Jɔlɛ Difuɛ Mun

13 Izraɛlifuɛ’m be yoli sa tɛ ekun Zoova ɲrun,+ ɔ maan Zoova fali be wlali Filistifuɛ’m be sa nun+ afuɛ ablanan (40).

2 Blɛ sɔ’n nun’n, bian kun o Zora+ lɔ, be flɛ i kɛ Manoa,+ ɔ ti Dan akpasua’n nunfuɛ.+ I yi’n i klun ti kpan, yɛ ɔ leman ba.+ 3 Cɛn kun’n, Zoova i anzi’n yili i wun nglo kleli bla’n, kpɛkun ɔ seli i kɛ: “Nian, ɔ klun ti kpan, yɛ a leman ba. Sanngɛ á wá wúnnzɛ yɛ á wá wú ba yasua kun.+ 4 Siɛn’n, nian ɔ wun su, nán nɔn duvɛn annzɛ nzan wie m’ɔ kwla bo’n,+ yɛ nán di like wie m’ɔ ti fiɛn’n.+ 5 Nian! Á wá wúnnzɛ yɛ á wá wú ba yasua kun, nán maan razuaa kɛn i ti’n,+ afin ba sɔ’n kɛ ɔ fɛ i i awuliɛ cɛn’n, ɔ́ yó Ɲanmiɛn i Nazirifuɛ. I yɛ ɔ́ wá bó Izraɛlifuɛ’m be delɛ bo Filistifuɛ’m be sa nun-ɔn.”+

6 I sin’n, bla’n ɔli ko seli i wun’n kɛ: “Ɲanmiɛn Kpli i sran kun wa wunnin min wun. I wafa’n ti kɛ Ɲanmiɛn Kpli i anzi wie sa, ɔ yo sro. M’an usɛmɛn i lika ng’ɔ fin’n, yɛ w’a bomɛn i dunman’n w’a kleman min.+ 7 Sanngɛ ɔ seli min kɛ: ‘Nian! Á wá wúnnzɛ, yɛ á wá wú ba yasua kun. Nán nɔn duvɛn annzɛ nzan wie m’ɔ kwla bo’n, yɛ nán di like wie m’ɔ ti fiɛn’n, afin ba sɔ’n kɛ ɔ fɛ i i awuliɛ cɛn lele m’ɔ́ fá jú i wie cɛn’n, ɔ́ yó Ɲanmiɛn i Nazirifuɛ.’”

8 Manoa srɛli Zoova. Ɔ seli i kɛ: “Zoova, yaci. Ń srɛ́ wɔ, maan Ɲanmiɛn Kpli i sran nga a sunmɛnnin i’n ɔ bla ekun naan ɔ wa kle e wafa ng’ɔ fata kɛ e ta ba nga é wá wú i’n.” 9 Ɲanmiɛn Kpli tieli Manoa i srɛlɛ’n. Ɔ maan Ɲanmiɛn Kpli i anzi’n bali bla’n i sin ekun. Kɛ ɔ́ yó sɔ’n, nn ɔ ti ase fie’n su lɔ, yɛ i wun Manoa nunmɛn i wun lɛ. 10 Bla’n wanndili ndɛndɛ ko seli i wun kɛ: “Nian! Bian nga cɛn kun ɔ wa wunnin min wun’n, w’a ba ekun.”+

11 Kɛ ɔ yoli sɔ’n, Manoa jasoli kpɛkun ɔ nin i yi be ɔli. Ɔ ɔli bian’n i wun lɔ, yɛ ɔ usɛli i kɛ: “?Wɔ yɛ a kannin ndɛ kleli min yi’n niɔn?” Ɔ tɛli su kɛ: “Min-ɔn.” 12 Yɛ Manoa seli kɛ: “Maan ɔ ndɛ’n kpɛn su! ?Sanngɛ ba’n i mɛn dilɛ’n ɔ́ yó sɛ? ?Yɛ ngue yɛ ɔ́ wá yó-ɔ?”+ 13 Ɔ maan Zoova i anzi’n seli Manoa kɛ: “Nán ɔ yi i nuan kan ninnge nga n kannin be ndɛ n kleli i’n.+ 14 Nán ɔ di like wie m’ɔ fin viɲin’n, nán ɔ nɔn duvɛn annzɛ nzan m’ɔ kwla bo’n,+ yɛ nán ɔ di like wie m’ɔ ti fiɛn’n.+ Ndɛ kwlaa nga n kan kleli i’n, maan ɔ nian su yo.”

15 Yɛ Manoa seli Zoova i anzi’n kɛ: “Yaci, minndɛ maan e fa boli gbanflɛn kun naan e fa yo like kan e man wɔ.”+ 16 Sanngɛ Zoova i anzi’n seli Manoa kɛ: “Sɛ n minndɛ bɔbɔ’n, n su diman ɔ aliɛ’n. Sanngɛ sɛ ɔ waan á yí tɛ nga kɛ bé yí’n be yra nnɛn’n i kɔlikɔli’n á mán Zoova’n, a kwla yi.” Manoa siman kɛ Zoova i anzi-ɔ. 17 Yɛ Manoa seli Zoova i anzi’n kɛ: “?Be flɛ ɔ sɛ?+ I liɛ’n, sɛ ɔ ndɛ’n kpɛn su’n, é mánmán wɔ.” 18 Sanngɛ Zoova i anzi’n seli i kɛ: “?Ngue ti yɛ a usa min dunman-ɔn? Ɔ ti dunman kun m’ɔ ti dan-ɔn.”

19 I sin’n, Manoa fali boli gbanflɛn’n, ɔ nin ble’n nin i wunsu like’n, kpɛkun ɔ fa be sieli i yɔbuɛ’n su mannin Zoova. Kɛ Manoa nin i yi be jin lɛ bé nían’n, Ɲanmiɛn yoli abonuan sa kun. 20 Kɛ sin taaman’n fin tɛ yiwlɛ’n su m’ɔ́ kɔ́ nglo’n, Zoova i anzi’n fuli tɛ yiwlɛ’n su sin taaman’n nun ɔli nglo. Kɛ ɔ́ yó sɔ’n, nn Manoa nin i yi be o lɛ bé nían. Kɛ be wunnin i sɔ cɛ’n be tɔli, be utuli be ɲin ase. 21 Zoova i anzi’n w’a yimɛn i wun nglo w’a kleman Manoa nin i yi be kun. Ɔ maan Manoa wunnin i wlɛ kɛ Zoova i anzi-ɔ.+ 22 Manoa seli i yi kɛ: “Saan é wú, afin Ɲanmiɛn yɛ e wunnin i-ɔ.”+ 23 Sanngɛ i yi’n seli i kɛ: “Sɛ Zoova kunndɛ kɛ ɔ́ kún e’n, nn w’a sɔman tɛ nga kɛ bé yí’n be yra nnɛn’n i kɔlikɔli’n,+ ɔ nin ble’n nin i wunsu like nga e fa mɛnnin i’n nun, nn w’a kleman e ninnge nga’m be kwlaa, nn w’a kanman ndɛ nga mun w’a kleman e.”

24 Kɛ ɔ́ kɔ́ i ɲrun’n, bla’n wuli ba yasua kun. Ɔ tɔnnin i dunman kɛ Samsɔn.+ Kɛ ba yasua’n ɲín kɔ́’n nn Zoova yrɛ́ i su. 25 I sin’n, Zoova wawɛ’n boli i tinlɛ bo+ Maane-Dan+ lɔ, Zora nin Ɛstaɔlu+ be afiɛn.