1 Samiɛli

12 I sin’n, Samiɛli seli Izraɛlifuɛ’m be kwlaa kɛ: “Like kwlaa nga amun seli min kɛ n yo’n, n yoli.* N sieli amun su famiɛn.+ 2 Famiɛn ng’ɔ́ síe amun’n* yɛ ɔ o yɛ!+ Min liɛ’n, m’an yo oke yɛ min ti w’a bo je. Min mma mun kusu be o amun wun wa.+ Kɛ ɔ fɛ i min gbanflɛn nun lele mɔ w’a fa ju yɛ’n, n dunnin amun ɲrun.+ 3 Min yɛ n wo yɛ. Sɛ n yoli sa wie m’ɔ nin i fataman’n, amun kɛn i kwlaa Zoova nin i sran ng’ɔ kpɛli i’n, be ɲrun:+ ?Wan yɛ n fɛli i nannin annzɛ i aflunmun-ɔn?+ ?Yɛ wan yɛ n dili i lufle annzɛ n miɛnmiɛnnin i-ɔ? ?Wan yɛ ɔ mannin min adi like* naan n kata sa ng’ɔ yoli’n su mɔ n sɔli nun-ɔn?+ Sɛ n yoli sɔ’n, amun kan naan n yi man amun.”+ 4 Yɛ be seli kɛ: “W’a diman e lufle, yɛ w’a mianmianman e. Asa ekun’n, w’a faman adi like sran fi sa nun.” 5 Ɔ seli be kɛ: “Andɛ’n, amun a wunman sa wie mɔ be kwla jran su bu min fɔ-ɔ.* Zoova nin i sran ng’ɔ kpɛli i’n be ti min lalofuɛ.” Yɛ be seli kɛ: “Ɔ ti ɔ lalofuɛ.”

6 Yɛ Samiɛli seli sran’m be kɛ: “Zoova m’ɔ kpali Moizi nin Aarɔn’n, m’ɔ fali amun nannan mun Ezipti mɛn’n nun lɔ fiteli’n,+ ɔ ti min lalofuɛ. 7 Siɛn’n, amun jranjran lɛ. Ń fá amun kɔ́ Zoova ja su. Sa kpakpa nga Zoova yo mannin amun nin amun nannan mun’n, ń fá kpɛ́n amun wla.

