Ezekiɛli

18 Kpɛkun Zoova kannin ndɛ kleli min ekun. Ɔ seli min kɛ: 2 “?Ɲanndra nga amun bu i Izraɛli mɛn’n nun mɔ amun se kɛ: ‘Siɛ’m be dili viɲin mma amuɛn sanngɛ ba mun yɛ be je’n ɲannin’n’ i bo’n yɛle benin’?+

3 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: ‘N wo lɛ sakpa, amun su kanman ndɛ sɔ’n Izraɛli lɔ kun. 4 An nian! Sran’m be kwlaa be nguan’n ti min liɛ, siɛ’n i nguan’n nin-o, ba’n i nguan’n nin-o, be ti min liɛ. Sran ng’ɔ yo sa tɛ’n i sɔfuɛ’n yɛ ɔ́ wú-ɔ.

5 “‘Wienun-ɔn, sran kun ti sran kpa. Ɔ yo sa nuan su sɛsɛ yɛ ɔ yo sa ng’ɔ ti kpa’n. 6 Ɔ diman nnɛn nga be fa yi tɛ be man amuin mun oka’m be su’n.+ Ɔ mɛnmɛn i ɲin su nianman Izraɛli nvle’n nunfuɛ’m be amuin mɔ be ti like kain’n,* ɔ kunndɛmɛn i wiengu i yi,*+ yɛ ɔ nin bla m’ɔ o i mannza blɛ nun’n be siman sua.+ 7 Ɔ yoman sran fi tɛ,+ yɛ sɛ sran wie usali bosia i sa nun naan ɔ wlali nun aowa’n, ɔ fa like sɔ mɔ sran’n wlɛli i aowa’n ɔ fa mɛn i.+ Ɔ wuaman sran like,+ sanngɛ ɔ fɛ i bɔbɔ i aliɛ’n ɔ man sran nga awe kun i’n,+ yɛ sran nga i wun ti kplɛn’n, ɔ fa tralɛ wlɛ i wun.+ 8 Kɛ ɔ bo sran bosia’n ɔ seman kɛ be su i bo,+ yɛ ɔ kunndɛman kɛ ɔ́ ɲán nun like, ɔ niɛn i wun su naan w’a yoman sa m’ɔ timan su’n.+ Sɛ ndɛ tɔ yasua nɲɔn be afiɛn’n ɔ di be ndɛ’n i klanman,+ 9 ɔ nanti min mmla’m be su, yɛ ɔ fa ndɛ nga n kan’n su, kɛ ɔ ko yo naan ɔ nin min w’a nanti klanman’n ti. Sran sɔ’n ti sran kpa, saan ɔ́ ká nguan nun.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

10 “‘Sanngɛ sɛ sran sɔ’n wu ba kun, naan ɔ kaci awiefuɛ+ annzɛ sran kunfuɛ,+ annzɛ ɔ yo ninnge nga’m be nun kun’n 11 (kusu nn i si w’a yoman sa sɔ’m be nun wie fi’n): Ɔ di nnɛn nga be fa yi tɛ man amuin mun oka’m be su’n, ɔ kunndɛ i wiengu i yi, 12 ɔ yo be nga be leman wie’n, ɔ nin yalɛfuɛ’m be tɛtɛ,+ ɔ wua, ɔ yiman like nga be wlɛli i aowa i sa nun’n manman, ɔ mɛn i ɲin su nian amuin mɔ be ti like kain’n,+ ɔ fɛ i wun wla tete sa’m be yolɛ’n nun,+ 13 kɛ ɔ bo sran bosia’n ɔ kunndɛ kɛ ɔ́ ɲán nun like, ɔ kunndɛ kɛ be su i bo.+ Ba sɔ’n su kaman nguan nun. Tete ninnge ng’ɔ yoli be’n be kwlaa be ti’n, saan bé kún i. I bɔbɔ ti yɛ ɔ wuli-ɔ.

14 “‘Sanngɛ maan e se kɛ, siɛ kun le ba kun. Ɔ wun sa tɛtɛ kwlaa nga i si yo’n. Kannzɛ bɔbɔ ɔ wun sa sɔ mun’n sanngɛ ɔ yoman wie. 15 Ɔ diman nnɛn nga be fa yi tɛ be man amuin mun oka’m be su’n, ɔ mɛnmɛn i ɲin su nianman Izraɛli nvle’n nunfuɛ’m be amuin mɔ be ti like kain’n, ɔ kunndɛmɛn i wiengu i yi, 16 ɔ yoman sran fi tɛ, like nga be wlɛli i aowa i sa nun’n ɔ kɛmɛn i sa nun, ɔ wuaman, ɔ fɛ i bɔbɔ i aliɛ’n man sran nga awe kun i’n, yɛ sran nga i wun ti kplɛn’n ɔ fa tralɛ wlɛ i wun. 17 Ɔ niɛn i wun su naan w’a yoman yalɛfuɛ’n i tɛtɛ. Sɛ ɔ bo sran bosia’n ɔ kunndɛman kɛ ɔ́ ɲán nun like, ɔ kunndɛman kɛ be su i bo. Ɔ fa ndɛ nga n kan’n su, yɛ ɔ nanti min mmla’m be su. Sran sɔ’n ɔ su wuman sa tɛ nga i si’n yoli be’n be ti. Saan ɔ́ ká nguan nun. 18 Sanngɛ kɛ mɔ i si dili ndrunmun, m’ɔ wuɛli i niaan’n, kpɛkun ɔ yoli sa ng’ɔ ti tɛ’n i nvlefuɛ’m be afiɛn’n ti’n, ɔ́ wú, sa tɛ ng’ɔ yoli’n ti.

