Ezekiɛli
11 I sin’n, wawɛ kun mannin min su, ɔ fali min ɔli Zoova i sua’n i anuan ng’ɔ o wia afiliɛ bue liɛ’n su lɔ’n nun, anuan nga i ɲin kpɛ wia afiliɛ lɔ’n.+ Anuan’n nun lɛ’n n wunnin sran ablaɔn-nin-nnun (25), Azuu i wa Zaazania, ɔ nin Benaya i wa Pelatia mɔ be ti nvle’n nun sran dandan’n be o be nun.+ 2 Ɔ seli min kɛ: “Sran wa, sran nga be cici kɛ bé yó sa tɛ mɔ be man afɔtuɛ tɛtɛ mun klɔ nga nun’n be yɛ be o lɛ-ɔ. 3 Be se kɛ: ‘?Nán blɛ m’ɔ fata kɛ e kplan sua’n yɛ?+ Klɔ’n* yɛ ɔ ti like tɔnlɛ sɛ’n*+ niɔn, kpɛkun e yɛ e ti nnɛn’n niɔn.’
4 “Ɔ maan sran wa, kan sa ng’ɔ́ wá jú’n i ndɛ. Kan sa ng’ɔ́ wá jú be su’n i ndɛ.”+
5 I sin’n, Zoova i wawɛ’n jrali min su,+ kpɛkun Ɲanmiɛn seli min kɛ: “Se be kɛ: ‘Ndɛ nga Zoova kan’n yɛ: “Ee Izraɛli i awlo’n nunfuɛ mun, ndɛ nga amun kannin’n ti su, yɛ n si akunndan nga amun bu’n. 6 Amun yoli maan sran kpanngban be wuli klɔ nga nun, yɛ amun yoli maan be diman fuɛn’m be yalɛ i akpɔ’m be su.”’”+ 7 I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Fuɛn nga amun fa be truli klɔ’n nun’n be yɛ be ti nnɛn’n niɔn, yɛ klɔ’n yɛ ɔ ti like tɔnlɛ sɛ’n niɔn.+ Sanngɛ amun liɛ’n, bé wá fá amun klɔ’n nun bé kɔ́.’”
8 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Amun sroli tokofi’n,+ ɔ maan ń má súnman tokofi kun amun sin. 9 Ń má fá amun klɔ’n nun ń fíte, kpɛkun ń fá amun ń wlá aofuɛ’m be sa nun. Kpɛkun ń tú amun fɔ.+ 10 Bé fá tokofi bé kún amun.+ Ń dí amun jɔlɛ Izraɛli mɛn’n i awɛ’n su lɛ,+ yɛ amún wá sí jrɛiin kɛ n ti Zoova.+ 11 Klɔ’n su yoman amun sɛ, yɛ amun su yoman like tɔnlɛ sɛ sɔ’n i nun nnɛn. Ń má dí amun jɔlɛ Izraɛli mɛn’n i awɛ’n su lɛ, 12 yɛ amún wá sí jrɛiin kɛ n ti Zoova, afin amun a nantiman min mmla mun, ɔ nin ndɛ nga n kan’n be su.+ Sanngɛ nvle nga be bo sin yia amun’n be ndɛ nga be kan’n i su yɛ amun fali-ɔ.’”+
13 Kɛ n wieli sa nga bé wá jú’n be ndɛ kan cɛ’n, Benaya i wa Pelatia wuli. Kpɛkun n utuli min ɲin ase, yɛ n kpannin kekle kpa n seli kɛ: “?Ee, min Min Zoova, wɔ mɔ a Sie Like Kwlakwla’n, á wá núnnún Izraɛlifuɛ nga be kali lɛ’n?”+
14 Zoova kannin ndɛ kleli min ekun, ɔ seli min kɛ: 15 “Sran wa, be nga be tran Zerizalɛmun’n be seli ɔ niaan mun, ɔ niaan’m be nun nga be ti ɔ ti kpɔfuɛ’n, ɔ nin Izraɛli i awlo’n nunfuɛ’m be kwlaa kɛ: ‘Nán amun fa amun wun mantan Zoova, mɛn’n ti e liɛ, be fa mannin e kɛ ɔ yo e liɛ.’ 16 I sɔ’n ti’n, se be kɛ: “Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘Kannzɛ bɔbɔ n fali be n ɔli nvlenvle mɔ be o mmua kpa’n be nun’n, yɛ n yoli maan be bo sanndili mɛnmɛn’m be nun’n,+ sanngɛ ń fá blɛ kan ń káci be sua mɛn nga be ɔli be nun’n be nun lɔ.’”+
17 “I sɔ’n ti’n, se be kɛ: ‘Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: “Ń má kó fá amun sran’m be afiɛn ń bá, yɛ mɛn nga n yoli maan amun bo sanndili be nun’n ń má kó fá amun lɔ ń bá, kpɛkun ń fá Izraɛli mɛn’n ń mán amun.+ 18 Bé wá sá be sin lɔ yɛ bé yí i nun ninnge kainkain mun ɔ nin tete sa mun.+ 19 Ń má yó maan be awlɛn’n trán like kunngba su,*+ yɛ ń fá akunndan uflɛ ń wlá be klun.+ Ń má yí be awlɛn m’ɔ ti kɛ yɔbuɛ sa’n be nun,+ yɛ ń mán be awlɛn kun m’ɔ ti wɛtɛɛ’n.*+ 20 I liɛ’n, bé nánti min mmla’m be su, kpɛkun bé fá ndɛ nga n kan’n su, yɛ be ɲin yí min. Ɔ maan bé káci min nvle, yɛ n kusu ń káci be Ɲanmiɛn.”’
21 “‘“Sanngɛ be nga be awlɛn te tran ninnge kainkain mun nin tete sa’m be su’n, ń má yó maan bé wún be ayeliɛ’n i su afɛ’n.” Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.’”
22 Ɔ maan seribɛn’m be mannin be ndɛwa’m be su nglo, kondokaa’m be o be wun koko lɛ.+ Yɛ Izraɛli Ɲanmiɛn’n i aɲrunɲan’n wo be ti su nglo.+ 23 I sin’n, Zoova i aɲrunɲan’n+ tuli i bo klɔ’n nun lɛ, kpɛkun ɔ ko trannin oka ng’ɔ o klɔ’n i wia afiliɛ lɔ lika’n nun’n i ti su nglo.+ 24 I sin’n, aolia nun like nga Ɲanmiɛn wawɛ’n maan n wunnin i’n nun’n, wawɛ kun mannin min su, ɔ fali min ɔli be nga be trali be ɔli Kalde mɛn’n nun lɔ’n be wun lɔ. Kpɛkun m’an wunman aolia nun like nga n wunnin i’n kun. 25 Ninnge kwlaa nga Zoova yili be nglo kleli min’n n kannin be ndɛ n kleli nvlefuɛ nga be trali be ɔli’n.