2 Samiɛli

2 Kɛ ɔ yoli sɔ’n, Davidi usali Zoova kɛ:+ “?N ko tran Zida klɔ’m be nun kun su?” Yɛ Zoova seli i kɛ: “Kɔ.” Davidi usɛli i ekun kɛ: “?N wɔ nin?” Yɛ ɔ tɛli i su kɛ: “Kɔ Ebrɔn.”+ 2 Ɔ maan Davidi fɛli i yi nɲɔn mun ɔli. Be yɛle Asinoamun+ m’ɔ fin Zizreɛli’n ɔ nin Abigaili.+ Bla sɔ’n ti Nabali m’ɔ fin Kaamɛli’n i angbeti. 3 Davidi fɛli i sran mun ɔli wie.+ Yɛ be kusu be fali be awlofuɛ mun naan b’a ko tran klɔ nga be mantan Ebrɔn’n be su. 4 I sin’n, Zidafuɛ’m be bali Ebrɔn lɛ, kpɛkun be fali Davidi be sieli* i be akpasua’n i su kpɛn.+

Be seli Davidi kɛ: “Zabɛsi-Galaadi lɔfuɛ mun yɛ be sieli Saili-ɔ.” 5 I sɔ’n ti’n, Davidi sunmannin sran Zabɛsi-Galaadi lɔfuɛ’m be sin. Ɔ ko seli be kɛ: “Maan Zoova yra amun su. Afin amun sieli Saili m’ɔ ti amun min’n.+ I lɛ nun’n, amun kleli kɛ amun klo amun min’n. 6 Maan Zoova kusu klo amun sɔ wie, yɛ maan ɔ nin amun nanti klanman. Min kusu ń má yó amun ye, like nga amun yoli’n ti.+ 7 Amun jran kekle, amun yo yakpafuɛ. Afin Saili m’ɔ ti amun min’n wuli. Yɛ Zidafuɛ’m be fa min sieli be su famiɛn.”

8 Sanngɛ Nɛɛ i wa Abnɛɛ+ m’ɔ ti Saili i sonja’m be su kpɛn’n, ɔ fali Saili i wa Isi-Bosɛti+ kpɛli nzue ba’n, kpɛkun be ɔli Maanaimun.+ 9 Ɔ fɛ i sieli Galaadifuɛ mun,+ nin Asurifuɛ mun, nin Zizreɛlifuɛ mun,+ nin Efraimunfuɛ mun,+ nin Bɛnzamɛnfuɛ mun, ɔ nin Izraɛlifuɛ’m be kwlaa be su famiɛn. 10 Kɛ bé síe Saili i wa Isi-Bosɛti i famiɛn Izraɛlifuɛ’m be su’n, nn ɔ le afuɛ ablanan (40). Yɛ ɔ dili famiɛn afuɛ nɲɔn. Sanngɛ Zidafuɛ’m be liɛ’n, Davidi sin yɛ be wo-ɔ.+ 11 I nun mɔ Davidi o Ebrɔn lɔ’n, ɔ yoli Zidafuɛ’m be su famiɛn afuɛ nso anglo nsiɛn.+

12 I sin’n, Nɛɛ i wa Abnɛɛ nin Saili i wa Isi-Bosɛti i sran’m be fɛli i Maanaimun+ lɛ be ɔli Gabaɔn.+ 13 Zeruya+ i wa Zoabu+ nin Davidi i sufuɛ’m be kusu be ɔli be liɛ. Ɔ maan be sonja akpasua nɲɔn’m be ko yiali nun Gabaɔn lɔ nzue gble’n su lɛ. Akpasua kun o bue kun su, yɛ akpasua kun o bue kun su. 14 Yɛ Abnɛɛ seli Zoabu kɛ: “Maan gbanflɛn’m be jranjran naan be kun naan e nian.” Zoabu kusu seli i kɛ: “Yoo, maan be jranjran.” 15 Kɛ be ko jranjrannin’n, be bue nɲɔn’m be sɛ. Bɛnzamɛnfuɛ mɔ be o Saili i wa Isi-Bosɛti sin’n, be ti sran blu-nin-nɲɔn (12). Davidi i sran’m be kusu be ti blu-nin-nɲɔn (12). 16 Be trali be wiengu’n i ti’n, kpɛkun be fali tokofi wɔli be wiengu i ku nvɛnwun. Ɔ maan be ngba be wuli. I sɔ’n ti’n, be flɛli Gabaɔn lɔ lika sɔ’n kɛ Ɛlkati-Azurimun.*

