1 Famiɛn Mun

1 Siɛn’n, Famiɛn Davidi w’a yo oke,+ be fa tralɛ’m be kɛtɛ i wun, sanngɛ i wun yomɛn i yrɛyrɛ. 2 I sufuɛ’m be seli i kɛ: “Maan e kunndɛ talua kun m’ɔ nin-a siman bian’n e man famiɛn’n. I liɛ’n, ɔ́ nían famiɛn’n i lika kɛ nga be fa nian tukpacifuɛ kun i lika’n sa. Ɔ́ lá ɔ klun, ɔ maan min min m’ɔ ti famiɛn’n i wun yó i yrɛyrɛ.” 3 Be kunndɛli talua klanman kpa kun Izraɛli mɛn wunmuan’n nun. Kpɛkun be wunnin Abisagi+ m’ɔ ti Sunɛmunfuɛ’n.+ Be fɛ i be blɛli famiɛn’n. 4 Talua’n ti klanman dan. I yɛ ɔ nian famiɛn’n i lika kɛ nga be fa nian tukpacifuɛ kun i lika’n sa-ɔ. Sanngɛ famiɛn’n nin i b’a siman sua.

5 Blɛ sɔ’n nun’n, Agiti i wa Adonia+ dili i nuan seli kɛ: “Min yɛ ń má yó famiɛn’n niɔn.” Ɔ yoli maan be yoli kakaklolo kun mɛnnin i, ɔ fali nnɛn kpanngɔ su fufuɛ wie mun, yɛ sran ablenun (50) be wanndi dun mmua i ɲrun.+ 6 Sanngɛ i si w’a ijɔmɛn i le* w’a seman kɛ: “?Ngue ti yɛ a yoli sa nga-ɔ?” I kusu ti gbanflɛn klanman kpa. Be dun mmua wuli Absalɔmun ka naan i nin liɛʼn wʼa wu i. 7 Ɔ nin Zeruya i wa Zoabu nin Abiataa+ m’ɔ ti Ɲanmiɛn ɲrun jranfuɛ’n be wunnin be wun. Kpɛkun be ukali Adonia, yɛ be jrɛnnin i sin.+ 8 Sanngɛ Zadɔku+ m’ɔ ti Ɲanmiɛn ɲrun jranfuɛ’n, nin Zoyada i wa Benaya,+ nin Natan+ m’ɔ ti Ɲanmiɛn nuan ijɔfuɛ’n, nin Simei,+ nin Rei, yɛ Davidi i sonja kpakpa mun+ b’a jranman Adonia sin.

9 Adonia fali bua nin nannin, ɔ nin nnɛn nga b’a lo kpa’n, ɔ fa yili tɛ+ yɔbuɛ ng’ɔ o Zoelɛti lɔ’n i wun lɛ, ɔ o An-Rogɛli i wun koko lɛ. Ɔ yiɛli i niaan mɔ be ti famiɛn’n i mma mun’n, ɔ nin Zida lɔ famiɛn’n i sufuɛ’m be kwlaa. 10 Sanngɛ w’a yiaman Natan m’ɔ ti Ɲanmiɛn nuan ijɔfuɛ’n, nin Benaya, nin alɛ kunfuɛ kpakpa mun, ɔ nin i niaan bian Salomɔn. 11 Natan+ seli Bati-Seba+ m’ɔ ti Salomɔn i nin’n+ kɛ: “?W’a timɛn i kɛ Agiti i wa Adonia+ w’a yo famiɛn naan e min Davidi bɔbɔ siman nun? 12 Yaci, ń má mán wɔ afɔtuɛ kun kɛ ɔ ko yo naan a nin ɔ wa Salomɔn amun a fite nun’n ti.+ 13 Kɔ ko wun Famiɛn Davidi wun, yɛ se i kɛ: “?Min min, wɔ mɔ a ti famiɛn’n, nán wɔ yɛ a tali ɔ sufuɛ’n i nda seli kɛ min wa Salomɔn yɛ ɔ́ sín ɔ osu dí famiɛn, naan i yɛ ɔ́ wá trán ɔ famiɛn bia’n su’n niɔn?+ ?Yɛ nn ngue ti yɛ Adonia yɛ w’a kaci famiɛn-ɔn?” 14 Kɛ a nin famiɛn’n bé íjɔ’n, n bɔbɔ ń wlú amun sin lɔ yɛ ń sé kɛ ɔ ndɛ’n ti su.”

