2 Be Ɲoliɛ

35 Zoziasi dili Delɛ Cɛn’n+ Zerizalɛmun lɔ Zoova dunman nun. Anglo klikli’n i cɛn ba blu-nin-nnan (14) su’n,+ be kunnin nnɛn nga bé fá dí Delɛ Cɛn’n.+ 2 Ɔ fali Ɲanmiɛn ɲrun jranfuɛ mun sieli be junman’m be su. Kpɛkun ɔ wlali be fanngan kɛ Zoova i sua’n nun lɔ junman nga be fa wlali be sa nun’n, be nian nun be di.+ 3 I sin’n, ɔ seli Izraɛli nvle wunmuan’n nun Levifuɛ mɔ be ti like klefuɛ+ mɔ be ti Zoova liɛ klonglo’n be kɛ: “Amun fa Ɲanmiɛn i Alaka’n sie i sua nga Davidi i wa Salomɔn m’ɔ yoli Izraɛli famiɛn’n kplannin’n nun.+ Nán amun suɛ i amun wati su kun.+ Amun di junman man Zoova m’ɔ ti amun Ɲanmiɛn’n nin Izraɛlifuɛ mɔ be ti i sran’n. 4 Amun nian osu nin akpasua nga i nun yɛ amun fin’n be su naan amun siesie amun wun, kɛ nga Davidi+ m’ɔ ti Izraɛli Famiɛn’n nin i wa Salomɔn be fa klɛli’n sa.+ 5 Amun jran lika m’ɔ ti Ɲanmiɛn liɛ klonglo’n nun, amun nian nvle’n nunfuɛ onga mɔ be ti amun niaan’n be akpasuaakpasua’m be su naan amun kusu amun bubu amun wun nun. Yɛ maan be akpasua kun yo Levifuɛ’m be si i awlobo’m be nun akpasua kun liɛ. 6 Amun kun nnɛn nga bé fá dí Delɛ Cɛn’n.+ Amun yo amun wun sanwun, yɛ amun siesie ninnge mun man amun niaan mun naan amun di ndɛ nga Zoova kan kleli Moizi’n su.”

7 Zoziasi fali nnɛn kpanngban mannin nvle’n nunfuɛ kwlaa nga be bali’n naan be fa yi Delɛ Cɛn i tɛ’n. Bua ba yasua nin boli ba yasua ng’ɔ mannin’n, i kwlaa ti akpiakpi ablasan (30.000). Asa ekun’n, ɔ mannin nannin akpi nsan (3.000). Famiɛn’n bɔbɔ i nnɛn mun yɛ ɔ fa mannin-ɔn.+ 8 I nvle’n nun sran dandan’m be kusu be klun klo su be mannin Ɲanmiɛn ɲrun jranfuɛ mun nin Levifuɛ mun nin sran onga’m be nnɛn. Ilkia+ nin Zakari nin Zeiɛli mɔ be ti Ɲanmiɛn Kpli i sua’n i su kpɛn’n, be mannin Ɲanmiɛn ɲrun jranfuɛ’m be nnɛn akpi nɲɔn ya nsiɛn (2.600) naan be fa yi Delɛ Cɛn i tɛ’n, ɔ nin nannin ya nsan (300). 9 Konania nin Semaia nin Netanɛli mɔ be ti i niaan mun’n, ɔ nin Asabia nin Zeiɛli ɔ nin Zozabadi mɔ be ti Levifuɛ’m be su kpɛn’n, be mannin Levifuɛ’m be nnɛn akpi nnun (5.000) naan be fa yi Delɛ Cɛn i tɛ’n, ɔ nin nannin ya nnun (500).

