Ezipti Lɔ Tulɛ
32 Kɛ ɔ́ yó sɔ’n, nvlefuɛ’m be wunnin kɛ Moizi su cɛ oka’n su lɔ naan ɔ jraman.+ Ɔ maan nvlefuɛ’m be ko yiali Aarɔn i wun lɛ, kpɛkun be seli i kɛ: “Jaso, yo ɲanmiɛn kun man e naan ɔ dun mmua e ɲrun,+ afin Moizi sɔ’n, bian m’ɔ fali e Ezipti mɛn’n nun lɔ bali’n, e siman sa nga w’a ju i su’n.” 2 Kɛ ɔ yoli sɔ’n, Aarɔn seli be kɛ: “Amun yiyi sika ɔkwlɛ asunmanndi+ mɔ be o amun yi mun, nin amun mma yasua mun, nin amun mma bla’m be su’m be nun’n, naan amun fa blɛ min.” 3 Ɔ maan nvlefuɛ’m be kwlaa be yiyili be su’m be nun sika ɔkwlɛ asunmanndi mun, kpɛkun be fa blɛli Aarɔn. 4 Ɔ fali sika ɔkwlɛ’n be sa nun, kpɛkun ɔ fali blalɛ kun fa boli naan w’a fa yo nannin ba kun.+ Yɛ be seli kɛ: “Izraɛli, ɔ Ɲanmiɛn’n yɛ, i yɛ ɔ fali wɔ Ezipti mɛn’n nun fiteli-ɔ.”+
5 Kɛ Aarɔn wunnin i sɔ’n, ɔ kplannin tɛ yiwlɛ kun nannin ba’n i ɲrun lɛ. I sin’n, Aarɔn kpan seli kɛ: “Ainman’n, é dí cɛn é mán Zoova.” 6 Kɛ aliɛ cɛnnin’n, be jasoli nglɛmun ndɛ kpa be yili tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ mun. Kɛ ɔ yoli sɔ’n, nvlefuɛ’m be trannin ase be dili like yɛ be nɔnnin nzan. I sin’n, be jasoli be kannin ngowa.+
7 Kpɛkun Zoova seli Moizi kɛ: “Kɔ, jra, afin ɔ sran nga a fali be Ezipti mɛn’n nun bali’n b’a yo sa tɛ dan.+ 8 B’a yaci atin nga n kleli be kɛ be fa su’n lalaa.+ B’a yo nannin ba kun, be koto i bo kpɛkun be yi tɛ be mɛn i. Be se kɛ: ‘Izraɛli, ɔ Ɲanmiɛn’n yɛ, i yɛ ɔ fali wɔ Ezipti mɛn’n nun fiteli-ɔ.’” 9 Zoova seli Moizi ekun kɛ: “M’an wun kɛ nvle nga nunfuɛ’m be ɲin su ti kekle.*+ 10 Siɛn’n, yaci min nun maan n yo sa kun. Min ya’n wá júe kɛ sin sa, kpɛkun ń núnnún be mlɔnmlɔn. Yɛ ń má yó maan á káci nvle dan kun, yɛ á sín be osu.”+
11 Moizi kpɛtɛli i Ɲanmiɛn Zoova.+ Ɔ seli kɛ: “?Ee, Zoova, ɔ sran mɔ a fali ɔ tinmin dan’n, nin ɔ sa mɔ wunmiɛn o nun’n fali be Ezipti mɛn’n nun fiteli’n, ngue ti yɛ ɔ ya’n ɔ́ júe be su-ɔ?+ 12 Nán maan Eziptifuɛ’m be se kɛ: ‘W’a buman be wun akunndan kpa yɛ ɔ fa be fiteli-ɔ. Ɔ kunndɛ kɛ ɔ́ kún be oka’m be su lɔ naan ɔ́ núnnún be asiɛ’n su mlɔnmlɔn.’+ Gua ɔ ya dan’n i ase, nán yo nga a sunnzunnin kɛ á yó’n,* nán fa ɲrɛnnɛn yi ɔ nvlefuɛ’m be su. 13 Maan ɔ wla kpɛn ɔ sufuɛ Abraamun, nin Izaaki, nin Izraɛli be su. A tali ɔ wun nda, a seli be kɛ: ‘Ń má yó maan amun osu’n nunfuɛ’m bé trɛ́ kɛ nzraama nga be o ɲanmiɛn su lɔ’n sa.+ Mɛn ng’ɔ o yɛ mɔ n kɛnnin i ndɛ’n, ń má fɛ́ i kwlaa ń mán amun osu’n nunfuɛ mun, naan be fa yo be liɛ tititi.’”+
14 Zoova kacili akunndan.* Ɔ maan ɲrɛnnɛn ng’ɔ seli kɛ ɔ́ fá yí i nvlefuɛ’m be su’n w’a fa yiman be su kun.+
15 I sin’n, Moizi sɛli i sin, ɔ fin oka’n su jrali, yɔbuɛ paplaapla nɲɔn mɔ Mmla’n* wo su’n+ be o i sa nun.+ Be klɛli yɔbuɛ paplaapla’m be bue nɲɔn’n su. Be klɛli be ɲrun nin be sin. 16 Yɔbuɛ paplaapla’m be ti Ɲanmiɛn i sa nuan like. Ɲanmiɛn yɛ ɔ klɛli yɔbuɛ paplaapla’m be su-ɔ.+ 17 Kɛ Zozie tili nvlefuɛ’m be nɛn’n, kpanlɛ mɔ be kpan’n ti’n, ɔ seli Moizi kɛ: “Alɛ nganniɛn tɛ nanmue’n nun lɔ.” 18 Sanngɛ Moizi seli kɛ:
“Nán kwlalɛ jue yɛ ɔ tɛ-ɔ.
