Ezekiɛli
17 Zoova kannin ndɛ kleli min ekun, ɔ seli min kɛ: 2 “Sran wa, bu ɲanndra kun, bu Izraɛli i awlo’n i wun ɲanndra kun.+ 3 Ɔ fata kɛ a se kɛ ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘Anunman ɲin dan’n,+ mɔ i ndɛwa’m be ti dandan’n, mɔ i ndɛwa ti’m be ti tɛnndɛn’n, mɔ i ndrɛ’n sɔnnin’n, mɔ i ɲin’n ti wafawafa’n, ɔ bali Liban,+ ɔ ko fali sɛdri waka’n+ i ti’n. 4 Ɔ kpɛli ng’ɔ fɛfɛli m’ɔ o i ti su nglo mmua kpa lɔ’n, ɔ fa ɔli aata difuɛ’m be mɛn’n nun lɔ,* kpɛkun ɔ ko sieli i aata difuɛ’m be klɔ kun su lɔ.+ 5 Ɔ fali mɛn sɔ’n nun like mma nga be lua’n wie,+ ɔ luɛli i fie kun mɔ i asiɛ’n yo like ye’n nun. Ɔ luɛli i nzue ba kun nuan kɛ waka nga be flɛ i kɛ solu’n sa. 6 Ɔ fifili, kpɛkun ɔ boli ngbɛndɛ, ɔ trɛli asiɛ wun,+ i nɲa’m be trɛ kɔman lika uflɛ, yɛ i olui’m be o i bo. Kɛ ɔ kacili viɲin kɛ ngalɛ’n sa, ɔ fɛfɛli yɛ ɔ ɲannin sama.+
7 “‘“I sin’n, anunman ɲin dan kun ekun bali,+ i ndɛwa’m be ti dandan, yɛ i ndɛwa ti’m be ti tɛnndɛn.+ Ɔ maan viɲin sɔ’n i konvi dan’n ti’n, ɔ trɛli i olui’m be nun ɔli i wun lɔ, waka’n i olui’m be ɔli fie nga i nun yɛ be tɛli i’n i wun mmua, ɔ trɛli i sama’m be nun ɔli i wun lɔ naan ɔ guɛ i su nzue.+ 8 Be dun mmua tɛli i fie kpa kun m’ɔ o nzue kpanngban wun’n i nun, naan ɔ ɲan sama, naan ɔ su mma, naan ɔ yo viɲin dan kun.”’+
9 “Se kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “?Ɔ́ kwlá yó kpa? ?Sran wie su kpɛkpɛmɛn i olui mun?+ ?Ɔ su yoman naan i su mma’m b’a saci? ?Yɛ ɔ su yoman naan i nɲa’m b’a glɔ?+ Ɔ́ wá wú kee dan ti’n, be su mianman sran kun m’ɔ le wunmiɛn kpa’n, annzɛ sran kpanngban wun naan b’a tu i bo. 10 ?Kannzɛ bɔbɔ be fɛli i lika uflɛ yɛ be wa tali’n, ɔ́ kwlá yó kpa? ?Sɛ wia afiliɛ lɔ aunmuan’n fitɛ i su’n, ɔ su wuman kee mlɔnmlɔn? Ɔ́ wú kee fie nga i nun yɛ ɔ fifili’n nun lɛ.”’”
