Zozie

7 Sanngɛ ninnge ng’ɔ fata kɛ be nunnun be’n i su ndɛ nga Ɲanmiɛn kannin’n, Izraɛlifuɛ’m b’a diman su. Afin Akan+ m’ɔ ti Kaamin i wa’n, mɔ i kusu ti Zabdi i wa’n, mɔ i kusu ti Zera i wa’n, m’ɔ fin Zida akpasua’n su’n, ɔ fali ninnge ng’ɔ fata kɛ be nunnun be’n be nun wie mun.+ I sɔ’n ti’n, Zoova fali ya dan kpa Izraɛlifuɛ’m be wun.+

2 Zozie sunmannin yasua wie mun Zeriko lɛ kɛ be wɔ Ai+ m’ɔ mantan Bɛti-Avɛnin’n, m’ɔ o Betɛli+ i wia afiliɛ lɔ’n. Ɔ seli be kɛ: “Amun wɔ naan amun ko kpla mɛn’n be nian.” Ɔ maan be ɔli be ko kplali Ai klɔ’n be niannin. 3 Kɛ be sali be sin Zozie wun lɔ’n, be seli i kɛ: “Nán sran’m be kwlaa be wɔ. Yasua kɔe akpi nɲɔn (2.000) annzɛ akpi nsan (3.000) be kwla fa Ai klɔ’n. Nán fa nvlefuɛ’m be kwlaa kɔ naan kle be yalɛ ngbɛn, afin lɔfuɛ’m b’a sɔnman.”

4 Ɔ maan yasua kɔe akpi nsan (3.000) be ɔli, sanngɛ be wanndili Ai yasua’m be ɲrun.+ 5 Ai yasua’m be kunnin be nun sran ablasan-nin-nsiɛn (36), be fuannin be klɔ’n i anuan’n nun lɛ lele fa juli Sebarimun,* yɛ kɛ be juli ndroliɛ’n nun lɔ’n, be kunnin wie mun ekun. Nvlefuɛ’m be sa sin bubuli be dan.*

6 I sɔ’n ti’n, Zozie titili i wun tralɛ’m be nun, ɔ utuli i ɲin ase Zoova i Alaka’n i ɲrun lɛ lele nnɔsua, ɔ nin Izraɛli kpɛnngbɛn mun, be fali ndutre guali be ti’n su. 7 Zozie seli kɛ: “?Ee, min Min Zoova, wɔ mɔ a Sie Like Kwlakwla’n, ngue ti yɛ a fali nvlefuɛ nga mun kpɛli Zurdɛn’n naan á fá be wlá Amɔɔfuɛ’m be sa nun naan be nunnun be-ɔ? Sɛ ɔ ti kɛ e kali Zurdɛn’n i bue kun lɔ’n,* nn ɔ flunman! 8 Ee, Zoova, yaci cɛ min. ?Kɛ nga Izraɛlifuɛ’m b’a wanndi* be kpɔfuɛ’m be ɲrun yɛ’n, ń sé sɛ ekun? 9 Kɛ Kanaanfuɛ mun nin be kwlaa nga be tran mɛn’n nun’n bé wá tí ndɛ sɔ’n, bé bó sín yía e yɛ bé núnnún e dunman’n asiɛ’n su. ?Ngue yɛ á yó naan ɔ dunman dan’n w’a fu-ɔ?”+

10 Zoova tɛli Zozie su kɛ: “Jaso! ?Ngue ti yɛ a utu ɔ ɲin ase-ɔ? 11 Izraɛlifuɛ’m be yoli sa tɛ. Min aenguɛ+ nga n seli be kɛ be di su’n, b’a diman su. Be fali ninnge ng’ɔ fata kɛ be nunnun be’n be+ nun wie mun, be wuali,+ kpɛkun be fa fiali be ninnge’m be nun.+ 12 I sɔ’n ti’n, Izraɛlifuɛ’m be su kwlá jranman be kpɔfuɛ’m be ɲrun. Bé káci be sin kpɛkun bé wánndi be kpɔfuɛ’m be ɲrun, afin b’a kaci like kun m’ɔ fata kɛ be nunnun i-ɔ. Sɛ amun a yiman like ng’ɔ fata kɛ be nunnun i’n amun afiɛn’n,+ n su jranman amun sin kun. 13 Jaso naan yo nvlefuɛ’m be sanwun!+ Se be kɛ: ‘Amun yo amun wun sanwun ainman liɛ ti, afin ndɛ nga Zoova m’ɔ ti Izraɛli Ɲanmiɛn’n kan’n yɛ: “Ee, Izraɛli, like ng’ɔ fata kɛ be nunnun i’n wo amun afiɛn. Amun su kwlá jranman amun kpɔfuɛ’m be ɲrun kun, saan amun a yi like ng’ɔ fata kɛ be nunnun i’n amun afiɛn. 14 Ainman nglɛmun’n, maan amun akpasuaakpasua’m be bla kunngunngun. Akpasua nga Zoova kle’n,+ maan i nun osuosu’m be bla kunngunngun. Osu nga Zoova kle’n, maan i nun awlobo’m be bla kunngunngun. Awlobo nga Zoova kle’n, maan i nun yasua’m be bla kunngunngun. 15 Sran nga be wun like ng’ɔ fata kɛ be nunnun i’n i sa nun’n, bé fá sin bé wɔ́ i nun,+ ɔ nin i ninnge’m be kwlaa. Afin w’a diman Zoova i aenguɛ’n+ su, ɔ yoli tete sa Izraɛli mɛn’n nun.”’”

