Zeremin
38 Kɛ Zeremin kán ndɛ klé nvlefuɛ mun’n, Matan i wa Sefatia, nin Pasii i wa Gedalia, nin Selemia i wa Zikali,+ nin Malkia i wa Pasii+ be tili. Ɔ seli kɛ: 2 “Zoova waan yoo: ‘Sran ng’ɔ ka klɔ nga su wa’n, sɛ alɛ’n* w’a dimɛn i’n, awe’n kún i lele ɔ́ wú, annzɛ tukpacɛ m’ɔ sa ndɛndɛ’n+ yɛ ɔ́ kún i-ɔ. Sanngɛ sran ng’ɔ fɛ i wun wla* Kaldefuɛ’m be sa nun’n ɔ́ fíte nun. I like liɛ ng’ɔ́ ɲɛ́n i’n yɛle i nguan’n. Ɔ maan ɔ́ ká nguan nun.’+ 3 Zoova waan yoo: ‘Klɔ nga tɔ́ Babilɔnin famiɛn’n i sonja’m be sa nun. Yɛ ɔ́ fá klɔ’n.’”+
4 Sran dandan’m be seli famiɛn’n kɛ: “Nian, maan be kun bian sɔ’n.+ Afin i ndɛ ng’ɔ kan be’n ti’n, e sonja nga be ka klɔ nga nun’n nin nvlefuɛ’m be kwlaa be sa sin w’a bubu be. Bian sɔ’n kunndɛman kɛ nvle nga i nunfuɛ’m be tran fɔuun nun. Ɲrɛnnɛn yɛ ɔ sunnzun i be wun-ɔn.” 5 Famiɛn Sedesiasi tɛli be su kɛ: “Yoo, like kwlaa nga amun klo kɛ amún fá yó i’n, amun fa yo i. Afin n ti famiɛn sɔ, sanngɛ n kwlá seman amun kɛ nán amun yo.”
6 Kɛ ɔ yoli sɔ’n, be fali Zeremin be jrɛli i famiɛn’n i wa Malkia i kunman’n nun. Kunman sɔ’n wo Gladi Difuɛ’m be Awlo Klun’n+ nun lɔ. Be fali ɲanman naan b’a fɛ i b’a jrɛ i kunman’n nun. Sanngɛ kɛ ɔ́ yó sɔ’n, nn nzue nunman kunman’n nun. Nnɔtiɛ yɛ ɔ o nun-ɔn. Ɔ maan be ja nun lɛ’n, Zeremin su mlɔn nnɔtiɛ’n nun.
7 Famiɛn’n i awlo lɔ junman difuɛ kun o lɛ’n, be flɛ i kɛ Ebɛdi-Melɛki.+ Ɔ ti Etiopi bian. Ɔ tili i kɛ be fali Zeremin be yili i kunman’n nun. Kɛ ɔ́ yó sɔ’n, nn famiɛn’n ti Bɛnzamɛn Anuan’n+ nun lɛ. 8 Ebɛdi-Melɛki fɛli i famiɛn’n i awlo lɛ naan w’a ko se famiɛn’n kɛ: 9 “Ee, min min, famiɛn, sa nga b’a fa yo Ɲanmiɛn nuan ijɔfuɛ Zeremin’n, ɔ ti tɛ dan-o! Be fɛ i yili kunman’n nun. Yɛ awe’n kún i lele ɔ́ wú lɔ. Afin kpanwun ba kun sa nunman klɔ’n nun.”+
10 Ɔ maan famiɛn’n seli Ebɛdi-Melɛki m’ɔ ti Etiopifuɛ’n kɛ: “Fa sran ablasan (30) wa naan amun ko yi Ɲanmiɛn nuan ijɔfuɛ Zeremin kunman’n nun fite naan w’a wuman.” 11 Ebɛdi-Melɛki fali sran mun, kpɛkun ɔ ɔli famiɛn’n i awlo lɔ, ninnge kpakpa’m be siewlɛ’n i bo ngua lɔ.+ Be fali tralɛ tafuɛn mun nin tannin tafuɛn mun, kpɛkun be fali ɲanman naan b’a fa be b’a jra Zeremin i sin, kunman’n nun lɔ. 12 Yɛ Ebɛdi-Melɛki m’ɔ ti Etiopifuɛ’n seli Zeremin kɛ: “Yaci, fa tralɛ tafuɛn mun nin tannin tafuɛn mun fa siesie ɔ nvlaan bo. Fa be yo ɲanman’m be bo anɲre.” I sɔ yɛ Zeremin yoli-ɔ. 13 Kpɛkun be cuɛnnin ɲanman’n naan b’a fɛ i kunman’n nun b’a fite. Yɛ Zeremin kali Gladi Difuɛ’m be Awlo Klun’n nun lɛ-ɔ.+
14 Famiɛn Sedesiasi sunmannin sran naan be ko fa Ɲanmiɛn nuan ijɔfuɛ Zeremin be blɛ i Zoova i sua’n i wluwlɛ nsan su’n i wun lɛ. Famiɛn’n seli Zeremin kɛ: “Min waan ń úsa ɔ sa. Ɔ li tɛ min su. Nán fia ndɛ ba kun sa su.” 15 Zeremin seli Sedesiasi kɛ: “Sɛ n tɛ ɔ su’n, saan kunlɛ cɛ yɛ á kún min-ɔn. Yɛ sɛ n man ɔ afɔtuɛ’n, a su faman su.” 16 I sɔ’n ti’n, Famiɛn Sedesiasi tali Zeremin i nda blɛlɛlɛ kɛ: “N kan Zoova m’ɔ lafiman’n, m’ɔ mannin e nguan’n. Nanwlɛ, n su kunman wɔ. Yɛ n su faman wɔ n wlaman be nga be kunndɛ kɛ bé kún wɔ’n be sa nun.”
