Jɔlɛ Difuɛ Mun

2 Zoova i anzi’n+ fɛli i Gilgali+ lɛ ɔli Bokimun, yɛ ɔ seli Izraɛlifuɛ’m be kɛ: “N fali amun Ezipti lɔ n bali mɛn nga n tali amun nannan’m be nda kɛ ń fá mán be’n, i nun.+ Asa ekun’n, n seli kɛ: ‘N su yaciman aenguɛ nga e nin amun e trali’n le.+ 2 Amun kusu, ɔ fataman kɛ amun nin mɛn nga nunfuɛ’m be tra aenguɛ.+ Yɛ ɔ fata kɛ amun bubu be tɛ yiwlɛ mun.’+ Sanngɛ amun a tieman min nuan ndɛ’n.+ ?Ngue ti yɛ amun yoli sɔ-ɔ? 3 I sɔ’n ti’n, n seli kɛ: ‘N su fuanman be amun ɲrun.+ Bé súa amun bo aya+ yɛ amún tɔ́ nun. Be ɲanmiɛn liɛ’m bé yó maan amún fá amun wun mántan be.’”+

4 Kɛ Zoova i anzi’n kannin ndɛ sɔ mun kleli Izraɛlifuɛ’m be kwlaa’n, nvlefuɛ’m be sunnin sunlɛ kpa. 5 Ɔ maan be tɔnnin lika sɔ’n i dunman kɛ Bokimun,* kpɛkun be yili tɛ mannin Zoova lɛ.

6 Kɛ Zozie seli nvlefuɛ’m be kɛ be wɔ’n, be tinuntinun be ɔli lika nga be fa mannin be kɛ ɔ yo be aja like’n i nun lɔ naan bé fá mɛn’n.+ 7 Zozie blɛ su’n, ɔ nin kpɛnngbɛn nga kɛ Zozie wuli’n be kali lɛ’n be blɛ su’n, nvlefuɛ’m be suli Zoova titi. Kpɛnngbɛn sɔ’m be wunnin sa dandan nga Zoova yo mannin Izraɛlifuɛ mun’n.+ 8 I sin’n, Nɛn i wa Zozie m’ɔ ti Zoova i sufuɛ’n ɔ wa wuli. Kɛ ɔ́ wú’n, nn ɔ le afuɛ ya kun afuɛ blu (110).+ 9 Be sieli i i lika ng’ɔ o Timnati-Erɛsi+ lɔ’n nun, Efraimun okaoka lika’n nun lɔ, Gaasi Oka’n i nglo lɔ lika’n nun.+ 10 Blɛ sɔ’n nunfuɛ’m be kwlaa be wa wuli, kpɛkun blɛ uflɛ nunfuɛ’m be wa jasoli su. Be liɛ’n be siman Zoova, yɛ be siman like ng’ɔ yo mannin Izraɛlifuɛ mun’n.

11 Ɔ maan Izraɛlifuɛ’m be wa yoli sa tɛ Zoova ɲrun, yɛ be sɔli Baali mun.+ 12 Be yacili Zoova m’ɔ ti be si’m be Ɲanmiɛn’n, m’ɔ fali be Ezipti mɛn’n nun fiteli’n.+ Kpɛkun be ko suli ɲanmiɛn uflɛ mun, be suli nvle nga be bo sin yia be’n be ɲanmiɛn liɛ mun.+ Be kotoli be bo, be yoli maan Zoova fali ya.+ 13 Be yacili Zoova, kpɛkun be sɔli Baali, ɔ nin Astaate i nzɔliɛ ninnge mun.+ 14 Kɛ ɔ yoli sɔ’n, Zoova fali ya dan kpa Izraɛlifuɛ’m be wun, ɔ fali be wlɛli i be nga be fɛn sran’m be bo ninnge mun’n be sa nun, yɛ be fɛnnin be bo ninnge mun.+ Ɔ yoli be atɛ be kpɔfuɛ nga be bo sin yia be’n be sa nun.+ Ɔ maan b’a kwlá jranman be kpɔfuɛ’m be ɲrun kun.+ 15 Lika kwlaa nga be kɔ’n, Zoova nin be le i, yɛ ɔ fa ɲrɛnnɛn yi be su,+ kɛ nga Zoova kan kleli be’n sa, kɛ nga Zoova fa wlali be su nun’n sa.+ I sɔ’n ti’n, be wla boli be wun dan kpa.+ 16 Ɔ maan Zoova fali jɔlɛ difuɛ wie mun mannin be naan be de be be bo ninnge fɛnfuɛ’m be sa nun.+   

17 Sanngɛ b’a tieman jɔlɛ difuɛ’m be nuan ndɛ’n bɔbɔ. Be nin amuin’m be boli tekle, be kotoli be bo. Be kacili be sin ndɛndɛ kpa sili atin nga be nannan’m be fali su’n. Be nannan’m be nantili Zoova i mmla’m be su.+ Sanngɛ b’a yoman kɛ be sa. 18 Kɛ Zoova man be jɔlɛ difuɛ kun’n,+ Zoova jran jɔlɛ difuɛ’n i sin, yɛ ɔ de be be kpɔfuɛ’m be sa nun, jɔlɛ difuɛ’n i blɛ su. Afin kɛ be kle be yalɛ’n, yɛ kɛ be yo be tɛtɛ mɔ be kplin’n,+ be yo Zoova i annvɔ.*+

19 Sanngɛ kɛ jɔlɛ difuɛ’n ko wu’n, be yo sa tɛ dan tra be si’m be liɛ’n, yɛle kɛ be ko su ɲanmiɛn uflɛ mun, be sɔ be, be koto be bo.+ B’a yaciman be sa tɛ’m be yolɛ, yɛ b’a yaciman ɲin kekle ayeliɛ’n. 20 I agualiɛ su’n, Zoova fali Izraɛlifuɛ’m be wun ya dan kpa,+ yɛ ɔ seli kɛ: “Nvle nga nunfuɛ’m b’a diman aenguɛ+ nga e nin be nannan mun e trali’n su, be ɲin w’a yiman min.+ 21 I sɔ’n ti’n, n kusu n su fuanman nvle nga kɛ Zozie wú’n, ɔ yacili be lɛ’n be wie fi be ɲrun.+ 22 Ń yó sɔ naan ń nían, sɛ bé fá Zoova i atin’n su+ kɛ be si’m be sa-o.” 23 Ɔ maan Zoova kplinnin su kɛ nvle sɔ’m be ka lɛ. W’a kaman lɛ w’a fuanman be, yɛ w’a faman be w’a wlaman Zozie sa nun.