Kusu nán sran mɔ b’a kwla be’n be kpanlɛ-ɔ.
Jue uflɛ yɛ n ti-ɔ.”
19 Kɛ Moizi juli nanmue’n i wun koko m’ɔ wunnin nannin ba’n,+ ɔ nin able mɔ be su si’n, ɔ fali ya dan kpa. Yɔbuɛ paplaapla nga be o i sa nun’n, ɔ tɛli be ase, ɔ bubuli be nun oka’n i bo lɛ.+ 20 Ɔ fali nannin ba nga be yoli’n, ɔ yrɛli i sin nun kpɛkun ɔ fufuli nun.+ I sin’n, ɔ fa sanndili i nzue’n su yɛ ɔ seli Izraɛlifuɛ’m be kɛ be nɔn.+ 21 Moizi usali Aarɔn kɛ: “?Ngue yɛ nvlefuɛ nga’m be yoli wɔ mɔ i ti yɛ a fali be yili sa tɛ dan kɛ nga sa’n nun-ɔn?” 22 Aarɔn tɛli i su kɛ: “Min min, nán fa ya, ɔ bɔbɔ a si kpa kɛ nvlefuɛ’m be klo sa tɛ yolɛ.+ 23 Be seli min kɛ: ‘Yo ɲanmiɛn kun man e naan ɔ dun mmua e ɲrun, afin Moizi sɔ’n, bian m’ɔ fali e Ezipti mɛn’n nun lɔ bali’n e siman sa nga w’a ju i su’n.’+ 24 Ɔ maan n seli be kɛ: ‘Sran kwlaa ng’ɔ le sika ɔkwlɛ’n maan ɔ yi naan ɔ fa blɛ min.’ I sin’n, n fa guɛli i sin nun yɛ nannin ba nga boli nun-ɔn.”
25 Moizi wunnin kɛ nvlefuɛ’m be su yo be klunklo like. Afin Aarɔn yacili be lɛ maan be yoli like nga be klo’n. Ɔ maan be ɲin guali ase be kpɔfuɛ’m be ɲrun. 26 I sin’n, Moizi ko jrannin nanmue’n i anuan’n nun lɛ, kpɛkun ɔ seli kɛ: “?Wan yɛ ɔ o Zoova sin-ɔn? Maan ɔ bla min wun wa!”+ Kpɛkun Levifuɛ’m be kwlaa be ko yiɛli i wun lɛ. 27 Ɔ seli be kɛ: “Ndɛ nga Zoova m’ɔ ti Izraɛlifuɛ’m be Ɲanmiɛn’n kan’n yɛ: ‘Maan amun tinuntinun amun fa amun tokofi mun naan amun sinsin nanmue’n i lika kwlaa nun, naan sran kun kun i niaan, nin i mantanfuɛ, nin i janvuɛ kpa’n.’”+ 28 Levifuɛ’m be yoli like nga Moizi seli kɛ be yo’n. Ɔ maan cɛn sɔ’n nun’n yasua akpi nsan (3.000) be wuli. 29 I sin’n, Moizi seli kɛ: “Andɛ’n, amun fa amun wun man Zoova naan amun di i junman’n. Afin amun tinuntinun amun kunnin amun bɔbɔ amun wa nin amun niaan.+ Andɛ’n, ɔ́ wá yrá amun su.”+
30 Kɛ aliɛ cɛnnin cɛ’n, Moizi seli nvlefuɛ’m be kɛ: “Amun yoli sa tɛ dan. Ɔ maan ń má fú Zoova wun lɔ naan ń nían, sɛ n kwla yo naan ɔ blu amun sa tɛ’n su-o.”+ 31 Moizi sɛli i sin Zoova i wun lɔ, kpɛkun ɔ seli i kɛ: “Nvlefuɛ’m be yoli sa tɛ dan! Be fali sika ɔkwlɛ be yoli ɲanmiɛn kun!+ 32 Sanngɛ sɛ ɔ ti ɔ klun su’n, yaci be sa tɛ’n cɛ be.+ Sɛ w’a yoman sɔ’n, yaci, nunnun min dunman’n ɔ fluwa nga a klɛli’n nun.”+ 33 Sanngɛ Zoova seli Moizi kɛ: “Sran ng’ɔ fɔnnin min wun’n yɛ ń núnnún i dunman’n min fluwa’n nun-ɔn. 34 Siɛn’n kɔ, fa nvlefuɛ mun kɔ lika nga n kɛnnin i ndɛ kleli wɔ’n nun lɔ. Nian, min anzi’n wá dún mmua ɔ ɲrun.+ Kpɛkun cɛn nga ń má úsa be sa’n, ń tú be fɔ be sa tɛ nga be yoli’n ti.” 35 Nannin ba nga nvlefuɛ’m be yoli’n ti’n, Zoova fali ɲrɛnnɛn yili be su. Aarɔn yɛ ɔ yoli nannin ba sɔ’n niɔn.