Ezekiɛli

33 Zoova kannin ndɛ kleli min ekun. Ɔ seli min kɛ: 2 “Sran wa, kan ndɛ kle ɔ nvle’n nunfuɛ’m be mma mun,+ se be kɛ:

“‘Sɛ n fa tokofi kun n ba nvle kun su’n+ naan nvle sɔ’n nunfuɛ’m be kwlaa be fa sran kun kɛ ɔ yo be gladi difuɛ’n, 3 sɛ sran sɔ’n wun tokofi ng’ɔ su ba nvle’n su’n naan ɔ bo awɛ’n yɛ ɔ bo i jɔ kle nvlefuɛ mun’n,+ 4 sɛ sran kun ti awɛ’n i tɛlɛ’n naan w’a bumɛn i ndɛ+ naan tokofi’n ba wa kun i’n, i mmoja’n ɔ́ kɛ́ i bɔbɔ i ti su.+ 5 Ɔ tili awɛ’n i tɛlɛ, sanngɛ w’a bumɛn i ndɛ. I mmoja’n ɔ́ kɛ́ i bɔbɔ i ti su. Sɛ ɔ ti kɛ ɔ buli i ndɛ’n nn ɔ fiteli nun.

6 “‘Sanngɛ sɛ gladi difuɛ’n wun tokofi m’ɔ su ba’n naan w’a boman awɛ’n+ yɛ w’a bomɛn i jɔ w’a kleman nvlefuɛ mun’n, naan tokofi’n ba wa kun be nun kun’n, sran sɔ’n i fɔnlɛ’n ti’n ɔ́ wú, sanngɛ ń sé kɛ gladi difuɛ’n ti yɛ maan ɔ wuli-ɔ.’*+

7 “Sanngɛ sran wa, ɔ liɛ’n n fali ɔ kɛ a yo Izraɛlifuɛ’m be gladi difuɛ. Kɛ a ko ti min nuan ndɛ’n, ɔ fata kɛ a bo su kle be man min.+ 8 Sɛ n se klunwifuɛ kun kɛ: ‘Klunwifuɛ, saan á wú,’+ naan w’a kan kleman klunwifuɛ’n naan w’a kaci i ayeliɛ’n, ɔ́ wú, i fɔnlɛ’n ti afin ɔ ti klunwifuɛ.+ Sanngɛ ń sé kɛ ɔ ti yɛ ɔ wuli-ɔ.* 9 Sanngɛ sɛ a se klunwifuɛ’n kɛ ɔ kaci i ayeliɛ’n naan ɔ kplinman su kɛ ɔ́ káci i ayeliɛ’n, ɔ́ wú, i fɔnlɛ’n ti.+ Sanngɛ ɔ liɛ’n á fíte nun.+

10 “Sanngɛ wɔ, sran wa, se Izraɛli i awlo’n nunfuɛ’m be kɛ: ‘Amun seli kɛ: “Ɲin kekle nga e yo’n nin e sa tɛ mun be tin e su dan, be yo maan e yo koklo.+ ?Ɔ maan é yó sɛ naan y’a ka nguan nun?”’+ 11 Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “N wo lɛ sakpa, klunwifuɛ’n i wie’n yoman min fɛ.+ Sanngɛ n kunndɛ kɛ klunwifuɛ’n kaci i ayeliɛ’n+ naan ɔ ka nguan nun.+ Amun kaci amun sin, amun kaci amun sin be si amun ayeliɛ tɛtɛ mun.+ ?Ee Izraɛli nvle’n nunfuɛ mun, ngue ti yɛ amun kó wú yɛ?”’+

12 “Sanngɛ wɔ, sran wa, se ɔ nvle’n nunfuɛ’m be mma’m be kɛ: ‘Sɛ sran kpa kun yo ɲin kekle’n,+ i sa kpakpa ng’ɔ yoli be’n be su kwlá demɛn i. Yɛ klunwifuɛ’n kusu sɛ ɔ kaci i sin si i klunwi ayeliɛ’n, i klunwi ng’ɔ yoli i laa’n ɔ su yoman naan w’a tɔ.+ Yɛ sran kpa’n kusu’n, cɛn ng’ɔ yo sa tɛ’n, sa kpakpa ng’ɔ yoli be laa’n be su kwlá yoman naan w’a ka nguan nun.+ 13 Sɛ n se sran kpa’n kɛ: “Saan á ká nguan nun,” naan ɔ bu i kɛ sa kpakpa ng’ɔ yo be’n bé wá dé i ti’n ɔ yo sa tɛ’n,*+ be wla su kpɛnman sa kpakpa ng’ɔ yoli be’n be nun wie fi su. Sanngɛ sa tɛ ng’ɔ yoli’n ti’n ɔ́ wú.+

14 “‘Yɛ sɛ n se klunwifuɛ’n kɛ: “Saan á wú,” naan ɔ kaci i sin si i sa tɛ’n, naan ɔ yo sa ng’ɔ ti i nuan su nin sa ng’ɔ ti kpa’n,+ 15 sɛ ɔ yi like nga be wlɛli i aowa i sa nun’n man’n,+ naan kusu ɔ yi like ng’ɔ wuali’n man’n,+ sɛ ɔ nanti mmla nga be fa su-ɔ, be ɲan nguan’n su’n, yɛle kɛ sɛ ɔ yoman sa tɛ’n, saan ɔ́ ká nguan nun.+ Ɔ su wuman. 16 Be wla su kpɛnman sa tɛ ng’ɔ yoli be’n be nun wie fi su kun.+ Kɛ m’ɔ yo sa ng’ɔ ti i nuan su nin sa ng’ɔ ti kpa’n ti’n, saan ɔ́ ká nguan nun.’+

17 “Sanngɛ ɔ nvle’n nunfuɛ’m be seli kɛ: ‘Like nga Zoova yo’n timan su,’ kusu nn like nga be bɔbɔ be yo’n yɛ ɔ timan su-ɔ.

