2 Be Ɲoliɛ

33 Kɛ Manase+ káci famiɛn’n, nn ɔ le afuɛ blu-nin-nɲɔn (12). Ɔ dili famiɛn afuɛ ablenun-nin-nnun (55) Zerizalɛmun lɔ.+

2 Ɔ yoli sa ng’ɔ ti tɛ Zoova ɲrun’n. I lɛ nun’n, nvle nga Zoova kannin be bo Izraɛlifuɛ’m be ɲrun’n be tete ninnge nga be yo’n, i wie yɛ ɔ yoli-ɔ.+ 3 Ɔ kplannin lika nglonglo nga i si Ezekiasi bubuli be’n be uflɛ.+ Ɔ takali tɛ yiwlɛ mun mannin Baali mun. Ɔ takali waka nga be sɔ be’n.* Kpɛkun ɔ kotoli ɲanmiɛn su lɔ sonja’m be kwlaa be bo, yɛ ɔ sɔli be.+ 4 Asa ekun’n, ɔ kplannin tɛ yiwlɛ mun Zoova i sua’n nun.+ Kusu nn Zoova kannin sua sɔ’n i ndɛ seli kɛ: “Zerizalɛmun wa yɛ min dunman’n trán tititi-ɔ.”+ 5 Ɔ kplannin tɛ yiwlɛ mun Zoova i sua’n i awlo klun nɲɔn’m be nun fa mannin ɲanmiɛn su lɔ sonja’m be kwlaa.+ 6 Ɔ yrɛli i bɔbɔ i klun ba mun sin’n nun*+ Inɔmun i Wa’n i Kongo’n* nun.+ Ɔ yili atrɛ,+ ɔ yili wunnzue, ɔ dili bae, kpɛkun ɔ sieli sran wie mun kɛ be nin be nga be wuli’n be ijɔ, yɛ ɔ sieli wie mun ekun naan be yi wunnzue.+ Ɔ yoli sa ng’ɔ ti tɛ Zoova ɲrun’n tratrali su naan ɔ́ fá fɔ́kɔ i awlɛn.

7 Ɔ yoli amuin kun, kpɛkun ɔ fa ko sieli i Ɲanmiɛn Kpli i sua’n nun lɔ.+ Kusu nn Ɲanmiɛn kannin sua sɔ’n i ndɛ kleli Davidi nin i wa Salomɔn be kɛ: “Ń fá min dunman’n ń síe i sua nga nun nin Zerizalɛmun klɔ mɔ n fɛli i Izraɛli akpasua’m be kwlaa be nun’n i nun tititi.+ 8 Sɛ Izraɛlifuɛ’m be yo like kwlaa nga n seli be kɛ be yo’n, sɛ be di Mmla’n kwlaa su’n, sɛ be nian afɔtuɛ, ɔ nin ndɛ fanunfanun nga n seli Moizi kɛ ɔ kan kle be’n be su nanti’n, n su yiman be ja’n asiɛ nga n fa mannin be nannan mun’n i su kun le.” 9 Manase fali Zidafuɛ mun nin Zerizalɛmunfuɛ mun sieli atin tɛ su. Ɔ yoli maan be yoli sa tɛ trali nvle nga Zoova nunnunnin be Izraɛlifuɛ’m be ɲrun’n be liɛ’n lelele.+

10 Zoova kannin ndɛ kleli Manase nin i sran mun lele. Sanngɛ b’a faman su.+ 11 I sɔ’n ti’n, Zoova maan Asiri famiɛn’n i sonja’m be su kpɛn’m be fali alɛ wlali be sin. Kpɛkun be fali ninnge wie mun kɛ kowa ba mun sa’n trali Manase,* be cili i nin aaba jrɔkɔ nɲɔn, yɛ be fɛ i ɔli Babilɔnin-ɔn. 12 Kɛ ɔ́ wún i ɲrun’n, ɔ kpatali Zoova m’ɔ ti i Ɲanmiɛn’n kɛ ɔ si i aunnvɔɛ. Ɔ kɛnnin i wun ase kpa liɛ su i nannan’m be Ɲanmiɛn’n i ɲrun. 13 Ɔ srɛli Ɲanmiɛn lele. Srɛlɛ ng’ɔ srɛli’n ti’n, ɔ yoli Ɲanmiɛn i annvɔ. Ɔ sieli i su tili kpatalɛ ng’ɔ kpɛtɛli i’n. Yɛ ɔ fɛ i sɛli i sin Zerizalɛmun lɔ, ɔ fɛ i trannin i famiɛn bia’n su ekun.+ I lɛ’n nun yɛ Manase wa wunnin i kɛ kannzu Zoova yɛ ɔ ti Ɲanmiɛn Kpli’n niɔn.+

