1 Samiɛli

11 I sin’n, Nasasi m’ɔ ti Amɔnfuɛ’n,+ ɔ bali wa boli i nanmue Zabɛsi+ m’ɔ o Galaadi lɔ’n i wun lɛ naan ɔ nin be kún. Yɛ Zabɛsifuɛ’m be kwlaa be wa seli Nasasi kɛ: “Maan e tra aenguɛ* naan e su wɔ.” 2 Sanngɛ Nasasi m’ɔ ti Amɔnfuɛ’n seli be kɛ: “Sɛ amún wún kɛ e nin amun y’a tra aenguɛ’n, nn b’a bobo amun ngba amun ɲinma fama’n. Ń yó sɔ naan Izraɛlifuɛ’m be kwlaa be ɲin gua ase.” 3 Zabɛsi lɔ kpɛnngbɛn’m be tɛli i su kɛ: “Man e cɛn ba nso naan e sunman sran Izraɛli nvle wunmuan’n nun. Sɛ sran fi nunman lɛ naan w’a de e’n, é fá e wun é mán wɔ.” 4 Kɛ be nga be sunmannin be’n, be juli Gibea+ mɔ lɔ yɛ Saili tran’n,* mɔ be kannin ndɛ sɔ’n kleli sran mun’n, be kwlaa be sunnin kekle kpa.

5 Kɛ ɔ́ yó sɔ’n nn Saili fin blo lɔ, ɔ su kankan nannin mun ba. Yɛ ɔ seli kɛ: “?Ngue sa yɛ ɔ o sran’m be su-ɔ? ?Ngue ti yɛ be sun-ɔn?” Ɔ maan be boli ndɛ nga Zabɛsifuɛ’m be wa kannin’n su kleli i. 6 Kɛ Saili tili ndɛ sɔ’n, Ɲanmiɛn wawɛ’n jrɛli i su.+ Kpɛkun ɔ fali ya dan kpa. 7 Ɔ trali nannin tola nɲɔn. Ɔ kpɛkpɛli be nun. Kpɛkun ɔ fa mannin ngaliɛ kanfuɛ mun naan be fa wlan Izraɛli nvle wunmuan’n nun. Kɛ bé kɔ́’n, nn bé sé sran mun kɛ: “Sran nga w’a suman Saili nin Samiɛli be su’n, kɛ bé yó i nannin liɛ’m be sa.” Yɛ Zoova yoli maan srɛ dan kpa wa kunnin nvle nunfuɛ mun. Yɛ be bo yoli kun* be fiteli-ɔ. 8 Saili kali sran mun Bezɛki lɔ. Yasua nga be fin Zida akpasua’n nun’n, be ti akpiakpi ablasan (30.000), yɛ yasua nga be fin Izraɛli akpasua onga’m be nun’n, be ti akpiakpi ya nsan (300.000). 9 I sin’n, be seli ngaliɛ kanfuɛ nga be fin Zabɛsi’n be kɛ: “Amun se Zabɛsi m’ɔ o Galaadi lɔ’n i su sran’m be kɛ ainman’n, kɛ wia’n ju e ti afiɛn’n, bé ɲán be ti.” Yɛ ngaliɛ kanfuɛ’m be ko kan kleli Zabɛsifuɛ mun-ɔn. Kɛ be tili’n, be klun jɔli dan. 10 I sɔ’n ti’n, Zabɛsifuɛ’m be ko seli Amɔnfuɛ’m be kɛ: “Ainman’n, é fá e wun é mán amun. Like kwlaa nga amun klo kɛ amún fá yó e’n, amun fa yo e.”+

11 Kɛ i aliɛ cɛnnin’n, Saili bubuli sran’m be nun akpasua nsan. Kpɛkun be ko wluli Amɔnfuɛ’m be nanmue’n nun aliɛ njɛnniɛn su.* Be kunnin Amɔnfuɛ’m+ be lele wia’n juli be ti afiɛn. Be nga be ɲannin be ti’n, be bo sanndili, sran kun fɛli i atin liɛ ɔli. 12 Yɛ sran’m be seli Samiɛli kɛ: “?Be nga be seli kɛ: ‘Naan Saili yɛ ɔ́ yó e su famiɛn’n,’ be o nin?+ Maan be fa be bla naan e kun be.” 13 Sanngɛ Saili seli kɛ: “Andɛ cɛn ba liɛ’n nun’n, be su kunman sran fi wa.+ Afin Zoova w’a de Izraɛli andɛ.”

14 Kɛ ɔ cɛli kan’n, Samiɛli seli sran’m be kɛ: “Amun e wɔ Gilgali+ naan e ko yi i nglo ekun kɛ Saili yɛ ɔ ti e famiɛn’n niɔn.”+ 15 Yɛ sran’m be kwlaa be ɔli Gilgali-ɔ. Kpɛkun be ko sieli Saili i famiɛn, Zoova i ɲrun lɛ. I sin’n, be yili bo kun yolɛ tɛ mannin Zoova+ lɛ. Saili nin Izraɛlifuɛ’m be kwlaa be dili i ti cɛn, yɛ be klun jɔli dan kpa.+