Jɔlɛ Difuɛ Mun

11 Zɛfte+ ti Galaadifuɛ, ɔ ti alɛ kunfuɛ dan kpa. I nin’n ti tekle bla. Be flɛ Zɛfte i si’n kɛ Galaadi. 2 Galaadi i yi’n kusu wuli ba yasua wie mun mɛnnin i. Kɛ ba sɔ’m be ɲinnin’n, be fuannin Zɛfte. Be seli i kɛ: “A su ɲanman aja like e si i awlo’n nun, afin a ti bla uflɛ wa.” 3 Ɔ maan Zɛfte wanndili i niaan’m be ɲrun ko trannin Tɔbu mɛn’n nun lɔ. Sran wie mɔ be leman junman diman’n be toli Zɛfte lɔ, kpɛkun be suli i su.

4 Kɛ ɔ cɛli kan’n, Amɔnfuɛ’m be nin Izraɛlifuɛ’m be kunnin alɛ.+ 5 Kɛ Amɔnfuɛ’m be nin Izraɛlifuɛ’m bé kún’n, Galaadi kpɛnngbɛn’m be ka lɛ ɔli Tɔbu mɛn’n nun lɔ ko seli Zɛfte kɛ ɔ bla. 6 Be seli Zɛfte kɛ: “Bla wa yo e sonja’m be su kpɛn naan e nin Amɔnfuɛ mun e ko kun.” 7 Sanngɛ Zɛfte seli Galaadi kpɛnngbɛn’m be kɛ: “?Nán amun yɛ amun kpɔ min dan mɔ i ti’n amun fuannin min min si i awlo’n nun’n niɔn?+ ?Ngue ti yɛ siɛn mɔ amun o ɲrɛnnɛn nun’n, amun su ba min sin-ɔn?” 8 Galaadi kpɛnngbɛn’m be tɛli Zɛfte su kɛ: “I sɔ’n ti yɛ y’a kpɛ e ɲin ɔ su siɛn’n niɔn. Sɛ a nin e kɔ naan e nin Amɔnfuɛ mun e ko kun’n, á yó Galaadifuɛ’m be kwlaa be su kpɛn.”+ 9 Zɛfte seli Galaadi kpɛnngbɛn’m be kɛ: “Sɛ an fa min kɔ naan e nin Amɔnfuɛ mun e ko kun naan Zoova fa be wla min sa nun’n, ń yó amun su kpɛn sakpa!” 10 Galaadi kpɛnngbɛn’m be seli Zɛfte kɛ: “Zoova ti e lalofuɛ.* I sɔ’n ti’n, é nían nga a kan’n su é yó.” 11 Ɔ maan Zɛfte nin Galaadi kpɛnngbɛn’m be ɔli. Kpɛkun nvlefuɛ’m be fɛ i sieli be su kpɛn, yɛ be sieli i sonja’m be su kpɛn. Ndɛ nga Zɛfte kannin’n, ɔ kɛnnin i kwlaa ekun Zoova ɲrun Mizpa lɔ.+

12 I sin’n, Zɛfte sunmannin sran wie mun Amɔnfuɛ’m+ be famiɛn’n i sin naan be ko se i kɛ: “?Ngue sa yɛ n yoli wɔ mɔ i ti yɛ w’a ba min mɛn’n i su tɔlɛ-ɔ?” 13 Amɔnfuɛ’m be famiɛn’n seli be nga Zɛfte sunmannin be’n be kɛ: “Sa nga ti yɛ n yoli sɔ’n yɛle kɛ, kɛ Izraɛlifuɛ’m be fin Ezipti lɔ fiteli’n, be fali min mɛn’n.+ Ɔ fɛ i Aanɔn nzue’n+ su lele fa ju Zabɔku yɛ ɔ fɛ i lɛ lele fa ju Zurdɛn’n su lɔ.+ Siɛn’n, fa min lika’n man min wɛtɛɛ su.” 14 Sanngɛ Zɛfte sunmannin sran sɔ mun ekun Amɔnfuɛ’m be famiɛn’n i sin, 15 naan be ko se i kɛ:

