Ezekiɛli

21 Zoova kannin ndɛ kleli min ekun. Ɔ seli min kɛ: 2 “Sran wa, kpɛ ɔ ɲin Zerizalɛmun su lɔ naan kan ndɛ kle lika mɔ be ti min liɛ klonglo’n, kan sa ng’ɔ́ wá jú Izraɛli nvle’n su’n i ndɛ. 3 Se Izraɛli nvle’n kɛ: ‘Ndɛ nga Zoova kan’n yɛ: “E nin wɔ e le i, ń má yí min tokofi’n i bua’n nun n fite,+ kpɛkun ń kún sran kpa nin klunwifuɛ nga be o lɔ’n. 4 Kɛ mɔ ń má kún sran kpa nin klunwifuɛ nga be o ɔ lɔ’n ti’n, min tokofi’n ɔ́ wá fín i bua’n nun fíte, ɔ́ kún sran’m be kwlaa, ɔ́ fɛ́ i ngua lɔ lele fá jú nglo lɔ lika’n nun. 5 Sran’m be kwlaa bé wá sí jrɛiin kɛ n bɔbɔ min Zoova, m’an yi min tokofi’n i bua’n nun m’an fite. Ɔ su sɛmɛn i sin kun.”’+

6 Yɛ wɔ, sran wa, kɛ á* úsu’n kplin. Nanwlɛ, kplin kplinlɛ kpa be ɲrun lɛ.+ 7 Yɛ sɛ be usa wɔ kɛ: ‘?Ngue ti yɛ a kplin-ɔn?’ Se kɛ: ‘Ndɛ kun mɔ n tili’n ti-ɔ.’ Saan sa sɔ’n jú, yɛ srɛ’n ti’n sran’m be su ɲanman awlɛn kun,* be sa’m bé glɔ́glɔ́ be wun, be wla bó be wun, yɛ nzue sónji be ja nannglunman’m be wun.*+ ‘An nian! Saan sa sɔ’n jú, ɔ́ kpɛ́n su.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

8 Zoova kannin ndɛ kleli min ekun. Ɔ seli min kɛ: 9 “Sran wa, kan sa ng’ɔ́ wá jú’n i ndɛ. Se kɛ: ‘Ndɛ nga Zoova kan’n yɛ: “Se kɛ: ‘Tokofi kun yɛ! Be su si tokofi kun,+ be su yo naan ɔ yo mlanmlan. 10 Be su si naan bé fá kún sran kpanngban, be su yo naan ɔ bo mianmian kɛ ɲanmiɛn m’ɔ kpa sin’n sa.’”’”

“?Ɔ fataman kɛ e di aklunjɔɛ?”

“‘?Ɔ́* wá kpálo min bɔbɔ min wa’n i kpɔnman’n+ kɛ nga ɔ fa kpalo waka’m be kwlaa’n sa?

11 “‘Be yoli i mlanmlan naan sran kun fa kun alɛ. Be sili tokofi sɔ’n, yɛ be yoli i mlanmlan naan bé fá wlá sran kunfuɛ kun sa nun.+

12 “‘Sran wa, kpan yɛ bo awuyomo,+ afin tokofi’n tɔli min nvle’n nunfuɛ’m be su. Ɔ su kɔ Izraɛli kpɛnngbɛn’m be su.+ Tokofi’n wá kún be, ɔ nin min nvle’n nunfuɛ mun. I sɔ’n ti’n, finfin ɔ sɔwa’n su, awlabɔɛ’n ti. 13 Afin be nianniannin min nvle’n nunfuɛ mun.+ ?Yɛ sɛ tokofi’n kpalo kpɔnman’n, sa benin yɛ ɔ́ jú-ɔ? Ɔ su tranman lɛ kun.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

14 “Yɛ wɔ, sran wa, kan sa ng’ɔ́ wá jú’n i ndɛ, yɛ bo ndɛ. Se kɛ: ‘Tokofi kun yɛ!’ Kɛn i sɔ kpɛ nsan. Sran nga be kunnin be’n be tokofi’n niɔn, tokofi m’ɔ kun sran kpanngban’n niɔn, tokofi m’ɔ bo sin yia be’n niɔn.+ 15 Srɛ’n ti’n, be su ɲanman awlɛn kun,*+ yɛ be nun kpanngban bé tɔ́ be klɔ’n i anuan’m be nun lɛ. Ń má fá tokofi ń kún be kunlɛ kpa. Nanwlɛ, tokofi’n ɔ́ bó mianmian kɛ ɲanmiɛn m’ɔ kpa sin’n sa. B’a yo i mlanmlan naan bé fá kún sran kpanngban. 16 Kun sran mun ɔ fama su! Kun wie mun ɔ bɛ su! Kɔ lika kwlaa nga ɔ ɲin’n kpɛ lɛ’n! 17 Asa ekun’n, ń má bó ndɛ, kpɛkun min ya’n ɔ́ jɔ́.+ N bɔbɔ Zoova, min yɛ n kannin-ɔn.”