8 “Kɛ Zakɔbu ɔli Ezipti+ lɔ mɔ amun nannan’m be kpan flɛli Zoova kɛ ɔ de be’n,+ Zoova sunmannin Moizi+ nin Aarɔn kɛ be ko fa amun nannan mun Ezipti lɔ fite naan be wa tran lika nga nun wa.+ 9 Sanngɛ be wla fili Zoova m’ɔ ti be Ɲanmiɛn’n i su. Ɔ maan i kusu yoli be atɛ+ Sizera+ m’ɔ ti Azɔɔ i sonja’m be su kpɛn’n, nin Filistifuɛ mun,+ ɔ nin Moabu famiɛn’n+ be sa nun. Yɛ be fali alɛ wlali be sin. 10 Kpɛkun be kpan flɛli Zoova kɛ ɔ de be.+ Be seli kɛ: ‘E yoli sa tɛ,+ afin e yacili Zoova lɛ, e ko sɔli Baali+ nin Astaate.+ De e e kpɔfuɛ’m be sa nun siɛn’n naan e ko su wɔ.’ 11 Kɛ ɔ yoli sɔ’n, Zoova sunmannin Zeribaali+ nin Bedan nin Zɛfte+ nin Samiɛli.+ Kpɛkun ɔ deli amun, amun kpɔfuɛ mɔ be bo sin yia amun’n be sa nun, naan amun tran fɔuun nun.+ 12 Kɛ amun wunnin kɛ Nasasi+ m’ɔ ti Amɔnfuɛ’m be famiɛn’n w’a fa alɛ w’a wla amun sin’n, amun seli min kɛ: “Cɛcɛ, e kunndɛ kpa kɛ é ɲán famiɛn kun naan ɔ sie e!”+ Kusu nn Zoova m’ɔ ti amun Ɲanmiɛn’n yɛ ɔ ti amun Famiɛn’n niɔn.+ 13 Sran nga amun fɛli i kɛ ɔ yo amun famiɛn’n yɛ. Amun bɔbɔ yɛ amun srɛli famiɛn sɔ’n niɔn. Amun nian, Zoova w’a sie amun su famiɛn.+ 14 Sɛ amun sro Zoova,+ naan amun su i,+ naan amun fɛ i nuan ndɛ’n su,+ naan amun yo like nga i waan amun yo’n, naan atin ng’ɔ kle amun’n yɛ amun fa su’n, naan amun yoman ɲin kekle Zoova su’n, naan amun bɔbɔ nin amun famiɛn’n amun ɲin yi Zoova m’ɔ ti amun Ɲanmiɛn’n, ɔ ti kpa. 15 Sanngɛ sɛ amun faman Zoova i nuan ndɛ’n su, naan amun yo ɲin kekle Zoova su’n, Zoova klé amun nin amun si mun amun ɲrɛnnɛn.+ 16 Siɛn’n, amun jranjran lɛ naan amun nian abonuan sa nga Zoova su wa yo i amun ɲin bo wa’n. 17 E o ble’n i kpɛlɛ blɛ’n nun. ?Nɛ́n i-ɔ? Sanngɛ ń má kpán flɛ́ Zoova naan ɲanmiɛn’n kpan kplannankplannan naan nzue’n tɔ. Kpɛkun amún wún i wlɛ kɛ famiɛn nga amun srɛli kɛ be fa man amun’n, ɔ ti sa tɛ dan yɛ amun yoli i Zoova ɲrun-ɔn.”+

18 Yɛ Samiɛli kpan flɛli Zoova-ɔ. Zoova kusu yoli maan ɲanmiɛn’n kpannin kplannankplannan yɛ nzue’n tɔli cɛn sɔ’n nun. Ɔ maan sran’m be kwlaa be wa sroli Zoova nin Samiɛli dan kpa. 19 I sɔ’n ti’n, sran’m be kwlaa be seli Samiɛli kɛ: “Srɛ Zoova m’ɔ ti ɔ Ɲanmiɛn’n man ɔ sufuɛ mun,+ afin e kloman kɛ é wú. Famiɛn mɔ e srɛli kɛ be fa man e’n, ɔ ti sa tɛ dan kpa yɛ e yoli e fa ukali laa liɛ’m be su-ɔ.”

20 Yɛ Samiɛli seli sran’m be kɛ: “Nán srɛ kun amun. Amun yoli sa tɛ dan sɔ. Sanngɛ nán amun kaci amun sin si Zoova.+ Amun fa amun awlɛn’n kwlaa be su Zoova.+ 21 Nán amun kaci amun sin si i naan amun ko su ninnge finfin’m be su.+ Be yoman sa fi ye,+ yɛ be kwlá deman sran. Afin be ti finfin like. 22 Zoova i dunman m’ɔ ti dan’n ti’n,+ ɔ su yimɛn i nvlefuɛ’m be blo le.+ Afin Zoova bɔbɔ yɛ i waan ɔ́ fá amun yó i nvle-ɔ.+ 23 Min liɛ’n, n kwlá seman kɛ n srɛman Zoova manman amun kun. Sɛ n yo sɔ’n, nn m’an yo sa tɛ dan kpa. Asa ekun’n, ń klé amun atin ng’ɔ ti kpa’n titi. 24 Amun li amun sro Zoova,+ amun fa amun awlɛn’n kwlaa su i nanwlɛ su. Afin nán amun wla fi su kɛ ɔ yoli sa dandan mannin amun.+ 25 Sanngɛ sɛ amun waan sa tɛ’n yɛ amún yó’n, amun nin amun famiɛn’n,+ amún núnnún.”+