Ezekiɛli

14 Kpɛkun Izraɛli lɔ kpɛnngbɛn wie’m be bali, yɛ be wa trannin min ɲrun lɛ.+ 2 Kpɛkun Zoova kannin ndɛ kleli min, ɔ seli min kɛ: 3 “Sran wa, sran nga mun b’a fua kpa kɛ bé sɔ́ be amuin mɔ be ti like kain’n,* yɛ b’a fa like kun mɔ be ja kpla su’n b’a sie i nvlefuɛ’m be ɲrun naan be yo sa tɛ. ?Ɔ fata kɛ n yaci be lɛ naan be usa min sa?+ 4 Siɛn’n, kan ndɛ kle be, se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Sɛ Izraɛlifuɛ kun w’a fua kpa kɛ ɔ́ sɔ́ i amuin mɔ be ti like kain’n, naan ɔ fa like mɔ be ja kpla su’n sie i nvlefuɛ’m be ɲrun naan be yo sa tɛ’n, naan i sin’n, ɔ ba wa usa Ɲanmiɛn nuan ijɔfuɛ kun i sa’n, n bɔbɔ min Zoova ń tɛ́ i su kɛ ng’ɔ nin i fata’n sa. Kɛ i amuin mɔ be ti like kain’n be kpanngban fa ti ju’n, i su yɛ ń nían ń tɛ́ i su-ɔ. 5 Ń má yó maan srɛ dan kpa wá kún Izraɛli nvle’n i nunfuɛ mun, afin be kwlaa be yacili min, yɛ be suli be amuin mɔ be ti like kain’n be su.”’+

6 “Ɔ maan se Izraɛli nvle’n nunfuɛ’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Amun sa amun sin, amun kaci amun sin be si amun amuin mɔ be ti like kain’n, kpɛkun amun yi amun ɲin amun tete sa’m be kwlaa be su.+ 7 Afin sɛ Izraɛlifuɛ kun, annzɛ aofuɛ kun m’ɔ tran Izraɛli nvle’n nun’n ɔ kpɔci min, yɛ ɔ fua kpa kɛ ɔ́ sú i amuin mɔ be ti like kain’n be su, kpɛkun ɔ fa like mɔ be ja kpla su’n ɔ fa sie i nvlefuɛ’m be ɲrun naan be yo sa tɛ’n, naan i sin’n, ɔ ba wa usa min nuan ijɔfuɛ’n i sa’n,+ n bɔbɔ min Zoova ń tɛ́ i su. 8 E nin sran sɔ’n é ɲɛ́n i, yɛ ń má yó maan ɔ́ káci nzɔliɛ like kun mɔ sran’m bé fá tú be wun fɔ-ɔ, bé fɛ́ i bé kpɛ́ flɛn. Ń má yí i min nvlefuɛ’m be nun,+ kpɛkun amún wá sí jrɛiin kɛ n ti Zoova.”’

9 “‘Sanngɛ sɛ be lakali Ɲanmiɛn nuan ijɔfuɛ’n naan ɔ tɛli be su’n, n bɔbɔ min Zoova yɛ n lakali Ɲanmiɛn nuan ijɔfuɛ sɔ’n niɔn.+ Ń má tínngɛ min sa’n nun i wun, kpɛkun ń núnnún i Izraɛlifuɛ mɔ be ti min nvle’n be afiɛn. 10 Bé wá wún be sa tɛ nga be yoli’n i su afɛ, bé bú sran ng’ɔ usali sa’n i fɔ, yɛ bé bú Ɲanmiɛn nuan ijɔfuɛ’n i fɔ wie. 11 I liɛ’n, Izraɛli nvle’n nunfuɛ’m be su kɔman min wun mmua kun, yɛ bé yáci be sa tɛtɛ kwlaa nga be yo maan be wlu fiɛn nun’n be yolɛ. Kpɛkun bé káci min nvle, yɛ n kusu ń yó be Ɲanmiɛn.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

