2 Samiɛli

18 Davidi kali i sonja mun. Kpɛkun ɔ sieli sonja akpi su kpɛn mun nin sonja ya su kpɛn mun sɛsɛsɛ.+ 2 Davidi buli i sran’m be nun akpasua nsan. Ɔ sieli Zoabu+ akpasua kun su kpɛn. Ɔ sieli Zeruya+ i wa Abisai+ m’ɔ ti Zoabu i niaan bian’n akpasua kun su kpɛn. Yɛ ɔ sieli Itai+ m’ɔ ti Gatifuɛ’n akpasua kun su kpɛn. Kpɛkun famiɛn’n seli be kɛ: “E nin amun é kɔ́.” 3 Sanngɛ be seli kɛ: “Nán kɔ wie.+ Afin sɛ e wanndi be bo’n, be su nianman e lɔ. Sɛ be bu e sonja’m be nun nɲɔn naan be kun e bue kun bɔbɔ’n, be su bumɛn i like. Afin a le ɲrun tra e nun sran akpiakpi blu (10.000).+ I sɔ’n ti’n, sɛ a ka klɔ wa naan a blɛ e ukafuɛ’n, ɔ ti kpa.” 4 Yɛ famiɛn’n seli be kɛ: “Like nga amun klo kɛ n yo’n, ń yó.” Kpɛkun ɔ ko trannin klɔ’n i anuan’n i wun lɛ. I sin’n, sonja’m be kwlaa be fiteli akpasuaakpasua. Wie’m be ti ya (100), yɛ wie’m be ti akpi (1.000). 5 Famiɛn’n seli Zoabu nin Abisai ɔ nin Itai be kɛ: “Min dunman nun ti’n, amun yo min wa Absalɔmun i blɛblɛ.”+ Kɛ famiɛn’n kán Absalɔmun liɛ’n klé sonja’m be su kpɛn mun’n, sonja’m be kwlaa be tili.

6 Sonja’m be ɔli naan be nin Izraɛlifuɛ’m bé kó kún. Efraimunfuɛ’m be bo’n nun lɔ yɛ be ko kunnin alɛ’n niɔn.+ 7 Davidi i sran’m+ be kwlali Izraɛlifuɛ mun.+ Be kunnin sran akpiakpi ablaɔn (20.000). Nanwlɛ, sran kpanngban kpa be wuli cɛn sɔ’n nun. 8 Alɛ’n truli lika wunmuan’n nun. Cɛn sɔ’n nun’n, be nga bo’n dili be’n, be sɔnnin tra be nga be fali tokofi kunnin be’n.

