1 Famiɛn Mun

17 Cɛn kun’n, Eli*+ m’ɔ ti Tisibefuɛ’n, m’ɔ tran Galaadi’n,+ ɔ ko seli Akabu kɛ: “N kan Zoova m’ɔ ti Izraɛli Ɲanmiɛn’n, mɔ n su i’n,* afuɛ nga bé bá yɛ’n be nun’n bɔlɛ su guaman naan se kɛ nzue yɛ ɔ́ tɔ́-ɔ, saan ndɛ w’a fin min nuan w’a fite.”+

2 Zoova seli Eli kɛ: 3 “Jaso wa, kɔ wia afiliɛ lɔ naan ko fia Keriti Kongo’n nun lɔ, Zurdɛn’n i wia afiliɛ lɔ. 4 Nɔn nzue ba’n i nun nzue’n wie, kpɛkun ń má sé kɔkɔkuankuan mun naan be ko man wɔ aliɛ lɔ.”+ 5 Eli ka lɛ ɔli, yɛ ɔ yoli like nga Zoova seli i kɛ ɔ yo’n. Ɔ ɔli ko trannin Keriti Kongo’n nun lɔ, Zurdɛn’n i wia afiliɛ lɔ. 6 Kɔkɔkuankuan’m be blɛ i kpanwun nin nnɛn nglɛmun, kpɛkun be blɛ i kpanwun nin nnɛn nnɔsua, yɛ ɔ nɔn nzue ba’n i nun nzue’n wie.+ 7 Kɛ ɔ́ kɔ́ i ɲrun’n, nzue ba’n wieli nun,+ afin nzue tɔman mɛn’n nun.

8 Ɔ maan Zoova seli Eli kɛ: 9 “Jaso kɔ Sarɛpta m’ɔ o Sidɔn lɔ’n su, yɛ tran lɔ. Ń má sé angbeti bla kun m’ɔ tran lɔ’n kɛ ɔ man wɔ aliɛ.”+ 10 Ɔ maan ɔ jaso ɔli Sarɛpta. Kɛ ɔ juli klɔ’n i anuan’n nun lɛ’n, ɔ wunnin angbeti bla kun, ɔ su isa yie. Ɔ flɛli bla’n kpɛkun ɔ seli i kɛ: “Yaci, blɛ min nzue kan klowa kun nun maan n nɔn.”+ 11 Kɛ bla’n kɔ́ nzue’n i salɛ’n, ɔ seli i kɛ: “Yaci, fa kpanwun kan tra nun blɛ min.” 12 Bla’n tɛli i su kɛ: “N kan ɔ Ɲanmiɛn Zoova, n leman kpanwun. Saan sanmlɛn sa buɛ kun yɛ n le i-ɔ, ɔ o sɛ dan kun nun. Yɛ n le ngo kan sɛ kaan kun nun.+ N su kunndɛ yie kan naan ń kɔ́ kó tɔ́n naan e nin min wa’n é dí, kpɛkun é mínndɛ wie’n.”

13 Eli seli i kɛ: “Nán srɛ kun wɔ. Kɔ ko yo nga a kannin’n. Sanngɛ dun mmua fa ng’ɔ o lɛ’n tɔn kpanwun kukluku kun blɛ min. I sin’n, a kwla tɔn a nin ɔ wa’n amun aliɛ liɛ. 14 Afin ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Sɛ dan’n i nun sanmlɛn’n su wieman, yɛ sɛ kaan’n i nun ngo’n su wieman, lele saan Zoova w’a yo maan nzue’n w’a tɔ asiɛ’n su.’”+ 15 Bla’n ɔli, ɔ niannin ndɛ nga Eli kannin’n su yoli. Kpɛkun bla’n nin i awlofuɛ mun be nin Eli be ɲannin like be dili i cɛn kpanngban.+ 16 Sɛ dan’n i nun sanmlɛn’n w’a wieman, yɛ sɛ kaan’n i nun ngo’n w’a wieman, kɛ nga Zoova sinnin Eli i lika fa kannin’n sa.

17 Kɛ ɔ cɛli kan’n, cɛn kun’n bla nga i liɛ yɛle sua’n i wa’n i wunnɛn wa yoli i ya. I wunnɛn ya sɔ’n wa yoli kekle kpa, kpɛkun ɔ wuli.*+ 18 Bla’n seli Eli kɛ: “?Ɲanmiɛn Kpli i sran, ngue sa yɛ n yoli wɔ-ɔ? ?A bali kɛ á yó naan min wla kpɛn min sa tɛ’m be su naan á kún min wa’n?”+ 19 Sanngɛ ɔ seli bla’n kɛ: “Fa ɔ wa’n man min.” Ɔ fali ba’n bla’n i sa nun, kpɛkun ɔ fɛ i ɔli sua’n i ti su nglo lɔ sua ba’n nun kan ɔ sike lɔ’n. Ɔ fali ba’n lɛli i i bɔbɔ i bɛ’n su.+ 20 Ɔ srɛli Zoova seli kɛ: “?Ee Zoova, min Ɲanmiɛn,+ bla m’ɔ sikeli min’n, á kún i wa’n naan ɔ wun ɲrɛnnɛn ekun?” 21 I sin’n, Eli lali ba’n su kpɛ nsan, kpɛkun ɔ srɛli Zoova seli kɛ: “Ee Zoova, min Ɲanmiɛn, yaci, yo maan ba’n sɛ i sin nguan nun.” 22 Zoova tieli Eli i srɛlɛ’n,+ ɔ maan ba’n sɛli i sin nguan nun ekun.+ 23 Eli fali ba’n sua’n i ti su nglo lɔ sua ba’n nun jrali, ɔ fɛ i ko mɛnnin i nin sua’n nun lɔ. Kpɛkun Eli seli bla’n kɛ: “Nian, ɔ wa’n i ɲin o su.”+ 24 Bla’n seli Eli kɛ: “Siɛn’n, m’an wun kɛ a ti Ɲanmiɛn i sran sakpa,+ yɛ Zoova i ndɛ nga a kan’n ɔ ti nanwlɛ.”