Ɲanndra Mun

5 Min wa, fa ɔ ɲin sie i min ngwlɛlɛ ndɛ’m be su kpa.

Sie ɔ su kpa naan tie sa wlɛ wunlɛ’n+ i su like nga n kle’n.

 2 I liɛ’n, á nían wafa nga a bu akunndan’n su,

yɛ ndɛ ng’ɔ́ fín ɔ nuan fíte’n, ɔ́ yó nanwlɛ tititi.+

 3 Afin bla ng’ɔ tranman diin’n* i nuan nun ndɛ’n ti nɛnkɛnnɛnkɛn kɛ awɛma nzue sa,+

i nuan nun yo fɛ tra ngo.+

 4 Sanngɛ i agualiɛ su’n, ɔ yo wi kɛ ijre wiwi wie sa+

yɛ ɔ la kɛ tokofi m’ɔ lɛ i ɲrun lɛ i sin’n sa.+

 5 I ja’m be fa wie’n i atin’n.

Ajalɛ ng’ɔ́ tú i lɛ’n, Ndia’n* nun lɔ trele yɛ ɔ su kɔ-ɔ.

 6 Ɔ buman nguan’n i atin’n i akunndan bɔɔ kaan sa.

Ɔ wlanwlan sa daan, sanngɛ ɔ siman wafa nga i bo’n gúa mɛ́n i’n.

 7 I sɔ’n ti’n, min wa,* sie ɔ su,

nán kpalo ndɛ nga n kan’n.

 8 Kɛ i wun mmua.

Nán mɛntɛn i sua’n i anuan’n i koko,+

 9 i liɛ’n, sran wie su sokpaman wɔ,+

yɛ a su wunman ɔ ɲrun lelele naan w’a wu.*+

10 I liɛ’n, sran nga a siman be’n be su fɛnman ɔ bo ninnge mun,+

yɛ like nga a fɛli lele naan w’a ɲɛn i’n, ɔ su juman aofuɛ wie i sua’n nun lɔ.

11 Sɛ w’a yoman sɔ’n, kɛ á wá wú’n á kplín lelele,

afin á yó fakafaka yɛ ɔ wunnɛn wunmuan’n wíewíe,+

12 yɛ á sé kɛ: “?Ngue ti yɛ m’an kloman fɔ tulɛ’n niɔn?

?Ngue ti yɛ m’an kloman kɛ be ijɔ min-ɔn?

13 M’an sieman min su min like klefuɛ’m be nuan bo,

yɛ m’an nianman be nga be kle min like’n be lɔ.

14 Yɛ min yɛ m’an kuakua mlɔnmlɔn

sran nga b’a yia’n be kwlaa be afiɛn yɛ.”+

15 Nɔn nzue ng’ɔ fin ɔ bɔbɔ ɔ nzue guawlɛ’n nun’n,

nin ɔ bɔbɔ ɔ gbo’n nun nzue ng’ɔ ɲrɛn’n.*+

16 ?Sɛ ɔ nzue ti’m be ɲrɛnɲrɛn gua su lɔ

naan ɔ nzue ba’m be sonjisonji klɔ’n i gua’m be su’n, i klanman lika’n yɛle benin?+

17 Maan be yo ɔ ngunmin ɔ like,

nán a nin sran nga a siman be’n be cɛ nun.+

18 Maan Ɲanmiɛn yra ɔ nzue ti’n su,

yɛ maan a nin ɔ gbanflɛn nun bla’n be di aklunjɔɛ.+

19 Ɔ ti kɛ flete klanman kpa kun sa, kɛ oka su boli klanman kun sa.+

Maan i wunflɛn’m be man ɔ aklunjɔɛ tititi.

Maan i klolɛ’n tran ɔ awlɛn’n nun titi.+

20 ?I sɔ’n ti’n, min wa, ngue ti yɛ ɔ awlɛn’n kó trán bla ng’ɔ tranman diin’n*

i su yɛ?

?Ngue ti yɛ á kó kán bla ng’ɔ ti bian kunndɛfuɛ’n* i wunflɛn’n nun ngowa yɛ?+

21 Afin Zoova i ɲinma ta ajalɛ nga sran kun fa’n.

Ɔ niannian like kwlaa ng’ɔ yo’n i kpa.+

22 Klunwifuɛ’n i fɔnlɛ ng’ɔ fɔn’n, ɔ ti kɛ aya wie yɛ w’a trɛ i sa,

i sa tɛ’m be kaci kɛ ɲanman wie yɛ w’a ci i sa.+

23 Fɔ nga be tuli i mɔ w’a faman su’n ti’n, ɔ́ wú,

yɛ sinnzin mɔ w’a di i buɛ’n ti’n, ɔ́ mlín.