Ezekiɛli
19 “Izraɛli siefuɛ’m be ti’n, ɔ fata kɛ a yi ngwlɛ. 2 Se kɛ:
‘?Laa’n ɔ nin’n ti sɛ? Ɔ ti asɔmɔli bla kun asɔmɔli’m be afiɛn.
Ɔ la asɔmɔli gbanflɛn mɔ be le wunmiɛn kpa’n* be afiɛn. Yɛ ɔ tɛ i mma mun.
3 Ɔ tɛli i mma’m be nun kun, yɛ ɔ kacili asɔmɔli gbanflɛn kun m’ɔ le wunmiɛn kpa-ɔ.+
Ɔ suannin wafa ng’ɔ kwla titi nnɛn ng’ɔ tra be’n be nun’n.
I kpa bɔbɔ’n, ɔ dili sran.
4 Nvlenvle’m be tili i su ndɛ, yɛ be kpɛli kunman be trɛli i.
Be fali blalɛ be wlɛli i bue’n nun, kpɛkun be fɛ i ɔli Ezipti mɛn’n nun lɔ.+
5 Asɔmɔli’n i nin’n minndɛli, kpɛkun i agualiɛ su’n ɔ wa wunnin i wlɛ kɛ i wa’n su sɛmɛn i sin kun.
Ɔ maan ɔ fɛli i wa uflɛ, kpɛkun ɔ yoli maan ɔ kacili asɔmɔli gbanflɛn kun m’ɔ le wunmiɛn kpa-ɔ.
6 I kusu ɔ wlanwlannin asɔmɔli’m be afiɛn, yɛ ɔ kacili asɔmɔli gbanflɛn kun m’ɔ le wunmiɛn kpa-ɔ.
Ɔ suannin wafa ng’ɔ kwla titi nnɛn ng’ɔ tra be’n be nun’n. I kpa bɔbɔ’n, ɔ dili sran.+
7 Ɔ wlanwlannin be sua fleinflein’m be afiɛn, yɛ ɔ sacili be klɔ mun.
Ɔ maan be ti i kpanlɛ’n mɛn mɔ w’a tɔ srolo’n i lika’n kwlaa nun.+
8 Nvlenvle nga be fin lika nga be mɛntɛn i lɛ’n be nun’n, be bali naan bé fá be lala’n bé gúɛ i su.
Be kpɛli kunman be trɛli i.
9 Be fali blalɛ be wlɛli i bue’n nun kpɛkun be fɛli i wlɛli i nnɛn tuin kun nun, kpɛkun be fɛ i ko mannin Babilɔnin Famiɛn’n.
Be wlɛli i bisua lɔ, kɛ ɔ ko yo naan b’a timɛn i nɛn’n Izraɛli oka’m be su kun’n ti.
10 Ɔ nin’n ti kɛ ɔ mmoja’n nun viɲin sa.*+ Ɔ o nzue ba nuan.
Kɛ m’ɔ o nzue ba nuan’n ti’n, ɔ su mma yɛ i sama’m be sɔnnin.
11 I sama’m be yoli kekleekle. Be kwla fa yo siefuɛ’m be kpɔnman.
Ɔ ɲinnin yɛ ɔ trali waka onga’m be su.
Kɛ m’ɔ ti tɛnndɛn m’ɔ le nɲa kpanngban’n ti’n ɔ fiaman.
12 Be tuli i bo ya su,+ yɛ be toli i be yili i asiɛ wun.
Kpɛkun aunmuan kun
m’ɔ fin wia afiliɛ lɔ’n ɔ yoli maan i mma’m be wuli kee.
13 Siɛn’n, b’a tɛ i aawlɛ flɛnnɛn’n nun,
mɛn kee kun mɔ nzue nunman lɔ’n nun.+
14 Sin ng’ɔ tɔli i sama’m be nun’n, ɔ yrɛli i sama kanngan mun nin i su mma mun.
Yɛ i sama kekleekle’m be nun wie fi w’a kaman lɛ, sielɛ kpɔnman wie fi w’a kaman lɛ.+
“‘Ngwlɛ yilɛ’n yɛ ɔ o lɛ-ɔ. Yɛ bé wá nían su bé yí ngwlɛ.’”