2 Famiɛn Mun

16 Kɛ Remalia i wa Peka kacili famiɛn’n, i afuɛ blu-nin-nso (17) su’n, Zotamun m’ɔ ti Zida famiɛn’n i wa Akazi+ kacili famiɛn. 2 Kɛ Akazi káci famiɛn’n, nn ɔ le afuɛ ablaɔn (20). Ɔ dili famiɛn afuɛ blu-nin-nsiɛn (16) Zerizalɛmun lɛ. W’a yoman like ng’ɔ ti kpa’n i Ɲanmiɛn Zoova i ɲrun kɛ nga i nannan Davidi fa yoli’n sa.+ 3 Ɔ niannin Izraɛli famiɛn’m be ajalɛ’n su nantili,+ i kpa bɔbɔ’n ɔ yrɛli i bɔbɔ i wa’n sin nun.*+ I lɛ nun’n, nvle nga Zoova fuannin be Izraɛlifuɛ’m be ɲrun’n be ninnge kainkain nga be yo’n,+ i wie yɛ ɔ yoli-ɔ. 4 Ɔ yili tɛ mun titi yɛ ɔ yrali like fa mannin amuin mun* titi lika nglonglo’m be su,+ nin kpɔlɛ’m be su, nin waka kwlaa nga be le nɲa kpanngban’n be bo.+

5 Blɛ sɔ’n nun’n, Famiɛn Rezɛn m’ɔ fin Siri’n, ɔ nin Remalia i wa Peka m’ɔ ti Izraɛli famiɛn’n, be bali kɛ be nin Zerizalɛmunfuɛ’m bé kún alɛ.+ Kɛ ɔ́ yó sɔ’n nn Akazi o lɔ. Be bo sin yiali klɔ’n, sanngɛ b’a kwlá faman. 6 Blɛ sɔ’n nun’n, Rezɛn m’ɔ ti Siri famiɛn’n fali Elati klɔ’n+ mannin Edɔmun ekun. I sin’n, ɔ fuannin Zifu mun* Elati lɔ. I sin’n, Edɔmunfuɛ’m be wa fali Elati klɔ’n. Lele nin andɛ’n be te tran lɔ. 7 Ɔ maan Akazi sunmannin sran wie mun Tiglati-Pilezɛɛ+ m’ɔ ti Asiri famiɛn’n i sin naan be ko se i kɛ: “N ti ɔ sufuɛ, yɛ n ti ɔ wa. Bla wa de min Siri famiɛn’n nin Izraɛli famiɛn mɔ b’a fa alɛ b’a wla min sin’n be sa nun.” 8 I sin’n, Akazi fali sika nin sika ɔkwlɛ ng’ɔ o Zoova i sua’n nun lɔ’n, ɔ nin ng’ɔ o famiɛn’n i sua’n nun lɔ ninnge kpakpa’m be siewlɛ’m be nun’n, kpɛkun ɔ fa ko wlali Asiri famiɛn’n i sa bo.+ 9 Asiri famiɛn’n tieli ndɛ ng’ɔ kannin’n. Ɔ ɔli Damasi, kpɛkun ɔ fali klɔ’n, ɔ trali klɔ’n nun sran mun ɔli Kii,+ yɛ ɔ kunnin Rezɛn.+