“Ndɛ nga Zɛfte kan’n yɛ: ‘Izraɛlifuɛ’m b’a faman Moabufuɛ’m be mɛn’n+ nin Amɔnfuɛ’m be mɛn’n.+ 16 Afin kɛ Izraɛlifuɛ’m bé fín Ezipti fíte’n, be sinnin aawlɛ flɛnnɛn’n nun lele be fa juli Jenvie Ɔkwlɛ’n su lɔ,+ kpɛkun be ɔli Kadɛsi.+ 17 Kɛ ɔ yoli sɔ’n, Izraɛlifuɛ’m be sunmannin sran wie mun Edɔmun famiɛn’n+ i sin naan be ko se i kɛ: “Yaci, man e atin naan e sin ɔ mɛn’n nun.” Sanngɛ Edɔmun famiɛn’n w’a kplinman su. Asa ekun’n, be sunmannin sran Moabu+ famiɛn’n i sin, sanngɛ w’a kplinman su. Ɔ maan Izraɛlifuɛ’m be kali Kadɛsi+ lɛ. 18 Kɛ bé sín aawlɛ flɛnnɛn’n nun lɔ’n, be sannin Edɔmun mɛn’n+ nin Moabu mɛn’n be wun. Be sinnin Moabu i wia afiliɛ lɔ lika’n nun,+ kpɛkun be boli nanmue Aanɔn lika liɛ’n nun lɔ. Sanngɛ b’a kpɛman Moabu awɛ’n,+ afin Aanɔn nzue’n yɛ ɔ ti Moabu awɛ’n niɔn.

19 “‘I sin’n, Izraɛlifuɛ’m be sunmannin sran wie mun Siɔn m’ɔ ti Amɔɔfuɛ’m be famiɛn’n, m’ɔ ti Ɛsbɔn famiɛn’n i sin. Izraɛlifuɛ’m be seli i kɛ: “Yaci, man e atin naan e sin ɔ mɛn’n nun e wɔ e lika liɛ’n nun lɔ.”+ 20 Sanngɛ Siɔn w’a lafiman su kɛ sinlɛ ngbɛn yɛ Izraɛlifuɛ’m be waan bé sín i lika’n nun-ɔn. I sɔ’n ti’n, Siɔn yiɛli i sran’m be kwlaa, kpɛkun ɔ boli nanmue Zaazi lɛ, yɛ ɔ nin Izraɛlifuɛ’m be kunnin alɛ.+ 21 Kɛ ɔ yoli sɔ’n, Zoova m’ɔ ti Izraɛli Ɲanmiɛn’n, ɔ fali Siɔn nin i sran’m be kwlaa wlali Izraɛlifuɛ’m be sa nun. Ɔ maan Izraɛlifuɛ’m be kwlali be, yɛ be fali Amɔɔfuɛ nga be tran mɛn sɔ’n nun’n be lika’n i kwlaa.+ 22 Be fali Amɔɔfuɛ’m be lika’n i kwlaa. Ɔ fɛ i Aanɔn nzue’n su lele fa ju Zabɔku, yɛ ɔ fɛ i aawlɛ flɛnnɛn’n su lɛ lele fa ju Zurdɛn’n su lɔ.+

23 “‘?Nán Zoova m’ɔ ti Izraɛli i Ɲanmiɛn’n yɛ ɔ fuannin Amɔɔfuɛ mun Izraɛli m’ɔ ti i nvle’n i ɲrun-ɔn?+ ?Ngue ti yɛ a kunndɛ kɛ á fúan be-ɔ? 24 ?Like nga ɔ ɲanmiɛn Kemɔsu+ fa man wɔ’n, nɛ́n i yɛ a fa-ɔ? Ɔ maan sran kwlaa nga Zoova m’ɔ ti e Ɲanmiɛn’n fuɛn i e ɲrun’n, i yɛ é fúɛn i-ɔ.+ 25 ?A bu i kɛ ɔ kpa tra Zipɔɔ i wa Balaki+ m’ɔ ti Moabu famiɛn’n? Ɔ nin Izraɛlifuɛ’m be nin-a ɲanman ndɛ le, yɛ ɔ nin be nin-a kunman alɛ le. 26 Izraɛlifuɛ’m be trannin Ɛsbɔn nin klɔ nga be o i asa’n su’n* be su,+ ɔ nin Aroɛɛ nin klɔ nga be o i asa’n su’n be su, ɔ nin klɔ kwlaa nga be o Aanɔn nzue’n i nuan lɔ’n be su, be dili afuɛ ya nsan (300) lɔ. ?Ngue ti yɛ blɛ sɔ’n nun’n, w’a seman le kɛ á dé lika sɔ’m be sa nun-ɔn?+ 27 M’an yoman wɔ sa tɛ fi, ɔ maan sɛ a fa alɛ wla min sin’n, ɔ timan su. Andɛ’n, maan Zoova m’ɔ ti Jɔlɛ Difuɛ’n+ ɔ di Izraɛlifuɛ mun nin Amɔnfuɛ’m be afiɛn jɔlɛ.’”