19 “‘Sanngɛ amún wá sé kɛ: “?Ngue ti yɛ siɛ’n i sa tɛ’n ti’n be buman ba’n i fɔ-ɔ? Kɛ mɔ ba’n yoli sa ng’ɔ ti i nuan su sɛsɛ’n, m’ɔ yoli sa kpa, m’ɔ fali min mmla’m be su, m’ɔ dili be su’n ti’n, saan ɔ́ ká nguan nun.+ 20 Sran ng’ɔ yo sa tɛ’n, i sɔfuɛ’n yɛ ɔ́ wú-ɔ.+ Be su buman ba’n i fɔ i si’n i sa tɛ’n ti. Be su buman siɛ’n i fɔ, ba’n i sa tɛ’n ti. Sran kpa’n i sa kpa m’ɔ yo’n ɔ ti i bɔbɔ i ngunmin i liɛ, yɛ klunwifuɛ’n i klunwi ayeliɛ’n ɔ ti i bɔbɔ i ngunmin i liɛ.+

21 “‘Asa ekun’n sɛ klunwifuɛ’n ɔ yaci sa tɛtɛ ng’ɔ yoli be’n be yolɛ, sɛ ɔ nanti min mmla’m be su naan ɔ yo sa ng’ɔ ti i nuan su nin sa ng’ɔ ti kpa’n, saan ɔ́ ká nguan nun. Ɔ su wuman.+ 22 Be su nianman sa tɛtɛ ng’ɔ yoli be’n be nun wie fi su be bumɛn i fɔ kun.+ Ɔ́ ká nguan nun sa kpa m’ɔ yo’n ti.’+

23 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: ‘?Kɛ klunwifuɛ’n wu’n yɛ ɔ yo min fɛ-ɔ?+ ?Kɛ ɔ kaci i ayeliɛ m’ɔ ka nguan nun’n, nɛ́n i sɔ’n yɛ n klo i-ɔ?’+

24 “‘?Sanngɛ sɛ sran kpa’n ɔ yaci sa kpa’n i yolɛ naan ɔ yo sa ng’ɔ ti tɛ’n, naan ɔ yo tete ninnge kwlaa nga klunwifuɛ’n yo’n wie’n, ɔ́ ká nguan nun? Sa kpakpa ng’ɔ yoli be’n be wla su kpɛnman be nun wie fi su kun.+ Kɛ m’ɔ nin min w’a nantiman klanman m’ɔ yoli sa tɛ’n ti’n, ɔ́ wú.+

25 “‘Sanngɛ amún wá sé kɛ: “Like nga Zoova yo’n ɔ timan su.”+ Ee, Izraɛli nvle’n nunfuɛ mun, amun yaci, amun tie. ?Like nga n yo’n yɛ ɔ timan su-ɔ?+ ?Nán like nga amun yo’n yɛ ɔ timan su-ɔ?+

26 “‘Sɛ sran kpa’n yaci sa kpa’n i yolɛ naan ɔ yo sa ng’ɔ ti tɛ’n, naan i sɔ’n ti ɔ wu’n, i bɔbɔ i sa tɛ ng’ɔ yoli be’n i ti yɛ ɔ wuli-ɔ.

27 “‘Yɛ sɛ klunwifuɛ’n ɔ yaci klunwi sa ng’ɔ yoli be’n be yolɛ, naan ɔ yo sa m’ɔ ti i nuan su sɛsɛ’n, yɛ ɔ yo sa kpa’n, ɔ́ dé i bɔbɔ i nguan’n.+ 28 Sɛ ɔ wun i wlɛ naan ɔ yaci sa tɛtɛ kwlaa ng’ɔ yoli be’n be yolɛ’n, saan ɔ́ ká nguan nun. Ɔ su wuman.

29 “‘Sanngɛ Izraɛli nvle’n nunfuɛ’m bé wá sé kɛ: “Like nga Zoova yo’n timan su.” ?Ee, Izraɛli nvle’n nunfuɛ mun, like nga n yo’n yɛ ɔ timan su-ɔ?+ ?Nán like nga amun yo’n yɛ ɔ timan su-ɔ?’

30 “‘Ndɛ nga Miɛn Zoova m’ɔ Sie Like Kwlakwla’n kan’n yɛ: ‘I sɔ’n ti’n, Izraɛli nvle’n nunfuɛ mun, ń má nían like nga amun tinuntinun amun yo’n su ń dí amun jɔlɛ.+ Amun kaci, nanwlɛ, amun yaci sa tɛtɛ kwlaa nga amun yoli be’n be yolɛ mlɔnmlɔn, kɛ ɔ ko yo naan b’a kaciman like mɔ be ja kpla su m’ɔ kwla fa amun yi i sa tɛ yolɛ nun’n ti. 31 Ee Izraɛli nvle’n nunfuɛ mun, amun wla sa tɛtɛ nga amun yoli be’n be ase,+ yɛ amun fa awlɛn uflɛ nin akunndan uflɛ.+ ?Ngue ti yɛ amún kó wú yɛ?’+

32 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Sran fi i wie’n yoman min fɛ kaan sa.+ Ɔ maan amun kaci amun ayeliɛ’n naan amun ka nguan nun.’”+