Ezekiɛli
7 Zoova kannin ndɛ kleli min ekun. Ɔ seli min kɛ: 2 “Sanngɛ sran wa, ndɛ nga Miɛn Zoova m’ɔ Sie Like Kwlakwla’n ɔ kan kle Izraɛli nvle’n yɛ: ‘W’a wie! Nvle’n i bue nnan’m be awieliɛ’n w’a ju. 3 Ɔ awieliɛ’n w’a ju. Ń má fá min ya’n i kwlaa ń gúa ɔ su. Ń má nían ɔ ayeliɛ’m be su ń dí ɔ jɔlɛ, ń má úsa ɔ tete sa kwlaa nga a yoli be’n be su sa. 4 N su siman ɔ aunnvɔɛ,* yɛ a su yoman min annvɔ.+ Afin ń má fá ɔ ayeliɛ’n i nuan like’n ń mán wɔ. Yɛ á wá wún tete sa nga a yoli be’n be su afɛ’n.+ Kpɛkun á wá sí jrɛiin kɛ n ti Zoova.’+
5 “Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘Amun nian! Ɲrɛnnɛn kun su ba, ɲrɛnnɛn kun m’ɔ ti i liɛ ngunmin’n su ba.+ 6 Awieliɛ’n su ba. Awieliɛ’n ɔ́ wá bá. Ɔ́ wá jáso* ɔ́ tɔ́ ɔ su. Nian! Ɔ su ba. 7 Wɔ mɔ a tran mɛn’n nun’n, ɔ liɛ w’a to wɔ.* Blɛ’n su ba, cɛn’n w’a mantan koko.+ Lika’n w’a sanngan, be kpanman aklunjɔɛ kpanlɛ kun oka’m be su.
8 “‘Ɔ cɛ kan’n, ń má fá min ya dan’n ń gúa ɔ su,+ ń má fá min ya’n i kwlaa ń gúa ɔ su.+ Ń má nían ɔ ayeliɛ’m be su ń dí ɔ jɔlɛ, ń má úsa ɔ tete sa kwlaa nga a yoli be’n be su sa. 9 N su siman ɔ aunnvɔɛ, yɛ a su yoman min annvɔ.+ Afin ń má fá ɔ ayeliɛ’n i nuan like’n ń mán wɔ. Yɛ á wá wún tete sa nga a yoli be’n be su afɛ’n. Kpɛkun á wá sí jrɛiin kɛ n bɔbɔ min Zoova yɛ n su tu ɔ fɔ-ɔ.+
10 “‘Nian, cɛn’n yɛ ɔ o yɛ! Nian, ɔ su ba!+ Ɔ liɛ w’a to wɔ.* Ɲantiaan’n w’a bo nɲrɛ, yɛ wun tulɛ’n w’a fɛfɛ. 11 Nzaje sa yolɛ’n w’a kaci klunwi yolɛ’n i ɲantiaan.+ Be bɔbɔ-o, be aɲanbeun ninnge mun-o, be sran kpanngban mun-o, be aɲrunɲan’n nin-o, be nun wie fi su kaman lɛ. 12 Blɛ’n ɔ́ wá jú, cɛn’n ɔ́ wá jú. Nán maan like tofuɛ’m be klun jɔ, yɛ nán maan like atɛ yofuɛ’m be wla bo. Afin m’an fa sran kpanngban sɔ’m be kwlaa be wun ya dan kpa.*+ 13 Asiɛ nga like atɛ yofuɛ’n yo i atɛ’n, kannzɛ bɔbɔ ɔ fite nun’n, ɔ su kwlá sɛmɛn i sin lɔ kun. Afin aolia nun like’n ti sran kpanngban sɔ’m be kwlaa be liɛ. Be nun wie fi su sɛmɛn i sin, yɛ be fɔnlɛ’n ti’n, be nun wie fi su kaman nguan nun.*