17 I sin’n, alɛ nga be wa kunnin i cɛn sɔ’n nun’n, w’a yoman blɛblɛ. Sanngɛ kɛ be kunnin lele’n, Davidi i sonja’m be kwlali Abnɛɛ nin Izraɛli sonja mun. 18 Kɛ ɔ́ yó sɔ’n, nn Zeruya+ i wa nsan’m be o lɛ wie. Be yɛle Zoabu,+ nin Abisai,+ ɔ nin Azaɛli.+ Azaɛli liɛ’n, ɔ kwla wanndi kpa kɛ wannzannin sa. 19 Azaɛli suli Abnɛɛ su. Kɛ ɔ́ sú i su’n, ɔ sinman bɛ su annzɛ fama su. Ɔ suli i su trelele. 20 Kɛ Abnɛɛ niɛnnin i sin’n, ɔ usali kɛ: “?Azaɛli, wɔ-ɔ?” Yɛ i kusu tɛli i su kɛ: “Ɛɛn-ɛn, min-ɔn.” 21 Yɛ Abnɛɛ seli i kɛ: “Kɔ fama su, annzɛ bɛ su naan tra gbanflɛn’m be nun kun. Kpɛkun fa like kwlaa ng’ɔ o i sa nun’n.” Sanngɛ Azaɛli waan ɔ yaciman Abnɛɛ i su sulɛ. 22 Abnɛɛ seli Azaɛli ekun kɛ: “Nán su min su kun. Nán yo naan n kun wɔ. Afin sɛ n kun wɔ’n, n su kwlaman ɔ niaan bian Zoabu i ɲrun nian.” 23 Sanngɛ Azaɛli waan ɔ yacimɛn i su sulɛ. I sɔ’n ti’n, Abnɛɛ fali cua’n i sin’n wɔli Azaɛli i ku nun.+ Kpɛkun cua’n boli nun i wiasin lɔ. Azaɛli tɔli i osu’n nun lɛ, kpɛkun ɔ wuli. Be kwlaa nga be juli kan Azaɛli tɔli m’ɔ wuli lɛ’n, be jrannin.

24 Zoabu nin Abisai be suli Abnɛɛ su. Kɛ wia’n wá tɔ́’n, be juli Ama kpɔlɛ’n i su lɛ atin ng’ɔ kɔ Gabaɔn aawlɛ flɛnnɛn’n nun lɔ’n su. Kpɔlɛ sɔ’n wo Gia i ɲrun ndɛnman su lɛ. 25 Kpɛkun Bɛnzamɛnfuɛ’m be ko yiali Abnɛɛ i wun lɛ. Be ngba be kan boli nun be kacili sonja akpasua kun. Kpɛkun be ko jrannin kpɔlɛ kun i ti afiɛn. 26 Abnɛɛ kpan flɛli Zoabu naan w’a se i kɛ: “?Naan é fá tokofi é kún e wun sa trilili? ?A siman kɛ wafa nga i bo’n gúa’n yɛle awlabɔɛ’n? ?Cɛn onin yɛ á sé ɔ sran’m be kɛ be yaci be niaan’m be su sulɛ-ɔ?” 27 Yɛ Zoabu tɛli i su kɛ: “N kan Ɲanmiɛn m’ɔ lafiman’n, sɛ ɔ ti kɛ w’a kanman sɔ sa’n, nn min sran’m bé sú be niaan’m be su lele saan lika’n w’a cɛn.” 28 Kpɛkun Zoabu fitali awɛ’n nun. Yɛ i sran’m be yacili Izraɛlifuɛ’m be su sulɛ-ɔ. Ɔ maan be yacili alɛ’n i kunlɛ.

29 Abnɛɛ nin i sran’m be nantili kɔnguɛ sɔ’n nun lele be sinnin Araba,+ kpɛkun be ko kpɛli Zurdɛn’n. Be kpɛli kongo’n,* kpɛkun be ɔli Maanaimun.+ 30 Kɛ Zoabu yacili Abnɛɛ i su sulɛ’n, ɔ ko yiɛli i sran’m be kwlaa. Davidi i sufuɛ’m be nun blu-nin-ngwlan (19) yɛ b’a wunman be-ɔ. Azaɛli uka be su. 31 Sanngɛ Davidi i sran’m be kwlali Bɛnzamɛnfuɛ mun nin Abnɛɛ i sran mun. Be kunnin sran sɔ’m be nun ya nsan ablesiɛn (360). 32 I sin’n, be fali Azaɛli+ i saka’n naan b’a ko sie i i si i asieliɛ’n m’ɔ o Bɛtleɛmun+ lɔ’n nun. Kpɛkun Zoabu nin i sran’m be nantili kɔnguɛ lelele naan b’a ju Ebrɔn+ aliɛ njɛnniɛn su.