18 Zoova kannin ndɛ kleli min ekun. Ɔ seli min kɛ: 19 “Sran wa, ɔ liɛ’n, yi atin nɲɔn naan Babilɔnin famiɛn’n i tokofi’n bla. Maan atin nɲɔn’m be fin nvle kunngba’n nun, yɛ lika nga atin’n kpaci nun nɲɔn mɔ kun kɔ klɔ kun su, mɔ kun kɔ klɔ uflɛ su lɛ’n, maan be ta nzɔliɛ like kun lɛ. 20 Ɔ fata kɛ a yi atin kun naan tokofi’n sin nun ko tɔ Raba+ m’ɔ ti Amɔnfuɛ’m be klɔ’n i su, yɛ ɔ fata kɛ a yi atin uflɛ ekun naan ɔ sin nun ko tɔ Zerizalɛmun klɔ+ mɔ i wun ti siwa’n m’ɔ o Zida lɔ’n i su. 21 Afin Babilɔnin famiɛn’n ɔ jran anngɔnda sɔ’n su lɛ, ɔ jran kɛ nga akpɔ’n i nun kpaci nɲɔn lɛ’n ɔ yi wunnzue. Ɔ kejekeje i ta mma mun. Ɔ usɛ i amuin’m* be sa, yɛ ɔ niannian nnɛn buɛ fa yi wunnzue. 22 Like ng’ɔ fa yi wunnzue m’ɔ o i sa fama’n nun’n, ɔ tɔli Zerizalɛmun su, naan be siesie waka nɔnnin nga be fa bubu talɛ mun’n, naan be se sran’m be kɛ be kun sran mun, naan be kpan alɛ kunlɛ kpanlɛ, naan be fa waka nɔnnin nga be fa bubu talɛ mun’n be fa siesie i anuan’m be wun, naan be kplan alɛ kunlɛ ninnge fleinflein mun, naan be kplan alɛ kunlɛ talɛ kun klɔ’n i wun.+ 23 Be* nga be tali be nda’n be su buman wunnzue sɔ’n i nanwlɛ.+ Sanngɛ i wla kpɛn be sa tɛ’n su yɛ ɔ́ trá be.+

24 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Amun yoli maan be wla kpɛnnin amun sa tɛ’n su, afin amun yili amun fɔnlɛ’m be nglo, yɛ amun yoli maan be wunnin amun sa tɛ mun sa kwlaa nga amun yo’n nun. Siɛn mɔ be wla w’a kpɛn amun su’n, bé wá fá amun kekle nun* bé kɔ́.’

25 “Ee, Izraɛli kpɛn klunwifuɛ, wɔ mɔ be yoli ɔ like yaya mɔ a o wie nuan’n,+ ɔ cɛn’n w’a ju, ɔ fɔ tulɛ kasiɛn’n i blɛ’n w’a ju. 26 Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Yi tannin tanmue ng’ɔ cici ɔ ti’n, yɛ yi famiɛn kle’n.+ Lika’n su kaman kɛ nga sa titi.+ Man sran ng’ɔ o asiɛ wun’n i su,+ yɛ kan sran ng’ɔ o nglo’n i ase.+ 27 Sacilɛ, sacilɛ, sacilɛ yɛ ń má saci i-ɔ. Yɛ ɔ su yoman sran fi liɛ, lele saan sran ng’ɔ le atin fa’n w’a ba,+ kpɛkun ń fá mɛ́n i.’+

28 “Yɛ wɔ, sran wa, kan sa ng’ɔ́ wá jú’n i ndɛ, yɛ se kɛ: ‘Amɔnfuɛ mun nin be nzowa nga be kpɛ’n i su ndɛ nga Miɛn Zoova m’ɔ Sie Like Kwlakwla’n ɔ kan’n yɛ.’ Se kɛ: ‘Tokofi kun yɛ! B’a yi tokofi kun naan bé fá kún sran mun. Be yoli naan ɔ bo mianmian kɛ ɲanmiɛn m’ɔ kpa sin’n sa naan bé fá kún sran mun. 29 Kannzɛ bɔbɔ ɔ su ndɛ nga be wunnin i aolia nun’n ti ato’n, yɛ ɔ wun wunnzue nga be yili’n ti ato’n, sanngɛ bé wá fá ɔ sran nga be kunnin be’n bé tían klunwifuɛ nga be cɛn’n w’a ju’n, mɔ be fɔ tulɛ kasiɛn’n i blɛ’n w’a ju’n be su. 30 Fa sɛ i sin i bua’n nun. Ń má dí ɔ jɔlɛ lika nga be yili wɔ lɛ’n nun, nvle nga a fin nun’n i nun. 31 Ń má fá min ya’n ń gúa ɔ su. Ń má fíta min ya’n m’ɔ ti kɛ sin sa’n ɔ su, ń má yí wɔ ń mán nzaje sa yofuɛ mun, ń yí wɔ ń mán be nga be si like saci kpa’n.+ 32 Bé wá fá wɔ bé trɔ́ sin,+ ɔ mmoja’n sónji nvle’n nun, yɛ be wla su kpɛnman ɔ su kun. N bɔbɔ Zoova, min yɛ n kannin-ɔn.’”