2 Be Ɲoliɛ

36 I sin’n, nvle’n nunfuɛ’m be fali Zoziasi i wa Zoakazi,+ kpɛkun be sieli i famiɛn i si i osu, Zerizalɛmun lɛ.+ 2 Kɛ Zoakazi káci famiɛn’n, nn ɔ le afuɛ ablaɔn-nin-nsan (23). Ɔ dili famiɛn anglo nsan Zerizalɛmun lɛ. 3 Sanngɛ Ezipti famiɛn’n ko tuli i famiɛn bia’n su Zerizalɛmun lɔ. Kpɛkun ɔ seli kɛ maan nvle’n nunfuɛ’m be yi sika talan* ya kun (100) nin sika ɔkwlɛ talan kun.+ 4 Asa ekun’n, Ezipti famiɛn’n sieli Zoakazi i niaan bian Eliakimun famiɛn Zidafuɛ mun nin Zerizalɛmunfuɛ’m be su. Yɛ ɔ kacili i dunman’n kɛ Zozakimun. Sanngɛ Neko+ fɛli i niaan bian Zoakazi ɔli Ezipti.+

5 Kɛ Zozakimun+ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ blu-nin-kun (11) Zerizalɛmun lɔ. Ɔ yoli sa ng’ɔ ti tɛ’n i Ɲanmiɛn Zoova i ɲrun titi.+ 6 Nebikadnezaa+ m’ɔ ti Babilɔnin famiɛn’n fali alɛ wlɛli i sin naan ɔ́ fá aaba jrɔkɔ nɲɔn cí i, naan ɔ́ fɛ́ i kɔ́ Babilɔnin.+ 7 Nebikadnezaa fali Zoova i sua’n nun ninnge wie mun ɔli Babilɔnin. Kpɛkun ɔ ko sieli be i sua’n nun Babilɔnin lɔ.+ 8 Zozakimun i su ndɛ’n i onga’n, nin sa tɛtɛ ng’ɔ yoli be’n, nin i wun ndɛ tɛtɛ mun, i kwlakwla ti klɛwa Izraɛli Famiɛn mun nin Zida Famiɛn’m be Fluwa’n nun. I wa Zozakinin sinnin i osu kacili famiɛn.+

9 Kɛ Zozakinin+ káci famiɛn’n, nn ɔ le afuɛ blu-nin-mɔcuɛ (18). Ɔ dili famiɛn anglo nsan nin cɛn ba blu Zerizalɛmun lɔ. Ɔ yoli sa ng’ɔ ti tɛ Zoova ɲrun’n titi.+ 10 Kɛ afuɛ’n boli i bo’n,* Famiɛn Nebikadnezaa sunmannin sran naan be ko fɛ i bla Babilɔnin.+ I waan be fa Zoova i sua’n nun lɔ ninnge kpakpa mun bla wie.+ Kpɛkun ɔ sieli Zozakinin i si i niaan bian ng’ɔ suan Sedesiasi’n i famiɛn Zidafuɛ mun nin Zerizalɛmunfuɛ’m be su.+

11 Kɛ Sedesiasi+ káci famiɛn’n, nn ɔ le afuɛ ablaɔn-nin-kun (21). Ɔ dili famiɛn afuɛ blu-nin-kun (11) Zerizalɛmun lɔ.+ 12 Ɔ yoli sa ng’ɔ ti tɛ’n i Ɲanmiɛn Zoova i ɲrun titi. W’a kɛnmɛn i wun ase Zeremin m’ɔ ti Ɲanmiɛn nuan ijɔfuɛ’n+ i ɲrun. Kusu nn Zoova yɛ ɔ fa ndɛ wlɛ i nuan-ɔn. 13 Famiɛn Nebikadnezaa yoli maan ɔ tali nda Ɲanmiɛn ɲrun. Sanngɛ ɔ jasoli Nebikadnezaa wun.+ W’a yaciman ɲin kekle yolɛ,* yɛ ɔ keteli i awlɛn’n. Kpɛkun ɔ kacili i sin sili Zoova m’ɔ ti Izraɛli Ɲanmiɛn’n. 14 Ɲanmiɛn ɲrun jranfuɛ’m be su kpɛn’m be kwlaa, ɔ nin nvlefuɛ mun be ayeliɛ’n ti tɛ tra su. Sa tɛtɛ kwlaa nga nvle onga’m be yo’n, i wie yɛ be yo-ɔ. Yɛ Zoova i sua m’ɔ o Zerizalɛmun lɔ’n, m’ɔ yoli i sanwun’n, be wa yoli i fiɛn.+

