Ezekiɛli

10 Kɛ n wo lɛ ń nían’n, n wunnin like kun like plaii ng’ɔ o seribɛn’m be ti su nglo’n i su nglo lɔ, ɔ ti kɛ yɔbuɛ nga be flɛ i kɛ safii’n sa, yɛ ɔ fa famiɛn bia.+ 2 Kpɛkun ɔ seli sran nga lɛn tralɛ wlɛ i wun’n+ kɛ: “Wlu kondokaa’m be afiɛn,+ seribɛn’m be bo, naan fa sɛnmlɛn ɲanɲan+ seribɛn’m be afiɛn lɛ ɔ sa nɲɔn’n nun maan ɔ yi, kpɛkun to be guɛ i klɔ’n su lɔ.”+ Ɔ maan ɔ ɔli, kɛ ɔ́ yó sɔ’n nn n wo lɛ ń nían.

3 Kɛ sran’n kɔ́’n, nn seribɛn’m be jinjin sua’n i fama su lɛ, kpɛkun ɲanmiɛn ble’n yili awlo klun kaan’n. 4 Kpɛkun Zoova i ɲrun ɲanɲan’n+ jasoli seribɛn’m be ti su nglo lɛ ɔli sua’n i anuan’n nun lɔ. Ɔ maan ɲanmiɛn ble’n yili sua’n+ blɛblɛblɛ. Zoova i aɲrunɲan’n kpajali sua wunmuan’n nun. 5 Be ti seribɛn’m be ndɛwa’m be tɛlɛ’n awlo klun dan’n nun lɔ, be tɛ kɛ Ɲanmiɛn m’ɔ Kwla Like Kwlaa Yo’n yɛ ɔ su ijɔ sa.+

6 I sin’n, ɔ seli sran nga lɛn tralɛ wlɛ i wun’n kɛ: “Fa sin kondokaa’m be afiɛn, seribɛn’m be afiɛn lɛ.” Ɔ maan ɔ ɔli ko jrannin kondokaa’m be nun kun i wun lɛ. 7 Kpɛkun seribɛn’m be nun kun tinngɛli i sa’n sin ng’ɔ o seribɛn’m be afiɛn’n+ i wun lɔ. Ɔ fali wie fa guɛli i sran nga lɛn tralɛ wlɛ i wun’n+ i sa klun. Yɛ i kusu fa ɔli-ɔ. 8 Like kun o seribɛn’m be ndɛwa’m be bo,+ ɔ ti kɛ sran sa sa.

9 Kɛ n wo lɛ ń nían’n, n wunnin kondokaa nnan seribɛn’m be wun lɛ, kondokaa kun o seribɛn’m be tinuntinun be wun lɛ. Kondokaa’m be wafa’n ti kɛ yɔbuɛ nga be flɛ i kɛ klizoliti m’ɔ bo mianmian’n sa.+ 10 Be nnan’n be fa be wun. Wafa nga be ti’n, ɔ ti kɛ kondokaa kun o kun klun sa. 11 Kɛ bé kɔ́’n, be kwla kɔ be bue nnan’n be kwlaa su, be kpɛman be wun. Afin lika nga seribɛn’m be ɲin* kaci lɔ’n, lɔ yɛ kondokaa’m be kɔ-ɔ, be kpɛman be wun. 12 Be wunnɛn wunmuan’n, nin be wiasin’n, ɔ nin be ndɛwa’m be ti ɲinma ngunmin. Kɛ kondokaa’m be ti sɔ wie-ɔ, be nnan’n be kwlaa be wun ti ɲinma ngunmin.+ 13 N tili sran kun nɛn, ɔ kpan flɛli kondokaa mun, ɔ seli kɛ: “Kondokaa mun!”

14 Be tinuntinun* be le ɲrun nnan. I klikli’n ti seribɛn ɲrun, i nɲɔn su’n ti sran ɲrun, i nsan su’n ti asɔmɔli ɲrun, yɛ i nnan su’n ti anunman ɲin ɲrun.+

15 Kpɛkun seribɛn’m be mannin be wun su (anzi nga n wunnin be Kebaa nzue ba’n i wun lɔ’n+ be kunngba mun-ɔn). 16 Kɛ seribɛn’m be tu be wun bo’n, be nin kondokaa mun yɛ be kɔ-ɔ. Kɛ seribɛn’m be trɛ be ndɛwa’m be nun mɔ be tu be wun bo asiɛ’n su be kɔ nglo mmua kpa’n, kondokaa’m be kpɛman be wun, yɛ be jasoman seribɛn’m be wun lɛ.+ 17 Kɛ be jran’n, be kusu be jran wie. Yɛ kɛ be man be wun su nglo’n, be kusu be man be wun su wie. Afin wawɛ ng’ɔ o anzi’m be nun’n,* ɔ o kondokaa’m be nun wie.

18 I sin’n, Zoova i aɲrunɲan’n+ jasoli sua’n i anuan’n nun lɛ, kpɛkun ɔ ko trannin seribɛn’m be ti su nglo.+ 19 Kɛ n wo lɛ ń nían’n, seribɛn’m be trɛli be ndɛwa’m be nun, kpɛkun be tuli be wun bo asiɛ’n su. Kɛ be tuli be wun bo’n, be nin kondokaa mun ɔli. Be ko jrannin Zoova i sua’n i anuan ng’ɔ kpɛ wia afiliɛ lɔ’n i nun lɛ, yɛ Izraɛli Ɲanmiɛn’n i aɲrunɲan’n ɔ o be ti su nglo.+

20 Anzi sɔ mun* yɛ n wunnin be Izraɛli Ɲanmiɛn’n i bo Kebaa nzue ba’n+ i wun lɔ’n niɔn. Ɔ maan n wunnin i wlɛ kɛ seribɛn mun-ɔn. 21 Be nnan’n be kwlaa be le ɲrun nnan, ɔ nin ndɛwa nnan, ɔ nin like m’ɔ ti kɛ sran sa sa m’ɔ o be ndɛwa’m be bo’n.+ 22 Be ɲrun’n i wafa’n ti kɛ nga n wunnin i Kebaa nzue ba’n i wun lɔ’n sa.+ Be tinuntinun be kɔ be ɲrun ndɛnman su trele.+