9 Kɛ bé kún alɛ’n kɔ́’n, Absalɔmun nin Davidi i sran’m be wa yiali nun. Kɛ ɔ́ yó sɔ’n, nn Absalɔmun ti nnɛn nga be flɛ i milɛ’n kun su. Kɛ milɛ’n wánndi sín waka dan kun bo’n, Absalɔmun i ti ndrɛ’n satali waka’n i sama’m be nun. Ɔ maan ɔ sendeli nglo* lɛ, kpɛkun milɛ ng’ɔ ti su’n i ngunmin ɔli. 10 Sran kun wunnin i naan w’a ko se Zoabu+ kɛ: “Nian! Absalɔmun sende waka dan kun su lɔ.” 11 Zoabu tɛli sran sɔ’n su kɛ: “?Sɛ a wunnin i’n, ngue ti yɛ w’a kunmɛn i naan w’a flo w’a tɔ asiɛ wun-ɔn? Sɛ ɔ ti kɛ a kunnin i sa’n, nn n cɛli wɔ sika mma blu ɔ nin kplo nga be fa ci be bo’n kun.” 12 Sanngɛ bian’n seli Zoabu kɛ: “Sɛ be man min sika mma akpi (1.000) bɔbɔ’n, n sa su kanman famiɛn’n i wa’n. Afin e tili ndɛ nga famiɛn’n kan kle wɔ nin Abisai ɔ nin Itai’n. Ɔ seli kɛ: ‘Amun kwlaa amun nian amun wun, amun sasa min wa Absalɔmun.’+ 13 Sɛ ɔ ti kɛ m’an faman ndɛ sɔ’n su naan n kunnin i’n, saan bé kán klé famiɛn’n. Yɛ ɔ kusu, a su jranman min sin.” 14 Zoabu tɛli i su kɛ: “Nian, nán bo min kokowa!” Kpɛkun ɔ fali ta mma* nsan naan w’a fa be w’a kplan Absalɔmun i awlɛn ba’n nun. Kɛ ɔ́ yó sɔ’n, nn i ɲin te o su, yɛ ɔ te sende waka dan’n su lɛ. 15 Kpɛkun sonja blu nga be tra Zoabu i alɛ ninnge’m be nun’n be bali naan b’a finfin Absalɔmun i like lele b’a kun i.+ 16 Kɛ ɔ yoli sɔ’n, Zoabu fitali awɛ’n nun, kpɛkun i sran’m be yacili Izraɛlifuɛ’m be su sulɛ. Afin ɔ seli be kɛ be jran. 17 I sin’n, be fali Absalɔmun i saka’n be to yili i bo’n nun lɔ kunman dan kun nun. Kpɛkun be suali yɔbuɛ guɛli i su lele ɔ yoli yɔbuɛ kwle dan kpa kun.+ Sanngɛ Izraɛlifuɛ’m be liɛ’n, be kwlaa be wanndi ɔli be awlo.

18 I nun nga Absalɔmun i ɲin te o su’n, ɔ seli kɛ: “N leman ba yasua, ɔ maan ɔ cɛman naan min dunman’n w’a mlin.”+ I sɔ’n ti’n, ɔ takali yɔbuɛ dan kun Famiɛn Kongo’n*+ nun lɔ. Kpɛkun ɔ fɛli i bɔbɔ i dunman’n sieli i yɔbuɛ sɔ’n su. Andɛ nin andɛ’n, be flɛ i kɛ Absalɔmun i Yɔbuɛ’n.

19 Zadɔku i wa Aimaazi+ seli kɛ: “Yaci, man min atin naan n wanndi n wɔ ndɛndɛ n ko kan jasin’n n kle famiɛn’n. Afin Zoova kɛnnin i ti ndɛ, ɔ deli i i kpɔfuɛ’m be sa nun.”+ 20 Sanngɛ Zoabu seli i kɛ: “Andɛ liɛ’n, a su kanman jasin fi. Cɛn uflɛ’n, a ko kan. Sanngɛ a su kanman jasin fi andɛ, afin famiɛn’n i klun ba’n yɛ ɔ wuli-ɔ.”+ 21 Yɛ Zoabu seli Kisifuɛ+ kun kɛ: “Ko kan like nga a wunnin i’n i ndɛ kle famiɛn’n.” Kisifuɛ’n kotoli Zoabu bo naan w’a wanndi w’a ɔ. 22 Zadɔku i wa Aimaazi seli Zoabu ekun kɛ: “Sɛ sa ɲán min’n, maan ɔ ɲan min. Ɔ li yaci, man min atin naan n wanndi n su Kisifuɛ’n su.” Sanngɛ Zoabu seli kɛ: “?Min wa, ngue ti yɛ ɔ waan á wánndi kɔ́ lɔ-ɔ? ?Ngue ndɛ yɛ á kó kán-ɔn?” 23 Sanngɛ Aimaazi seli kɛ: “Sɛ sa ɲán min’n, maan ɔ ɲan min. Ɔ li man min atin naan n wanndi n su i su.” Ɔ maan Zoabu seli i kɛ: “Yoo, kɔ!” Yɛ Aimaazi wanndi ɔli-ɔ. Ɔ fali atin ng’ɔ kɔ Zurdɛn asa’n su lɔ’n, kpɛkun ɔ ko buli Kisifuɛ’n i wun.