15 Ɔ maan Bati-Seba wluli famiɛn’n i sin i sua ba’n nun lɔ. Famiɛn’n w’a yo oke kpa, yɛ Abisagi+ m’ɔ ti Sunɛmunfuɛ’n niɛn i lika. 16 I sin’n, Bati-Seba kotoli, ɔ utuli i ɲin ase famiɛn’n i ɲrun lɛ, yɛ famiɛn’n usɛli i kɛ: “?Ngue yɛ a kunndɛ kɛ n yo man wɔ-ɔ?” 17 Ɔ tɛli i su kɛ: “Min min, ɔ bɔbɔ a tali ɔ sufuɛ’n i nda ɔ Ɲanmiɛn Zoova i ɲrun seli kɛ min wa Salomɔn yɛ ɔ́ sín ɔ osu dí famiɛn-ɔn, naan i yɛ ɔ́ trán ɔ famiɛn bia’n su-ɔ.+ 18 Sanngɛ nian! Adonia w’a kaci famiɛn, yɛ min min m’ɔ ti famiɛn’n ɔ siman nun.+ 19 Ɔ fali nannin tola mun, nnɛn mɔ b’a lo kpa’n nin bua kpanngban kpa, yɛ ɔ yiali famiɛn’n i mma’m be kwlaa, nin Abiataa m’ɔ ti Ɲanmiɛn ɲrun jranfuɛ’n nin Zoabu m’ɔ ti sonja’m be su kpɛn’n.+ Sanngɛ w’a yiaman ɔ sufuɛ Salomɔn wie.+ 20 Ɔ maan min min, wɔ mɔ a ti famiɛn’n, siɛn’n Izraɛlifuɛ’m be kwlaa be ɲin ta wɔ, kle be sran ng’ɔ́ wá sín min min m’ɔ ti famiɛn’n i osu ɔ́ trán famiɛn bia’n su’n. 21 Sɛ w’a yoman sɔ’n, kɛ a ko wu’n,* bé sé kɛ e nin min wa Salomɔn e ti be kpɔfuɛ.”

22 Kɛ ɔ́ kán ndɛ’n klé famiɛn’n yɛ Natan m’ɔ ti Ɲanmiɛn nuan ijɔfuɛ’n bali-ɔ.+ 23 Be ka lɛ seli famiɛn’n kɛ: “Natan m’ɔ ti Ɲanmiɛn nuan ijɔfuɛ’n w’a ba!” Ɔ ɔli famiɛn’n i ɲrun lɔ, ɔ kotoli famiɛn’n i bo yɛ ɔ utuli i ɲin ase. 24 I sin’n, Natan seli kɛ: “?Min min, wɔ mɔ a ti famiɛn’n, wɔ yɛ a seli kɛ maan Adonia sin ɔ osu di famiɛn naan i yɛ ɔ tran ɔ famiɛn bia’n su-ɔ?+ 25 Afin andɛ’n, w’a fa nannin tola mun, nnɛn mɔ b’a lo kpa’n, nin bua kpanngban kpa w’a fa yi tɛ.+ Ɔ yiali famiɛn’n i mma’m be kwlaa, ɔ nin sonja su kpɛn mun, nin Abiataa m’ɔ ti Ɲanmiɛn ɲrun jranfuɛ’n.+ Yɛ kɛ é sé yɛ’n, be nin i be o lɔ be su di like, yɛ be su nɔn nzan. Be kpan be se kɛ: ‘Maan wie’n wla fi Famiɛn Adonia!’ 26 Sanngɛ b’a yiaman min mɔ n ti ɔ sufuɛ’n, nin Zadɔku m’ɔ ti Ɲanmiɛn ɲrun jranfuɛ’n, nin Zoyada i wa Benaya,+ nin ɔ sufuɛ Salomɔn. 27 ?Min min, wɔ mɔ a ti famiɛn’n, wɔ yɛ a mannin sa sɔ’n i wun atin mɔ w’a kleman ɔ sufuɛ’n sran ng’ɔ fata kɛ ɔ sin ɔ osu tran famiɛn bia’n su’n niɔn?”