16 Ɔ maan kɛ i aliɛ cɛnnin’n Zozie jasoli nglɛmun ndɛ kpa, ɔ yoli maan Izraɛlifuɛ’m be bali akpasuaakpasua, kpɛkun be kleli Zida akpasua’n. 17 Ɔ yoli maan Zida akpasua’n i nun osuosu’m be bali, kpɛkun be kleli Zerafuɛ’m be osu’n.+ I sin’n, Zerafuɛ’m be osu’n bali. Yasua’m be bali kunngunngun, yɛ be kleli Zabdi. 18 Kasiɛn su’n Zabdi i awlofuɛ’m be bali. Yasua’m be bali kunngunngun, kpɛkun be kleli+ Akan m’ɔ ti Kaamin i wa’n, mɔ i kusu ti Zabdi i wa’n, mɔ i kusu ti Zera i wa’n, m’ɔ fin Zida akpasua’n su’n. 19 I sin’n, Zozie seli Akan kɛ: “Min wa, yaci, manman Zoova m’ɔ ti Izraɛli i Ɲanmiɛn’n, di sa nga a yoli’n i nanwlɛ kle i. Yaci, kan sa nga a yoli’n kle min. Nán fia su.”

20 Akan tɛli Zozie su kɛ: “Nanwlɛ, min yɛ n fɔnnin Zoova m’ɔ ti Izraɛli Ɲanmiɛn’n i wun-ɔn, sa nga n yoli’n yɛ. 21 Kɛ n wunnin ninnge nga e ɲannin be’n be nun tralɛ klanman kpa kun m’ɔ fin Sinea’n,+ ɔ nin sika sikli ya nɲɔn’n (200),* ɔ nin sika ɔkwlɛ kpɔlɛ kun mɔ i nɔnnin’n ju sikli ablenun’n (50), min konvi sɔli be, ɔ maan n fali be. N fali be n fiali kunman kun nun min tannin sua’n nun lɔ, sika’n wo i bo lɔ.”

22 Be ja nun lɛ’n, Zozie sunmannin sran wie mun, be wanndi ɔli tannin sua’n nun lɔ, tralɛ’n fiɛ i tannin sua’n nun lɔ, yɛ sika’n wo i bo. 23 Be fali ninnge mun tannin sua’n nun fiteli, kpɛkun be fa be blɛli Zozie nin Izraɛlifuɛ’m be kwlaa, yɛ be fa be sieli Zoova ɲrun. 24 Zozie nin Izraɛlifuɛ’m be kwlaa be fali Akan+ m’ɔ ti Zera i wa’n, ɔ nin sika’n, nin tralɛ’n, nin sika ɔkwlɛ kpɔlɛ’n,+ ɔ nin i mma yasua mun nin i mma bla mun, nin i nannin tola’n nin i aflunmun’n, ɔ nin i bua nin i boli mun, nin i tannin sua’n, ɔ nin i ninnge’m be kwlaa, kpɛkun be fa be ɔli Akɔɔ Kongo’n+ nun lɔ. 25 Zozie seli kɛ: “?Ngue ti yɛ a fali ɲrɛnnɛn* yili e su-ɔ?+ Zoova wá fá ɲrɛnnɛn yí ɔ su andɛ.” Kɛ ɔ yoli sɔ’n, Izraɛlifuɛ’m be kwlaa be finfinnin be yɔbuɛ,+ i sin’n be fali sin wɔli be nun.+ Ɔ maan be finfinnin be kwlaa be yɔbuɛ. 26 I sin’n, be fali yɔbuɛ kpanngban kpa guɛli i su, lele nin andɛ’n yɔbuɛ kwle sɔ’n wo lɛ. Kɛ ɔ yoli sɔ’n, Zoova i ya dan’n kannin ase.+ I sɔ’n ti’n, lele nin andɛ’n be flɛ lika sɔ’n kɛ Akɔɔ* Kongo.