14 I sin’n, ɔ kplannin talɛ kun ekun Davidi Klɔ’n+ i sin lɔ, Giɔn i wia atɔliɛ lɔ,+ kongo’n nun. Talɛ’n kɔ lele ju Jue Anuan’n nun lɔ.+ Kɛ ɔ fɛ i lɛ’n, ɔ bli lele ju Ofɛli.+ Ɔ kplɛnnin i nglonglo kpa liɛ su. Asa ekun’n, ɔ sieli sonja kpɛnngbɛn mun Zida klɔ nga be sisili be wun’n be kwlaa be su. 15 I sin’n, ɔ yili nvle nga be o be wun lɛ’n be amuin mun, ɔ nin amuin ng’ɔ o Zoova i sua’n nun’n.+ Ɔ yili tɛ yiwlɛ kwlaa ng’ɔ kplannin be oka nga i su yɛ Zoova i sua’n wo’n su,+ ɔ nin tɛ yiwlɛ nga be o Zerizalɛmun lɛ’n. Kpɛkun ɔ seli kɛ be ko gua be blo klɔ’n i sin lɔ. 16 Asa ekun’n, ɔ siesieli Zoova i tɛ yiwlɛ’n i ye.+ Kpɛkun ɔ wa yili bo kun yolɛ tɛ mun+ nin tɛ uflɛ wie mun fa lɛli i ase+ tɛ yiwlɛ sɔ’n su. Yɛ ɔ seli Zidafuɛ’m be kɛ be su Zoova m’ɔ ti Izraɛli Ɲanmiɛn’n. 17 Ɔ nin i sɔ ngba’n, sran’m b’a yaciman lika nglonglo’m be su tɛ yilɛ. Sanngɛ Zoova m’ɔ ti be Ɲanmiɛn’n cɛ yɛ be yili tɛ sɔ mun mɛnnin i-ɔ.

18 Manase i su ndɛ’n i onga’n, nin srɛlɛ ng’ɔ srɛli i Ɲanmiɛn’n, ɔ nin jeliwafuɛ nga be kannin ndɛ kleli i Zoova m’ɔ ti Izraɛli Ɲanmiɛn’n i dunman nun’n be ndɛ’n, i kwlakwla ti klɛwa Izraɛli famiɛn’m be fluwa’n nun. 19 Asa ekun’n, srɛlɛ ng’ɔ srɛli Ɲanmiɛn’n,+ nin wafa nga Ɲanmiɛn tɛli i su’n, nin sa tɛ ng’ɔ yoli be’n, nin wafa ng’ɔ kacili i sin sili Ɲanmiɛn’n,+ nin kan ɔ kplannin lika nglonglo mun lɛ’n, nin lika ng’ɔ kplannin waka nga be sɔ be’n*+ ɔ nin amuin ng’ɔ sɛli be kwlaa naan w’a kɛn i wun ase’n, i kwlakwla ti klɛwa i jeliwafuɛ’m be ndɛ’n nun. 20 Manase wa wuli,* be sieli i i awlo lɛ. Yɛ i wa Amɔn sinnin i osu kacili famiɛn-ɔn.+

21 Kɛ Amɔn+ káci famiɛn’n, nn ɔ le afuɛ ablaɔn-nin-nɲɔn (22). Ɔ dili famiɛn afuɛ nɲɔn Zerizalɛmun lɔ.+ 22 Amɔn yoli sa ng’ɔ ti tɛ Zoova ɲrun’n titi, kɛ i si Manase fa yoli’n sa.+ Yɛ ɔ yili tɛ mun mannin amuin kwlaa nga i si Manase yoli be’n,+ kpɛkun ɔ sɔli be lele. 23 Sanngɛ Amɔn w’a kɛnmɛn i wun ase Zoova ɲrun+ kɛ nga i si Manase fa kɛnnin i wun ase’n sa.+ I sa tɛ ng’ɔ yoli’n, ɔ tra ngba. 24 Kasiɛn su’n, i sufuɛ’m be cicili i wun ndɛ,+ kpɛkun be kunnin i i bɔbɔ i sua’n nun lɔ. 25 Sanngɛ nvle’n nunfuɛ’m be kunnin be kwlaa nga be cicili Famiɛn Amɔn i wun ndɛ’n.+ Kpɛkun be sieli i wa Zoziasi+ famiɛn i osu.