2 Famiɛn Mun
19 Kɛ Famiɛn Ezekiasi tili ndɛ sɔ’n, ɔ titili i wun tralɛ’m be nun, ɔ fali bajɛ tralɛ kɛtɛli i wun, kpɛkun ɔ ɔli Zoova i sua’n nun lɔ.+ 2 I sin’n, ɔ sunmannin Eliakimun m’ɔ nian famiɛn’n i awlo’n* su’n, nin Sɛbna m’ɔ ti fluwa klɛfuɛ’n, ɔ nin Ɲanmiɛn ɲrun jranfuɛ’m be su kpɛn mun naan be ko wun Amɔzu i wa Ezai+ m’ɔ ti Ɲanmiɛn nuan ijɔfuɛ’n i wun. Kɛ bé kɔ́’n, bajɛ tralɛ kata be wun. 3 Be seli i kɛ: “Ndɛ nga Ezekiasi kan’n yɛ: ‘Andɛ cɛn liɛ’n ti awlabɔɛ cɛn, ɔ ti fɔ tulɛ* cɛn, yɛ ɔ ti ɲin ase gualɛ cɛn. Afin e ti kɛ bla kun mɔ i ba wulɛ blɛ’n w’a ju mɔ sanngɛ ɔ leman wunmiɛn naan w’a wu ba’n sa.+ 4 Atrɛkpa’n, ɔ Ɲanmiɛn Zoova wá tí ndɛ kwlaa nga Rabusake’n mɔ Asiri famiɛn’n sunmɛnnin i kɛ ɔ wa klɔklɔ Ɲanmiɛn m’ɔ lafiman’n+ ɔ kannin’n. Kpɛkun ndɛ sɔ m’ɔ kannin mɔ ɔ Ɲanmiɛn Zoova tili’n ti’n, ɔ́ wá tú i fɔ. I sɔ’n ti’n, srɛ Ɲanmiɛn+ man be nga be kali lɛ’n.’”
5 Ɔ maan Famiɛn Ezekiasi i sufuɛ’m be ɔli Ezai i sin.+ 6 Ezai seli be kɛ: “Ndɛ ng’ɔ fata kɛ amun kan kle amun min’n yɛ: ‘Ndɛ nga Zoova kan’n yɛ: “Nzowa nga Asiri famiɛn’n i sufuɛ’n kpɛli min mɔ a tili’n,+ nán maan ɔ kun wɔ srɛ.+ 7 Ń má fá akunndan kun ń wlɛ́ i ti nun,* ɔ́ wá tí ndɛ kun kpɛkun ɔ́ sɛ́ i sin i mɛn’n nun lɔ. Yɛ ń má yó maan bé fá tokofi bé kún i, i bɔbɔ i mɛn’n nun lɔ.”’”+
8 Kɛ Rabusake’n tili i kɛ Asiri famiɛn’n w’a jaso Lakisi+ lɛ’n, ɔ sɛli i sin i wun lɔ. Kɛ ɔ́ jú lɔ’n, nn ɔ nin Libinafuɛ mun+ be su kun alɛ. 9 Famiɛn’n tili i kɛ Famiɛn Tiraka m’ɔ ti Etiopi famiɛn’n, ɔ su ba naan ɔ nin i bé wá kún alɛ. Ɔ maan ɔ sunmannin sran+ Ezekiasi sin ekun. I waan: 10 “Ndɛ ng’ɔ fata kɛ amun kan kle Ezekiasi m’ɔ ti Zida famiɛn’n yɛ: ‘Nán maan ɔ Ɲanmiɛn mɔ a fa ɔ wla’n guɛ i su’n ɔ laka wɔ. Ɔ se wɔ kɛ: “Asiri famiɛn’n su faman Zerizalɛmun klɔ’n.”+ 11 Nian, a si like nga Asiri famiɛn’m be fa yoli nvle’m be kwlaa’n, be nunnunnin be.+ ?A bu i kɛ ɔ liɛ’n, á wá fín nun fíte? 12 ?Nvle nga min nannan’m be nunnunnin be’n be ɲanmiɛn’m be deli be? ?Gozan nin Aran+ nin Rezɛfu, ɔ nin Edɛninfuɛ mɔ be o Tɛlasaa’n be o nin? 13 ?Amati famiɛn’n nin Aapadi famiɛn’n nin Sefavaimun klɔ’m be famiɛn’n, ɔ nin Ena famiɛn’n nin Iva famiɛn’n be o nin?’”+
