2 Be Ɲoliɛ

15 Ɲanmiɛn wawɛ’n jrali Odɛdi i wa Azaria su. 2 Ɔ maan ɔ ko toli Aza naan w’a se i kɛ: “Aza, wɔ nin Zidafuɛ mun nin Bɛnzamɛnfuɛ’m be kwlaa, amun sie amun su! Sɛ amun nin Zoova be o nun titi’n, i kusu ɔ nin amun trán titi.+ Sɛ amun kpɛ i sin atin’n, ɔ́ yí i wun nglo klé amun.+ Sanngɛ sɛ amun kaci amun sin si i’n, i kusu ɔ́ káci i sin sí amun.+ 3 Blɛ wie nun’n, Izraɛlifuɛ’m be nin Ɲanmiɛn Kpli be afiɛn tili nun, Ɲanmiɛn ɲrun jranfuɛ fi kleman be like, yɛ be diman mmla’n su. I sɔ liɛ’n cɛli kpa.*+ 4 Sanngɛ kɛ be wa wunnin ɲrɛnnɛn mɔ be sali be sin Zoova m’ɔ ti Izraɛli Ɲanmiɛn’n i wun’n, mɔ be kpɛli i sin atin’n, ɔ yili i wun nglo kleli be.+ 5 Blɛ sɔ’n nun’n, ajalɛ tulɛ’n ti kekle.* Afin ndɛnnganndɛnngan o be kwlaa nga be tran akpasua fanunfanun’m be su’n, be afiɛn. 6 Nvle kun jaso ko saci nvle uflɛ. Yɛ klɔ kun jaso ko saci klɔ uflɛ. Afin Ɲanmiɛn bɔbɔ yoli maan ndɛnnganndɛnngan trannin be afiɛn titi naan be wun ɲrɛnnɛn fanunfanun.+ 7 Sanngɛ amun liɛ’n, amun jran kekle, nán amun sa sin bubu amun.+ Afin like nga amun yo’n, cɛn wie lele’n, amún ɲɛ́n i nuan like.”

8 Kɛ Aza tili ndɛ sɔ mun ɔ nin ndɛ nga Ɲanmiɛn fa wlali i nuan ijɔfuɛ Odɛdi i nuan kɛ ɔ kan’n, ɔ ɲannin wunmiɛn. I sɔ’n ti’n, ɔ nunnunnin amuin mɔ be ti like kain’n mɔ be o Zida+ nin Bɛnzamɛn akpasua wunmuan’n be nun’n, ɔ nin amuin nga be o klɔ ng’ɔ fali be mɔ be o Efraimun okaoka lika’n nun’n. Ɔ siesieli Zoova i tɛ yiwlɛ ng’ɔ o Zoova i sua’n i lika ng’ɔ ti fleiin kpa’n i ɲrun lɛ’n, i ye kpa.+ 9 Ɔ yiali Zidafuɛ mun nin Bɛnzamɛnfuɛ mun, nin aofuɛ nga be nin be tran’n mɔ be fin Efraimun nin Manase nin Simeɔn akpasua’m be nun’n.+ Afin aofuɛ sɔ’m be tuli Izraɛli lɔ kaka kpa, kpɛkun be fali be wun mɛntɛnnin i. Afin be wunnin kɛ Zoova m’ɔ ti i Ɲanmiɛn’n jin i sin. 10 Kɛ Aza kacili famiɛn’n i afuɛ blu-nin-nnun (15) su i anglo nsan su’n nun’n, be yiali Zerizalɛmun lɛ. 11 Cɛn sɔ’n nun’n, nnɛn nga be ɲɛnnin i alɛ kunlɛ nun’n, be fali wie be yili tɛ mannin Zoova. Be fali nannin ya nso (700) ɔ nin bua akpi nso (7.000). 12 Asa ekun’n, be trali aenguɛ naan bé fá be awlɛn’n kwlaa nin be nguan’n kwlaa bé sú* Zoova m’ɔ ti be nannan’m be Ɲanmiɛn’n,+ 13 naan sran kwlaa ng’ɔ suman Zoova m’ɔ ti Izraɛli Ɲanmiɛn’n, sɛ ɔ le ɲrun-o, sɛ ɔ leman ɲrun-o, sɛ yasua-o, sɛ bla-o, maan be kun i.+ 14 I sɔ’n ti’n, be mannin be nɛn’n su kpa be tali Zoova i nda. Be kpannin aklunjɔɛ kpanlɛ, yɛ be fitali awɛ wafawafa’m* be nun. 15 Zidafuɛ’m be kwlaa be klun jɔli kpa, nda nga be tali’n ti. Afin be awlɛn’n kwlaa yɛ be fa tali nda sɔ’n niɔn. Asa ekun’n, be kpɛli Ɲanmiɛn i sin atin, yɛ i kusu ɔ yili i wun nglo kleli be.+ Zoova maan lika wunmuan’n tɔli fɔuun mannin be.+

16 I kpa bɔbɔ’n, famiɛn Aza yoli maan i nannan bla m’ɔ suan Maaka’n,+ w’a ɲanman ɲrun kun.* Afin ɔ yoli amuin ba m’ɔ ti tete like’n naan be sɔ waka nga be takali’n.*+ Aza buli bla’n i amuin ba sɔ m’ɔ ti tete like’n. Ɔ fufuli nun, kpɛkun ɔ wɔli nun Sedrɔn Kongo’n nun lɔ.+ 17 Ɔ nin i sɔ ngbaʼn, lika nglonglo’m* be kali+ Izraɛli nvle’n nun.+ Sanngɛ lele mɔ Aza fá wú’n, ɔ fɛli i awlɛn’n kwlaa fa suli Ɲanmiɛn.+ 18 Ninnge nga ɔ nin i si be yoli be sanwun’n, ɔ fa be bali Ɲanmiɛn Kpli i sua’n nun. Be yɛle sika nin sika ɔkwlɛ, ɔ nin ninnge fanunfanun wie mun.+ 19 Lele m’ɔ́ fá jú Aza i famiɛn dilɛ’n i afuɛ ablasan-nin-nnun (35) su’n, alɛ ba kun sa w’a tɔman.+