2 Be Ɲoliɛ

9 Saba famiɛn bla’n+ tili Salomɔn i su ndɛ. Ɔ maan ɔ bali Zerizalɛmun naan ɔ́ úsɛ i kosan kekleekle wie mun ɔ́ fá kpɛ́ i ngwlɛlɛ’n i bo. Ɔ nin sran kpanngban kpa yɛ be bali-ɔ. Ɲɔnngɔnmin ng’ɔ fa be bali’n be suali bomie ngo, ɔ nin sika ɔkwlɛ kpanngban kpa,+ nin yɔbuɛ kpakpa wie mun. Ɔ wa wunnin Salomɔn wun, kpɛkun sa kwlaa nga be ti i cinnjin’n, ɔ koko kleli i.+ 2 Salomɔn tɛli i kosan’m be kwlaa be su, ɔ leman ndɛ kun sa mɔ i kekle’n* ti’n, Salomɔn w’a kwlá yiyiman nun w’a klemɛn i-ɔ.

3 Kɛ Saba famiɛn bla’n wunnin Salomɔn i ngwlɛlɛ’n,+ nin sua ng’ɔ kplannin’n,+ 4 nin aliɛ nga be fa sie i tabli’n su’n,+ nin wafa nga i sufuɛ’m be trantran’n, nin wafa nga i junman difuɛ’m be fa ninnge mun siesie i tabli’n su’n, nin be wun wlawlalɛ’n, nin i nzan sufuɛ mun nin be wun wlawlalɛ’n, ɔ nin tɛ nga kɛ bé yí’n be yra nnɛn’n i kɔlikɔli’n m’ɔ yi i titi Zoova i sua’n nun’n,+ i nuan boli i wun dan tratrali su.* 5 Ɔ maan ɔ seli famiɛn’n kɛ: “Ninnge nga a yoli be’n* nin ɔ ngwlɛlɛ’n be su ndɛ nga n tili i min mɛn’n nun lɔ’n, ɔ ti nanwlɛ. 6 Sanngɛ m’an lafiman ndɛ nga be kan kleli min’n su lele naan m’an ba, naan min bɔbɔ min ɲinma’n w’a wun i.+ Nanwlɛ, sɛ be bu ngwlɛlɛ dan nga a si i’n i nun nɲɔn’n, nga be kɛnnin i ndɛ kleli min’n ɔ juman bue kun bɔbɔ.+ Wafa nga a fa ti’n, ɔ tra nga n tili’n fatifati.+ 7 Ɔ sran mun, nin ɔ sufuɛ nga be jran ɔ ɲrun titi mɔ be ti ɔ ngwlɛlɛ ndɛ mun’n, be liɛ su ti ye-o! 8 Maan be manman ɔ Ɲanmiɛn Zoova mɔ i klun jɔli ɔ wun m’ɔ fali wɔ sieli i famiɛn bia’n su naan a di famiɛn ɔ Ɲanmiɛn Zoova i dunman nun’n. Kɛ mɔ ɔ Ɲanmiɛn’n klo Izraɛli ti’n,+ ɔ fa wɔ sieli Izraɛlifuɛ’m be su naan a di be jɔlɛ mun klanman naan be yo sa i nuan su sɛsɛ. I liɛ’n, Izraɛli nvle’n ká lɛ tititi.”

9 I sin’n, ɔ mannin famiɛn’n i sika ɔkwlɛ talan ya kun ablaɔn (120)*+ nin bomie ngo kpanngban kpa, ɔ nin yɔbuɛ kpakpa wie mun. Kɛ ɔ fin lɛ’n, b’a faman bomie ngo kpanngban kɛ nga Saba famiɛn bla’n fa blɛli Famiɛn Salomɔn’n sa b’a baman kun.+

10 Asa ekun’n, Iramun i sufuɛ mun nin Salomɔn i sufuɛ nga be kɔ Ofii be ko fa sika ɔkwlɛ’n,+ be fa waka nga be flɛ i algumimun’n* nin yɔbuɛ kpakpa wie mun ba wie.+ 11 Famiɛn’n fali algumimun waka yoli Zoova i sua’n nin famiɛn sua’n+ be nun asikalie mun.+ Asa ekun’n, ɔ fali wie yoli jru nin miziki bolɛ ninnge nga be le ɲanman’n fa mannin jue tofuɛ mun.+ Be nin-a wunman waka kɛ ngalɛ’n sa le Zida mɛn’n nun.

12 Ninnge kwlaa nga Saba famiɛn bla’n klo i’n ɔ nin ng’ɔ srɛli’n, famiɛn Salomɔn fa mɛnnin i. Ninnge sɔ’m be sɔnnin tra bla’n i liɛ ng’ɔ fa blɛli famiɛn’n.* I sin’n, bla’n nin i sufuɛ’m be sali be sin i mɛn’n nun lɔ.+

13 Sika ɔkwlɛ nga be fa blɛ Salomɔn afuɛ kwlakwla’n ti talan ya nsiɛn ablesiɛn-nin-nsiɛn (666),+ 14 Asa ekun’n, ninnge atɛ yofuɛ mun nin aata difuɛ mun nin Arabu famiɛn’m be kwlaa ɔ nin mɛn sɔ’n nun famiɛn’n i janunfuɛ’m be blɛ Salomɔn i sika ɔkwlɛ nin sika.+