17 Yɛ Zeremin seli Sedesiasi kɛ: “Zoova, Ɲanmiɛn m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Sɛ a fa ɔ wun wla* Babilɔnin famiɛn’n i nvle’n nun sran dandan’m be sa nun’n, á fíte nun. Be su faman sin wɔman klɔ nga nun. Yɛ ɔ bɔbɔ nin ɔ awlofuɛ mun, amún ká nguan nun.+ 18 Sanngɛ sɛ w’a faman ɔ wun w’a wlaman* Babilɔnin famiɛn’n i nvle’n nun sran dandan’m be sa nun’n, Kaldefuɛ’m bé fá klɔ nga. Kpɛkun bé fá sin wɔ́ nun.+ Yɛ ɔ bɔbɔ a su fiteman nun.’”+
19 Yɛ famiɛn Sedesiasi seli Zeremin kɛ: “Zifu nga be sinnin Kaldefuɛ’m be sin’n be ti yɛ srɛ kun min-ɔn. Sɛ be fa min wla be sa nun’n, bé yó min tɛtɛ kpa.” 20 Sanngɛ Zeremin tɛli i su kɛ: “Be su faman wɔ wlaman be sa nun. Yaci, maan ɔ ɲin yi Zoova. Fa ndɛ nga n kan’n su. Sɛ a yo sɔ’n, i bo’n gúa kpa mán ɔ. Yɛ á ká nguan nun. 21 Sanngɛ sɛ ɔ waan a faman ɔ wun wlaman be sa nun’n,* sa nga Zoova yili i nglo kleli min mɔ bé wá jú’n be yɛ: 22 Be su fa Zida famiɛn’n i awlo’n nun bla kwlaa nga be kali lɛ’n bé kó mán Babilɔnin famiɛn’n i nvle’n nun sran dandan mun.+ Yɛ bla sɔ’m be se kɛ:
‘Yasua nga a lafili be su’n* b’a laka wɔ, yɛ b’a ɲan wɔ.+
Be yoli maan ɔ ja’n w’a mlɔn nnɔtiɛ’n nun.
Siɛn’n, b’a yaci ɔ lɛ b’a wanndi.’
23 Be su fa ɔ yi nin ɔ mma yasua’m be kwlaa bé kó mán Kaldefuɛ mun. Be su yaciman ɔ lɛ. Babilɔnin famiɛn’n trá wɔ.+ Yɛ ɔ dunman nun ti’n, bé fá sin bé wɔ́ klɔ nga nun.”+
24 Yɛ Sedesiasi seli Zeremin kɛ: “Sɛ a kunndɛman kɛ be kun wɔ’n, nán kan ndɛ sɔ’n kle sran fi. 25 Yɛ sɛ nvle’n nun sran dandan’m be ti i kɛ e nin wɔ e kokoli yalɛ’n, naan be wa se ɔ kɛ: ‘Ndɛ nga a kan kleli famiɛn’n, kan kle e, nán fia ba kun sa su, kɛn i kwlaa kle e. I liɛ’n, e su kunman wɔ.+ ?Ngue ndɛ yɛ famiɛn’n kan kleli wɔ-ɔ?’ 26 Tɛ be su kɛ: ‘N srɛli famiɛn’n kɛ nán maan ɔ fa min wɔ Zoonatan i sua’n nun lɔ kun, kɛ ɔ ko yo naan m’an wuman lɔ’n ti.’”+
27 I sin’n, nvle’n nun sran dandan’m be kwlaa be wa toli Zeremin, yɛ be usɛli i sa. Ndɛ nga famiɛn’n seli Zeremin kɛ ɔ kan’n, ɔ niannin su sɛsɛsɛ ɔ kan kleli be. Ɔ maan b’a kanman ndɛ fi kun. Afin sran fi w’a timan be ndɛ’n nun. 28 Zeremin kali Gladi Difuɛ’m be Awlo Klun’n+ nun lɔ lele yɛ be wa utuli Zerizalɛmun klɔ’n niɔn. Kɛ bé fá Zerizalɛmun klɔ’n, nn ɔ te o lɔ.+