15 Zoova m’ɔ ti be nannan’m be Ɲanmiɛn’n sunmɛnnin i sran mun titi naan be ko kan ndɛ kle be. Ɔ kannin ndɛ kleli be lelele, aunnvɔɛ m’ɔ si i nvle’n nunfuɛ mun’n, nin i bɔbɔ i tranwlɛ’n be ti. 16 Sanngɛ be fali Ɲanmiɛn Kpli i sran’m be yiyili be ɲin su sa trilili,+ be yoli i ndɛ’n i finfin,+ yɛ be srili i nuan ijɔfuɛ mun.+ Be yoli sɔ lele Zoova wa fali i nvle’n nunfuɛ’m be wun ya dan.+ Be yoli sɔ lele b’a kwlá yoman juejue kun.

17 I sɔ’n ti’n, Ɲanmiɛn yoli maan Kaldefuɛ’m+ be famiɛn’n fali alɛ wlali be sin. Ɔ fali tokofi kunnin be gbanflɛn mun+ lika m’ɔ ti Ɲanmiɛn liɛ’n nun.+ I gbanflɛn-o, i talua m’ɔ nin-a siman bian-o, i sran oke-o, i cɛcɛwafuɛ-o, w’a siman be nun wie fi i aunnvɔɛ.+ Ɲanmiɛn fali like kwlakwla wlɛli i sa nun.+ 18 Ninnge kwlaa nga be o Ɲanmiɛn Kpli i sua’n nun’n, i dan-o, i kaan-o, ɔ fali be kwlaa ɔli Babilɔnin. Asa ekun’n, ɔ fali Zoova i sua’n nun ninnge kpakpa mun, ɔ nin famiɛn nin i sran dandan’m be ninnge kpakpa mun ɔli wie.+ 19 Ɔ wɔli Ɲanmiɛn Kpli i sua’n nun.+ Ɔ bubuli Zerizalɛmun klɔ’n i wun talɛ’n.+ Ɔ wɔli talɛ’n i su sua fleiin nga be jran cinnjinnjin bɔbɔ’n be nun, yɛ ɔ sacili ninnge kpakpa’m be kwlakwla.+ 20 Be nga tokofi w’a kunman be’n, ɔ trali be ɔli Babilɔnin.+ Be ko suli i bɔbɔ+ nin i mma mun lele Pɛɛsi famiɛn’n wa boli mɛn’n i sielɛ bo,+ 21 kɛ ɔ ko yo naan ndɛ nga Zoova fa wlali Zeremin nuan’n w’a kpɛn su’n,+ naan nvle’n w’a tua wunmiɛn-lolɛ-cɛn’n i ti kalɛ ng’ɔ o i su’n+ ti. Blɛ kwlaa nga nvle’n tɔli srolo’n, ɔ loli wunmiɛn lele afuɛ ableso (70) sinnin wauun.+

22 Kɛ Sirisi+ kacili Pɛɛsi famiɛn’n i afuɛ klikli’n nun’n, kɛ ɔ ko yo naan Zoova i nuan ndɛ ng’ɔ sinnin Zeremin+ i lika kannin’n w’a kpɛn su’n ti’n, Zoova yoli maan Sirisi m’ɔ ti Pɛɛsi famiɛn’n boli ndɛ kun i ndolo i famiɛn diwlɛ’n kwlaa nun. Ɔ klɛli ndɛ sɔ’n.+ Ɔ klɛli i kɛ: 23 “Ndɛ nga Sirisi m’ɔ ti Pɛɛsi famiɛn’n kan’n yɛ: ‘Ɲanmiɛn Zoova m’ɔ sie ɲanmiɛn m’ɔ la nglo lɔ plaii’n, ɔ fali asiɛ’n su wa famiɛn diwlɛ’m be kwlaa wlali min sa nun,+ yɛ ɔ seli min kɛ n kplan sua kun n mɛn i Zerizalɛmun lɔ, Zida lɔ.+ Amun nun sran kwlaa ng’ɔ ti i nvle’n nunfuɛ’n, maan Zoova m’ɔ ti i Ɲanmiɛn’n jrɛn i sin naan ɔ wɔ lɔ.’”+