2 Samiɛli

19 I sin’n, be kan kleli Zoabu kɛ: “Famiɛn’n wo lɔ sún. Absalɔmun i wie’n ti’n, ɔ o awlabɔɛ nun.”+ 2 Kɛ sonja’m be tili i kɛ famiɛn’n su sun i wa’n, kwlalɛ mɔ be kwlali be kpɔfuɛ mun’n i su aklunjɔɛ nga be su di’n, ɔ wa kacili awlabɔɛ cɛn sɔ’n nun. 3 Sran’m be sali be sin klɔ’n nun lɔ blɛlɛlɛ+ cɛn sɔ’n nun kɛ sran mɔ b’a wanndi alɛ bo mɔ ɲannzuɛn kun be’n sa. 4 Famiɛn’n fali tannin kɛtɛli i ti. Kpɛkun ɔ sunnin kekle kpa. Ɔ kpan seli kɛ: “Ɔo, min wa Absalɔmun! Ɔo, min wa Absalɔmun! Min wa’n nin-o!”+

5 Zoabu toli famiɛn’n i sua lɔ naan w’a se i kɛ: “?Ngue ti yɛ andɛ’n a gua ɔ sufuɛ nga be deli wɔ nin ɔ mma yasua mun,+ nin ɔ mma bla mun,+ nin ɔ yi fanunfanun mun’n,+ be kwlaa be ɲin ase kɛ nga sa-ɔ? 6 A klo ɔ kpɔfuɛ mun. Sanngɛ a kpɔ ɔ klofuɛ mun. Afin andɛ’n, a yili i nglo weiin kɛ a buman ɔ sufuɛ mun nin be nga a sieli be kpɛnngbɛn’n be like fi. N si kɛ sɛ ɔ ti kɛ andɛ nga’n, e ngba e wuli naan Absalɔmun kali lɛ’n, nn ɔ́ yó ɔ fɛ. 7 Jaso naan ko gua ɔ sufuɛ’m be awlɛn su nzue. Afin n kan Zoova, sɛ w’a fiteman’n, sran fi su kaman ɔ wun wa kɔnguɛ’n. Ɔ maan ɔ ɲrun nga á wá wún i’n, ɔ́ trá nga a wunnin i ɔ gbanflɛn nun lele mɔ w’a fa ju andɛ’n.” 8 I sɔ’n ti’n, famiɛn’n ko trannin klɔ’n i anuan’n nun lɛ. Yɛ be kan kleli sran’m be kwlaa kɛ: “Famiɛn’n ti klɔ’n i anuan’n nun lɔ.” Ɔ maan be kwlaa be bali famiɛn’n i ɲrun lɛ.

Sanngɛ Izraɛlifuɛ’m be liɛ’n, be wanndi ɔli be awlo’m be nun kunngunngun.+ 9 Izraɛli akpasua’m be kwlaa nun’n, sran’m be si akplowa be afiɛn lɔ. Be kan kɛ: “Famiɛn’n deli e e kpɔfuɛ’m be sa nun.+ I yɛ ɔ deli e Filistifuɛ’m be sa nun-ɔn. Sanngɛ Absalɔmun ti’n, ɔ wanndi ɔli lika uflɛ.+ 10 Absalɔmun kusu mɔ e sieli i famiɛn’n,*+ ɔ wuli alɛ’n nun.+ ?Yɛ nn ngue ti yɛ amun ko faman famiɛn’n baman-ɔn?”

11 Famiɛn Davidi sunmannin sran naan be ko se Zadɔku+ nin Abiataa+ mɔ be ti Ɲanmiɛn ɲrun jranfuɛ’n be kɛ: “Amun kan ndɛ kle Zida+ kpɛnngbɛn mun. Amun se be kɛ yoo: ‘Kɛ n wo min awlo wa’n, n tili ndɛ nga Izraɛlifuɛ’m be kwlaa be kan’n. ?Ngue ti yɛ amun yɛ amún ká siɛn bé fá famiɛn’n sɛ́ i sin i awlo-ɔ? 12 Min niaan yɛle amun. E nin amun e ti kun, e kpaciman.* ?Ngue ti yɛ amun yɛ amún ká siɛn bé fá famiɛn’n sɛ́ i sin i awlo-ɔ?’ 13 Asa ekun’n, amun kan kle Amaza+ kɛ: ‘E nin wɔ e ti kun, e kpaciman. I sɔ’n ti’n, sɛ andɛ bɔbɔ’n m’an faman wɔ m’an sieman Zoabu+ i osu, naan w’a yoman min sonja’m be su kpɛn cɛ’n, maan Ɲanmiɛn kle min ɲrɛnnɛn.’”

14 Kɛ nga sa yɛ Davidi yoli maan Zidafuɛ’m be kwlaa be awlɛn’n wa trɛnnin i su-ɔ. Ɔ maan be bo yoli kun be ko seli famiɛn’n kɛ: “A nin ɔ sufuɛ’m be kwlaa, amun sa amun sin.”

