Rɔmunfuɛ Mun

9 Kɛ mɔ n ti Klisi i sɔnnzɔnfuɛ’n ti’n, n di nanwlɛ, n buaman ato, Ɲanmiɛn wawɛ’n maan min akunndan’n kle min sɔ weiin: 2 Min wla w’a bo min wun dan, yɛ min awlɛn kpɛ min klun titi. 3 N kunndɛ kɛ e nin Klisi e afiɛn ti nun naan be bo min sannzan, naan ń úka min niaan mɔ e nin be e fin nvle kunngba’n nun’n. 4 Min niaan sɔ mun yɛle Izraɛlifuɛ mun. Ɲanmiɛn fa be kacili i wa,+ ɔ yoli maan be ɲannin ɲrun, kpɛkun ɔ nin be trali aenguɛ.+ Ɔ fali Mmla’n mannin be,+ yɛ ɔ mannin be atin kɛ be su i,+ kpɛkun ɔ tali be nda.+ 5 Be ti e nannan’m be wa,+ yɛ Klisi ti be wa wie.+ Maan manmanlɛ’n yo Ɲanmiɛn m’ɔ o like kwlaa ti su’n i liɛ tititi. Maan ɔ yo sɔ.

6 Sanngɛ nán kɛ ndɛ nga Ɲanmiɛn kannin’n w’a kpɛnman su ti-ɔ. Afin be nga Izraɛli wuli be’n nán be kwlaa yɛ be ti Izraɛlifuɛ sakpa-ɔ.+ 7 Asa kusu’n, nán be ngba yɛ be ti Abraamun i wa-ɔ.+ I kpa bɔbɔ’n be klɛli i kɛ: “Be nga bé flɛ́ be kɛ ɔ osu’n nunfuɛ mun’n, bé fín Izaaki.”+ 8 Yɛle kɛ nán Abraamun i klun ba’m be ngba yɛ be ti Ɲanmiɛn i mma mun sakpa-ɔ.+ Sanngɛ nda nga Ɲanmiɛn tali’n ti’n ba nga be wuli be’n,+ be yɛ be ti Abraamun i mma mun Ɲanmiɛn ɲrun-ɔn. 9 Afin Ɲanmiɛn tali nda seli kɛ: “Blɛ kunngba nga nun’n ń bá, yɛ Sara wú ba yasua kun.”+ 10 Sanngɛ nán blɛ sɔ’n nun ngunmin-ɔn. I nun nga Rebeka wunnzɛli nda mun’n, Ɲanmiɛn tali nda wie. Ba sɔ’m be si yɛle e nannan Izaaki.+ 11 Kɛ ɔ́ tá nda sɔ’n, nn be nin-a wuman be bɔbɔ naan se kɛ bé sí sa kpa nin sa tɛ’n. Sa sɔ’n yoli sɔ naan y’a wun i wlɛ weiin kɛ, kɛ Ɲanmiɛn fɛ i sa sie sran kun su’n, ɔ finman like nga sran’n yo’n, sanngɛ ɔ fin i bɔbɔ m’ɔ flɛ sran’n. 12 Ɲanmiɛn seli bla’n kɛ: “Kpɛnngbɛnfuɛ’n, ɔ́ yó i sinma’n i kanga.”+ 13 I sɔ kusu yɛ be klɛli-ɔ. Be klɛli i kɛ: “N kloli Zakɔbu, sanngɛ Ezau liɛ’n n kpɔli i.”+

14 ?Ɔ maan, é sé sɛ? ?É sé kɛ Ɲanmiɛn yoman sa i nuan su? Cɛcɛ!+ 15 Afin ɔ seli Moizi kɛ: “Sran nga n klo kɛ ń sí i aunnvɔɛ’n, ń sí i aunnvɔɛ. Yɛ sran nga n klo kɛ ń yó i ye’n, ń yó i ye.”+ 16 Ɔ maan i sɔ’n finman sran’n i like ng’ɔ klo kɛ ɔ́ yó’n annzɛ i wunmiɛn’n, sanngɛ ɔ fin Ɲanmiɛn m’ɔ si sran aunnvɔɛ’n.+ 17 Afin Ɲanmiɛn ndɛ’n se Faraɔn kɛ: “Like nga ti yɛ m’an kplinman su kɛ a wu’n yɛ: Ń fá wɔ ń klé kɛ n le tinmin, naan be bo min dunman’n asiɛ wunmuan’n su.”+ 18 Ɔ maan sran ng’ɔ klo kɛ ɔ́ sí i aunnvɔɛ’n, ɔ si i aunnvɔɛ. Sanngɛ sran ng’ɔ klo kɛ ɔ́ yáci i lɛ naan i awlɛn’n kete’n, ɔ yaci i lɛ.+

