2 Be Ɲoliɛ

29 Kɛ Ezekiasi+ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ ablaɔn-nin-ngwlan (29) Zerizalɛmun lɔ. Be flɛ i nin’n kɛ Abia, Zakari i wa-ɔ.+ 2 Ɔ yoli sa ng’ɔ ti kpa Zoova ɲrun’n titi+ kɛ i nannan Davidi fa yoli’n sa.+ 3 Kɛ ɔ boli famiɛn dilɛ bo’n, i afuɛ klikli’n, i anglo klikli’n su’n, ɔ tikeli Zoova i sua’n i anuan mun, kpɛkun ɔ siesieli be ye.+ 4 I sin’n, ɔ flɛli Ɲanmiɛn ɲrun jranfuɛ mun nin Levifuɛ mun, yɛ ɔ yiali be lika gbawun ng’ɔ o wia afiliɛ lɔ’n nun. 5 Ɔ seli be kɛ: “Levifuɛ mun, amun sie amun su min nuan bo. Amun yo amun wun sanwun,+ yɛ amun yo Zoova m’ɔ ti amun nannan’m be Ɲanmiɛn’n i sua’n i sanwun wie. Amun yi ninnge nga be ti fiɛn’n lika m’ɔ ti Ɲanmiɛn liɛ klonglo’n nun.+ 6 Afin e si’m be nin Ɲanmiɛn b’a nantiman klanman, yɛ be yoli sa ng’ɔ ti tɛ’n Zoova m’ɔ ti e Ɲanmiɛn’n i ɲrun.+ Be yili i blo, b’a kpɛman be ɲin Zoova i tannin sua’n i wun lɔ, yɛ be kacili be sin be sili i.+ 7 Asa ekun’n, be ɲinnin Ɲanmiɛn sua’n i lika ng’ɔ ti fleiin kpa’n i anuan mun,+ yɛ be nuannin kannin mun.+ Be yacili ansan’n i yralɛ,+ yɛ b’a yiman tɛ nga kɛ bé yí’n be yra nnɛn’n i kɔlikɔli’n+ lika m’ɔ ti Izraɛli i Ɲanmiɛn’n i liɛ klonglo’n nun kun. 8 I sɔ’n ti’n, Zoova fali Zidafuɛ mun nin Zerizalɛmunfuɛ’m be wun ya.+ Ɔ yoli maan be kacili kɛ ɲrɛnnɛnfuɛ sa. Be nga be wun be’n, ɔ bo be nuan, yɛ be bo feliman* kɛ nga amun bɔbɔ amun ɲin tɛ i yɛ’n sa.+ 9 I ti yɛ be fali tokofi kunnin e nannan mun,+ kpɛkun be trali e wa yasua mun, nin e wa bla mun, nin e yi mun ɔli-ɔ.+ 10 Siɛn’n, n klo kpa kɛ e nin Zoova m’ɔ ti Izraɛli i Ɲanmiɛn’n é trá aenguɛ.+ I liɛ’n, e wun ya ng’ɔ fali’n, ɔ́ gúɛ i ase. 11 Min mma mun, kɛ nga y’a ju yɛ’n, nán amun ɲin kpa sa su* kun. Afin Zoova kpali amun kɛ amun jrɛn i ɲrun naan amun di junman be mɛn i,+ yɛ amun yo naan i tɛ’m be wunsrɛn’n fite.”+

12 Kɛ ɔ yoli sɔ’n, Levifuɛ’m be jasoli. Be yɛ: Keati i osu’n nun’n,+ Amasai i wa Maati nin Azaria i wa Zoɛli. Merari i osu’n nun’n,+ Abdi i wa Kisi nin Zealelɛli i wa Azaria. Gɛɛsɔn i osu’n nun’n,+ Zima i wa Zoa nin Zoa i wa Edɛnin. 13 Ɛlizafan i osu’n nun’n, Simiri nin Zeuɛli. Azafu i osu’n nun’n,+ Zakari nin Matania. 14 Eman i osu’n nun’n,+ Zeiɛli nin Simei. Zeditɛn i osu’n nun’n,+ Semaia nin Uziɛli. 15 Be yiali be niaan mun, kpɛkun be yoli be wun sanwun. I sin’n, be bali be wa yoli Zoova i sua’n i sanwun kɛ nga Zoova fali ndɛ’n wlali famiɛn’n i nuan m’ɔ seli be kɛ be yo’n sa.+ 16 Ɲanmiɛn ɲrun jranfuɛ’m be wluli Zoova i sua’n nun lɔ naan bé yó i sanwun. Ninnge kwlaa nga be ti fiɛn mɔ be wunnin be Zoova i sua’n nun’n, be fali be ko sieli be Zoova i sua’n i awlo klun’n nun lɛ.+ Levifuɛ’m be kusu be isali be fiteli naan b’a ko gua be Sedrɔn Kongo’n nun lɔ.+ 17 Anglo klikli’n i cɛn ba klikli’n su’n, be boli sua’n i sanwun yolɛ bo. Kɛ ɔ́ fá jú anglo sɔ’n i cɛn ba mɔcuɛ’n su’n, nn b’a to Zoova i sua’n i lika ng’ɔ ti fleiin kpa’n.+ Be fali cɛn ba mɔcuɛ ekun be yoli Zoova i sua’n i sanwun. Anglo klikli’n i cɛn ba blu-nin-nsiɛn (16) su’n, be wieli i yo.

