2 Famiɛn Mun

8 Elize seli bla ng’ɔ cɛnnin i wa yasua’n+ kɛ: “Jaso kɔ, a nin ɔ awlofuɛ mun, amun ko tran nvle uflɛ nun. Amun tran lika kwlaa nga amun klo’n. Afin Zoova seli kɛ awe wá kpɛ́n+ nvle’n nun yɛ ɔ́ dí afuɛ nso.” 2 Ɔ maan bla’n ɔli, ɔ yoli like nga Ɲanmiɛn Kpli i sran’n seli i kɛ ɔ yo’n. Ɔ nin i awlofuɛ’m be ko trannin Filisti mɛn’n nun,+ be dili afuɛ nso lɔ.

3 Kɛ afuɛ nso sinnin’n, bla’n jasoli Filisti mɛn’n nun kpɛkun ɔ sɛli i sin. Ɔ ko wunnin famiɛn’n i wun naan ɔ́ kɛ́n i sua’n nin i fie’n be ndɛ klé i. 4 Kɛ ɔ́ yó sɔ’n, nn famiɛn’n su kan ndɛ kle Geazi m’ɔ ti Ɲanmiɛn Kpli i sran’n i sufuɛ’n. Ɔ seli i kɛ: “Yaci, kan sa dandan nga Elize yoli be’n i kwlaa kle min.”+ 5 Kɛ Geazi kán wafa nga Elize cɛnnin sran kun m’ɔ wuli’n+ i ndɛ klé famiɛn’n, bla nga Elize cɛnnin i wa’n ɔ bali famiɛn’n i wun wunlɛ naan ɔ́ kɛ́n i sua’n nin i fie’n+ be ndɛ klé i. Kɛ Geazi wunnin i cɛ’n, ɔ seli kɛ: “Min min, famiɛn, bla sɔ’n yɛ, yɛ i wa nga Elize cɛnnin i’n yɛ.” 6 Famiɛn’n usali bla’n naan w’a kan sa ng’ɔ juli’n i ndɛ w’a kle i. I sin’n, famiɛn’n seli i awlo lɔ junman difuɛ kun kɛ: “Fa ninnge kwlaa ng’ɔ ti bla’n i liɛ’n mɛn i. Kɛ ɔ jasoli lika’n nun lele mɔ w’a fa ju yɛ’n, i fie’n su ninnge’m be nuan sika ng’ɔ fata kɛ ɔ ɲɛn i’n, fɛ i kwlaa mɛn i.”

7 Elize wa ɔli Damasi.+ Blɛ sɔ’n nun’n, nn Bɛnin-Adadi+ m’ɔ ti Siri famiɛn’n i wunnɛn yo i ya. Be ko seli i kɛ: “Ɲanmiɛn Kpli i sran’n+ w’a ba wa.” 8 Yɛ famiɛn’n seli Azaɛli+ kɛ: “Fa like kan ko man Ɲanmiɛn Kpli i sran’n.+ Sin i lika usa Zoova i sa, usɛ i kɛ: ‘?Tukpacɛ nga m’an tɔ i yɛ’n, ń yó juejue?’” 9 Azaɛli ɔli ko wunnin Elize i wun. Kɛ ɔ́ kɔ́’n, ɔ fali Damasi lɔ ninnge kpakpa wafawafa kwlaa. Ɔ fali ninnge nga ɲɔnngɔnmin ablanan (40) be kwla sua’n. Ɔ ɔli ko jrannin Elize i ɲrun lɛ, kpɛkun ɔ seli i kɛ: “Ɔ wa Bɛnin-Adadi m’ɔ ti Siri famiɛn’n sunmannin min ɔ sin. I waan n usa ɔ kɛ: ‘?Tukpacɛ nga m’an tɔ i yɛ’n, ń yó juejue?’” 10 Elize tɛli i su kɛ: “Kɔ naan ko se i kɛ: ‘Saan á yó juejue.’ Sanngɛ Zoova yili i nglo kleli min kɛ saan ɔ́ wú.”+ 11 Elize niannin Azaɛli lele maan ɔ yoli i kɛnsrɛn. I sin’n, Ɲanmiɛn Kpli i sran’n sunnin. 12 Azaɛli usɛli i kɛ: “?Min min, ngue ti yɛ a sun-ɔn?” Ɔ tɛli i su kɛ: “Afin n si sa yaya nga á wá fá yí i Izraɛlifuɛ’m be su’n.+ Á wá wɔ́ be klɔ nga be sili be wun’n be nun. Be sran nga be si alɛ kun kpa’n, á wá fá tokofi kún be, á wá títí be mma’m be nun, yɛ á kpáci bla nga b’a wunnzɛ’n be ku’n nun.”+ 13 Azaɛli usɛli i kɛ: “?Alua ngbɛn kɛ min sa’n, n kwla yo sa kɛ nga sa?” Elize tɛli i su kɛ: “Zoova yili i nglo kleli min kɛ á wá yó Siri famiɛn.”+

