Sa nga Akoto’m be yoli’n

22 “Nja mun, aniaan mun, min si mun, amun sie amun su tie ndɛ nga ń má kán’n.”+ 2 Kɛ be tili i kɛ ɔ su kan ndɛ kle be Ebre nun’n, be guali bliin. Yɛ ɔ seli kɛ: 3 “N ti Zifu.+ Be wuli min Tasi m’ɔ o Silisi mɛn’n nun lɔ’n su.+ Sanngɛ klɔ nga su wa yɛ n dili suklu-ɔ. Sran ng’ɔ kleli min like’n yɛle Gamaliɛli.+ Ɔ kleli min kɛ n fa Mmla nga e nannan’m be fali su laa’n i kwlaa su.+ Yɛ n dili Ɲanmiɛn i junman’n juejue su kpa, kɛ nga amun kwlaa amun yo i andɛ’n sa.+ 4 N kleli be nga be fa Atin sɔ’n su’n be yalɛ lele be nun wie’m be wuli. I yasua-o, i bla-o, n cili be, kpɛkun n wlali be bisua.+ 5 Ɲanmiɛn ɲrun jranfuɛ dan’n nin kpɛnngbɛn’m be kwlaa be kwla di min ti lalo. Be mannin min fluwa kɛ n fa ko man e niaan nga be o Damasi lɔ’n. N fali atin’n kɛ ń kó cí be nga be o lɔ’n, naan ń fá be ń bá Zerizalɛmun wa naan be tu be fɔ.

6 “Sanngɛ kɛ n wo atin’n su mɔ n mantannin Damasi klɔ’n i koko’n, ɲanmiɛn’n ka lɛ kpajali piaa guali min su.+ Kɛ ɔ́ yó sɔ’n, nn mindi su wa ju. 7 N tɔli, kpɛkun n tili sran kun nɛn. Ɔ seli min kɛ: ‘?Sɔlu, Sɔlu, ngue ti yɛ a kle min yalɛ-ɔ?’ 8 N tɛli i su kɛ: ‘?Nannan, wan yɛle wɔ?’ Ɔ seli min kɛ: ‘Min-ɔn, Zezi m’ɔ fin Nazarɛti mɔ a kle i yalɛ’n niɔn.’ 9 Be nga be o min wun lɛ’n, be wunnin kɛ lika’n kpajali, sanngɛ b’a timan sran ng’ɔ nin min su ijɔ’n i nɛn’n. 10 Yɛ n kusu n seli kɛ: ‘?Min Min, ngue yɛ ɔ fata kɛ n yo-ɔ?’ E Min’n seli min kɛ: ‘Jaso naan kɔ Damasi. Sɛ a ju lɔ’n, bé klé wɔ like ng’ɔ fata kɛ a yo’n.’+ 11 Sanngɛ lika’n i kpajalɛ m’ɔ kpajali dan’n ti’n, m’an wunman ase kun. Ɔ maan be nga be nin min o lɛ’n be trali min sa naan b’a fa min b’a wlu Damasi klɔ’n nun.

12 “Bian kun o klɔ sɔ’n su lɛ’n, be flɛ i Ananiasi. Ɔ su Ɲanmiɛn kpa kɛ nga Mmla’n fa kle’n sa. Yɛ Zifu kwlaa nga be o lika sɔ’n nun’n, be bo i dunman kpa. 13 Ɔ bali min wun wunlɛ. Ɔ jrannin min wun lɛ, yɛ ɔ seli min kɛ: ‘Min niaan Sɔlu, maan ɔ ɲinma wun ase kɛ laa’n sa!’ Kɛ ɔ seli sɔ cɛ’n, n mannin min ɲin su, kpɛkun n wunnin i.+ 14 Ɔ seli kɛ: ‘E nannan’m be Ɲanmiɛn’n fɛli i sa’n sieli ɔ su naan a si i klun sa’n, naan a wun sran m’ɔ ti kpa’n,+ naan a ti i nuan ndɛ’n. 15 Afin ninnge nga a wunnin be’n nin ndɛ nga a tili be’n, á wá kán be ndɛ klé sran kwlaa.+ 16 ?Yɛ ngue yɛ a minndɛ-ɔ? Jaso maan be yo ɔ batɛmun, kpɛkun bo i dunman naan Ɲanmiɛn yaci ɔ sa tɛ mun cɛ wɔ.’+

