Ezekiɛli

39 “Yɛ wɔ, sran wa, kan sa ng’ɔ́ wá jú Gɔgu su’n+ i ndɛ kle i. Se i kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Gɔgu, wɔ mɔ a ti Mesɛki nin Tubali+ be kpɛnngbɛn’m be su kpɛn’n,* e nin wɔ e le i. 2 Ń má yó maan á sá ɔ sin, yɛ ń klé wɔ atin, ń kó fá wɔ nglo lɔ lika mmuammua’m be nun ń bá,+ yɛ ń fá wɔ ń kɔ́ Izraɛli oka’m be su. 3 Ń má fín ɔ ta’n su yɛ ɔ́ fló ɔ sa bɛ’n nun tɔ́. Ń má yó maan ɔ ta mma nga be o ɔ sa fama’n nun’n bé gúa. 4 A nin ɔ sonja mun, ɔ nin sran nga bé jrán ɔ sin’n amún tɔ́ Izraɛli oka’m be su lɔ.+ Ń má fá wɔ ń mán anunman nga be di nnɛn’n be wafawafa kwlaa, ɔ nin blo lɔ nnɛn mun naan a kaci be aliɛ.”’+

5 “‘Á wá tɔ́ blo lɔ,+ afin n bɔbɔ min yɛ n kannin sɔ-ɔ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

6 “‘Ń má súnman sin kun Magɔgu ɔ nin be nga be tran lika mɔ nzue bo sin yia be’n be nun fɔun’n be sin.+ Yɛ bé wá sí jrɛiin kɛ n ti Zoova. 7 Ń má yó maan Izraɛli m’ɔ ti min nvle’n i nunfuɛ mun bé wá sí min dunman m’ɔ ti sanwun’n. Yɛ n su kplinman su kɛ be yo min dunman m’ɔ ti sanwun’n i finfin kun. Yɛ nvlenvle’m bé wá sí jrɛiin kɛ n ti Zoova,+ Izraɛli lɔ Ɲanmiɛn m’ɔ ti sanwun’n.’+

8 “‘Nanwlɛ, sa sɔ’n su ba, yɛ ɔ́ wá kpɛ́n su. Cɛn sɔ’n yɛ n kɛnnin i ndɛ’n niɔn.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ. 9 ‘Be nga be tran Izraɛli klɔ’m be su’n bé wá fíte, bé wá fá ɔ alɛ kunlɛ ninnge’m bé trɔ́ sin: I ɲrɛn kanngan-o,* i ɲrɛn dandan-o, i ta-o, i ta mma-o, i kate-o,* i cua-o. Yɛ bé wá fá be trɔ́ sin+ afuɛ nso. 10 Be su ko faman waka fie’m be su, yɛ be su ko faman yie bo’m be nun be tiantianman be nuan. Afin bé wá fá alɛ kunlɛ ninnge mun bé trɔ́ sin.’

“‘Be nga be fali be ninnge mun laa’n bé wá fá be liɛ mun wie, be nga be fɛnnin be bo ninnge mun laa’n bé wá fɛ́n be liɛ mun wie.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

11 “‘Cɛn sɔ’n nun’n, ń má mán Gɔgu+ i asieliɛ kun Izraɛli lɛ, be nga be tu ajalɛ jenvie’n i wia afiliɛ lɔ’n be kongo’n nun lɔ, yɛ kongo sɔ’n ɔ́ tánnin be nga be sin lɛ’n be atin’n. Lɛ yɛ bé síe Gɔgu ɔ nin i sran kpanngban’m be kwlaa-ɔ, yɛ bé wá flɛ́ kongo sɔ’n kɛ Amɔn-Gɔgu Kongo.*+ 12 Kɛ ɔ ko yo naan mɛn’n w’a yo sanwun’n, Izraɛli nvle’n nunfuɛ’m bé wá fá anglo nso bé síe be.+ 13 Nvle’n nunfuɛ’m be kwlaa bé wá síe be, ɔ maan cɛn nga ń má yí min aɲrunɲan’n i nglo’n, be dunman’n fú.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