14 I sin’n, ɔ jasoli Elize i ɲrun lɛ, ɔ sɛli i sin i min’n i wun lɔ. I min’n usɛli i kɛ: “?Ndɛ benin yɛ Elize kan kleli wɔ-ɔ?” Ɔ tɛli i su kɛ: “I waan saan á yó juejue.”+ 15 Sanngɛ kɛ i aliɛ cɛnnin’n, Azaɛli fali kondro kun wlɛli i nzue nun, kpɛkun ɔ fa sieli i famiɛn’n i ɲrun lika’n su, ɔ tinnin su lele maan ɔ wuli.+ Kpɛkun Azaɛli sinnin i osu kacili famiɛn.+

16 Kɛ Akabu i wa Zoramun+ kacili Izraɛli famiɛn’n i afuɛ nnun’n su’n, Famiɛn Zozafati m’ɔ ti Zida famiɛn’n i wa Zoramun+ kacili famiɛn. Kɛ ɔ́ yó sɔ’n, nn Zozafati ti Zida famiɛn. 17 Kɛ ɔ́ káci famiɛn’n, nn ɔ le afuɛ ablasan-nin-nɲɔn (32). Ɔ dili famiɛn afuɛ mɔcuɛ Zerizalɛmun lɔ. 18 Ɔ niannin Izraɛli famiɛn’m be ajalɛ’n su nantili,+ kɛ nga Akabu i awlofuɛ’m be fa yoli’n sa.+ Afin ɔ jali Akabu i wa bla’n.+ Yɛ ɔ yoli sa ng’ɔ ti tɛ Zoova ɲrun’n titi.+ 19 Sanngɛ Zoova w’a kunndɛman kɛ ɔ́ núnnún Zida, i sufuɛ Davidi ti.+ Afin ɔ tɛli i nda kɛ ɔ́ mɛ́n i nin i mma’m be kannin kun+ titi.

20 Zoramun blɛ su’n, Edɔmunfuɛ’m be jasoli Zida wun.+ Kpɛkun be sieli be bɔbɔ be famiɛn liɛ.+ 21 I sɔ’n ti’n, Zoramun fɛli i kakaklolo’m be kwlaa ɔli Zaii. Kpɛkun ɔ jasoli kɔnguɛ, ɔ nin Edɔmunfuɛ nga be bo sin yiɛli i’n nin kakaklolo su kpɛn mun be kunnin, yɛ ɔ kwlali be. Ɔ maan sonja’m be wanndi ɔli be tannin sua’m be nun. 22 Sanngɛ lele nin andɛ’n, Edɔmunfuɛ’m be te jaso Zida wun. Blɛ kunngba sɔ’n nun’n, Libinafuɛ’m+ be kusu be jasoli Zida wun wie.

23 Zoramun i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun. 24 Zoramun wuli,* be sieli i nin i nannan mun Davidi Klɔ lɔ.+ Yɛ i wa Akazia+ sinnin i osu kacili famiɛn-ɔn.

25 Kɛ Akabu i wa Zoramun kacili Izraɛli famiɛn’n, i afuɛ blu-nin-nɲɔn (12) su’n, Zoramun m’ɔ ti Zida famiɛn’n i wa Akazia kacili famiɛn.+ 26 Kɛ Akazia káci famiɛn’n, nn ɔ le afuɛ ablaɔn-nin-nɲɔn (22). Ɔ dili famiɛn afuɛ kun Zerizalɛmun lɛ. Be flɛ i nin’n kɛ Atali.+ Ɔmri+ m’ɔ ti Izraɛli famiɛn’n i anunman-ɔn.* 27 Ɔ niannin Akabu i awlofuɛ’m be ajalɛ’n su nantili.+ Ɔ yoli sa ng’ɔ ti tɛ Zoova ɲrun’n titi, kɛ nga Akabu i awlofuɛ’m be fa yoli’n sa. Afin ɔ jali Akabu i awlo’n nunfuɛ.+ 28 Ɔ maan ɔ nin Akabu i wa Zoramun be ɔli naan be nin Azaɛli m’ɔ ti Siri famiɛn’n bé kún alɛ Ramɔtu-Galaadi+ lɔ. Sanngɛ Sirifuɛ’m be yoli Zoramun i like yaya.+ 29 I sɔ’n ti’n, Famiɛn Zoramun sɛli i sin Zizreɛli+ lɔ naan ɔ́ kó yó i wun ayre. Afin kɛ ɔ nin Azaɛli m’ɔ ti Siri famiɛn’n bé kún alɛ Rama lɔ’n, Sirifuɛ’m be yoli i like yaya.+ Zoramun i wa Akazia m’ɔ ti Zida famiɛn’n ɔli Zizreɛli lɔ naan ɔ́ kó nían Akabu i wa Zoramun i osu, afin be yoli i like yaya.*