11 Kpɛkun Zoova kannin ndɛ kleli min ekun, ɔ seli min kɛ: 12 “Yaci, se awlo mɔ i nunfuɛ’m be ɲin su ti kekle’n be kɛ: ‘?Amun wunman ninnge sɔ’m be wlɛ?’ Se kɛ: ‘An nian! Babilɔnin famiɛn’n bali Zerizalɛmun, ɔ wa trali Zerizalɛmun famiɛn’n nin sran dandan mun, kpɛkun ɔ fa be ɔli Babilɔnin.+ 13 Asa ekun’n, ɔ fali famiɛn’n i osu’n nunfuɛ kun,+ ɔ nin i be trali aenguɛ, kpɛkun ɔ yoli maan ɔ tali nda.+ I sin’n, ɔ fali nvle’n nun sran dandan mun ɔli.+ 14 I liɛ’n, famiɛn diwlɛ’n tɔ́, ɔ su kwlá mɛnmɛn i wun su, saan sɛ nvle’n nunfuɛ’m be di i aenguɛ’n su’n, yɛ nvle’n ká lɛ-ɔ.+ 15 Sanngɛ famiɛn’n yoli ɲin kekle i su,+ ɔ sunmɛnnin i sran wie mun Ezipti lɔ, naan be mɛn i nnɛn kpanngɔ+ nin sonja kpanngban.+ ?Like ng’ɔ sunnzun’n kwla yo ye? ?Sran ng’ɔ yo sa sɔ mun’n, fɔ tulɛ’n kwla to fuɛn i? ?Ɔ kwla saci aenguɛ’n, kpɛkun ɔ ɲɛn i ti?’+
16 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: “N wo lɛ sakpa, ɔ́ wú Babilɔnin lɔ, ɔ́ wú lika nga famiɛn* ng’ɔ sieli i* famiɛn’n ɔ tran lɔ’n nun. W’a diman famiɛn sɔ’n i nda’n su, yɛ ɔ sacili i aenguɛ’n.+ 17 Kɛ bé wá kplán alɛ kunlɛ ninnge fleinflein mɔ bé kplán klɔ’n i wun talɛ naan bé kún sran kpanngban’n, Faraɔn i sonja akpasua dan’n, ɔ nin i alɛ kunfuɛ mɔ be sɔnnin kpanngban’n be su kwlá yoman like fi alɛ kunlɛ sɔ’n nun.+ 18 W’a diman nda ng’ɔ tali’n su, yɛ ɔ sacili aenguɛ’n. Kannzɛ bɔbɔ ɔ tali nda’n,* sanngɛ ɔ yoli ninnge kwlaa sɔ mun, ɔ maan ɔ su finman nun fiteman.”’
19 “‘I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “N wo lɛ sakpa, ń má yó maan ɔ́ wá wún min nda mɔ w’a diman su’n,+ ɔ nin min aenguɛ m’ɔ sacili i’n i su afɛ. 20 Ń má tó min lala’n ń gúɛ i su, yɛ ń trɛ́ i min koniɛn dilɛ lala’n nun.+ Ń má fɛ́ i ń kɔ́ Babilɔnin kpɛkun ń dí i jɔlɛ lɔ, afin ɔ nin min w’a nantiman klanman.+ 21 Bé wá fá tokofi bé kún i sonja nga be wanndili’n be kwlaa, yɛ be nga bé ká lɛ’n bé bó sánndi lika’n i bue kwlaa su.*+ Ɔ maan amún wá sí jrɛiin kɛ n bɔbɔ min Zoova n kannin ndɛ.”’+
22 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má kó kpɛ́ sɛdri waka tɛnndɛn’n i sama ng’ɔ fɛfɛli i ti su nglo lɔ’n yɛ ń tá.+ Ń má kó kpɛ́ i nɔnman kun m’ɔ fɛfɛli i sama kanngan’m be ti su nglo lɔ’n,+ yɛ n bɔbɔ ń kó tɛ́ i oka fleiin kun mɔ i su ti nglonglo kpa’n i su lɔ.+ 23 Ń tɛ́ i Izraɛli lɔ oka fleiin kun su, ɔ́ ɲán sama, yɛ ɔ́ sú mma, ɔ́ káci sɛdri waka dan kun. Kpɛkun anunman wafawafa kwlaa bé trɛ́n i bo, bé trɛ́n i nɲa’m be fɔnvɔ’n i bo. 24 Yɛ fie su lɔ waka’m be kwlaa bé wá sí jrɛiin kɛ min bɔbɔ Zoova, n kannin waka tɛnndɛn’n i ase, yɛ n mannin waka kaan’n i su.+ N yoli maan waka mɔnnɛn’n wuli kee, kpɛkun n yoli maan waka kee’n boli nɲrɛ.+ N bɔbɔ min Zoova n kannin ndɛ, yɛ n yoli i nuan sa.”’”