14 “‘Bé wá kpá sran wie mun kɛ be sinsin mɛn’n nun titi, naan be sie fuɛn nga be kali asiɛ wun lɛ’n. I liɛ’n asiɛ’n yó sanwun. Bé fá anglo nso bé kúnndɛ fuɛn mun. 15 Sɛ be nga be sinsin mɛn’n nun’n be wun sran owie kun’n, bé síe i wun lɛ nzɔliɛ kun, kpɛkun be nga be kpali be kɛ be sie sran mun’n, bé fá kó síe i Amɔn-Gɔgu Kongo’n nun lɔ.+ 16 Asa ekun’n, klɔ kun wá trán lɛ, bé flɛ́ i Amona.* Kpɛkun bé wá yó mɛn’n i sanwun.’+

17 “Sran wa, ɔ liɛ’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Se anunman wafawafa kwlakwla, ɔ nin blo lɔ nnɛn’m be kwlaa be kɛ: “Maan amun ti yia naan amun bla. Maan amun ti yia tɛ mɔ n su yi n man amun’n i wun. Ɔ ti tɛ yilɛ dan kun Izraɛli oka’m be su.+ Amún wá dí nnɛn yɛ amún nɔ́n mmoja.+ 18 Amún wá dí safuɲrɛn’m be nnɛn mun, yɛ amún nɔ́n asiɛ’n su kpɛn’m be mmoja’n. Be ti bua ɲin, bua ba, boli, ɔ nin nannin tola, amún dí Basan lɔ nnɛn mɔ b’a lo’n be kwlaa. 19 Tɛ nga n siesieli n mannin amun’n ti’n, amún wá dí nnɛn lui lele amún ku yí. Yɛ amún nɔ́n mmoja lele amún bó.”’

20 “‘Amún wá dí nnɛn kpanngɔ mun, ɔ nin nnɛn kpanngɔ su fufuɛ mun, ɔ nin safuɲrɛn mun, ɔ nin alɛ kunfuɛ wafa kwlakwla min tabli’n i sin lele amun ku yí.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

21 “‘Ń má yí min aɲrunɲan’n i nglo nvlenvle’m be afiɛn. Nvlenvle’m be kwlaa bé wá wún jɔlɛ nga n dili’n, yɛ bé wún min tinmin* nga n yili i nglo be afiɛn’n.+ 22 Kɛ ɔ fɛ i cɛn sɔ’n nun’n, Izraɛli nvle’n nunfuɛ’m bé wá sí jrɛiin kɛ n ti be Ɲanmiɛn Zoova. 23 Kpɛkun nvlenvle’m bé wá sí kɛ, sɛ be trali Izraɛli nvle’n nunfuɛ’m be ɔli’n, ɔ fin be fɔnlɛ’n afin be nin min b’a nantiman klanman.+ Ɔ maan n fali min ɲrun’n n fiali be wun,+ yɛ be fali be wlali be kpɔfuɛ’m be sa nun.+ Kpɛkun be fali tokofi kunnin be kwlaa. 24 N niannin fiɛn mɔ be wluli nun’n, ɔ nin be sa tɛ’m be su yɛ n yoli be sa-ɔ. N fali min ɲrun’n n fiali be wun.’

25 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má yó maan Zakɔbu i awlo’n nunfuɛ mɔ be trali be ɔli’n, bé sá be sin.+ Yɛ ń má sí Izraɛli nvle’n nunfuɛ’m be kwlaa be aunnvɔɛ.+ Kpɛkun ń má kplí min dunman m’ɔ ti sanwun’n i ti juejue su.+ 26 Kɛ be ko gua be ɲin ase fɔnlɛ nga be fɔnnin min wun’n i kwlaa ti’n,+ bé wá trán fɔun be mɛn’n nun. Sran fi su wlaman be ɲin nglonglo.+ 27 Kɛ ń má kó fá be nvlenvle’m be nun ń bá, mɔ ń kó fá be be kpɔfuɛ’m be mɛn’m be nun ń bá mɔ ń yía be nuan’n,+ ń má yí i nglo be afiɛn kɛ n ti sanwun, nvle kpanngban be ɲrun.’+

28 “‘Kɛ ń má yó maan bé trá be kɔ́ nvlenvle’m be nun’n, mɔ i sin’n ń yó maan bé sá be sin be mɛn’n nun’n, mɔ be nun ba kun sa su kaman lɔ’n,+ bé wá sí jrɛiin kɛ min yɛ n ti be Ɲanmiɛn Zoova’n niɔn. 29 N su faman min ɲrun’n n fiaman be wun kun,+ afin ń má fá min wawɛ’n ń mán Izraɛli nvle’n nunfuɛ mun.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”