28 Famiɛn Davidi tɛli su kɛ: “Maan be flɛ Bati-Seba be man min.” Kɛ ɔ yoli sɔ’n, Bati-Seba bali, ɔ wa jrannin famiɛn’n i ɲrun lɛ. 29 Famiɛn’n tali nda kɛ: “N kan Zoova m’ɔ lafiman’n, m’ɔ deli min* sa kekle kwlaa nun’n.+ 30 Kɛ nga n fa tali wɔ nda Zoova m’ɔ ti Izraɛli i Ɲanmiɛn’n i ɲrun’n sa’n, mɔ n seli kɛ min wa Salomɔn yɛ ɔ́ sín min osu dí famiɛn naan i yɛ ɔ́ wá trán min famiɛn bia’n su’n, i sɔ yɛ ń má yó i andɛ cɛn ba liɛ’n nun-ɔn.” 31 Ɔ maan Bati-Seba kotoli famiɛn’n i bo, ɔ utuli i ɲin ase yɛ ɔ seli famiɛn’n kɛ: “Maan wie’n wla fi Famiɛn Davidi.”

32 Be ja nun lɛ’n, Famiɛn Davidi seli kɛ: “Maan amun flɛ Zadɔku m’ɔ ti Ɲanmiɛn ɲrun jranfuɛ’n, nin Natan m’ɔ ti Ɲanmiɛn nuan ijɔfuɛ’n nin Zoyada+ i wa Benaya.”+ Ɔ maan be bali famiɛn’n i ɲrun. 33 Famiɛn’n seli be kɛ: “Maan amun nin amun min’n i sufuɛ mun an fa min wa Salomɔn fu min milɛ’n* su.+ Yɛ an fɛ i wɔ Giɔn.+ 34 Zadɔku m’ɔ ti Ɲanmiɛn ɲrun jranfuɛ’n, nin Natan m’ɔ ti Ɲanmiɛn nuan ijɔfuɛ’n bé gúɛ i ti su ngo+ naan ɔ yo famiɛn Izraɛlifuɛ’m be su. I sin’n, maan be bo awɛ yɛ be se kɛ: ‘Maan wie’n wla fi Famiɛn Salomɔn!’+ 35 Kpɛkun maan amun nin i be sa be sin. Maan ɔ wa tran min famiɛn bia’n su. Ɔ́ káci famiɛn sín min osu, yɛ ń má síe i Izraɛli nin Zida be su kpɛn.” 36 Be ja nun lɛ’n, Zoyada i wa Benaya seli famiɛn’n kɛ: “Maan ɔ yo sɔ! Maan Zoova m’ɔ ti min min m’ɔ ti famiɛn’n i Ɲanmiɛn’n ɔ yo maan sa sɔ’n kpɛn su. 37 Kɛ nga Zoova fa jrannin min min m’ɔ ti famiɛn’n i sin’n sa’n, maan ɔ jran Salomɔn sin sɔ wie.+ Yɛ maan ɔ yo naan i kwlalɛ’n yo dan tra min min Famiɛn Davidi liɛ’n.”+

38 I sin’n, Zadɔku m’ɔ ti Ɲanmiɛn ɲrun jranfuɛ’n nin Natan m’ɔ ti Ɲanmiɛn nuan ijɔfuɛ’n, nin Zoyada i wa Benaya,+ nin Kerɛtifuɛ mun, nin Pelɛtifuɛ’m+ be ɔli, be yoli maan Salomɔn fuli Famiɛn Davidi i milɛ’n* su,+ yɛ be fɛ i ɔli Giɔn.+ 39 Zadɔku m’ɔ ti Ɲanmiɛn ɲrun jranfuɛ’n ɔ fali nnɛn wɛ nga ngo o nun’n+ tannin sua’n+ nun lɔ, yɛ ɔ guali Salomɔn i ti su ngo.+ Ɔ maan be boli awɛ’n, yɛ nvlefuɛ’m be kwlaa be kpan seli kɛ: “Maan wie’n wla fi Famiɛn Salomɔn!” 40 Kɛ ɔ yoli sɔ’n, nvlefuɛ’m be kwlaa be suli i su be ɔli. Kɛ bé kɔ́’n nn bé bó blo, nn bé kpán aklunjɔɛ kpanlɛ. Be kpanlɛ sɔ’n ti’n asiɛ’n kejeli.*+