14 “‘B’a bo awɛ’n,+ yɛ be kwlaa b’a buabua be wun, sanngɛ sran fi kɔman alɛ kunlɛ. Afin m’an fa sran kpanngban sɔ’m be kwlaa be wun ya dan kpa.+ 15 Tokofi’n wo klɔ’n i sin lɔ,+ kpɛkun tukpacɛ m’ɔ sa ndɛndɛ’n nin awe’n be o klɔ’n nun. Be kwlaa nga be o blo lɔ’n bé fá tokofi bé kún be, yɛ awe’n nin tukpacɛ m’ɔ sa ndɛndɛ’n bé kún be nga be o klɔ’n nun lɔ’n.+ 16 Be nga bé ká lɛ, mɔ bé yó blɛblɛ bé fíte nun’n, bé kɔ́ oka’m be su lɔ. Kpɛkun kɛ be tinuntinun bé bú be fɔnlɛ’n i akunndan’n bé kplín kɛ kongo nun auble mun sa.+ 17 Be sa’m be kwlaa bé glɔ́glɔ́ be wun, yɛ nzue sónji be ja nannglunman’m be kwlaa be wun.*+ 18 Bé wlá bajɛ tralɛ,+ yɛ srɛ m’ɔ́ kún be’n ti’n, bé úsu sa tututu. Be kwlaa be ɲin wá gúa ase, yɛ be kwlaa be ti’n kpá.*+
19 “‘Bé wá gúa be sika’n i blo akpɔ’m be su. Yɛ be sika ɔkwlɛ’n yó be tɛ. Be sika nin be sika ɔkwlɛ’n be su kwlá deman be Zoova i ya cɛn dan’n nun.+ Awe kún be, yɛ be ku su yiman. Afin be* kacili kɛ like kun mɔ be ja kpla su’n sa, ɔ yoli maan be tɔli. 20 Be ninnge nglanman’m be ti’n be tu be wun, be fa be* yo tete nzɔliɛ ninnge mun, be fa be yo amuin mɔ be ti like kain’n.+ I sɔ’n ti’n, ń má yó maan be ɲin tú be su. 21 Ń fá be* ń wlá aofuɛ’m be sa nun naan be fa, ń fá mán asiɛ’n su klunwifuɛ mun naan be fa yo be liɛ, yɛ bé yó be finfin.
22 “‘Ń má yí min ɲin be su,+ kpɛkun bé yó min fiawlɛ’n* i fiɛn. Awiefuɛ’m bé wlú lɔ yɛ bé yó i fiɛn.+
23 “‘Yo jrɔkɔ kun,*+ afin be nga be buli be ndɛ kwlɛ’n be mmoja’n w’a yi nvle’n piɛ,+ yɛ nzaje sa yolɛ’n w’a yi klɔ’n.+ 24 Ń má fá nvlenvle’m be nun sran tɛtɛ kpa mun ń bá,+ kpɛkun bé fá be sua’m bé yó be liɛ.+ Ń má yó maan be mɔ be le wunmiɛn’n be wun tulɛ’n ɔ́ wíe, kpɛkun bé yó be sua mɔ be ti be liɛ ngunmin’n be finfin.+ 25 Kɛ awlabɔɛ wá tɔ́ be su’n bé wá kúnndɛ aunjɔɛ’n, sanngɛ be su ɲɛnmɛn i.+ 26 Kɛ ɲrɛnnɛn kun ko tɔ’n, uflɛ sú i su, yɛ kɛ be ko ti nganniɛn kun’n, uflɛ sú i su. Nvlefuɛ’m bé wá kúnndɛ kɛ Ɲanmiɛn nuan ijɔfuɛ’m be kan aolia nun sa’m be ndɛ kle be.+ Sanngɛ mmla’n* ɔ́ wíe Ɲanmiɛn ɲrun jranfuɛ’m be sa nun, yɛ afɔtuɛ’n ɔ́ wíe kpɛnngbɛn’m be sa nun.+ 27 Famiɛn’n ɔ́ trán sɛ nun,+ yɛ siefuɛ’n ɔ́ fá awlabɔɛ’n wlɛ́ i wun kɛ tralɛ sa. Kpɛkun nvle’n i nunfuɛ’m be sa’m bé úsu be wun, srɛ dan m’ɔ́ kún be’n ti. Be ayeliɛ’m be su yɛ ń nían ń yó be sa-ɔ. Wafa nga be dili sran’m be jɔlɛ’n i su yɛ ń nían ń dí be jɔlɛ-ɔ. Kpɛkun bé wá sí jrɛiin kɛ n ti Zoova.’”+