titi sa’n kwlaa nun.+ Maan e Min’n nin amun kwlaa be tran.

17 Min bɔbɔ min Pɔlu mɔ n su fa min sa n klɛ fluwa yɛ’n, ń yó amun like.+ Fluwa nga n klɛ’n like nga be fa sie i nzɔliɛ’n yɛ ɔ o lɛ. Kɛ n klɛ min fluwa mun kɛ ngalɛ’n sa.

18 Maan e Min Zezi Klisi yo amun kwlaa amun ye.