18 “Sɛ sran kpa’n ɔ yaci sa ng’ɔ ti kpa’n i yolɛ naan ɔ yo sa ng’ɔ ti tɛ’n, ɔ fata kɛ ɔ wu, sa tɛ sɔ’n ti.+ 19 Sanngɛ sɛ klunwifuɛ’n ɔ yaci i klunwi ayeliɛ’n naan ɔ yo sa ng’ɔ ti i nuan su nin sa ng’ɔ ti kpa’n, ɔ́ ká nguan nun, i sɔ m’ɔ yoli’n ti.+

20 “Sanngɛ amun seli kɛ: ‘Like nga Zoova yo’n timan su.’+ Ee Izraɛli nvle’n nunfuɛ mun, ń má nían like nga amun tinuntinun amun yo’n su ń dí amun jɔlɛ.”

21 Kɛ be trali e ɔli’n i afuɛ blu-nin-nɲɔn (12) su’n, anglo blu su’n i cɛn ba nnun su’n, sran kun mɔ kɛ be tɔli Zerizalɛmun su’n ɔ fiteli nun’n, ɔ bali wa seli min+ kɛ: “B’a fa klɔ’n!”+

22 Nnɔsua nun’n, ka naan sran ng’ɔ fiteli nun’n w’a ba’n, Zoova fɛli i sa’n sieli min su, kpɛkun ɔ tikeli min nuan’n ka naan sran sɔ’n w’a to min lɛ nglɛmun nun. Ɔ maan min nuan’n tikeli, yɛ m’an yoman bobo kun.+

23 Kpɛkun Zoova kannin ndɛ kleli min. Ɔ seli min kɛ: 24 “Sran wa, klɔ nga be sacili be’n be nunfuɛ’m+ be kan Izraɛli nvle’n i ndɛ be se kɛ: ‘Abraamun i ba kunngba, sanngɛ ɔ fali nvle’n.+ Sanngɛ e liɛ’n e sɔnnin, ɔ maan be fali nvle’n be mannin e sakpa.’

25 “I sɔ’n ti’n, se be kɛ: ‘Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: “Amun di nnɛn nin i mmoja’n,+ yɛ amun man amun ɲin su be nian amun amuin mɔ be ti like kain’n,* kpɛkun amun yaciman sran mmoja ase gualɛ.+ ?Ɔ maan ngue ti yɛ nvle’n kó yó amun liɛ yɛ? 26 Amun lafili amun tokofi’n su,+ amun fali amun wun be wlɛli i tete sa’m be yolɛ’n nun, yɛ amun tinuntinun amun kunndɛli amun wiengu yi.*+ ?Ɔ maan ngue ti yɛ nvle’n kó yó amun liɛ yɛ?”’+

27 “Ndɛ ng’ɔ fata kɛ a kan kle be’n yɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “N wo lɛ sakpa, bé wá fá tokofi bé kún be nga be tran klɔ nga be sacili be’n be su’n. Ń má fá be nga be o blo lɔ’n ń mán blo nnɛn mun naan be di be. Yɛ tukpacɛ’n kún be+ nga be o fiawlɛ lika mun, ɔ nin yɔbuɛ buɛ’m be nun’n. 28 Ń má yó maan nvle’n ɔ́ tɔ́ srolo dan.+ Yɛ i wun tulɛ’n ɔ́ wíe. Izraɛli lɔ oka mun bé wá tɔ́ srolo,+ sran fi su sinman lɔ. 29 Tete sa nga be yoli be’n be kwlaa ti’n,+ ń má yó maan nvle’n ɔ́ tɔ́ srolo dan.+ Kpɛkun bé wá sí jrɛiin kɛ n ti Zoova.”’

30 Sanngɛ sran wa, ɔ liɛ’n ɔ nvle’n nunfuɛ’m be kan ɔ wun ndɛ be kle be wiengu talɛ’m be wun lɛ, ɔ nin sua’m be anuan’m be nun.+ Be kan ndɛ kle be wiengu, kun se i niaan’n kɛ: ‘Bla maan e ko tie Zoova i nuan ndɛ’n.’ 31 Bé wá tú kpu bé bá bé wá trán ɔ ɲrun lɛ kɛ min nvle’n nunfuɛ mun sa. Bé wá tíe ɔ nuan ndɛ’n sanngɛ be su diman su.+ Be fa be nuan nun fɛ be fa lakalaka wɔ. Sanngɛ be awlɛn’n nun lɔ’n be kunndɛ kɛ bé dí ndrunmun naan bé ɲán nun like. 32 Nian! A ti be ɲrun kɛ klolɛ jue mɔ be fa be nɛn fɛfɛ be to, mɔ be bo miziki bolɛ like m’ɔ le ɲanman’n i kpa be fa suɛn i bo’n sa. Bé wá tíe ndɛ nga a kan’n, sanngɛ be nun wie fi su nantiman su. 33 Yɛ kɛ ɔ́ wá kpɛ́n su’n (afin ɔ́ kpɛ́n su sakpa), bé wá sí jrɛiin kɛ Ɲanmiɛn nuan ijɔfuɛ kun trannin be afiɛn.”+