1 Samiɛli

23 Cɛn kun’n, be seli Davidi kɛ: “Filistifuɛ’m be fali alɛ wlali Keila+ lɔfuɛ’m be sin, yɛ be su wua be aliɛ mun.” 2 Yɛ Davidi usali Zoova kɛ:+ “?N wɔ naan n ko kun Filistifuɛ sɔ mun?” Zoova tɛli Davidi su kɛ: “Kɔ ko kun Filistifuɛ mun naan de Keila lɔfuɛ mun.” 3 Sanngɛ Davidi i sran’m be seli i kɛ: “Nian! Kɛ e o Zida wa bɔbɔ’n, srɛ kun e.+ ?Yɛ sɛ be waan y’a ɔ Keila lɔ kɛ e nin Filistifuɛ mun é kó kún’n nin? Nanwlɛ, srɛ kún e dan trá nga!”+ 4 Ɔ maan Davidi usali Zoova i sa ekun.+ Yɛ Zoova tɛli i su kɛ: “Jaso naan kɔ Keila. Afin ń má fá Filistifuɛ mun ń wlá ɔ sa nun.”+ 5 I sɔ’n ti’n, Davidi nin i sran’m be ɔli Keila. Be nin Filistifuɛ’m be ko kunnin. Davidi fali be nnɛn mun, yɛ ɔ kunnin sran kpanngban kpa. Kpɛkun ɔ deli Keila lɔfuɛ mun.+

6 I nun mɔ Aimelɛki i wa Abiataa+ wánndi kɔ́ Davidi sin Keila lɔ’n, nn efɔdu kun wo Abiataa i sa nun. 7 Be seli Saili kɛ: “Davidi o Keila lɔ.” Yɛ Saili seli kɛ: “Ɲanmiɛn w’a fɛ i w’a wla min sa nun.*+ Afin klɔ ng’ɔ wluli nun’n, ɔ le anuan, yɛ be tanndan anuan’m be sin. Ɔ maan ɔ ti kɛ w’a tɔ i bɔbɔ i aya’n nun sa.” 8 I sɔ’n ti’n, Saili yiali i alɛ kunfuɛ’m be kwlaa kɛ be wɔ Keila, naan be ko utu Davidi nin i sran mun. 9 Kɛ Davidi tili i kɛ Saili su buɛbuɛ i wun naan ɔ́ fá alɛ wlɛ́ i sin’n, ɔ seli Ɲanmiɛn ɲrun jranfuɛ Abiataa kɛ: “Fa efɔdu’n bla.”+ 10 Yɛ Davidi seli kɛ: “Ee, Zoova, Izraɛli i Ɲanmiɛn, ɔ sufuɛ’n tili i kɛ Saili kunndɛ kɛ ɔ́ bá Keila naan min dunman nun ti’n, ɔ́ núnnún klɔ’n.+ 11 ?Keila klɔ’n su kpɛnngbɛn’m* bé fá min wlá Saili i sa nun? ?Saili bá sakpa kɛ nga be kan kleli min’n sa? Ee, Zoova, Izraɛli i Ɲanmiɛn, yaci, tɛ ɔ sufuɛ’n su.” Yɛ Zoova seli kɛ: “Ɔ́ bá.” 12 Davidi usali ekun kɛ: “?Keila klɔ’n su kpɛnngbɛn’m bé fá min nin min sran mun wlá Saili i sa nun?” Zoova tɛli su kɛ: “Bé fá amun wlɛ́ i sa nun.”

13 Yɛ Davidi jasoli-ɔ. Ɔ fɛli i sran kɔe ya nsiɛn (600) mun,+ kpɛkun be jasoli Keila lɛ be ɔli lika nga sɛ be kɔ lɔ’n be kwla ɲan be ti’n. Kɛ Saili tili i kɛ Davidi w’a tu Keila klɔ’n su’n, w’a sumɛn i su kun. 14 Davidi trannin Zifi lɔ aawlɛ flɛnnɛn’n nun oka’m be nun.+ Lika sɔ’n nun lɔ kɔlɛ’n timan pɔpɔ. Saili kunndɛli Davidi lele,+ sanngɛ Zoova w’a fɛmɛn i w’a wlaman Saili sa nun. 15 Kɛ Davidi o Orɛsi m’ɔ o Zifi lɔ aawlɛ flɛnnɛn’n nun lɔ’n, ɔ tili i kɛ* Saili ɔli i kunndɛlɛ naan ɔ́ kún i.