18 I sin’n, be ko toli Famiɛn Ezekiasi naan b’a se i kɛ: “E yoli Zoova i sua wunmuan’n, nin tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ nin i ninnge kwlaa+ be sanwun. Yɛ e yoli tabli nga i su yɛ be siesie kpanwun nga be tian be wiengu su’n*+ nin i ninnge’m be kwlaa be sanwun. 19 Yɛ i nun nga Akazi ti famiɛn’n, m’ɔ́ yó i sa tɛ mun’n,+ ninnge kwlaa ng’ɔ yacili be lika kun nun’n, e siesieli be ye, yɛ e yoli be sanwun wie.+ Be o Zoova i tɛ yiwlɛ’n i ɲrun lɛ.”

20 Kɛ Famiɛn Ezekiasi jasoli nglɛmun ndɛ kpa’n, ɔ yiali klɔ’n su sran dandan mun, kpɛkun ɔ nin be ɔli Zoova i sua’n nun lɔ. 21 Kɛ bé kɔ́’n, be fali nannin tola nso, nin bua ɲin nso, nin bua ba yasua nso, nin boli kpakpuɛ nso naan bé fá yí famiɛn diwlɛ’n, nin lika m’ɔ ti Ɲanmiɛn liɛ’n, nin Zidafuɛ’m be sa tɛ’n i ti tɛ.+ Yɛ ɔ seli Ɲanmiɛn ɲrun jranfuɛ mɔ be ti Aarɔn i osu’n nunfuɛ’n kɛ be fa nnɛn sɔ’m be yi tɛ Zoova i tɛ yiwlɛ’n su. 22 Be kunnin nannin mun,+ kpɛkun Ɲanmiɛn ɲrun jranfuɛ’m be fali be mmoja’n kpɛntɛnkpɛntɛnnin i tɛ yiwlɛ’n su.+ I sin’n, be kunnin bua ɲin mun naan b’a fa be mmoja’n b’a kpɛntɛnkpɛntɛn i tɛ yiwlɛ’n su. Yɛ be kunnin bua ba yasua mun, kpɛkun be fali be mmoja’n kpɛntɛnkpɛntɛnnin i tɛ yiwlɛ’n su. 23 I sin’n, be fali boli kpakpuɛ nga bé fá yí sa tɛ’n i ti tɛ’n bali famiɛn’n nin sran nga be yiali lɛ’n be ɲrun lɛ. Yɛ be fali be sa’n sieli be su. 24 Ɲanmiɛn ɲrun jranfuɛ’m be kunnin be, yɛ be fali be mmoja’n yili sa tɛ’n i ti tɛ, tɛ yiwlɛ’n su. Be yoli sɔ naan Izraɛlifuɛ’m be kwlakwla be nin Ɲanmiɛn be afiɛn w’a sɛ ekun. Afin famiɛn’n seli kɛ Izraɛlifuɛ’m be kwlaa be ti’n, be yi tɛ nga kɛ bé yí’n be yra nnɛn’n i kɔlikɔli’n, ɔ nin sa tɛ’n i ti tɛ.

25 Kɛ ɔ́ yó sɔ’n, ɔ seli Levifuɛ’m be kɛ be jranjran Zoova i sua’n nun lɛ, sɛnbali nin miziki bolɛ ninnge nga be le ɲanman’n, nin jru’m+ be o be sa nun sɛsɛsɛ. I lɛ nun’n, be niannin mmla nga Davidi+ nin Gadi+ m’ɔ ti famiɛn’n i sran ngʼɔ wun aolia nun sa munʼn nin Natan+ m’ɔ ti Ɲanmiɛn nuan ijɔfuɛ’n be kpɛli’n su. Mmla sɔ’n fin Zoova yɛ ɔ fa wlɛli i nuan ijɔfuɛ’m be nuan yɛ be kannin-ɔn. 26 Ɔ maan Levifuɛ’m be jranjrannin lɛ. Kɛ ɔ́ yó sɔ’n, nn Davidi i miziki bolɛ ninnge’m be o be sa nun. Yɛ awɛ’m be o Ɲanmiɛn ɲrun jranfuɛ’m be sa nun.+