15 Famiɛn Salomɔn fali sika ɔkwlɛ mɔ be sɛnngɛnnin i nin like uflɛ’n fa yoli ɲrɛn dandan ya nɲɔn (200)+ (kɛ bé yó ɲrɛn kun’n, be fa sika ɔkwlɛ mɔ be sɛnngɛnnin i nin like uflɛ’n sikli ya nsiɛn (600)*).+ 16 Ɔ fali sika ɔkwlɛ mɔ be sɛnngɛnnin i nin like uflɛ’n fa yoli ɲrɛn kanngan* ya nsan (300) (kɛ bé yó ɲrɛn kaan kun’n, be fa sika ɔkwlɛ minin* nsan). I sin’n, ɔ fa be sieli i Liban Bo Sua’n nun lɔ.+

17 Asa ekun’n, famiɛn’n fali sui je yoli famiɛn bia dan kun. Kpɛkun ɔ fali sika ɔkwlɛ jrɛiin kɛtɛli i wun.+ 18 Be ja takatakawlɛ nga be fa fu asikalie’n su naan b’a to famiɛn bia’n, be ti nsiɛn. Bia sɔ’n le be ja takatakawlɛ kun, sika ɔkwlɛ yɛ be fa yoli-ɔ. Yɛ ɔ nin famiɛn bia’n be sa su kunngba. Be sa siewlɛ o bia’n i bue nɲɔn’m be su. Yɛ asɔmɔli nɲɔn+ be o be sa siewlɛ sɔ’m be wun lɛ. 19 Ɔ yoli asɔmɔli blu-nin-nɲɔn (12)+ be ja takatakawlɛ nsiɛn nga be fa fu asikalie’n su’n, be su. Be ja takawlɛ kun su’n, asɔmɔli kun o i tiwa kun su, yɛ kun ekun o i tiwa kun su. Be nin-a yomɛn i sɔ like’n le nvle uflɛ nun. 20 Sika ɔkwlɛ yɛ be fa yoli Famiɛn Salomɔn i klowa ng’ɔ nɔn be nun’n be kwlaa-ɔ. Liban Bo Sua’n i nun ninnge’m be kwlaa be ti sika ɔkwlɛ jrɛiin, b’a faman sika b’a yiman like wie fi. Afin Salomɔn blɛ su’n be buman sika’n i like.+ 21 Afin famiɛn’n i mmeli’m be kɔ Taasisi.+ Iramun i sufuɛ mun+ yɛ be fa kɔ-ɔ. Afuɛ nsan kwlaa’n, kɛ mmeli nga be fin Taasisi’n bé bá’n, sika ɔkwlɛ, nin sika, nin sui je,+ nin ndo, ɔ nin anunman nga be flɛ i pan’n be yi be piɛ.

22 Famiɛn Salomɔn i aɲanbeun’n nin i ngwlɛlɛ’n trali asiɛ’n su famiɛn’m be kwlaa be liɛ’n.+ 23 Asiɛ wunmuan’n su famiɛn’m be kunndɛli kɛ bé wún Salomɔn i wun* naan bé tíe i ngwlɛlɛ ndɛ nga Ɲanmiɛn Kpli fa wlɛli i ti nun’n.+ 24 Be tinuntinun be blɛ i like: Sika nin sika ɔkwlɛ ninnge mun, ɔ nin tralɛ mun,+ nin alɛ kunlɛ ninnge mun, nin bomie ngo, nin nnɛn kpanngɔ, ɔ nin milɛ. Afuɛ kwlaa’n, kɛ be yo sɔ-ɔ. 25 Sua ba nga Salomɔn i nnɛn kpanngɔ’m be la nun’n be ti akpi nnan (4.000). Yɛ ɔ le kakaklolo mun, nin nnɛn kpanngɔ* akpiakpi blu-nin-nɲɔn (12.000).+ Ɔ sieli wie mun kakaklolo klɔ’m be su. Yɛ ɔ sieli wie mun i bɔbɔ i wun lɛ, Zerizalɛmun lɛ.+ 26 Salomɔn sieli famiɛn nga be o Nzue’n* i nuan lɛ’n, lele fa ju Filistifuɛ’m be mɛn’n nun ɔ nin Ezipti mɛn’n i tiwa su lɔ.+ 27 Famiɛn’n yoli maan sika’n wa truli Zerizalɛmun lɔ kɛ yɔbuɛ sa. Kpɛkun sɛdri waka’m be wa truli lika’n nun kɛ Sefela’n nun lɔ sikomɔɔ waka mun sa.+ 28 Be ko fa nnɛn kpanngɔ mun Ezipti lɔ+ nin nvle onga’m be kwlaa be nun be blɛ Salomɔn.

29 Salomɔn i su ndɛ’n i onga’n,+ kɛ ɔ fɛ i i bo bolɛ’n nun lele m’ɔ́ fá jú i agualiɛ’n, ɔ o ndɛ nga Ɲanmiɛn nuan ijɔfuɛ Natan+ klɛli’n, nin Ɲanmiɛn nuan ndɛ nga Aia+ m’ɔ fin Silo’n klɛli’n, nin Nebati i wa Zeroboamun+ i su ndɛ nga Ido+ m’ɔ wun aolia nun sa munʼn ɔ wunnin i aolia nun m’ɔ klɛli’n, be nun. 30 Salomɔn yoli Izraɛlifuɛ’m be kwlaa be su famiɛn Zerizalɛmun lɔ afuɛ ablanan (40). 31 I sin’n, Salomɔn wuli.* Kpɛkun be sieli i i si Davidi Klɔ’n su lɔ.+ Yɛ i wa Roboamun sinnin i osu yoli famiɛn-ɔn.+