19 Wienun-ɔn, sran wie kwla usa kɛ: “?Yɛ nn ngue ti yɛ ɔ te bu sran’m be fɔ-ɔ? ?Yɛ wan yɛ ɔ kwla tɛnndɛn i ɲrun kɛ nán ɔ yo i klun sa’n niɔn?” 20 ?Sanngɛ wɔ, klɔ sran, a ti ɔ liɛ sɛ mɔ kɛ Ɲanmiɛn ko kɛn i ndɛ liɛ’n, ɔ kusu a kan wie-ɔ?+ ?Like nga fa yɛ be fa wuli’n, ɔ kwla se i wufuɛ’n kɛ: “Ngue ti yɛ a yoli min kɛ nga sa-ɔ”?+ 21 Sɛ wufuɛ’n ɔ fa fa ng’ɔ o i sa nun’n ɔ yo like ng’ɔ klo’n. ?Nɛ́n i-ɔ?+ Sɛ ɔ́ fá fa tɔlɛ kunngba’n ɔ́ wú sɛ kun mɔ be fa yo like kpa ngunmin annzɛ ɔ́ fá wú sɛ kun mɔ be fa yo like m’ɔ leman ɲrun’n, ɔ ti kɛ i bɔbɔ sa. ?Nɛ́n i-ɔ? 22 Ɲanmiɛn waan ɔ́ yí i ya’n i nglo klé sran mun, yɛ i waan ɔ́ klé kɛ ɔ le tinmin. Ɔ kunndɛ kɛ ɔ́ yí i ya’n i nglo klé sran sɔ mɔ be ti kɛ sɛ sa’n. Sanngɛ ɔ trɛ i awlɛn be wun, kusu nn be nin nunnunlɛ fata. 23 Ɔ yoli sɔ naan be nga be ti kɛ sɛ sa mɔ be nin aunnvɔɛ silɛ’n fata’n,+ be wun i wlɛ kɛ ɔ le ɲrun dan. Ɔ fɛli i sa sieli sran sɔ’m be su laa kɛ be ɲan ɲrun. 24 Sran sɔ mun yɛle e. Ɲanmiɛn niannin Zifu mun ɔ nin be nga be timan Zifu’n be nun ɔ flɛli e.+ ?I sɔ m’ɔ yoli’n, ɔ ti tɛ? 25 I sɔ’n yɛ ɔ kɛnnin i ndɛ Oze fluwa’n nun-ɔn. Ɔ seli kɛ: “Be nga be timan min nvle’n nunfuɛ’n,+ ń flɛ́ be ‘min nvle’n nunfuɛ.’ Yɛ bla nga b’a klomɛn i’n, bé flɛ́ i ‘bla mɔ be klo i’n.’+ 26 Kpɛkun lika nga n seli be lɛ kɛ, ‘Amun timan min nvle’n nunfuɛ’n,’ lika sɔ’n nun’n, bé wá flɛ́ amun kɛ ‘Ɲanmiɛn m’ɔ lafiman’n i mma mun.’”+

27 Asa ekun’n, Ezai sunnin Izraɛli nvle’n i ti. Ɔ seli kɛ: “Kannzɛ Izraɛlifuɛ’m be sɔnnin kɛ jenvie nuan aunɲan’n sa’n, sanngɛ be nun kaan sa yɛ bé ká lɛ-ɔ. Be yɛ bé ɲán be ti-ɔ.+ 28 Afin Zoova* wá dí jɔlɛ asiɛ’n su wa. Ɔ́ yó i sɔ gúɛ i ti nin i bo, yɛ ɔ́ yó i ndɛndɛ.”+ 29 Asa kusu’n, ɔ yoli kɛ nga Ezai fa kannin’n sa cɛ. Ɔ seli kɛ: “Sɛ Zoova* m’ɔ ti sonja’m be su kpɛn’n, w’a yaciman e osu’n nun sran wie mun lɛ w’a manman e’n, nn e kacili kɛ Sodɔmun nin Gomɔru sa.”+

30 ?Ɔ maan, é sé sɛ? É sé kɛ kannzɛ be nga be timan Zifu’n be mianman be ɲin naan Ɲanmiɛn bu be sran kpa’n,+ Ɲanmiɛn su mɔ be lafi’n ti’n, Ɲanmiɛn bu be sran kpa.+ 31 Sanngɛ Izraɛlifuɛ’m be liɛ’n, kannzɛ bɔbɔ be mian be ɲin be nanti mmla’n su naan Ɲanmiɛn bu be sran kpa’n, b’a kwlá nantiman mmla sɔ’n su lele b’a guɛmɛn i bo. 32 ?Ngue ti-ɔ? Afin be mian be ɲin be yo sa kpa naan Ɲanmiɛn bu be sran kpa, sanngɛ be lafiman Ɲanmiɛn su. Ɔ maan be ja kplali “yɔbuɛ ng’ɔ fin sran ase’n” i su+ 33 kɛ nga be fa klɛli’n sa. Be klɛli i kɛ: “An nian! N su wla yɔbuɛ kun+ m’ɔ fin sran ase’n, m’ɔ lo sran’m be ngasi’n, i ase Siɔn lɔ. Sanngɛ sran ng’ɔ lafi i su’n, i ɲin su guaman ase.”+