10 I sin’n, Famiɛn Akazi ɔli Damasi naan ɔ́ kó wún Tiglati-Pilezɛɛ m’ɔ ti Asiri famiɛn’n i wun. Kɛ Famiɛn Akazi wunnin tɛ yiwlɛ ng’ɔ o Damasi lɔ’n, ɔ fɛli i jajalɛ’n nin i wafa ng’ɔ ti’n, ɔ nin wafa nga be yoli’n ko mannin Iri m’ɔ ti Ɲanmiɛn ɲrun jranfuɛ’n.+ 11 Iri+ m’ɔ ti Ɲanmiɛn ɲrun jranfuɛ’n niannin ndɛ kwlaa nga kɛ Famiɛn Akazi o Damasi lɔ’n ɔ kan kleli i’n su kplannin tɛ yiwlɛ kun.+ Iri m’ɔ ti Ɲanmiɛn ɲrun jranfuɛ’n wieli i kplan ka naan Famiɛn Akazi w’a fin Damasi lɔ w’a ba. 12 Kɛ famiɛn’n fin Damasi bali m’ɔ wunnin tɛ yiwlɛ’n, ɔ wunngeli i wun lɔ, kpɛkun ɔ yili tɛ wie mun tɛ yiwlɛ’n su.+ 13 Ɔ yili tɛ nga kɛ bé yí’n be yra nnɛn’n i kɔlikɔli’n tɛ yiwlɛ sɔ’n su titi, yɛ ɔ fali ble annzɛ i wunsu like yili tɛ tɛ yiwlɛ sɔ’n su, ɔ yoli maan be wunsrɛn’n fiteli. Asa ekun’n, ɔ guali nzan tɛ yiwlɛ’n su, yɛ ɔ fali bo kun yolɛ tɛ ng’ɔ yili’n i mmoja’n kpɛntɛnkpɛntɛnnin su. 14 I sin’n, aaba tɛ yiwlɛ+ m’ɔ o Zoova i ɲrun’n, m’ɔ o sua’n i ɲrun lɛ’n, m’ɔ o i bɔbɔ i tɛ yiwlɛ’n nin Zoova i sua’n be afiɛn’n, ɔ yili i lɛ kpɛkun ɔ fa sieli i i tɛ yiwlɛ liɛ’n i bue nga i ɲin kpɛ nglo lɔ lika’n nun’n su lɔ. 15 Famiɛn Akazi seli Iri+ m’ɔ ti Ɲanmiɛn ɲrun jranfuɛ’n kɛ: “Yi nglɛmun nun tɛ nga kɛ bé yí’n be yra nnɛn’n i kɔlikɔli’n tɛ yiwlɛ dan’n+ su naan i wunsrɛn’n fite, ɔ nin ble annzɛ i wunsu like mɔ be fa man Ɲanmiɛn nnɔsua nun’n,+ ɔ nin famiɛn’n i ti tɛ nga kɛ bé yí’n be yra nnɛn’n i kɔlikɔli’n, ɔ nin famiɛn’n i ti tɛ nga be fa ble annzɛ i wunsu like be yi’n, ɔ nin nvlefuɛ’m be ti tɛ nga kɛ bé yí’n be yra nnɛn’n i kɔlikɔli’n, ɔ nin be ti tɛ nga be fa ble annzɛ i wunsu like be yi’n, ɔ nin be ti tɛ nga kɛ bé yí’n be gua nzan’n. Asa ekun’n, fa tɛ nga kɛ bé yí’n be yra nnɛn’n i kɔlikɔli’n i mmoja’n i kwlaa nin tɛ uflɛ nga be yi be’n be mmoja’n i kwlaa fa kpɛntɛnkpɛntɛn tɛ yiwlɛ sɔ’n su. Aaba tɛ yiwlɛ i liɛ’n, ń má klé like nga bé wá fá yó’n.” 16 Iri m’ɔ ti Ɲanmiɛn ɲrun jranfuɛ’n yoli like kwlaa nga Famiɛn Akazi seli i kɛ ɔ yo’n.+

17 Asa ekun’n, Famiɛn Akazi kpɛkpɛli kakaklolo’m be wun ninnge paplaapla mun,+ kpɛkun ɔ yili kpongbo dandan nga be o kakaklolo’m be su’n.+ Ɔ yili Jenvie* m’ɔ o nannin tola mɔ be fali aaba be yoli be’n+ be su’n, kpɛkun ɔ fa tɛkɛli i yɔbuɛ wie’m be su.+ 18 Zoova i sua’n i awlo klun’n i lika nga be katali su m’ɔ ti Wunmiɛn-lolɛ-cɛn’n nun liɛ’n, ɔ nin gua su lɔ anuan ng’ɔ ti famiɛn’n i liɛ’n, ɔ yili be. Asiri famiɛn’n ti yɛ ɔ yoli sɔ-ɔ.

19 Akazi i su ndɛ’n i onga’n, like ng’ɔ yoli’n, be klɛli be fluwa ng’ɔ kan Zida famiɛn’m be ndɛ’n i nun.+ 20 I sin’n, Akazi wuli.* Be sieli i kan be sieli i nannan mun lɔ’n, Davidi Klɔ lɔ. Yɛ i wa Ezekiasi*+ sinnin i osu kacili famiɛn.