2 Be Ɲoliɛ

7 Kɛ Salomɔn wieli Ɲanmiɛn srɛ cɛ’n,+ sin fin ɲanmiɛn su lɔ jrali,+ ɔ yrali nnɛn nga be fa yili tɛ nga kɛ bé yí’n be yra nnɛn’n i kɔlikɔli’n, nin nnɛn onga nga be fa yili tɛ mun’n. Kpɛkun Zoova i ɲrun ɲanɲan’n deli sua wunmuan’n.+ 2 Ɲanmiɛn ɲrun jranfuɛ’m be kwlá wluman Zoova i sua’n nun. Afin Zoova i ɲrun ɲanɲan’n deli Zoova i sua wunmuan’n.+ 3 Izraɛlifuɛ’m be kwlaa be wunnin sin m’ɔ fin nglo lɔ jrali’n nin Zoova i ɲrun ɲanɲan’n m’ɔ o sua’n i ti su’n. Kpɛkun be kotoli, yɛ be utuli be ɲin ase yɔbuɛyɔbuɛ’m be su lɛ naan b’a la Zoova i ase, “afin ɔ ti kpa, yɛ i sran klolɛ dan’n wieman le.”

4 I sin’n, famiɛn’n nin sran’m be kwlaa be yili tɛ Zoova ɲrun lɛ.+ 5 Famiɛn Salomɔn fali nannin akpiakpi ablaɔn-nin-nɲɔn (22.000) nin bua akpiakpi ya akpiakpi ablaɔn (120.000) fa yili tɛ. Kɛ famiɛn’n nin sran’m be kwlaa be yili Ɲanmiɛn Kpli i sua’n i nglo kɛ ngalɛ’n sa.+ 6 Ɲanmiɛn ɲrun jranfuɛ’m be jrannin be jranwlɛ’m be nun. Miziki bolɛ ninnge nga be fa to jue be man Zoova’n, be o Levifuɛ’m be kusu be sa nun.+ (I nun mɔ famiɛn Davidi nin be* manmannin Ɲanmiɛn’n, ɔ yoli miziki bolɛ ninnge sɔ mun naan be fa to jue be la Zoova i ase, “afin i sran klolɛ dan’n wieman le.”) Yɛ Ɲanmiɛn ɲrun jranfuɛ’m be boli awɛ mun kekle kpa+ be ɲrun lɛ. Kɛ ɔ́ yó sɔ’n, nn Izraɛlifuɛ’m be kwlaa be jinjin lɛ.

7 Kɛ ɔ yoli sɔ’n, Salomɔn yoli Zoova i sua’n i ɲrun lɛ awlo klun’n i afiɛn’n i sanwun. Afin lɛ yɛ ɔ yili tɛ nga kɛ bé yí’n be yra nnɛn’n i kɔlikɔli’n niɔn,+ yɛ lɛ yɛ ɔ fali nnɛn nga be fa yili bo kun yolɛ tɛ’n i lui’n fa mannin Ɲanmiɛn-ɔn. Afin tɛ nga kɛ bé yí’n be yra nnɛn’n i kɔlikɔli’n, nin ble annzɛ i wunsu like nga be fa man Ɲanmiɛn’n,+ nin nnɛn’m be lui’m+ be sɔnman aaba tɛ yiwlɛ+ nga Salomɔn yoli’n su. 8 Blɛ sɔ’n nun’n, Salomɔn nin Izraɛlifuɛ’m be kwlaa be dili cɛn lele cɛn ba nso.+ Sran nga be bali’n, be sɔnnin kpa yɛ be fin lele Lebo-Amati* nin Ezipti Kongo’n nun lɔ.+ 9 Sanngɛ cɛn ba mɔcuɛ su’n,* be yoli aɲia ngunmin kun.+ Afin tɛ yiwlɛ’n i nglo yilɛ’n dili cɛn ba nso, kpɛkun be fali cɛn ba nso be dili cɛn. 10 Anglo nso su’n, i cɛn ba ablaɔn-nin-nsan (23) su’n, ɔ mannin nvlefuɛ’m be atin naan be wɔ be awlo. Kɛ bé kɔ́’n, be klun ti jɔwa,+ yɛ be klun tɔli nun fɔuun, ye dan nga Zoova yoli Davidi nin Salomɔn ɔ nin Izraɛlifuɛ mɔ be ti i nvle nunfuɛ mun’n ti.+

