Fluwa nɲɔn su nga Pɔlu klɛli Tesalonikifuɛ mun’n

1 Min Pɔlu mɔ min nin Silvɛn* nin Timote+ e o wa’n, é fá fluwa nga é blɛ́ amun mɔ amun o Tesaloniki lɔ asɔnun’n nun’n, mɔ amun nin e Si Ɲanmiɛn nin e Min Zezi Klisi be o nun’n:

2 Maan e Si Ɲanmiɛn nin e Min Zezi Klisi be yo amun ye, yɛ maan be yo maan amun di fɔundi.

3 Aniaan mun, amun ti’n, ɔ fata kɛ e la Ɲanmiɛn ase titi. Sɛ e yo sɔ’n, ɔ ti su afin amun lafi e Min’n su kpa, yɛ amun klo amun wiengu kpa tra laa’n.+ 4 Ɔ maan e fa amun e di e nuan+ Ɲanmiɛn i asɔnun’m be nun, afin amun jran kekle yalɛ kwlaa nin ɲrɛnnɛn nga be su kle amun’n be ɲrun. Kpɛkun amun fa amun wla guɛ i Ɲanmiɛn su.+ 5 I sɔ’n kle kɛ jɔlɛ nga Ɲanmiɛn di’n ɔ ti i nuan su sɛsɛ. I sɔ’n ti yɛ Ɲanmiɛn bú amun kɛ amun nin i Famiɛn Diwlɛ mɔ i ti yɛ amun su wun ɲrɛnnɛn’n* i nun tranlɛ fata’n niɔn.+

6 Ɔ maan kɛ mɔ Ɲanmiɛn yo sa i nuan su sɛsɛ’n ti’n, sɛ ɔ kle be nga be kle amun ɲrɛnnɛn’n be ɲrɛnnɛn’n, ɔ ti su.+ 7 Sanngɛ amun mɔ amun wun ɲrɛnnɛn’n kɛ bé wá yí e Min Zezi i nglo+ m’ɔ nin i anzi kwlafuɛ’m bé fín ɲanmiɛn su bé bá’n,+ e nin amun é ɲán e ti. 8 Ɔ́ bá sin m’ɔ jue vlanwunvlanwun’n nun. Ɔ́ tú i klunngbɔ be nga be siman Ɲanmiɛn’n ɔ nin be nga be faman e Min Zezi i jasin fɛ’n su’n be su.+ 9 E Min’n wá dí sran sɔ’m be jɔlɛ. Fɔ nga bé fá tú be’n yɛle be nunnunlɛ mlɔnmlɔn’n.+ Ɔ maan e Min’n su wunman be kun naan se kɛ ɔ́ fɛ́ i tinmin dan’n úka be. 10 Blɛ ng’ɔ́ bá naan be mɛn i nin i sran’m be kɔmin su’n, ɔ́ yó be nga be lafi i su’n be ɲɛnmɛn. Yɛ kɛ mɔ amun lafili ndɛ nga e kan kleli amun’n su’n ti’n, amún trán be nun wie.

11 I sɔ’n ti’n, e srɛ Ɲanmiɛn e man amun titi. E srɛ i kɛ nán maan flɛlɛ nga Ɲanmiɛn flɛli amun’n,+ ɔ yo ngbɛn. Yɛ e srɛ i ekun kɛ ɔ fɛ i tinmin’n yo sa kpa kwlaa ng’ɔ klo’n naan ɔ gua junman nga i su lafilɛ’n ti’n amun su di’n, i bo. 12 I liɛ’n amun ti’n, e Min Zezi i dunman’n fú. Yɛ kɛ mɔ amun kusu amun nin i o nun’n ti’n, amún ɲán ɲrun wie, ye mɔ e Ɲanmiɛn nin e Min Zezi Klisi be yo e’n ti.