41 Adonia nin be kwlaa ng’ɔ yiali be’n, be tili aklunjɔɛ kpanlɛ sɔ’n. Kɛ ɔ́ yó sɔ’n, nn b’a wie like di.+ Kɛ Zoabu tili awɛ’n i tɛlɛ’n cɛ’n, ɔ seli kɛ: “?Ngue ti yɛ be kpankpan klɔ’n nun lɔ sɔ-ɔ?” 42 I nuan nin-a tɔman kpɛkun Abiataa i wa Zonatan+ m’ɔ ti Ɲanmiɛn ɲrun jranfuɛ’n w’a ba. I sin’n, Adonia seli kɛ: “Wlu wa, a ti sran kpa,* n si kɛ jasin fɛ o ɔ nuan.” 43 Sanngɛ Zonatan tɛli Adonia su kɛ: “Cɛcɛ, e min Famiɛn Davidi w’a sie Salomɔn famiɛn. 44 Famiɛn’n seli Zadɔku m’ɔ ti Ɲanmiɛn ɲrun jranfuɛ’n nin Zoyada i wa Benaya nin Kerɛtifuɛ mun, nin Pelɛtifuɛ mun kɛ be nin Salomɔn be wɔ. Be fɛ i fuli famiɛn’n i milɛ’n su.+ 45 I sin’n, Zadɔku m’ɔ ti Ɲanmiɛn ɲrun jranfuɛ’n nin Natan m’ɔ ti Ɲanmiɛn nuan ijɔfuɛ’n be guɛli i ti su ngo Giɔn lɔ. Kpɛkun be sali be sin. Kɛ bé bá’n be di aklunjɔɛ, ɔ maan klɔ’n nun w’a keje yekee. Yɛle kpankpanlɛ nga amun tili i lɛ’n. 46 Asa ekun’n, Salomɔn w’a tran famiɛn bia’n su. 47 Sanngɛ nɛ́n i ngba-ɔ, famiɛn’n i sufuɛ’m be bali be wa yoli e min Famiɛn Davidi i mo. Be seli kɛ: ‘Maan ɔ Ɲanmiɛn’n yo maan Salomɔn i dunman’n yo dan tra ɔ liɛ’n, yɛ maan ɔ yo maan i kwlalɛ’n yo dan tra ɔ liɛ’n!’ Kɛ ɔ yoli sɔ’n, famiɛn’n kɛnnin i ti ase manmannin Ɲanmiɛn i bɛ’n su. 48 Asa ekun’n, famiɛn’n seli kɛ: ‘Maan be manman Zoova m’ɔ ti Izraɛli Ɲanmiɛn’n, afin andɛ’n w’a fa sran kun kɛ ɔ tran famiɛn bia’n su, yɛ ɔ yoli maan min ɲinma wunnin sa sɔ’n.’”

49 Kɛ ɔ yoli sɔ’n, srɛ dan kpa kunnin be nga Adonia yiali be’n, ɔ maan be jasoli kunngunngun be ɔli. 50 Adonia bɔbɔ’n, srɛ kunnin i dan kpa Salomɔn wun wie. Ɔ maan ɔ fɛli i sa ko to blali nnɛn wɛ nga be o tɛ yiwlɛ’n su’n.+ 51 Be ko seli Salomɔn kɛ: “Famiɛn Salomɔn ti’n, srɛ kun Adonia. Ɔ maan w’a ko tra nnɛn wɛ nga be o tɛ yiwlɛ’n su’n. I waan: ‘Maan Famiɛn Salomɔn dun mmua ta min nda kɛ ɔ su faman tokofi kunmɛn i sufuɛ’n.’” 52 Salomɔn tɛli su kɛ: “Sɛ ɔ nanti kɛ ɔ fata’n sa’n, i ti ndrɛ ba kun sa su tɔman asiɛ wun,+ sanngɛ sɛ ɔ yo sa tɛ’n, saan ɔ́ wú.” 53 Ɔ maan Famiɛn Salomɔn sunmannin sran kɛ be ko fɛ i tɛ yiwlɛ’n su lɔ bla. Ɔ bali, ɔ wa kotoli Famiɛn Salomɔn bo. I sin’n, Salomɔn seli i kɛ: “Kɔ ɔ awlo.”