28 Sanngɛ Amɔnfuɛ’m be famiɛn’n w’a tieman ndɛ nga Zɛfte waan be ko kan kle i’n.

29 Zoova i wawɛ’n jrali Zɛfte su.+ Kpɛkun ɔ sinnin Galaadi mɛn’n nun, ɔ nin Manase i lika’n nun ɔli Mizpa* m’ɔ o Galaadi lɔ’n.+ Ɔ fɛli i Mizpa* m’ɔ o Galaadi lɔ’n su lɛ ɔli Amɔnfuɛ’m be lɔ.

30 I sin’n, Zɛfte tali Zoova i nda,+ ɔ seli i kɛ: “Sɛ a fa Amɔnfuɛ mun wla min sa nun’n, 31 kɛ ń fín Amɔnfuɛ’m be lɔ mɔ ń sá min sin fɔuun’n, sran kwlaa ng’ɔ fin min sua’n i anuan’n nun ba min atin kpalɛ’n, ɔ́ yó Zoova liɛ,+ yɛ ń fɛ́ i ń yí tɛ nga kɛ bé yí’n be yra nnɛn’n i kɔlikɔli’n.”+

32 Ɔ maan Zɛfte nin Amɔnfuɛ’m be ko kunnin alɛ, kpɛkun Zoova fali be wlɛli i sa nun. 33 Ɔ kunnin be kunlɛ kpa, ɔ boli be kunlɛ bo Aroɛɛ lɛ lele fa juli Miniti. Ɔ fali klɔ ablaɔn (20), yɛ ɔ kunnin be lele juli Abɛli-Keramimun. Kɛ Izraɛlifuɛ’m be kwlali Amɔnfuɛ mun kɛ ngalɛ’n sa.

34 Kɛ Zɛfte sɛ́ i sin i awlo Mizpa lɔ’n,+ ɔ́ nían-ɔn, i wa bla’n yɛ ɔ su bɛ i atin kpalɛ yɛ. Kɛ ɔ́ bá’n, nn ɔ́ bó klɛn, nn ɔ́ sí able. Zɛfte i wa ng’ɔ le i’n yɛ ɔ o lɛ-ɔ. Ɔ leman ba yasua fi, yɛ ɔ leman ba bla uflɛ fi. 35 Kɛ ɔ wunnin i’n, ɔ titili i tralɛ’m be nun, kpɛkun ɔ seli kɛ: “Ee, min wa! W’a kun min, afin w’a kaci sran kun mɔ m’an kɛn i bo-ɔ. M’an ta Zoova i nda, n kwlá kaciman min nuan.”+

36 Sanngɛ ɔ seli i kɛ: “Min si, sɛ a tali Zoova i nda’n, like nga a seli kɛ á fá yó min’n, fa yo min.+ Afin Zoova yoli maan a tuli ɔ klunngbɔ Amɔnfuɛ mɔ be ti ɔ kpɔfuɛ’n be su.” 37 I sin’n, ɔ seli i si kɛ: “Maan n srɛ ɔ like kun: Yaci min nun anglo nɲɔn naan n wɔ oka’m be su lɔ. Kpɛkun e nin min wiengu bla mun é kó sún, afin n su siman bian le.”*

38 Kɛ ɔ yoli sɔ’n, ɔ seli i kɛ: “Kɔ!” Ɔ mɛnnin i atin naan ɔ ko di anglo nɲɔn. Ɔ maan ɔ nin i wiengu’m be ɔli oka’m be su lɔ be ko sunnin, afin ɔ su siman bian le. 39 Kɛ anglo nɲɔn sinnin’n, ɔ sɛli i sin i si wun lɔ. Kpɛkun i si yiɛli i su nda ng’ɔ tali’n i nuan.+ Ɔ nin yasua b’a siman sua le. Sa sɔ’n kacili Izraɛlifuɛ’m be nzuɛn,* 40 yɛle kɛ afuɛ kwlaa nun’n, Izraɛli talua’m be fa cɛn ba nnan be ko yi Zɛfte m’ɔ ti Galaadifuɛ’n i wa bla’n i ayɛ.