12 Zoova kannin ndɛ kleli min ekun. Ɔ seli min kɛ: 13 “Sran wa, sɛ nvle kun fɔn min wun’n, yɛle kɛ sɛ ɔ nin min nantiman klanman’n, ń tínngɛ min sa’n i wun, kpɛkun ń sáci lɔ aliɛ’n kwlaa,*+ ń súnman awe’n lɔ,+ yɛ ń kún sran nin nnɛn nga be o lɔ’n.”+ 14 “‘Kannzɛ bɔbɔ Nowe+ nin Daniɛli+ nin Zɔbu+ be o nvle sɔ’n nun’n, sran nsan sɔ’m be ngunmin yɛ bé ɲán be ti-ɔ, be sa nuan su sɛsɛ yolɛ’n ti.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

15 “‘Sɛ n yo naan blo nnɛn wlɛfuɛ’m be sin nvle sɔ’n nun naan be kun i nunfuɛ mun’n,* sɛ be yo naan ɔ tɔ srolo naan blo nnɛn’m be ti’n sran fi sinman lɔ kun’n,+ 16 kɛ mɔ n wo lɛ sakpa’n ti’n, kannzɛ bɔbɔ sran nsan sɔ mun be o nvle sɔ’n nun’n, be su kwlá deman be mma yasua mun nin be mma bla mun, saan be ngunmin yɛ bé ɲán be ti-ɔ, kpɛkun nvle’n tɔ́ srolo.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

17 “‘Annzɛ sɛ n sunman tokofi kun nvle sɔ’n nun+ naan n se kɛ: “Maan tokofi kun sin nvle’n nun’n,” naan n kun sran nin nnɛn mun’n,+ 18 kannzɛ bɔbɔ sran nsan sɔ’m be o nvle’n nun’n, kɛ mɔ n wo lɛ sakpa’n ti’n, be su kwlá deman be mma yasua mun nin be mma bla mun, saan be ngunmin yɛ bé ɲán be ti-ɔ.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”

19 “‘Annzɛ sɛ n sunman tukpacɛ m’ɔ sa ndɛndɛ’n nvle sɔ’n nun’n,+ naan n gua mmoja kpanngban ase n fa yi min ya’n i nglo i su’n, naan n kun sran nin nnɛn mun’n, 20 kannzɛ bɔbɔ Nowe+ nin Daniɛli+ nin Zɔbu+ be o nvle sɔ’n nun’n, kɛ mɔ n wo lɛ sakpa’n ti’n, be su kwlá deman be mma yasua nin be mma bla mun, saan be ngunmin yɛ bé ɲán be ti-ɔ, be sa nuan su sɛsɛ yolɛ’n ti.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”+

21 “Afin ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ ń má súnman min fɔ tulɛ like nnan+ mɔ be yɛle tokofi’n, nin awe’n, nin blo nnɛn wlɛfuɛ mun, ɔ nin tukpacɛ m’ɔ sa ndɛndɛ’n+ Zerizalɛmun klɔ’n nun naan be kun sran mun nin nnɛn mun’n,+ sa ng’ɔ́ wá jú’n yɛ ɔ o lɛ-ɔ. 22 Sanngɛ sran wie’m bé ká lɛ, ba yasua nin ba bla wie’m bé ká lɛ, yɛ bé fá be fíte.+ Bé wá bá amun sin, yɛ kɛ amún wá wún be ayeliɛ’n nin ninnge nga be yo be’n, amun wla wá gúa ase, ɲrɛnnɛn nga n fa yili i Zerizalɛmun su’n ti, like kwlaa nga n fa yoli i’n ti.’”

23 “‘Kɛ amún wá wún be ayeliɛ’n nin ninnge nga be yo be’n, amun wla wá gúa ase, yɛ amún wá sí kɛ nán ngbɛn ti yɛ n fali ɲrɛnnɛn n yili i su-ɔ.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”