10 Kɛ be wieli be junman’n i siesie’n, Ɲanmiɛn ɲrun jranfuɛ’m be ko jrannin be junman diwlɛ’m be nun sɛsɛsɛ. Yɛ Levifuɛ’m be jranjrannin akpasuaakpasua,+ kɛ nga famiɛn’n fa kannin’n sa. 11 Be kunnin nnɛn nga be fa be yi Delɛ Cɛn i tɛ’n.+ Kpɛkun Ɲanmiɛn ɲrun jranfuɛ’m be fali nnɛn’m be mmoja nga Levifuɛ’m be fa mannin be’n fa guɛguɛli i tɛ yiwlɛ’n i wun.+ Kɛ ɔ́ yó sɔ’n, nn Levifuɛ’m bé yí nnɛn’m be wun kplo’n.+ 12 I sin’n, nnɛn nga bé fá yí tɛ nga kɛ bé yí’n be yra nnɛn’n i kɔlikɔli’n, be siesieli be naan bé fá cɛ́cɛ́ nvle’n nunfuɛ nga be yiali lɛ akpasuaakpasua’n. I liɛ’n, be kwla fa sie i Zoova ɲrun kɛ nga be klɛli i Moizi fluwa’n nun sa. Kɛ be yoli nannin’m be sɔ wie-ɔ. 13 Nnɛn nga be kunnin be Delɛ Cɛn’n nun’n, be tɔnnin* be sin’n su kɛ nga be kleli be’n sa.+ Yɛ nnɛn nga be fa yili tɛ mannin Ɲanmiɛn’n, be tɔnnin be sɛ, nin kasrɔ nin puali’m be nun. Kpɛkun be fa ko mannin nvle’n nunfuɛ mun ndɛndɛ. 14 I sin’n, be tɔnnin be Delɛ Cɛn aliɛ liɛ’n, ɔ nin Ɲanmiɛn ɲrun jranfuɛ’m be liɛ’n. Afin Ɲanmiɛn ɲrun jranfuɛ mɔ be ti Aarɔn i osu’n nunfuɛ’n, be yili tɛ nga kɛ bé yí’n be yra nnɛn’n i kɔlikɔli’n, yɛ be fali nnɛn’m be luilui’n mannin Ɲanmiɛn lele lika’n fa sannin be. I sɔ’n ti’n, Levifuɛ’m be tɔnnin be bɔbɔ be aliɛ liɛ’n, ɔ nin Ɲanmiɛn ɲrun jranfuɛ mɔ be ti Aarɔn i osu’n nunfuɛ’n be liɛ’n.

15 Yɛ Azafu i mma mun mɔ be ti jue tofuɛ’n,+ be kali be jranwlɛ nun kɛ nga Davidi,+ nin Azafu,+ nin Eman, nin Zeditɛn+ m’ɔ ti famiɛn’n i sran ngʼɔ wun aolia nun sa munʼn be fa kleli’n sa. Anuan sunianfuɛ’m be kusu be jranjrannin anuan’m be nun sɛsɛsɛ.+ Ɔ nunman nun kɛ be yaci be junman’n lɛ. Afin be niaan Levifuɛ’m be tɔnnin Delɛ Cɛn aliɛ’n mannin be. 16 Ninnge kwlakwla nga Zoova waan be fa di Delɛ Cɛn’n+ nin nga be fa yi tɛ nga kɛ bé yí’n be yra nnɛn’n i kɔlikɔli Zoova i tɛ yiwlɛ’n su’n, be yiali be nuan. I sɔ yɛ Famiɛn Zoziasi seli be kɛ be yo-ɔ.+

17 Izraɛlifuɛ nga be bali’n, be dili Delɛ Cɛn’n blɛ sɔ’n nun. Kpɛkun be fali cɛn ba nso be dili Kpanwun mɔ Levii Nunman nun’n i ti Cɛn’n.+ 18 Kɛ ɔ fɛ i Ɲanmiɛn nuan ijɔfuɛ Samiɛli i blɛ su’n, be nin-a diman Delɛ Cɛn’n i kɛ ngalɛ’n sa le Izraɛli nvle’n nun. Yɛ Izraɛli famiɛn uflɛ fi w’a diman Delɛ Cɛn’n i kɛ nga Zoziasi+ nin Levifuɛ mun, nin Ɲanmiɛn ɲrun jranfuɛ’m be kwlaa, nin Izraɛlifuɛ mun, nin Zerizalɛmunfuɛ’m be fa dili’n sa. 19 Kɛ Zoziasi yoli famiɛn’n, i afuɛ blu-nin-mɔcuɛ (18) su yɛ be dili Delɛ Cɛn sɔ’n niɔn.

