Jɔlɛ Difuɛ Mun
10 Kɛ Abimelɛki i blɛ’n sinnin’n, Tola m’ɔ ti Pia i wa’n, mɔ i kusu ti Dodo i wa’n, m’ɔ fin Isakaa akpasua’n su’n, ɔ jasoli kɛ ɔ́ dé Izraɛlifuɛ mun.+ Ɔ tran Samiri, Efraimun okaoka lika’n nun lɔ. 2 Ɔ dili Izraɛlifuɛ’m be jɔlɛ afuɛ ablaɔn-nin-nsan (23). I sin’n, ɔ wuli kpɛkun be sieli i Samiri lɔ.
3 Kɛ Tola i blɛ’n sinnin’n, Zairi m’ɔ ti Galaadifuɛ’n sinnin i osu. Ɔ dili Izraɛlifuɛ’m be jɔlɛ afuɛ ablaɔn-nin-nɲɔn (22). 4 Ɔ le ba yasua ablasan (30), be fu aflunmun ablasan (30) su, yɛ be le klɔ ablasan (30). Andɛ nin andɛ’n be te flɛ klɔ sɔ mun kɛ Avɔti-Zairi,+ be o Galaadi mɛn’n nun lɔ. 5 I sin’n, Zairi wuli kpɛkun be sieli i Kamɔn lɔ.
6 Izraɛlifuɛ’m be yoli sa tɛ Zoova ɲrun ekun.+ Be sɔli Baali mun,+ nin Astaate i nzɔliɛ ninnge mun, nin Aramun* amuin mun, ɔ nin Sidɔn amuin mun, nin Moabu amuin mun,+ nin Amɔnfuɛ’m be amuin mun,+ ɔ nin Filistifuɛ’m be amuin mun.+ Be kacili be sin sili Zoova, b’a sumɛn i. 7 Kɛ ɔ yoli sɔ’n, Zoova fali ya dan kpa Izraɛlifuɛ’m be wun, yɛ ɔ fali be wlali Filistifuɛ mun nin Amɔnfuɛ’m be sa nun.+ 8 Ɔ maan be tinnin Izraɛlifuɛ’m be su, yɛ be yoli be tɛtɛ kpa afuɛ sɔ’n nun. Izraɛlifuɛ be kwlaa nga be o Zurdɛn’n i bue nga laa’n ɔ ti Amɔɔfuɛ’m be liɛ Galaadi lɔ’n, be kleli be yalɛ afuɛ blu-nin-mɔcuɛ (18). 9 Amɔnfuɛ mun bɔbɔ be kpɛli Zurdɛn’n naan be nin Zida, nin Bɛnzamɛn, ɔ nin Efraimun i awlo’n bé kó kún alɛ. I sɔ’n ti’n, Izraɛlifuɛ’m be wla boli be wun dan kpa. 10 Kɛ ɔ yoli sɔ’n, Izraɛlifuɛ’m be kpan flɛli Zoova kɛ ɔ uka be.+ Be seli kɛ: “E yoli sa tɛ ɔ ɲrun, afin e yacili e Ɲanmiɛn’n kpɛkun e sɔli Baali mun.”+
11 Sanngɛ Zoova seli Izraɛlifuɛ’m be kɛ: “?M’an deman amun Eziptifuɛ mun,+ nin Amɔɔfuɛ mun,+ nin Amɔnfuɛ mun, nin Filistifuɛ mun,+ 12 nin Sidɔnfuɛ mun, nin Amalɛkifuɛ mun, ɔ nin Madianfuɛ mɔ be kleli amun yalɛ’n, be sa nun? Kɛ amun kpan flɛli min’n, n deli amun be sa nun. 13 Sanngɛ amun yacili min ko sɔli amuin mun.+ I sɔ’n ti’n, n su deman amun kun.+ 14 Amun wɔ amuin nga amun sɔ be’n be sin, yɛ an kpan flɛ be naan be uka amun.+ Maan be de amun amun awlabɔɛ blɛ’n nun.”+ 15 Sanngɛ Izraɛlifuɛ’m be seli Zoova kɛ: “E yoli sa tɛ. Like kwlaa nga ɔ waan á fá yó e’n, fa yo e. Sanngɛ ɔ li yaci, de e andɛ.” 16 Kpɛkun be guali be amuin’m be blo, yɛ be suli Zoova.+ Ɔ maan ɔ yaci Izraɛlifuɛ mun ɲrɛnnɛn sɔ’n nun-ɔn, ɔ yoman ye.*+
17 I sin’n, Amɔnfuɛ’m+ be yiayiali be sonja mun, kpɛkun be boli be nanmue Galaadi lɔ. Ɔ maan Izraɛlifuɛ’m be kusu be ti yiali, kpɛkun be boli be nanmue Mizpa lɔ. 18 Galaadifuɛ mun nin be sran dandan mun be seli be wiengu kɛ: “?Wan yɛ ɔ́ dún mmua e ɲrun naan e nin Amɔnfuɛ mun y’a ko kun-ɔn?+ Maan sran sɔ’n yo Galaadifuɛ’m be kwlaa be su kpɛn.”