27 I sin’n, Ezekiasi mannin atin kɛ be yi tɛ nga kɛ bé yí’n be yra nnɛn’n i kɔlikɔli’n tɛ yiwlɛ’n su.+ Kɛ be boli tɛ nga kɛ bé yí’n be yra nnɛn’n i kɔlikɔli’n i yilɛ bo’n, be boli Zoova i jue’n i tolɛ’n bo. Kpɛkun be boli miziki bolɛ ninnge nga Davidi m’ɔ yoli Izraɛli famiɛn’n yoli’n be bolɛ bo. Kɛ ɔ́ yó sɔ’n, nn bé bó awɛ mun kusu. 28 Kɛ bé tó jue mɔ awɛ’m bé tɛ́’n, be kwlaa nga be yiali lɛ’n, be utuli be ɲin ase. Be yoli sɔ lele be wieli tɛ nga kɛ bé yí’n be yra nnɛn’n i kɔlikɔli’n i yi. 29 Kɛ be wieli tɛ’n i yi cɛ’n, famiɛn’n nin be kwlaa nga be o i wun lɛ’n be kotoli, kpɛkun be utuli be ɲin ase. 30 Famiɛn Ezekiasi nin sran dandan’m be seli Levifuɛ’m be kɛ be to jue nga Davidi+ nin Azafu+ m’ɔ wun aolia nun sa mun’n be kpɛli’n be manman Zoova. Ɔ maan be manmannin Ɲanmiɛn aklunjɔɛ su. Be kotoli kpɛkun be utuli be ɲin ase.

31 Yɛ Ezekiasi seli kɛ: “Siɛn mɔ b’a kpa amun kɛ amun yo Zoova liɛ’n, amun fa nnɛn nga bé fá yí tɛ’n, nin ninnge nga bé fá lá Ɲanmiɛn i ase’n be bla Zoova i sua’n nun.” Ɔ maan sran’m be kwlakwla be fali nnɛn nga bé fá yí tɛ’n, nin ninnge nga bé fá lá Ɲanmiɛn i ase’n be bali. Be kwlaa nga be waan bé mán like be klun klo su’n, be fali nnɛn mun bali naan be fa yi tɛ nga kɛ bé yí’n be yra nnɛn’n i kɔlikɔli’n.+ 32 Nnɛn nga sran’m be mannin naan be fa yi tɛ nga kɛ bé yí’n be yra nnɛn’n i kɔlikɔli’n be nuan yɛ: nannin ableso (70), nin bua ɲin ya kun (100), nin bua ba yasua ya nɲɔn (200). Be mannin nnɛn kwlaa sɔ mun naan be fa yi tɛ nga kɛ bé yí’n be yra nnɛn’n i kɔlikɔli’n man Zoova.+ 33 Yɛ be fali nannin ya nsiɛn (600) nin bua akpi nsan (3.000) yili tɛ wie mun ekun mannin Ɲanmiɛn. 34 Sanngɛ Ɲanmiɛn ɲrun jranfuɛ nga bé yí nnɛn kwlaa sɔ’m be wun kplo’n ka naan b’a fa be b’a yi tɛ nga kɛ bé yí’n be yra nnɛn’n i kɔlikɔli’n, b’a sɔnman. I sɔ’n ti’n, be niaan Levifuɛ’m be wa ukali be+ lele be wieli junman’n i di. Asa ekun’n, be ukali be sɔ lele Ɲanmiɛn ɲrun jranfuɛ’m be wieli be wun sanwun yo.+ Afin sanwun yolɛ’n yoli Levifuɛ’m be cinnjin trali Ɲanmiɛn ɲrun jranfuɛ mun. 35 Asa ekun’n, nnɛn nga bé fá yi tɛ nga kɛ bé yí’n be yra nnɛn’n i kɔlikɔli’n sɔnnin kpa,+ yɛ nnɛn’m be luilui lika nga bé fá yí bo kun yolɛ tɛ’n+ be sɔnnin wie. Asa kusu’n, nzan nga be fa sieli i tɛ nga kɛ bé yí’n be yra nnɛn’n i kɔlikɔli’n su’n+ timan aɔwi. Kɛ ɔ yoli sɔ’n yɛ Zoova i sua’n nun lɔ junman dilɛ’n wa boli i bo ekun-ɔn. 36 Ezekiasi nin nvlefuɛ’m be kwlaa be klun jɔli kpa like nga Ɲanmiɛn Kpli siesie mannin be’n ti,+ afin sa kwlaa sɔ’m be juli ndɛndɛ kpa.