20 Kɛ i kwlaa sɔ’n wieli’n mɔ Zoziasi siesieli Ɲanmiɛn sua’n, Neko+ m’ɔ ti Ezipti famiɛn’n bali Efrati i nuan lɛ klɔ nga be flɛ i kɛ Kaakemisi’n su lɛ naan ɔ́ kún alɛ. Zoziasi kusu ɔli naan ɔ nin i bé kún.+ 21 I ti’n, Neko sunmannin sran naan be ko se Zoziasi kɛ: “?Zida famiɛn, ɔ ndɛ o ndɛ nga nun sɛ? M’an baman kɛ e nin wɔ é kún andɛ. Sanngɛ nvle uflɛ nunfuɛ mun yɛ e nin be e su ko kun-ɔn. Yɛ Ɲanmiɛn waan n kan min wun. Ɔ maan ɔ bɔbɔ ɔ liɛ ti’n, nán tanndan Ɲanmiɛn m’ɔ nin min o nun’n, i ɲrun. Sɛ a yo sɔ’n, ɔ́ kún ɔ.” 22 Sanngɛ Zoziasi w’a yaciman bian’n i diin. Ɔ wlɛwlɛli i wun wafa kun naan b’a wunmɛn i wlɛ+ kpɛkun ɔ ɔli naan ɔ nin i bé kó kún. W’a faman Neko i ndɛ’n su, kusu nn ndɛ sɔ’n fin Ɲanmiɛn. Ɔ maan ɔ ɔli Megido Lika Kpɛtɛkplɛɛ’n+ nun naan ɔ nin i bé kún.

23 Ta tofuɛ’m be toli Famiɛn Zoziasi i wun ta. Yɛ famiɛn’n seli i sufuɛ’m be kɛ: “Amun fa min jaso wa, afin b’a yo min like yaya kpa.” 24 I sɔ’n ti’n, Zoziasi i sufuɛ’m be fɛli i kakaklolo’n nun jrali. Kpɛkun be fɛ i fuli i alɛ kunlɛ kakaklolo nɲɔn su’n nun naan b’a fɛ i b’a ɔ Zerizalɛmun. Ɔ wa wuli yɛ be sieli i i nannan’m be asieliɛ’n nun.+ Zidafuɛ mun nin Zerizalɛmunfuɛ’m be kwlaa be sunnin i. 25 Zeremin+ toli Zoziasi i ti jue. Yɛ kɛ jue tofuɛ yasua nin bla’m+ be kwlaa bé yí ngwlɛ’n, be bo Zoziasi i dunman. Andɛ nin andɛ’n be te yo i sɔ. Kpɛkun be wa fali ajalɛ kɛ be to jue sɔ mun Izraɛli mɛn’n nun. Jue sɔ’m be o ngwlɛ yilɛ’m be nun wie.

26 Zoziasi i su ndɛ’n i onga’n nin sa ng’ɔ yoli be m’ɔ kle kɛ ɔ klo Ɲanmiɛn’n, m’ɔ fali ndɛ nga be klɛli i Zoova i Mmla’n nun’n su’n, 27 nin ninnge ng’ɔ yoli be’n, kɛ ɔ fɛ i i bo bolɛ’n nun lele m’ɔ́ fá wíe’n, i kwlakwla ti klɛwa Izraɛli Famiɛn mun nin Zida Famiɛn’m be Fluwa’n nun.+