15 Yɛ famiɛn’n fali atin’n niɔn. Ɔ juli Zurdɛn’n i nuan lɛ. Yɛ Zidafuɛ’m be bɛli i atin kpalɛ Gilgali+ lɛ naan bé fɛ́ i kpɛ́ Zurdɛn’n. 16 Gera i wa Simei+ m’ɔ fin Baurimun’n, m’ɔ ti Bɛnzamɛnfuɛ’n, ɔ bali ndɛndɛ naan ɔ nin Zidafuɛ’m bé kpá Famiɛn Davidi i atin. 17 Ɔ nin Bɛnzamɛnfuɛ akpi kun (1.000) yɛ be bali-ɔ. Ziba+ m’ɔ di junman Saili i awlo lɔ’n, nin i wa blu-nin-nnun (15) nin i sufuɛ ablaɔn (20) be ɔli Zurdɛn’n nuan lɔ naan bé kó kpá famiɛn’n i atin wie. 18 Ɔ* sinnin Zurdɛn’n i lika nga be kwla kpɛ i be ja nun lɛ’n naan ɔ́ fá famiɛn’n i awlofuɛ mun kpɛ́. Kpɛkun ɔ fɛli i wun wlali famiɛn’n i sa nun naan ɔ́ yó like kwlaa nga famiɛn’n klo’n. Kɛ famiɛn’n wá kpɛ́ Zurdɛn’n, Gera i wa Simei kotoli i ɲrun lɛ. 19 Ɔ seli famiɛn’n kɛ: “Famiɛn, nán bu min fɔ. I nun mɔ á fín Zerizalɛmun lɔ bá’n, safle nga n wɔli wɔ’n, nán bo su di jɔlɛ kun.+ Nán fa sie ɔ klun. 20 Famiɛn, n bɔbɔ n si kɛ n yoli sa tɛ. I sɔ’n ti yɛ andɛ’n, n dunnin Zozɛfu i awlo’n nunfuɛ’m be kwlaa be ɲrun mmua naan ń bá ɔ atin kpalɛ-ɔ.”

21 Yɛ Zeruya+ i wa Abisai+ seli kɛ: “Simei boli sran mɔ Zoova kpɛli i’n i sannzan. ?Ɔ maan nán kunlɛ cɛ yɛ ɔ fata kɛ be kun i-ɔ?”+ 22 Sanngɛ Davidi seli kɛ: “?Zeruya i mma mun,+ amun ndɛ o nun sɛ? ?Ngue ti yɛ amun kunndɛ kɛ amún yó like nga n klomɛn i’n niɔn? ?Sɛ be kun sran kun Izraɛli wa andɛ’n, i sɔ liɛ’n nin i fata? ?Amun bu i kɛ n siman kɛ andɛ’n m’an sa min sin m’an kaci famiɛn Izraɛli wa?” 23 Yɛ famiɛn’n seli Simei kɛ: “A su wuman.” Kpɛkun famiɛn’n tɛli i nda.+

24 Mefibosɛti+ m’ɔ ti Saili i anunman’n i kusu bali famiɛn’n i nun sɔlɛ wie. Kɛ ɔ fɛ i cɛn mɔ famiɛn’n jasoli klɔ’n su lele m’ɔ́ fá sɛ́ i sin wɛtɛɛ su’n, Mefibosɛti w’a niɛnmɛn i ja’n i lika. W’a kpɛkpɛmɛn i akanza’n* su, yɛ w’a kpumɛn i tralɛ mun. 25 Kɛ ɔ ɔli* Zerizalɛmun lɔ naan ɔ́ kó yó famiɛn’n i like’n, famiɛn’n usɛli i kɛ: “?Mefibosɛti, ngue ti yɛ w’a suman min su-ɔ?” 26 Yɛ Mefibosɛti tɛli i su kɛ: “Nannan, nian, min sufuɛ’n+ lakali min. Afin kɛ mɔ min ja’n ti saciwa’n+ ti’n, n seli i kɛ: ‘Maan be siesie min aflunmun’n naan e nin famiɛn’n e wɔ.’ 27 Kpɛkun famiɛn, min sufuɛ’n wa tɔnnin min suɛn ɔ wun wa.+ Sanngɛ famiɛn, n si kɛ a ti kɛ Ɲanmiɛn Kpli i anzi sa. I sɔ’n ti’n, yo like kwlaa nga a klo’n. 28 Famiɛn, sɛ a klo kɛ á kún min si i awlo’n nunfuɛ mun’n, nn a kunnin be. Sanngɛ a fali min sieli be nga be di like ɔ tabli su’n be nun wie.+ ?Ɔ maan famiɛn, ngue ti yɛ ń kó jrán ɔ wun kɛ a yo like man min ekun-ɔn?”

29 Sanngɛ famiɛn’n seli i kɛ: “Yoo, muan ɔ nuan sɔ. Min waan a nin Ziba be cɛ fie’n nun.”+ 30 Yɛ Mefibosɛti seli famiɛn’n kɛ: “Nannan, maan ɔ fɛ i ngba. Afin like ng’ɔ ti cinnjin’n yɛle kɛ w’a sa ɔ sin w’a ba awlo wɛtɛɛ su.”