14 Ezekiasi fali fluwa mun sran nga be sunmannin be’n be sa nun yɛ ɔ kanngannin be nun. I sin’n, ɔ ɔli Zoova i sua’n nun lɔ, kpɛkun ɔ trɛtrɛli be nun* Zoova i ɲrun lɛ.+ 15 Kpɛkun Ezekiasi srɛli+ Zoova, ɔ seli kɛ: “Ee, Zoova, Izraɛli Ɲanmiɛn, wɔ mɔ a ti famiɛn bia m’ɔ o seribɛn’m be ti su nglo’n*+ su’n, ɔ kunngba cɛ yɛ a ti Ɲanmiɛn Kpli asiɛ’n su famiɛn diwlɛ’m be kwlaa be su-ɔ.+ Wɔ yɛ a yili nglo’n nin asiɛ’n niɔn. 16 Zoova, sie ɔ su naan tie!+ Zoova, uke ɔ ɲin naan nian!+ Tie ndɛ nga Sankeribu kannin fa klɔklɔli wɔ mɔ a ti Ɲanmiɛn m’ɔ lafiman’n. 17 Zoova, ɔ ti su kɛ Asiri famiɛn’m be sacili nvlenvle mun, be sacili be mɛn’n wie.+ 18 Yɛ be guali be amuin ba mun sin nun, afin be timan ɲanmiɛn,+ be ti sran sa nuan like,+ be ti waka nin yɔbuɛ. I sɔ’n ti yɛ be kwla nunnunnin be-ɔ. 19 Siɛn’n, e Ɲanmiɛn Zoova, yaci, de e i sa nun. I liɛ’n, asiɛ’n su famiɛn diwlɛ’m be kwlaa bé sí kɛ wɔ Zoova, ɔ kunngba cɛ yɛ a ti Ɲanmiɛn’n niɔn.”+
20 Amɔzu i wa Ezai kannin ndɛ yɛ’n kleli Ezekiasi. Ɔ seli i kɛ: “Ndɛ nga Zoova m’ɔ ti Izraɛli Ɲanmiɛn’n ɔ kan’n yɛ: ‘N tili srɛlɛ+ mɔ Asiri famiɛn Sankeribu ti’n a srɛli min’n.+ 21 I wun ndɛ nga Zoova kannin’n yɛ:
“Siɔn i wa bla m’ɔ nin-a siman bian’n ɔ buman wɔ like fi, ɔ sri wɔ.
Zerizalɛmun i wa bla’n kejekeje i ti’n ɔ su.
22 ?Wan yɛ a klɔklɔli i mɔ a kpɛli i nzowa’n niɔn?+
?Wan su yɛ a kpankpannin’n niɔn?+
?Yɛ wan yɛ a kpɛli i kannglɛ’n niɔn?
Izraɛli Ɲanmiɛn m’ɔ ti Sanwun’n niɔn!+
23 A sinnin be nga a sunmannin be’n+ be lika klɔklɔli Zoova,+ a seli kɛ:
‘Ń fá min alɛ kunlɛ kakaklolo mɔ be sɔnnin kpa’n,
ń fú oka’m be ti su nglo lɔ,
ń kɔ́ Liban i likalika nga be o mmua kpa’n be nun,
ń kpɛ́kpɛ́ sɛdri waka fleiin kpa mun, ɔ nin zenevrie waka kpakpa mun.
Ń kɔ́ fiawlɛ nga be o mmua kpa’n be nun, ɔ nin bo ble’m be nun.
24 Ń má kpɛ́ gbo mun, yɛ ń nɔ́n be nun nzue.
Min ja mɔ ń tíɛ i sa’n, ɔ́ yó maan Ezipti lɔ nzue ba’m* be kwlaa bé wíe nun.’
25 ?W’a timan ndɛ sɔ’n? N sunnzunnin* sa sɔ’n w’a cɛ.+
N siesieli w’a cɛ.+
Siɛn’n, n su wa yo naan ɔ kpɛn su.+
Á wá yó maan klɔ nga be sisili be wun’n bé káci yɔbuɛ kwle, sran fi su tranman lɔ kun.+
26 Klɔ sɔ’m be sufuɛ’m be su kwlá yoman like fi.
Srɛ kún be dan kpa, yɛ be ɲin gúa ase.