17 “Sanngɛ kɛ n sali min sin Zerizalɛmun+ mɔ n wo Ɲanmiɛn sua’n nun lɔ ń srɛ́ Ɲanmiɛn’n, n wunnin like kun aolia nun. 18 N wunnin Zezi, ɔ seli min kɛ: ‘Jaso, fin Zerizalɛmun klɔ’n nun fite ndɛndɛ. Afin kɛ á wá kán min ndɛ klé be’n, be su faman su.’+ 19 Yɛ n seli kɛ: ‘Min Min, be bɔbɔ be si kpa kɛ laa’n, n sinsinnin Ɲanmiɛn sulɛ sua kwlaa nun n wlali be nga be lafi ɔ su’n be bisua, kpɛkun n fali ngble boli be.+ 20 Yɛ i nun nga bé kún Etiɛnin mʼɔ ti wɔ lalofuɛʼn, n jin lɛ. Sa sɔ mɔ be yoli’n, ɔ jɔli min klun. Kpɛkun n niannin be nga be o lɛ bé kún i’n be tralɛ’m be su.’+ 21 Sanngɛ ɔ seli min kɛ: ‘Kɔ, afin ń má súnman wɔ be nga be timan Zifu mɔ be o mmuammua kpa’n, be sin.’”+

22 Sran’m be tieli i ndɛ’n lele juli ndɛ sɔ’n su. Kpɛkun be kpan seli kɛ: “Maan be kun bian ngalɛ’n. Ɔ nin nguan nun tranlɛ fataman!” 23 Kɛ mɔ be kpan, mɔ be yi be tralɛ mun gua, mɔ be sanndi ndutre’n nun nglo’n ti’n,+ 24 sonja akpi su kpɛn’n seli kɛ be fa Pɔlu be wɔ sonja’m be tranwlɛ lɔ. I waan be fa ngble be bo i naan ɔ kan sa ng’ɔ yoli’n. I liɛ’n, ɔ́ sí like nga ti yɛ sran’m be kpan Pɔlu su kɛ ngalɛ’n sa’n. 25 Kɛ be waan bé fá ngble bé bó Pɔlu’n, Pɔlu usali sonja ya su kpɛn’n kɛ: “?Sran kun m’ɔ ti Rɔmunfuɛ mɔ kusu b’a dimɛn i jɔlɛ’n,* be kwla bo i?”+ 26 Kɛ sonja ya su kpɛn’n tili ndɛ sɔ’n, ɔ ɔli sonja akpi su kpɛn’n i wun lɔ naan w’a bo ndɛ’n su w’a kle i. Ɔ seli i kɛ: “?Siɛn’n, ngue yɛ á wá yó-ɔ? Afin bian sɔ’n ti Rɔmunfuɛ.” 27 Ɔ maan sonja akpi su kpɛn’n wunngeli Pɔlu wun lɔ naan w’a se i kɛ: “?A ti Rɔmunfuɛ?” Ɔ tɛli i su kɛ: “Ɛɛn-ɛn.” 28 Sonja akpi su kpɛn’n seli kɛ: “N yili sika kpanngban kpa naan m’an kwla kaci Rɔmunfuɛ.” Pɔlu seli kɛ: “N nin min liɛ’n fin min nin klun.”+

29 Ɔ maan yasua nga ɔ fata kɛ be bo Pɔlu naan be usɛ i kosan’n, be jasoli i wun lɛ ndɛndɛ. Srɛ kunnin sonja akpi su kpɛn’n, afin ɔ wunnin kɛ ɔ ti Rɔmunfuɛ, kpɛkun w’a fa jrɔkɔ w’a ci i.+

30 Kɛ aliɛ cɛnnin’n, ɔ ɲannjili i. Kpɛkun ɔ seli Ɲanmiɛn ɲrun jranfuɛ’m be su kpɛn’n nin Zifu’m be Jɔlɛ Difuɛ Dandan’m* be kwlaa kɛ be yia. Kɛ be kwlaa be yiali’n, ɔ yoli maan be fali Pɔlu be bali, kpɛkun ɔ fɛli i jrannin be afiɛn lɛ. Ɔ yoli sɔ naan ɔ́ sí like nga ti yɛ Zifu’m be kan Pɔlu i wun ndɛ tɛtɛ’n.+