31 Baazilai+ m’ɔ ti Galaadifuɛ’n fɛli i Rogelimun lɔ naan ɔ́ kó súnman famiɛn’n lele jú Zurdɛn’n i nuan lɔ. 32 Baazilai sɔ’n ti sran oke. Ɔ le afuɛ ablaɔcuɛ (80), yɛ ɔ ti aɲanbeunfuɛ. Ɔ fali aliɛ blɛli famiɛn’n.+ Kɛ ɔ́ yó sɔ’n, nn famiɛn’n wo Maanaimun. 33 Yɛ famiɛn’n seli Baazilai kɛ: “Maan e kpɛ nzue ba’n naan e wɔ. Like nga á dí i Zerizalɛmun lɔ’n, ń fá mán wɔ.”+ 34 Sanngɛ Baazilai seli famiɛn’n kɛ: “?Olɛ nga n wo yɛ’n, ń dí cɛn nɲɛ ekun naan m’an wu? ?Ɔ maan ń sú famiɛn’n su Zerizalɛmun lɔ ń kó yó ngue? 35 Kɛ é sé yɛ’n, n le afuɛ ablaɔcuɛ (80).+ ?Kɛ n wo yɛ’n, n kwla si sa kpa nin sa tɛ’n be ngbaciɛ’n ekun? ?Min mɔ n ti ɔ sufuɛ’n, aliɛ nga n di’n nin nzan nga n nɔn’n, n kwla wun be fɛ ekun? ?Yasua nin bla nga be to jue’n, n kwla ti be nɛn’n i ekun yɛ ɔ o lɛ-ɔ?+ I sɔ’n ti’n, famiɛn, n kunndɛman kɛ ń káci kɛ trɔ nɔnninnɔnnin wie sa ɔ ti su. 36 Famiɛn, nán se kɛ á yó like fá lá min ase. Afin sunmanlɛ nga m’an sunman wɔ lele mɔ m’an ju Zurdɛn’n i nuan yɛ’n, ɔ ti min cenjele like dan. 37 Yaci, ɔ li maan n sa min sin min klɔ lɔ, naan n ko wu min si nin min nin be asieliɛ’n i wun koko lɛ.+ Famiɛn, Kimamun yɛ ɔ o yɛ,+ maan ɔ nin wɔ be kpɛ nzue ba’n. Like kwlaa nga a klo kɛ á yó mɛ́n i’n, a kwla yo.”

38 Famiɛn’n seli i kɛ: “E nin Kimamun é wá kpɛ́ nzue ba’n. Like kwlaa nga a klo’n, ń yó mɛ́n i. Like kwlaa nga a srɛ min kɛ n yo man wɔ kusu’n, ń yó.” 39 I sin’n, sran’m be kwlaa be fali atin naan bé kpɛ́ Zurdɛn’n. Kwlaa naan famiɛn’n w’a ɔ i liɛ’n, ɔ tɔli Baazilai nun,*+ kpɛkun ɔ boli muae mɛnnin i. Yɛ Baazilai sɛli i sin awlo-ɔ. 40 Kɛ famiɛn’n kpɛli nzue ba’n naan ɔ́ tó i ti Gilgali’n,+ Kimamun kpɛli nzue ba’n wie. Zidafuɛ’m be kwlaa nin Izraɛlifuɛ’m be bue kun yɛ be fali famiɛn’n kpɛli nzue ba’n niɔn.+

41 I sin’n, Izraɛlifuɛ’m be onga’m be wa toli famiɛn’n naan b’a se i kɛ: “Zidafuɛ mɔ be ti e niaan’n be wuali famiɛn’n. Kpɛkun be fali famiɛn’n nin i awlofuɛ mun nin i sran’m be kwlaa be kpɛli Zurdɛn’n. ?Ngue ti yɛ be yoli sɔ-ɔ?”+ 42 Zidafuɛ’m be kwlaa be tɛli Izraɛlifuɛ’m be su kɛ: “Famiɛn’n ti e osufuɛ ti-ɔ.+ ?Ngue ti yɛ i sɔ liɛ’n yo amun ya-ɔ? ?Be waan famiɛn’n mannin e aliɛ kɛ e di? ?Annzɛ kusu be waan ɔ cɛli e like?”

43 Sanngɛ Izraɛlifuɛ’m be tɛli Zidafuɛ’m be su kɛ: “E ti akpasua blu. Ɔ maan e bɔbɔ e le atin e yo sɔ man Davidi tra amun. ?Ngue ti yɛ amun buli e lufle sɔ-ɔ? ?Nán e yɛ ɔ fata kɛ e dun mmua e fa e famiɛn’n e fa sɛ i sin-ɔn?” Sanngɛ kɛ be kɛnnin i lele’n, Zidafuɛ’m be nuan liɛ’n yoli kekle trali Izraɛlifuɛ’m be liɛ’n.