Bé yó kɛ fie su lɔ nɲanɲa mun nin ijre mun sa,+
bé yó kɛ sua su ijre mɔ wia afiliɛ lɔ aunmuan’n yo maan ɔ wu kee’n sa.
27 Sanngɛ n si blɛ mɔ a tran ase’n nin blɛ mɔ a fite’n, ɔ nin blɛ mɔ a wlu’n,+
ɔ nin blɛ mɔ a fa ya min wun’n i kpa.+
28 Afin min wun ya nga a fali’n,+ ɔ nin kpanlɛ mɔ a kpan kɛ asɔmɔli sa’n, b’a gua min su nun.+
Ɔ maan ń má wlá ɔ bue
nun nga, yɛ ń wlá ɔ nuan nun nga,+
kpɛkun ń fá wɔ ń sín atin kunngba nga a fa bali’n su, ń fá wɔ ń sá ɔ sin.”+
29 “‘Nzɔliɛ nga á* wá fá sí kɛ sa sɔ’n wá kpɛ́n su’n yɛ: Afuɛ nga nun’n, ninnge nga be bɔbɔ be fifili’n, be su mma mun yɛ amún dí-ɔ. I afuɛ nɲɔn su’n nun’n, ninnge sɔ’m be su mma nga be tɔli mɔ be fifili’n, be su mma mun yɛ amún dí-ɔ.+ Sanngɛ afuɛ nsan su’n nun’n, amún lúa like yɛ amún títí i su mma, amún dí viɲin fie, yɛ amún dí be su mma mun.+ 30 Zida awlo’n nunfuɛ nga bé ɲán be ti mɔ bé ká lɛ’n,+ be olui’n ɔ́ wlú asiɛ’n nun kpa, kpɛkun bé sú mma. 31 Afin be nga be o Zerizalɛmun’n be nun wie’m bé ká lɛ, yɛ Siɔn Oka’n sufuɛ wie’m bé fín nun fíte. Zoova m’ɔ ti sonja’m be su kpɛn’n, ɔ́ wá wlɛ́ i wun ase yó sa sɔ’n.+
32 “‘I sɔ’n ti’n, ndɛ nga Zoova kɛn i Asiri famiɛn’n i wun’n yɛ:+
“Ɔ su wluman klɔ nga nun,+
ɔ su toman ta mma kun sa wa,
ɔ su faman ɲrɛn kun sa baman klɔ nga nun kɛ ɔ́ kún alɛ, yɛ ɔ su kplanman like fleiin kun klɔ’n i wun kɛ ɔ́ jrán su kún alɛ.+
33 Atin ng’ɔ fa bali’n, i kunngba’n yɛ ɔ́ fá sɛ́ i sin-ɔn.
Ɔ su wluman klɔ nga nun,” ndɛ nga Zoova kan’n yɛ ɔ o lɛ-ɔ.
34 “Ń kplí klɔ nga i ti,+ yɛ ń dé i min bɔbɔ min dunman nun,+
ɔ nin min sufuɛ Davidi i dunman nun.”’”+
35 Kɔnguɛ kunngba sɔ’n nun’n, Zoova i anzi’n ɔli Asirifuɛ’m be nanmue’n nun lɔ, ɔ ko kunnin sran akpiakpi ya akpiakpi ablaɔcuɛ-nin-nnun (185.000).+ Kɛ be jasoli nglɛmun ndɛ kpa’n, lika’n nun ti fuɛn ngunmin.+ 36 Ɔ maan Famiɛn Sankeribu m’ɔ ti Asiri famiɛn’n ɔli, ɔ sɛli i sin Ninivu+ lɔ, yɛ ɔ kali lɔ.+ 37 Cɛn kun’n, kɛ ɔ ko kotoli i amuin Nisrɔku i sua’n nun lɔ’n, i bɔbɔ i wa Adramelɛki nin Sarezɛɛ be fali tokofi be kunnin i.+ I sin’n, be wanndi ɔli Ararati mɛn’n nun lɔ.+ Yɛ i wa Eza-Adɔn+ sinnin i osu kacili famiɛn.