2 Samiɛli

8 Kɛ i osu cɛli kan’n, Davidi nin Filistifuɛ’m be kunnin,+ kpɛkun ɔ kwlali be.+ Yɛ ɔ deli Metɛgi-Ama Filistifuɛ’m be sa nun.

2 Ɔ kwlali Moabufuɛ mun.+ Kpɛkun ɔ lalali be sonja mun asiɛ wun, ɲanman su. Ɔ fali ɲanman kun sunnzunnin be. Kɛ ɔ sunnzunnin i kpalɛ kun, nin i kpalɛ nɲɔn’n, be kwlaa nga be lala lɛ’n, ɔ kunnin be ngba. Kpɛkun kɛ ɔ sunnzunnin i kpalɛ nsan su’n, be kwlaa nga be lala lɛ’n, ɔ yacili be lɛ, w’a kunman be.+ Kɛ ɔ yoli sɔ’n, Moabufuɛ’m be kacili Davidi i sufuɛ, yɛ be tuali lapo be mɛnnin i.+

3 Davidi kwlali Reɔbu i wa Adadezɛɛ m’ɔ ti Zoba lɔ famiɛn’n.+ Kɛ ɔ́ yó sɔ’n, nn Adadezɛɛ su kɔ naan ɔ́ kó fá lika ng’ɔ o kan Efrati Nzue’n wo lɔ’n i ekun.+ 4 Davidi trali Adadezɛɛ i nnɛn kpanngɔ su fufuɛ akpi kun ya nso (1.700), nin sonja nga be nanti be ja nun’n akpiakpi ablaɔn (20.000). I sin’n, ɔ kpɛkpɛli nnɛn kpanngɔ nga be cuɛn kakaklolo mun’n be kwlaa be jasin ndin’n nun. Saan nnɛn kpanngɔ ya kun (100) yɛ ɔ yacili be lɛ-ɔ.+

5 Sirifuɛ’m be sonja nga be fin Damasi’n,+ be bali Adadezɛɛ m’ɔ ti Zoba lɔ famiɛn’n i ukalɛ. Sanngɛ Davidi kunnin be nun sran akpiakpi ablaɔn-nin-nɲɔn (22.000).+ 6 I sin’n, Davidi sieli i sonja wie mun Damasi m’ɔ ti Sirifuɛ’m be klɔ’n su lɔ. Yɛ Sirifuɛ’m be kacili Davidi i sufuɛ. Be tuali lapo be mɛnnin i. Lika kwlaa nga Davidi kɔ alɛ kunlɛ lɛ’n, Zoova yo maan ɔ kwlɛ i kpɔfuɛ mun.+ 7 Asa ekun’n, Davidi fali Adadezɛɛ i sonja’m be ɲrɛn kukluuklu nga be fali sika ɔkwlɛ be yoli’n, kpɛkun ɔ fa be bali Zerizalɛmun.+ 8 Famiɛn Davidi fali aaba kpanngban kpa Betaki nin Berota lɔ bali wie. Klɔ sɔ’m be ti Adadezɛɛ liɛ.

9 Tɔi m’ɔ ti Amati+ lɔ famiɛn’n tili i kɛ Davidi kwlali Adadezɛɛ i sonja’m be ngba.+ 10 I sɔ’n ti’n, Tɔi sunmɛnnin i wa Zoramun kɛ ɔ ko nian Famiɛn Davidi i osu, naan ɔ yo i mo. Afin ɔ nin Adadezɛɛ be kunnin, kpɛkun ɔ kwlɛli i. (Afin Adadezɛɛ fali alɛ wlali Tɔi i sin kpɛ sunman.) Asa ekun’n, ɔ ko mɛnnin i ninnge wie mun. Sika nin sika ɔkwlɛ, ɔ nin aaba yɛ be fa yoli ninnge sɔ mun-ɔn. 11 Famiɛn Davidi yoli ninnge sɔ’m be sanwun fa mannin Zoova. Kɛ ɔ yoli sika nin sika ɔkwlɛ ng’ɔ ɲannin be nvle kwlaa ng’ɔ kwlali be’n be nun’n, be sɔ wie-ɔ.+ 12 Nvle sɔ mun yɛ: Sirifuɛ’m be nvle’n, nin Moabufuɛ’m+ be nvle’n, nin Amɔnfuɛ’m be nvle’n, nin Filistifuɛ’m+ be nvle’n, nin Amalɛkifuɛ’m+ be nvle’n. Kɛ ɔ yoli ninnge ng’ɔ fali be Reɔbu i wa Adadezɛɛ+ m’ɔ ti Zoba lɔ famiɛn’n i sa nun’n, be sɔ wie-ɔ. 13 Asa ekun’n, kɛ Davidi ko kunnin Edɔmunfuɛ akpiakpi blu-nin-mɔcuɛ (18.000) Njin Kongo’n+ nun lɔ m’ɔ sɛli i sin’n, i dunman’n fuli dan. 14 Ɔ sieli i sonja wie mun Edɔmun lɛ, nin be nvle wunmuan’n nun. Ɔ maan Edɔmunfuɛ’m be kwlaa be kacili Davidi i sufuɛ.+ Lika kwlaa nga Davidi kɔ alɛ kunlɛ lɛ’n, Zoova yo maan ɔ kwlɛ i kpɔfuɛ mun.+

15 Davidi sieli Izraɛli nvle wunmuan’n.+ Ɔ dili i nvle’n nunfuɛ’m be kwlaa+ be jɔlɛ mun klanman mannin be,+ yɛ ɔ yoli maan b’a buman sran fi lufle. 16 Zeruya i wa Zoabu+ yɛ ɔ ti sonja’m be su kpɛn-ɔn. Yɛ Ailidi i wa Zozafati+ yɛ ɔ klɛ nvle’n nun ndɛ mun sie-ɔ. 17 Aitubu i wa Zadɔku+ nin Abiataa i wa Aimelɛki be ti Ɲanmiɛn ɲrun jranfuɛ. Kpɛkun Seraya ti fluwa klɛfuɛ. 18 Zoyada i wa Benaya+ yɛ ɔ ti Kerɛtifuɛ mun nin Pelɛtifuɛ’m*+ be su kpɛn-ɔn. Davidi kusu i mma’m be ti i sran’m be su kpɛnngbɛn.*