Ezekiɛli
31 Afuɛ blu-nin-kun (11) su’n i anglo nsan su’n, anglo’n i cɛn ba klikli’n su’n, Zoova kannin ndɛ kleli min ekun. Ɔ seli min kɛ: 2 “Sran wa, se Faraɔn nin i sran kpanngban’m be kɛ:+
‘?Wan yɛ ɔ ti dan kɛ wɔ sa-ɔ?
3 Asirifuɛ kun o lɛ’n, ɔ ti kɛ Liban lɔ sɛdri waka sa.
I sama’m be ti nglanman kpa, be ti kɛ susrɛ m’ɔ le fɔnvɔ dan’n sa. Yɛ ɔ ti tɛnndɛn kpa.
I ti’n to ɲanmiɛn ble’n lɔ.
4 Nzue’n yoli maan ɔ ɲinnin, nzue ti mɔ be bo ti kploun’n be yoli maan ɔ ɲinnin tɛnndɛn kpa.
Nzue mɔ be sonji’n, be bo sin yia lika nga be tɛli i lɛ’n.
Nzue sɔ’m be sama’m be yo maan bo’n nun waka’m be kwlaa be ɲan nzue.
5 I sɔ’n ti yɛ ɔ ɲinnin dan trali bo’n nun waka onga’m be kwlaa’n niɔn.
I sama dandan’m be wa sɔnnin, yɛ i sama kanngan’m be wa yoli tɛnndɛn,
nzue kpanngban m’ɔ o i nzue ba’m be nun’n ti.
6 Anunman nga be tu sin nglo lɔ’n, be kwlaa be yo be sua mun i sama’m be nun.
Bo’n nun lɔ nnɛn’m be kwlaa be wu ba i sama’m be bo.
Yɛ nvle dandan’m be kwlaa be trɛn i fɔnvɔ’n i bo.
7 I klanman’n nin i sama mɔ be ti tɛnndɛn’n ti’n, ɔ yo ɲɛnmɛn dan,
afin i olui’m be wlu lele be ju nzue kpanngban nun.
8 Ɲanmiɛn i fie klanman’n+ nun lɔ sɛdri waka wie fi nin i be sɛman.
Zenevrie waka wie fi i sama’m be timan kɛ i liɛ’n sa.
Platanin waka wie fi i sama’m be nin i liɛ’n be sɛman.
Yɛ Ɲanmiɛn i fie klanman’n nun lɔ waka wie fi i klanman’n tomɛn i liɛ’n.
9 N yoli maan ɔ yoli klanman kpa, yɛ i su nɲa’n sɔnnin.
Kpɛkun Edɛnin lɔ waka onga mun, Ɲanmiɛn Kpli i fie klanman’n nun lɔ waka’m be ɲin bloli i wun.’
10 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘Ɔ* yoli tɛnndɛn dan, i ti’n to ɲanmiɛn ble’n lɔ. Kpɛkun ɔ tuli i wun i tɛnndɛn’n ti. 11 I sɔ’n ti’n, ń má yí i ń wlá nvlenvle’m be siefuɛ m’ɔ le kwlalɛ kpa’n i sa nun.+ Saan ɔ́ jáso i wun, kpɛkun i klunwi’n ti’n ń yí i blo. 12 Yɛ aofuɛ mun, nvlenvle’m be nun tɛ kpafuɛ mun bé wá kpɛ́ i bo, kpɛkun bé yáci i oka’m be su lɔ. I nɲa’m bé gúa kongo’m be kwlaa be nun, yɛ i sama mɔ be bubuli be’n bé gúa nvle’n nun nzue ba’m be kwlaa be nun.+ Asiɛ’n sufuɛ’m be kwlaa bé jáso i fɔnvɔ’n i bo, bé yáci i lɛ bé kɔ́. 13 Anunman nga be tu sin nglo lɔ’n be kwlaa bé wá trán waka mɔ be kpɛli i bo’n i afiɛn m’ɔ nannan lɛ’n su, yɛ bo’n nun nnɛn mun bé wá fú i sama’m be su.+ 14 I sɔ sa’n juli naan waka nga be o nzue nuan’n, b’a ɲinman tɛnndɛn naan be ti’n w’a toman ɲanmiɛn ble’n lɔ kun, naan kusu waka nga be ɲan nzue kpa’n b’a ɲinman tɛnndɛn naan be ti’n w’a toman ɲanmiɛn ble’n lɔ kun. Afin bé wá yí be kwlaa bé mán wie’n, bé yí be bé mán ja ngua lɔ mɛn’n, be nin klɔ sran’m be mma mɔ be jra kunman’n* nun lɔ’n.’
15 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Cɛn nga ɔ́ wá jrá Ndia’n* nun lɔ’n, ń má yó maan bé yó sɛ. I sɔ’n ti’n, ń má káta nzue mɔ i bo ti kploun’n su, kpɛkun ń jrɛ́n i sama mun. I liɛ’n, nzue dan’n su sonjiman kun. I dunman nun ti’n, ń má yó maan Liban’n ɔ́ lú tuun, kpɛkun bo’n nun lɔ waka’m be kwlaa bé wú kee. 16 Kɛ ń má yó maan ɔ nin be kwlaa nga be jra kunman’n* nun lɔ’n bé jrá Ndia’n* nun lɔ’n, i tɔlɛ’n i tɛlɛ’n ɔ́ yó maan nvlenvle’m bé úsu. Kpɛkun Edɛnin lɔ waka’m be kwlaa,+ Liban lɔ waka nglanman mun nin waka kpakpa mun, be kwlaa nga be ɲan nzue kpa’n, be wla wá gúa ase ja ngua lɔ mɛn’n nun. 17 Be jrali Ndia’n* nun lɔ kɛ i sa, be jrali be mɔ be fali tokofi kunnin be’n be wun lɔ.+ Yɛ be nga be suɛn i bo’n,* mɔ be trɛn i fɔnvɔ’n i bo nvlenvle’m be nun’n be o i wun lɔ.’+
18 “‘?Edɛnin lɔ waka benin yɛ i aɲrunɲan’n nin i dan’n ɔ nin ɔ liɛ’n be sɛ-ɔ?+ Sanngɛ saan bé fá wɔ nin Edɛnin lɔ waka mun bé jrá ja ngua lɔ mɛn’n nun lɔ. Á wá lá be mɔ b’a wlaman be klɛn’n be afiɛn, a nin be mɔ be fali tokofi kunnin be’n yɛ amún yó sɔ-ɔ. Sa ng’ɔ́ wá jú Faraɔn nin i sran kpanngban’m be su’n yɛ ɔ o lɛ-ɔ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”