16 Saili i wa Zonatan ko toli Davidi Orɛsi lɔ. Kpɛkun ɔ wlɛli i fanngan naan ɔ lafi Zoova su.+ 17 Ɔ seli i kɛ: “Nán srɛ kun wɔ, afin min si Saili su wunman wɔ. Á wá yó Izraɛli nvle’n su famiɛn.+ Yɛ min yɛ ń mántan wɔ-ɔ. Min si Saili bɔbɔ si sɔ.”+ 18 Kɛ ɔ yoli sɔ’n, be nɲɔn’n be trali aenguɛ+ Zoova ɲrun. Davidi kali Orɛsi lɛ, sanngɛ Zonatan liɛ’n, ɔ sɛli i sin ɔli awlo.

19 I sin’n, Zifi lɔfuɛ’m be ko toli Saili Gibea lɔ+ naan b’a se kɛ: “Davidi fia e wun koko lɛ.+ Ɔ o Orɛsi,+ Akila lɔ kpɔlɛ’n su,+ Zesimɔn’n* i ngua lɛ.*+ Lika sɔ’n nun lɔ kɔlɛ timan pɔpɔ. 20 I sɔ’n ti’n, nannan, blɛ kwlaa nga a kunndɛ kɛ á bá’n, bla. É fɛ́ i wlá ɔ sa nun.”+ 21 Yɛ Saili seli kɛ: “Maan Zoova yra amun su, afin amun sili min aunnvɔɛ. 22 Amun yaci, amun bɔbɔ amun wɔ naan amun ko si lika trele ng’ɔ o’n, ɔ nin sran ng’ɔ wunnin i lɔ’n. Afin be seli min kɛ Davidi si ngwlɛlɛ kpa. 23 Amun kunndɛkunndɛ i fiawlɛ’m be kpa naan amun wun be. Kɛ amun ko wun be’n, amun bla be wa kan kle min. I liɛ’n, e nin amun é kɔ́, yɛ sɛ ɔ o lika sɔ’n nun’n, ń kúnndɛ i Zida lɔ awlobo’m* be kwlaa be nun.”

24 Sran sɔ’m be jasoli Saili i wun lɛ, yɛ be sali be sin Zifi lɔ.+ Kɛ ɔ́ yó sɔ’n, nn Davidi nin i sran’m be o Araba,+ Maɔn lɔ aawlɛ flɛnnɛn’n nun.+ Lika sɔ’n wo Zesimɔn’n i ngua lɔ. 25 I sin’n, Saili fɛli i sran mun naan be ko kunndɛ Davidi.+ Kɛ be kɛnnin i sɔ’n kleli Davidi cɛ’n, ɔ ɔli Maɔn lɔ aawlɛ flɛnnɛn’n nun, kɛ yɔbuɛ’n wo lɔ’n,+ kpɛkun ɔ kali lɔ. Kɛ Saili tili’n, ɔ suli i su Maɔn lɔ aawlɛ flɛnnɛn’n nun lɔ. 26 Kɛ Saili jú oka’n i bue kun’n, nn Davidi nin i sran’m be kusu be o i bue kun’n su lɔ. Davidi wanndili ndɛndɛ+ naan Saili w’a tomɛn i. Sanngɛ Saili nin i sran’m be mantannin Davidi nin i sran’m be koko naan bé trá be.+ 27 Sanngɛ sran kun bali wa seli Saili kɛ: “Bla ndɛndɛ, afin Filistifuɛ’m b’a wlu e nvle’n nun naan be nin e kún.” 28 Kɛ ɔ yoli sɔ’n, Saili yacili Davidi i su sulɛ.+ Yɛ ɔ sɛli i sin naan ɔ nin Filistifuɛ’m bé kó kún. I sɔ’n ti’n, be wa flɛli lika sɔ’n kɛ Be Nun Titilɛ Yɔbuɛ.

29 I sin’n, Davidi fɛli i lɛ ko trannin An-Gedi+ asa’n su lɔ lika wie’m be nun. Lɔ kɔlɛ’n timan pɔpɔ.