11 Salomɔn wieli Zoova i sua’n nin famiɛn sua’n be kplan.+ Like kwlaa nga Salomɔn i awlɛn o su kɛ ɔ́ yó i Zoova i sua’n nun lɔ’n, nin i bɔbɔ i sua’n nun lɔ’n, ɔ yoli i kwlaa kpan.+ 12 Kɔnguɛ’n, Zoova yili i wun nglo kleli Salomɔn+ naan w’a se i kɛ: “N tili ɔ srɛlɛ’n. M’an kpa sua nga naan be yi tɛ nun man min.+ 13 Sɛ n tannin ɲanmiɛn su lɔ’n naan nzue ba kun sa tɔman’n, sɛ n se lalo’m be kɛ be ko di amun fie su ninnge mun sekeseke’n, yɛ sɛ n fa tukpacɛ m’ɔ sa ndɛndɛ’n n yi i min nvle nunfuɛ’m be su’n, 14 naan min nvle nunfuɛ mɔ min dunman o be su’n+ be kan be wun ase’n,+ naan be srɛ min’n, naan be kpɛ min sin atin’n, naan be yaci be sa tɛtɛ’m be yolɛ’n,+ kɛ n wo ɲanmiɛn su wa’n ń síe min su ń tíe, yɛ ń yó maan be nvle’n yó kpa ekun.+ 15 Kɛ ɔ fin andɛ’n, min ɲinma’m bé tíketíke, yɛ ń síe min su ń tíe srɛlɛ nga bé srɛ́ min lika nga nun’n.+ 16 Siɛn’n, m’an kpa sua nga, yɛ m’an fa yo min liɛ klonglo* naan min dunman’n tran su tititi.+ Min ɲinma’n nin min awlɛn’n bé trán lika nga su tititi.+

17 “Ɔ kusu’n, sɛ a nin min nanti kɛ ɔ si Davidi nin min nantili’n sa’n, naan a yo like kwlaa nga n se wɔ kɛ a yo’n, naan a fa min mmla nin min ndɛ’m be su’n,+ 18 ń yó maan ɔ famiɛn dilɛ’n táka kpa+ kɛ nga n kan kleli ɔ si Davidi’n sa. Kɛ e nin i é trá aenguɛ’n,+ n seli i kɛ: ‘Ɔ osu’n nun’n, bé ɲán sran tititi naan ɔ sie Izraɛli nvle’n.’+ 19 Sanngɛ sɛ amun kaci amun sin si min, naan amun nantiman ndɛ nga n kan’n nin min mmla nga n fa mannin amun’n be su’n, naan amun ko su ɲanmiɛn uflɛ naan amun koto be bo’n,+ 20 ń tú Izraɛlifuɛ’m be bo mɛn nga n fa mannin be’n nun,+ yɛ sua nga n yoli i sanwun mɔ min dunman’n wo su’n, ń yí i min ɲin bo lɛ. Kpɛkun ń yó maan ɔ́ yó finfin like nvlenvle’m be kwlaa be ɲrun,* yɛ bé fá yó srilɛ like.+ 21 Yɛ sua nga búbú sekeseke. Be kwlaa nga bé sín lɛ’n, bé níɛn i siin be nuan m’ɔ́ bó be wun’n ti.+ Kpɛkun bé sé kɛ: ‘?Ngue ti yɛ Zoova yoli nvle nga nin sua nga be sɔ-ɔ?’+ 22 Yɛ bé tɛ́ be su kɛ: ‘Kɛ mɔ be yacili Zoova+ m’ɔ ti be nannan’m be Ɲanmiɛn’n i ti-ɔ. I yɛ ɔ fali be Ezipti mɛn’n nun lɔ fiteli-ɔ.+ Sanngɛ be fali be wun wlali ɲanmiɛn uflɛ’m be sa nun, be kotoli be bo, yɛ be suli be.+ I sɔ’n ti yɛ ɔ fali ɲrɛnnɛn kwlaa nga yili be su-ɔ.’”+