24 Kɛ ɔ́ yó sɔ’n, nn Davidi o klɔ’n i anuan ng’ɔ fite gua su lɔ’n nin anuan ng’ɔ fite klɔ’n nun lɔ’n be afiɛn’n nun lɛ.+ Klɔ sasafuɛ’n+ fuli klɔ’n i anuan ng’ɔ nin talɛ’n be sa su’n i ti su nglo lɔ. Ɔ́ nían-ɔn, sran kun su wanndi ba. 25 Klɔ sasafuɛ’n flɛli famiɛn’n naan w’a kan w’a kle i. Yɛ famiɛn’n seli kɛ: “Sɛ i kunngba yɛ ɔ ba’n, nn ɔ su ba jasin bolɛ.” Kɛ bian’n juli klɔ’n i wun koko’n, 26 klɔ sasafuɛ’n nían-ɔn, sran kun ekun yɛ ɔ́ wánndi bá yɛ. Ɔ seli anuan sunianfuɛ’n kɛ: “Nian! Sran kun ekun su wanndi ba!” Yɛ famiɛn’n seli kɛ: “I kusu su ba jasin bolɛ wie.” 27 Klɔ sasafuɛ’n seli kɛ: “Sran ng’ɔ dun mmua’n, ɔ fa Zadɔku i wa Aimaazi.”+ Yɛ famiɛn’n seli kɛ: “Ɔ ti sran kpa. Ndɛ fɛ o i nuan.” 28 Aimaazi kpan seli famiɛn’n kɛ: “E wun ti kpa!” Kpɛkun ɔ utuli i ɲin ase famiɛn’n i bo lɛ, naan w’a se ekun kɛ: “Famiɛn, maan e la Zoova m’ɔ ti ɔ Ɲanmiɛn’n i ase. Afin ɔ fali be nga be jasoli ɔ wun’n wlali ɔ sa nun.”+

29 Sanngɛ famiɛn’n usali kɛ: “?Min wa Absalɔmun i wun ti kpa?” Aimaazi tɛli i su kɛ: “Kɛ Zoabu súnman e nin ɔ sufuɛ kun’n, nn lika’n w’a keje yekee. Sanngɛ n siman sa nga ti yɛ lika’n kejeli sɔ’n.”+ 30 Ɔ maan famiɛn’n seli kɛ: “Yoo, jran bue kun wa.” Yɛ ɔ ko jrannin bue kun lɔ-ɔ.

31 I sin’n, Kisifuɛ’n juli lɛ+ naan w’a se kɛ: “Famiɛn, jasin ng’ɔ o min nuan’n yɛ: Andɛ’n, Zoova kannin ɔ ti ndɛ, ɔ deli wɔ be kwlaa nga be jasoli ɔ wun’n be sa nun.”+ 32 Sanngɛ famiɛn’n usali Kisifuɛ’n kɛ: “?Min wa Absalɔmun i wun ti kpa?” Ɔ tɛli i su kɛ: “Famiɛn, ɔ kpɔfuɛ mun nin be kwlaa nga be jasoli ɔ wun naan bé yó ɔ like yaya’n, maan awieliɛ’n wie be kɛ ɔ wa’n i liɛ’n sa.”+

33 Ndɛ sɔ’n boli famiɛn’n i wla. I sɔ’n ti’n, ɔ ɔli sua ba ng’ɔ o klɔ’n i anuan’n i ti su nglo lɔ’n nun. Kɛ ɔ́ nánti’n, nn ɔ́ sún, nn ɔ́ sé kɛ: “Min wa Absalɔmun e! Ɔo, min wa’n nin-o! Min wa Absalɔmun e! Sɛ ɔ ti kɛ min yɛ n wuli naan a kali lɛ’n, nn ɔ flunman!”+